ဟေဗြဲ 7 - ခေတ်သစ်မြန်မာ သမ္မာကျမ်းယဇ်ပုရောဟိတ်မေလခိဇေဒက် 1 ဤမေလခိဇေဒက်သည် ရှာလင်မြို့၏ဘုရင်ဖြစ်ပြီး အမြင့်မြတ်ဆုံးသောဘုရားသခင်၏ ယဇ်ပုရောဟိတ်ဖြစ်၏။ အာဗြဟံသည် ရှင်ဘုရင်များကို အနိုင်ရပြီး အောင်ပွဲခံ၍ ပြန်လာသောအခါ မေလခိဇေဒက်သည် အာဗြဟံကို ကြိုဆိုလျက် ကောင်းချီးပေးလေ၏။ 2 အာဗြဟံသည်လည်း ထိုမင်းကြီးအား ရရှိသောပစ္စည်းများမှ ဆယ်ပုံတစ်ပုံကို ပေးလှူ၏။ မေလခိဇေဒက်ဟူသော အမည်၏ အဓိပ္ပာယ်မှာ “ဖြောင့်မတ်ခြင်း၏ဘုရင်” ဖြစ်ပြီး နောက်ပိုင်းတွင် သူ့ကို ရှာလင်ဘုရင်ဟု ခေါ်တွင်ကာ “ငြိမ်းချမ်းရေးဘုရင်” ဟု အဓိပ္ပာယ်ရ၏။ 3 သူ၌ ဖခင်နှင့်မိခင်၊ မျိုးရိုး၊ ဘဝ၏ အစအဆုံး စသည့် မှတ်တမ်းများမရှိပေ။ သူသည် ဘုရားသခင်၏သားတော်ကဲ့သို့ ထာဝရယဇ်ပုရောဟိတ်အရိုက်အရာကို ရရှိထားသူဖြစ်၏။ 4 ကျွန်ုပ်တို့၏ဘိုးဘေးအာဗြဟံသည် စစ်ပွဲမှ သိမ်းယူခဲ့သော ဥစ္စာပစ္စည်း၏ဆယ်ပုံတစ်ပုံကို မေလခိဇေဒက်အား ပေးလှူခဲ့ပြီး ဤသို့ပေးလှူခြင်းခံရသူသည် မည်မျှဂုဏ်အသရေရှိကြောင်း ဆင်ခြင်ကြလော့။ 5 လေဝိအနွယ်မှ ယဇ်ပုရောဟိတ်များသည် အာဗြဟံ၏ သားမြေးများပင်ဖြစ်သော်လည်း ပညတ်တရား၏ စည်းမျဉ်းအရ ဆယ်ဖို့တစ်ဖို့ကို မိမိတို့လူမျိုးထံမှ ကောက်ယူခွင့်ရှိကြ၏။ 6 သို့သော် ဤမေလခိဇေဒက်သည် လေဝိမျိုးဆက်မဟုတ်သော်လည်း သူသည် အာဗြဟံထံမှ ဆယ်ဖို့တစ်ဖို့အလှူကို ခံယူလျက် ဘုရားသခင်၏ကတိတော်ကို ရရှိထားသော အာဗြဟံအား ကောင်းချီးပေးခဲ့၏။ 7 ကောင်းချီးပေးသောသူသည် ကောင်းချီးမင်္ဂလာခံယူသူထက် ပို၍ကြီးမြတ်သည်မှာ ငြင်းဆိုဖွယ်မရှိ။ 8 ဆယ်ပုံတစ်ပုံကို ခံယူသော လေဝိအနွယ်ယဇ်ပုရောဟိတ်တို့သည် သေတတ်သောလူများဖြစ်ကြသော်လည်း ဆယ်ပုံတစ်ပုံကို ခံယူသော ဤမေလခိဇေဒက်မှာ အသက်ရှင်ကြောင်း သက်သေထင်ရှား၏။ 9 ဆယ်ပုံတစ်ပုံကို ခံယူသော လေဝိသည်ပင် အာဗြဟံမှတစ်ဆင့် မေလခိဇေဒက်အား ဆယ်ပုံတစ်ပုံကို ပေးလှူသည်ဟု ဆိုနိုင်၏။ 10 အဘယ်ကြောင့်ဆိုသော် အာဗြဟံထံမှ ဆယ်ပုံတစ်ပုံကို