လုကာ 7 - ခေတ်သစ်မြန်မာ သမ္မာကျမ်းရောမတပ်မှူးတစ်ဦး၏ယုံကြည်ခြင်း 1 ယေရှုသည် တရားစကားအားလုံးကို လူတို့အား ဟောတော်မူပြီးနောက် ကပေရနောင်မြို့သို့ ကြွတော်မူ၏။ 2 ထိုအခါ ရောမတပ်မှူးတစ်ဦး၏အလွန်ယုံကြည်စိတ်ချရသော အစေခံတစ်ဦးသည် သေလုမြောပါး ဖျားနာလျက်ရှိ၏။ 3 ထိုတပ်မှူးသည် ယေရှု၏သတင်းတော်ကို ကြားသောအခါ ဂျူးလူမျိုးအကြီးအကဲတချို့ကို ကိုယ်တော်ထံတော်သို့ စေလွှတ်ကာ ကြွလာ၍ မိမိအစေခံကို ကျန်းမာစေတော်မူရန် တောင်းလျှောက်စေ၏။ 4 ထိုသူတို့သည် ယေရှုထံတော်သို့ရောက်ကြသော် ယေရှုအား “တပ်မှူးသည် သခင်၏ကျေးဇူးပြုခြင်းကို ခံထိုက်သူဖြစ်ပါ၏။ 5 သူသည် ဂျူးလူမျိုးများကို ချစ်ခင်၍ ကျွန်ုပ်တို့အတွက် ဝတ်ပြုဆောင်ကို ဆောက်လုပ်ပေးသူလည်း ဖြစ်ပါသည်” ဟူ၍ ဆိုလျက် ထိုအစေခံအား ကျန်းမာစေတော်မူရန် အနူးအညွတ်မေတ္တာရပ်ခံကြ၏။ 6 ထိုအခါ ယေရှုသည် ထိုသူတို့နှင့်အတူ ကြွတော်မူ၏။ သို့သော်လည်း အိမ်အနီးသို့ ရောက်သောအခါ တပ်မှူးသည် မိမိ၏မိတ်ဆွေတို့ကို တစ်ဖန်စေလွှတ်၍ “သခင်… ဒုက္ခမခံပါနှင့်။ အကျွန်ုပ်၏အိမ်မိုးအောက်သို့ သခင်ကြွဝင်တော်မူခြင်းကိုပင် အကျွန်ုပ်မခံထိုက်ပါ။ 7 အကျွန်ုပ်သည်လည်း ကိုယ်တော်ထံသို့ လာထိုက်သောသူမဟုတ်ကြောင်းကိုလည်း ယူဆမိပါ၏။ သို့သော်လည်း စကားတော်တစ်ခွန်းမိန့်တော်မူလျှင် အကျွန်ုပ်၏အစေခံသည် ကျန်းမာပါလိမ့်မည်။ 8 အကျွန်ုပ်သည် အမိန့်အာဏာအောက်တွင် ရှိသူဖြစ်ပြီး အကျွန်ုပ်၏လက်အောက်တွင်လည်း စစ်သားများရှိပါ၏။ အကျွန်ုပ်သည် တစ်ဦးအား ‘သွားလော့’ ဟု ပြောလျှင် သူသည်သွားရ၏။ အခြားတစ်ဦးအား ‘လာလော့’ ဟု ပြောလျှင် သူသည်လာရ၏။ အကျွန်ုပ်၏အစေခံအား ‘ဤအရာကို လုပ်ဆောင်လော့’ ဟု ပြောလျှင် သူသည် လုပ်ဆောင်ရပါ၏” ဟု လျှောက်စေ၏။ 9 ယေရှုသည် ထိုတပ်မှူး၏စကားကို ကြားသော် အံ့သြတော်မူလျက် နောက်တော်သို့လိုက်သောသူများဘက်သို့ လှည့်၍ “သင်တို့အား ငါပြောဆိုသည်မှာ ဤကဲ့သို့သော ယုံကြည်ခြင်းကို အစ္စရေးလူမျိုးထဲ၌ပင် ငါမတွေ့ဖူးသေး” ဟူ၍ မိန့်တော်မူ၏။ 10 တပ်မှူး စေလွှတ်သောမိတ်ဆွေများသည် အိမ်သို့ ပြန်ရောက်သောအခါ ထိုအစေခံသည် ကျန်းမာလျက်ရှိကြောင်းကို တွေ့မြင်ကြ၏။ မုဆိုးမ၏သားကို အသက်ပြန်ရှင်စေတော်မူခြင်း 11 ထို့နောက် ယေရှုသည် နာဣနမြို့သို့ ကြွတော်မူ၍ တပည့်တော်များနှင့် လူအုပ်ကြီးသည်လည်း နောက်တော်သို့ လိုက်ကြ၏။ 12 ယေရှုသည် မြို့အဝင်တံခါးအနီးသို့ ရောက်သောအခါ လူတို့သည် လူသေအလောင်းတစ်လောင်းကို သင်္ဂြိုဟ်ရန် မြို့ပြင်သို့ ထုတ်ဆောင်လာကြ၏။ ထိုလူသေသည် မုဆိုးမတစ်ဦး၏တစ်ဦးတည်းသော သားဖြစ်၏။ မြို့သူမြို့သားတို့သည်လည်း ထိုမုဆိုးမနှင့်အတူ လိုက်ပို့ကြ၏။ 13 ယေရှုသည် မုဆိုးမကို မြင်သောအခါ သနားစိတ်ရှိတော်မူသဖြင့် “မငိုနှင့်” ဟု မိန့်တော်မူ၏။ 14 ထို့နောက် ယေရှုက အနီးသို့ ချဉ်းကပ်၍ အလောင်းစင်ကိုတို့တော်မူလျှင် အလောင်းထမ်းသူများသည်ရပ်လျက်နေကြ၏။ ယေရှုကလည်း “အို လူငယ်… သင့်အား ငါအမိန့်ပေးသည်။ ထလော့” ဟု မိန့်တော်မူ၏။ 15 ထိုလူသေသည် ထထိုင်၍ စကားပြောလေ၏။ ယေရှုကလည်း ထိုသူကို မိခင်ထံသို့ အပ်ပေးလေ၏။ 16 လူအပေါင်းတို့သည်လည်း အံ့သြထိတ်လန့်၍ “ငါတို့အထဲတွင် ထူဆန်းသောပရောဖက်တစ်ပါး ပေါ်ထွန်းလေပြီ။ ဘုရားသခင်သည် မိမိလူမျိုးအား အကူအညီပေးတော်မူရန် ကြွလာတော်မူပြီ” ဟူ၍ ဘုရားသခင်၏ဂုဏ်တော်ကို ချီးမွမ်းကြ၏။ 17 ထိုသတင်းတော်သည် ယုဒပြည်နှင့် ပတ်ဝန်းကျင် ဒေသအသီးသီးသို့ ပျံ့နှံ့လေ၏။ ယေရှုနှင့် နှစ်ခြင်းဆရာယောဟန် 18 နှစ်ခြင်းဆရာယောဟန်၏တပည့်တို့သည် ယေရှုပြုတော်မူသောအမှုအားလုံးကို ယောဟန်အားပြောပြကြ၏။ ယောဟန်သည် မိမိ၏တပည့်နှစ်ဦးကို ခေါ်ပြီးလျှင် 19 ယေရှုထံတော်သို့စေလွှတ်၍ “အရှင်သည် အကျွန်ုပ်တို့စောင့်မျှော်နေသော ခရစ်တော်မှန်သလော။ သို့မဟုတ် အကျွန်ုပ်တို့သည် အခြားသူကို စောင့်မျှော်ရပါမည်လော” ဟု မေးလျှောက်စေ၏။ 20 ထိုသူတို့သည် ယေရှုထံသို့ရောက်သောအခါ “နှစ်ခြင်းဆရာယောဟန်က ကျွန်ုပ်တို့အား စေလွှတ်၍ ‘အရှင်သည် အကျွန်ုပ်တို့ စောင့်မျှော်နေသောခရစ်တော် မှန်သလော။ သို့မဟုတ် အကျွန်ုပ်တို့သည် အခြားသူကို စောင့်မျှော်ရပါမည်လော’ ဟု မေးလျှောက်စေသည်” ဟူ၍ လျှောက်ကြ၏။ 21 ထိုအချိန်တွင် ယေရှုသည် အနာရောဂါဝေဒနာသည်များနှင့် နတ်ဆိုးပူးသူများအား ကျန်းမာစေလျက် မျက်မမြင်များကိုလည်း ပြန်မြင်စေတော်မူ၏။ 22 ယေရှုက ထိုသူတို့အား “သင်တို့ကြားရ၊ မြင်ရသမျှတို့ကို ပြန်သွား၍ ယောဟန်အား ပြောကြလော့။ မျက်မမြင်တို့သည် မျက်စိမြင်ကြပြီ။ ခြေမသန်သူတို့သည် လမ်းလျှောက်ကြပြီ။ အနာကြီးရောဂါသည်တို့သည် စင်ကြယ်ကြပြီ။ နားမကြားသောသူတို့သည် ကြားကြပြီ။ သေဆုံးသောသူတို့သည် ပြန်ရှင်ကြပြီ။ ဆင်းရဲသားတို့သည်လည်း သတင်းကောင်းကို ကြားရကြပြီ။ 23 ငါ့ကြောင့် စိတ်မပျက်သောသူသည် မင်္ဂလာရှိ၏” ဟု ပြန်၍ မိန့်တော်မူ၏။ 24 ယောဟန်၏တပည့်များ ထွက်သွားကြပြီးနောက် ယေရှုသည် ယောဟန်အကြောင်းနှင့် ဆက်စပ်၍ လူထုတို့အား ဤသို့ ဟောပြောတော်မူ၏။ ယေရှုက “သင်တို့သည် မည်ကဲ့သို့သောသူကိုရှာရန် တောသို့ ထွက်သွားကြသနည်း။ လေတိုက်လျှင် လှုပ်ယမ်းသည့် ကျူပင်ကဲ့သို့သောသူကိုလော။ 25 သို့မဟုတ် မည်ကဲ့သို့သောသူကိုရှာရန် သွားကြသနည်း။ အဖိုးတန်အဝတ်အထည်တို့ကို ဝတ်ဆင်သောသူကိုလော။ ဝတ်ကောင်းစားလှကို ဝတ်ဆင်လျက် စည်းစိမ်ခံစား၍နေသောသူတို့သည် နန်းတော်များ၌သာ နေကြ၏။ 26 သို့ဖြစ်လျှင် မည်ကဲ့သို့သောသူကိုရှာရန် သွားကြသနည်း။ ပရောဖက်တစ်ပါးကိုလော။ မှန်ပါ၏။ ထိုသူသည် ပရောဖက်ထက် ပို၍ကြီးမြတ်သောသူဖြစ်သည်ဟု ငါဆို၏။ 27 ကျမ်းစာ၌ ‘ကြည့်ရှုလော့။ ငါ၏တမန်ကို ဦးစွာ စေလွှတ်မည်။ သူသည် သင်သွားမည့်လမ်းကို သင့်ရှေ့တွင် ပြင်ဆင်လိမ့်မည်’ ဟု ရေးသားထားသည်မှာ ဤယောဟန်ကို ဆိုလို၏။ 28 သင်တို့အား ငါပြောဆိုသည်မှာ အမျိုးသမီးများမှ မွေးဖွားသောသူများထဲတွင် နှစ်ခြင်းဆရာယောဟန်ထက် ကြီးမြတ်သောသူ မရှိပါ။ သို့သော်လည်း ဘုရားသခင်၏နိုင်ငံတော်တွင် အသေးနုပ်ဆုံးသောသူသည် ယောဟန်ထက် ကြီးမြတ်သည်” ဟု မိန့်တော်မူ၏။ 29 အခွန်ကောက်သူများမှစ၍ လူအပေါင်းတို့သည် ဤတရားစကားကို ကြားသောအခါ ဘုရားသခင်၏ တရားတော်သည် မှန်ကန်ကြောင်း ဝန်ခံကြ၏။ ထိုသူတို့သည် ယောဟန်ထံ၌ နှစ်ခြင်းမင်္ဂလာကို ခံယူခဲ့သူများဖြစ်ကြ၏။ 30 သို့သော်လည်း ဖာရိရှဲများနှင့် ကျမ်းတတ်ပညာရှင်တို့သည် မိမိတို့ကိုယ်ကျိုးအတွက် ဘုရားသခင်၏ အကြံအစည်တော်ကို ငြင်းပယ်၍ ယောဟန်ပေးသော နှစ်ခြင်းမင်္ဂလာကို မခံယူကြပေ။ 31 ယေရှုက “ဤခေတ်လူတို့ကို မည်သည့်အရာနှင့် ခိုင်းနှိုင်းရမည်နည်း။ မည်သူနှင့် တူသနည်း။ 32 ထိုသူတို့သည် ဈေးအရပ်၌ ကစားနေသောကလေးများနှင့် တူကြ၏။ ထိုကလေးများက ‘ငါတို့သည် သင်တို့အတွက် တီးမှုတ်သော်လည်း သင်တို့သည် မကကြ။ ငါတို့သည် ငိုချင်းကို သီဆိုသော်လည်း သင်တို့သည် မငိုကြွေးကြ’ ဟူ၍ အချင်းချင်းပြောဆိုကြ၏။ 33 အဘယ်ကြောင့်ဆိုသော် နှစ်ခြင်းဆရာယောဟန်သည် အစာကို မစား၊ စပျစ်ဝိုင်ကို မသောက်ဘဲနေသောအခါ သင်တို့က ‘သူသည်နတ်ဆိုးပူးသူဖြစ်သည်’ ဟု ပြောကြသောကြောင့်ဖြစ်၏။ 34 လူသားသည် စားသောက်၍နေသည်ကို သင်တို့က ‘သူသည် အစားကြီးသူ၊ စပျစ်ဝိုင်သောက်ကြူးသူဖြစ်၏။ အခွန်ကောက်သူများနှင့် အပြစ်သားတို့၏မိတ်ဆွေလည်း ဖြစ်သည်’ ဟု ဆိုကြပြန်၏။ 35 သို့သော်လည်း ဉာဏ်ပညာသည် မှန်ကန်ကြောင်း ၎င်း၏လုပ်ဆောင်မှုများက ဖော်ပြသည်” ဟု မိန့်တော်မူ၏။ အပြစ်များသော အမျိုးသမီးတစ်ဦးက ယေရှုအား ဆီမွှေးလိမ်းကျံခြင်း 36 ထို့နောက် ဖာရိရှဲတစ်ဦးသည် မိမိနှင့်အတူ ညစာသုံးဆောင်ရန် ယေရှုအား ဖိတ်ခေါ်သဖြင့် ထိုသူ၏အိမ်သို့ ကြွ၍ စားပွဲ၌ ထိုင်တော်မူ၏။ 37 ယေရှုသည် ဖာရိရှဲအိမ်၌ စားသောက်နေကြောင်းကို ထိုမြို့ရှိ အပြစ်များသော အမျိုးသမီးတစ်ဦးသည် သိရှိလျှင် ဆီမွှေးထည့်ထားသောကျောက်ဖြူဘူးတစ်လုံးကို ယူခဲ့လေ၏။ 38 သူသည် ကိုယ်တော်၏နောက်ဘက်ခြေတော်ရင်း၌ ရပ်၍ ငိုကြွေးလျက် ခြေတော်ကို မျက်ရည်ဖြင့် ဆေးကာ သူ၏ဆံပင်ဖြင့် သုတ်၏။ ထို့နောက် ကိုယ်တော်၏ခြေတော်ကို အဆက်မပြတ်နမ်းရှုပ်လျက် ဆီမွှေးဖြင့် သုတ်လိမ်းပေးလေ၏။ 39 ထိုသို့ပြုသည်ကို ယေရှုအား ဖိတ်ခေါ်သူ ဖာရိရှဲသည် မြင်လေသော် “ဤသူသည် ပရောဖက်တစ်ပါးဖြစ်လျှင် သူ့အားထိနေသော ထိုအမျိုးသမီးသည် မည်သူဖြစ်ကြောင်းနှင့် မည်သို့သောသူ ဖြစ်ကြောင်းကို သိရမည်။ ဤအမျိုးသမီးသည် အပြစ်များသော အမျိုးသမီးဖြစ်သည်” ဟု မိမိစိတ်ထဲ၌ တွေးတောလေ၏။ 40 ယေရှုက ထိုသူအား “ရှိမုန်… ငါသည် သင့်အားပြောစရာတစ်ခုရှိ၏” ဟူ၍ မိန့်တော်မူလျှင် ရှိမုန်ကလည်း “မိန့်တော်မူပါ ဆရာတော်” ဟု လျှောက်လေ၏။ 41 “အကြွေးရှင်တစ်ဦး၌ အကြွေးတင်သူနှစ်ဦးရှိ၏။ တစ်ဦးတွင် ငွေဒင်္ဂါးပြားငါးရာ၊ အခြားတစ်ဦးတွင် ငွေဒင်္ဂါးပြားငါးဆယ် အကြွေးရှိ၏။ 42 ထိုသူနှစ်ဦးသည် အကြွေးမဆပ်နိုင်သောအခါ အကြွေးရှင်သည် ပယ်ဖျက်ပေး၏။ သို့ဖြစ်လျှင် ထိုသူနှစ်ဦးတွင် မည်သူသည် အကြွေးရှင်အား ပို၍ ချစ်မည်နည်း” ဟု မေးတော်မူ၏။ 43 ရှိမုန်က “ပို၍များသောအကြွေးကို ပယ်ဖျက်ခံရသောသူသည် ပို၍ ချစ်လိမ့်မည်ထင်ပါ၏” ဟု လျှောက်သော် ယေရှုက “သင်ထင်သည်အတိုင်း မှန်ပေ၏” ဟု မိန့်တော်မူ၏။ 44 ယေရှုသည် ထိုအမျိုးသမီးဘက်သို့လှည့်၍ ရှိမုန်အား “ဤအမျိုးသမီးကို မြင်သလော။ ငါသည် သင့်အိမ်သို့ ဝင်သောအခါ သင်သည် ငါ့ခြေကိုဆေးကြောရန်အတွက် ရေကိုမပေး။ သို့သော် သူသည် ငါ့ခြေကို မျက်ရည်ဖြင့်ဆေး၍ သူ၏ဆံပင်ဖြင့် သုတ်လေပြီ။ 45 သင်သည် ငါ့ကိုမနမ်း။ သို့သော် သူသည် ငါဝင်လာသောအချိန်မှစ၍ ငါ့ခြေကို အဆက်မပြတ် နမ်းလေပြီ။ 46 သင်သည် ငါ့ခေါင်းကို ဆီဖြင့်မလိမ်း။ သို့သော် သူသည် ငါ့ခြေကို နံ့သာဆီမွှေးဖြင့် လိမ်းလေပြီ။ 47 ထို့ကြောင့် သင့်အား ငါပြောလိုသည်မှာ သူ၏အပြစ်သည် အလွန်များပြားလှသော်လည်း သူသည် ခွင့်လွှတ်ခြင်းကို ခံရပြီ။ ထို့ကြောင့် သူသည် ငါ့ကို များစွာ ချစ်တော်မူ၏။ အနည်းငယ်သောအပြစ်လွှတ်ခြင်းကို ခံရသောသူသည် အနည်းငယ်သာချစ်တော်မူ၏” ဟု မိန့်တော်မူ၏။ 48 ထို့နောက် “သင်၏အပြစ်ကို ခွင့်လွှတ်ပြီ” ဟု ထိုအမျိုးသမီးအား မိန့်တော်မူ၏။ 49 ထိုစားပွဲ၌ အတူထိုင်သောသူတို့က “အပြစ်လွှတ်ပိုင်သော ဤသူသည် မည်သူနည်း” ဟု အချင်းချင်း ပြောဆိုကြ၏။ 50 သို့ရာတွင် ယေရှုက ထိုအမျိုးသမီးအား “သင်၏ယုံကြည်ခြင်းသည် သင့်အားကယ်တင်ပြီ။ ငြိမ်းချမ်းစွာသွားလော့” ဟု မိန့်တော်မူ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.