မေလခိဇေဒက် ခံယူသောအချိန်၌ လေဝိသည် မမွေးဖွားသေးသော်လည်း သူ၏ မျိုးစေ့သည် အာဗြဟံ၏ ကိုယ်၌ ရှိနေသောကြောင့်ဖြစ်၏။ ယဇ်ပုရောဟိတ်မင်း ယေရှု 11 အစ္စရေးလူမျိုးတို့သည် လေဝိအနွယ်မှ ဆင်းသက်သည့်ယဇ်ပုရောဟိတ်အမျိုးကို အခြေခံသောပညတ်တရားကို လက်ခံရရှိကြ၏။ ထို့ကြောင့် သူတို့သည် ဤလေဝိအနွယ်ယဇ်ပုရောဟိတ်အားဖြင့် ပြီးပြည့်စုံမှုကို ရရှိသည်မှန်လျှင် လေဝိအနွယ် အာရုန်နည်းတူမဟုတ်ဘဲ မေလခိဇေဒက်နည်းတူ အခြားယဇ်ပုရောဟိတ်တစ်ဦးပေါ်ထွန်းလာရန် အဘယ်ကြောင့် လိုအပ်သေးသနည်း။ 12 ယဇ်ပုရောဟိတ်မျိုးနွယ်ကို ပြောင်းလဲလျှင် ပညတ်တရားကိုလည်း ပြောင်းလဲရမည်။ 13 ဤတွင် ကျွန်ုပ်တို့ပြောဆိုနေသော ယဇ်ပုရောဟိတ်မှာ အခြားအနွယ် ဖြစ်ပြီး ထိုအနွယ်ထဲမှ မည်သူမျှ ယဇ်ပလ္လင်၌ အမှုမဆောင်ရွက်ဖူးပေ။ 14 ကျွန်ုပ်တို့၏ သခင်သည် ယုဒအနွယ်မှ ဆင်းသက်တော်မူကြောင်းထင်ရှား၏။ မောရှေသည် ထိုယုဒအနွယ်မှ ယဇ်ပုရောဟိတ်ပေါ်ထွန်းမည်ဟု မည်သည့်အခါမျှ မပြောခဲ့ပေ။ 15 မေလခိဇေဒက်နှင့်တူသော အခြားယဇ်ပုရောဟိတ်တစ်ဦးပေါ်ထွန်းလာလျှင် ကျွန်ုပ်တို့ ပြောဆိုသည့် ယဇ်ပုရောဟိတ်မျိုးနွယ် ပြောင်းလဲကြောင်း ပိုမို သိသာထင်ရှား၏။ 16 ထိုယဇ်ပုရောဟိတ်သည် လေဝိအနွယ်မှ ဖြစ်ရမည်ဟူသော ပညတ်တရား၏ စည်းမျဉ်းအရ မဟုတ်ဘဲ မိမိ၏မပျက်စီးနိုင်သောအသက်တန်ခိုးအရ ယဇ်ပုရောဟိတ်ဖြစ်လာ၏။ 17 ဤအကြောင်းနှင့်ပတ်သက်၍ ကျမ်းစာ၌ “သင်သည် မေလခိဇေဒက်နည်းတူ ထာဝရယဇ်ပုရောဟိတ်ဖြစ်၏” ဟု ဖော်ပြထား၏။ 18 ယခင်ပညတ်တရား၏ စည်းမျဉ်းသည် အားနည်း၍ ကောင်းကျိုးမပေးနိုင်သောကြောင့် ဖျက်သိမ်းခြင်းခံရ၏။ 19 အဘယ်ကြောင့်ဆိုသော် ပညတ်တရားသည် မည်သည့်အရာကိုမျှ ပြီးပြည့်စုံအောင်မလုပ်ဆောင်နိုင်သောကြောင့် ဖြစ်၏။ ယခုတွင်မူ ပို၍ကောင်းသောမျှော်လင့်ချက် ရှိလာသဖြင့် ကျွန်ုပ်တို့သည် ထိုမျှော်လင့်ချက်ဖြင့် ဘုရားသခင်ထံတော်သို့ ချဉ်းကပ်ကြ၏။ 20 ထို့ပြင် ယေရှု၏ ယဇ်ပုရောဟိတ်အရိုက်အရာသည် သစ္စာဆိုခြင်းမပါဘဲ ဖြစ်လာသည်မဟုတ်။ အခြားသူတို့၏ယဇ်ပုရောဟိတ်အရိုက်အရာမှာမူ သစ္စာဆိုခြင်းမပါဘဲ ဖြစ်လာကြ၏။ 21 ဘုရားသခင်သည် ယေရှုအား ယဇ်ပုရောဟိတ်အဖြစ် ခန့်ထားတော်မူသောအခါ “ ‘သင်သည် ထာဝရယဇ်ပုရောဟိတ်ဖြစ်၏’ ဟု ထာဝရဘုရားသစ္စာပြုတော်မူပြီ။ မိမိစိတ်တော်ကိုလည်း ပြောင်းလဲတော်မူမည်မဟုတ်” ဟူ၍ ကိုယ်တော်အား မိန့်တော်မူ၏။ 22 ဤသစ္စာပြုခြင်းကြောင့် ယေရှုသည် ပို၍ကောင်းသောပဋိညာဉ်၏ အာမခံဖြစ်လာ၏။ 23 ယဇ်ပုရောဟိတ်တို့သည် သေရသောကြောင့် အစဉ်အမြဲ အမှုမထမ်းဆောင်နိုင်ကြပေ။ သို့ဖြစ်၍ သူတို့သည် အမြောက်အမြားရှိခဲ့၏။ 24 သို့သော် ယေရှုမှာမူ ထာဝရအသက်ရှင်သောကြောင့် ကိုယ်တော်၏ယဇ်ပုရောဟိတ်အရိုက်အရာသည် မည်သည့်အခါမျှ မပြောင်းလဲပါ။ 25 ထို့ကြောင့် ကိုယ်တော်သည် မိမိကိုအမှီပြု၍ ဘုရားသခင်ထံသို့ ချဉ်းကပ်လာသူများကို အပြည့်အဝကယ်တင်နိုင်တော်မူ၏။ အဘယ်ကြောင့်ဆိုသော် ကိုယ်တော်သည် သူတို့အတွက် အသနားခံပေးရန် ထာဝရအသက်ရှင်နေသောကြောင့်ဖြစ်၏။ 26 ထိုယဇ်ပုရောဟိတ်မင်းသည် သန့်ရှင်းသူ၊ အပြစ်ကင်းသူ၊ ဖြူစင်သူ၊ အပြစ်သားတို့နှင့် ခြားနားသူ၊ ကောင်းကင်ဘုံ၌ အကြီးမြတ်ဆုံးသော နေရာသို့ ချီးမြှောက်ခံရသူဖြစ်သောကြောင့် ကျွန်ုပ်တို့လိုအပ်နေသောယဇ်ပုရောဟိတ်မင်းမျိုး ဖြစ်၏။ 27 အခြားယဇ်ပုရောဟိတ်မင်းများသည် မိမိတို့အပြစ်အတွက် သော်လည်းကောင်း၊ လူတို့၏ အပြစ်အတွက်သော်လည်းကောင်း နေ့တိုင်းယဇ်ပူဇော်ရသော်လည်း ကိုယ်တော်သည် ထိုသို့ပူဇော်ရန် မလိုအပ်ပေ။ အဘယ်ကြောင့်ဆိုသော် ကိုယ်တော်သည် လူတို့၏ အပြစ်အတွက် မိမိအသက်ကို ပူဇော်စဉ်က တစ်ကြိမ်တည်းနှင့် အပြီး ပူဇော်သောကြောင့်ဖြစ်၏။ 28 ပညတ်တရားအရ ခန့်အပ်ထားသော ယဇ်ပုရောဟိတ်မင်းသည် လူသားဖြစ်၍အားနည်းချက်ရှိ၏။ သို့သော် ပညတ်တရားနောက်၌ လာသည့်သစ္စာပြုခြင်းအားဖြင့် ခန့်အပ်ထားသော သားတော်မှာမူ ထာဝရပြီးပြည့်စုံတော်မူ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.