လုကာ 2 - ခေတ်သစ်မြန်မာ သမ္မာကျမ်းယေရှုမွေးဖွားလာတော်မူခြင်း 1 ထိုကာလ၌ ရောမဘုရင် ဩဂတ်စ်တပ်စ်ဆီဇာသည် တစ်နိုင်ငံလုံးတွင် သန်းခေါင်စာရင်းကောက်ယူရန် ကြေညာချက်ထုတ်ပြန်၏။ 2 ဤသို့ သန်းခေါင်စာရင်းကောက်ယူခြင်းသည် ဆီးရီးယားပြည်၊ ဘုရင်ခံကုရေနိမင်းလက်ထက်တွင် ပထမဆုံးအကြိမ်ဖြစ်၏။ 3 လူအပေါင်းတို့သည် သန်းခေါင်စာရင်းသွင်းရန် မိမိတို့၏ဇာတိမြို့အသီးသီးသို့ ပြန်ကြ၏။ 4 ယောသပ်သည်လည်း ဒါဝိဒ်မင်းအမျိုးအနွယ်မှ ဆင်းသက်လာသူဖြစ်သောကြောင့် ဂါလိလဲပြည်နာဇရက်မြို့မှ ယုဒပြည်ရှိ ဗက်လင်မြို့ဟု ခေါ်သော ဒါဝိဒ်၏မြို့သို့ သွားလေ၏။ 5 ထိုသို့ စာရင်းသွင်းရန် သွားရာတွင် ယောသပ်သည် မိမိနှင့် စေ့စပ်ကြောင်းလမ်းထားသူဖြစ်သည့် ကိုယ်ဝန်အရင့်အမာရှိသော မာရိကိုလည်း ခေါ်ဆောင်သွားလေ၏။ 6 ဗက်လင်မြို့၌ သူတို့ရှိနေကြစဉ် မာရိသည်သားဖွားရန် နေ့လစေ့သဖြင့် 7 သားဦးကို မွေးဖွားလေ၏။ တည်းခိုခန်းတွင် သူတို့အတွက် တည်းခိုရန် နေရာမရှိသောကြောင့် မာရိသည် သူငယ်ကို အနှီးနှင့်ရစ်ပတ်၍ နွားစားခွက်၌ သိပ်ထားလေ၏။ သိုးထိန်းများနှင့် ကောင်းကင်တမန်များ 8 ထိုအရပ်ဒေသတွင် သိုးထိန်းများရှိကြ၏။ သူတို့သည် ညအခါ ကွင်းပြင်များ၌ သိုးများကို စောင့်နေကြ၏။ 9 ထိုစဉ် ထာဝရဘုရား၏ကောင်းကင်တမန်တစ်ပါးသည် သူတို့ရှေ့၌ ပေါ်လာ၍ ထာဝရဘုရား၏ဘုန်းရောင်ခြည်သည် သူတို့၏ပတ်လည်တွင် ထွန်းလင်းသဖြင့် သူတို့သည် အလွန် ကြောက်ရွံ့တုန်လှုပ်ကြ၏။ 10 ကောင်းကင်တမန်က “မကြောက်ကြနှင့်။ ငါသည် လူသားအားလုံးအတွက် အလွန်ဝမ်းမြောက်စရာသတင်းကောင်းကို သင်တို့ထံသို့ ယူဆောင်လာ၏။ 11 ယနေ့တွင် ဒါဝိဒ်၏မြို့၌ သခင်ခရစ်တော်တည်းဟူသော ကယ်တင်ရှင်သည် သင်တို့အတွက် မွေးဖွားလာတော်မူပြီ။ 12 မည်ကဲ့သို့သိမြင်မည်ဆိုလျှင် အနှီးဖြင့် ရစ်ပတ်ထား၍ နွားစားခွက်တွင် သိပ်ထားသောသူငယ်ကို သင်တို့တွေ့ရလိမ့်မည်” ဟု ဆိုလေ၏။ 13 ထိုခဏချင်းတွင် ကောင်းကင်တမန်နှင့်အတူ ကောင်းကင်ဗိုလ်ခြေများစွာတို့သည် ပေါ်လာ၍ ဘုရားသခင်၏ဂုဏ်တော်ကို ချီးမွမ်းလျက် 14 “အမြင့်ဆုံးသောကောင်းကင်ဘုံ၌ ရှိတော်မူသောဘုရားသခင်သည် ဘုန်းကြီးတော်မူပါစေ။ မြေကြီးပေါ်၌ ဘုရားသခင်နှစ်သက်တော်မူသော သူတို့အပေါ်တွင် ငြိမ်းချမ်းခြင်းရှိပါစေ” ဟု ဆိုကြ၏။ 15 ကောင်းကင်တမန်များသည် ကောင်းကင်ဘုံသို့ ပြန်တက်သွားကြသောအခါ သိုးထိန်းများက “ငါတို့သည် ဗက်လင်မြို့သို့ သွား၍ ငါတို့အား ထာဝရဘုရားဖော်ပြသောအကြောင်းအရာကို ကြည့်ရှုကြစို့” ဟု အချင်းချင်း တိုင်ပင်ပြောဆိုကြ၏။ 16 သူတို့သည် အလျင်အမြန်သွား၍ မာရိနှင့်ယောသပ်ကိုလည်းကောင်း၊ နွားစားခွက်တွင် သိပ်ထားသောသူငယ်တော်ကိုလည်းကောင်း တွေ့မြင်ကြ၏။ 17 သူငယ်တော်ကို တွေ့မြင်ပြီးသောအခါ သိုးထိန်းတို့သည် မိမိတို့ကြားရသော သူငယ်တော်၏အကြောင်းကို လူတို့အား ပြန်လည်ပြောပြကြ၏။ 18 သိုးထိန်းတို့၏စကားကို ကြားရသောသူအပေါင်းတို့သည် အံ့သြကြ၏။ 19 သို့သော်လည်း မာရိသည် ဤဖြစ်ပျက်သမျှအကြောင်းအရာအားလုံးကို မိမိစိတ်နှလုံးထဲတွင် မှတ်သား၍ စဉ်းစားဆင်ခြင်လျက်နေ၏။ 20 သိုးထိန်းတို့သည် ကောင်းကင်တမန်များဖော်ပြသည့်အတိုင်း မြင်ရကြားရသဖြင့် ထိုအကြောင်းအရာ အားလုံးအတွက် ဘုရားသခင်၏ဂုဏ်တော်ကို ချီးမွမ်းလျက် ပြန်သွားကြ၏။ သူငယ်တော်ယေရှုအား ဗိမာန်တော်၌ ဆက်ကပ်ခြင်း 21 ရှစ်ရက်ပြည့်သောအခါ သူငယ်ကို အရေပြားလှီးခြင်းမင်္ဂလာပေး၍ ယေရှုဟု အမည်ပေးကြ၏။ ထိုအမည်မှာ ကိုယ်ဝန်မဆောင်မီကပင် ကောင်းကင်တမန်ပေးထားသောအမည် ဖြစ်၏။ 22 ထို့နောက် မောရှေ၏ပညတ်ကျမ်းအတိုင်း သန့်ရှင်းစင်ကြယ်ခြင်းကျင့်ဝတ်ကို ပြုချိန်ရောက်လာသောအခါ မိဘနှစ်ပါးတို့သည် ယေရှုကို ဘုရားသခင်ထံဆက်ကပ်ရန် ဂျေရုဆလင်မြို့သို့ ခေါ်ဆောင်သွားကြ၏။ 23 ဤအရာသည် ထာဝရဘုရား၏ပညတ်ကျမ်း၌ “သားဦးတိုင်းကို ထာဝရဘုရားအတွက် ဆက်ကပ်ရမည်” ဟု ရေးထားသည်နှင့်အညီ ဖြစ်၏။ 24 ထို့ပြင် “ချိုးငှက်နှစ်ကောင်၊ သို့မဟုတ် ခိုငယ်နှစ်ကောင်ကို ပူဇော်ရမည်” ဟူ၍ ထာဝရဘုရား၏ပညတ်ကျမ်းတွင် ဖော်ပြထားသည့်အတိုင်း ယဇ်ပူဇော်ကြ၏။ ရှိမောင်၏ပရောဖက်ပြုချီးမွမ်းခြင်း 25 ထိုအချိန်၌ ဂျေရုဆလင်မြို့တွင် ရှိမောင်ဟု ခေါ်သော လူတစ်ဦးရှိ၏။ သူသည် သူတော်ကောင်းတစ်ဦးဖြစ်ပြီး ဘုရားတရားကိုင်းရှိုင်းသူလည်း ဖြစ်၏။ အစ္စရေးလူမျိုးတို့အား နှစ်သိမ့်တော်မူမည့် ကယ်တင်ရှင်ကြွလာမည်ကို စောင့်မျှော်နေသူ ဖြစ်၍ သန့်ရှင်းသောဝိညာဉ်တော်သည်လည်း သူ့အပေါ်၌ တည်နေ၏။ 26 သူသည် ထာဝရဘုရား၏ခရစ်တော်ကို ကိုယ်တိုင်မတွေ့မမြင်ရဘဲ မသေရဟူ၍ သန့်ရှင်းသောဝိညာဉ်တော်၏ဖွင့်ပြထားခြင်းကို ခံရသူဖြစ်၏။ 27 သူသည် သန့်ရှင်းသောဝိညာဉ်တော်၏နှိုးဆော်မှုအတိုင်း ဗိမာန်တော်ထဲသို့ သွားလေ၏။ မာရိနှင့်ယောသပ်တို့သည် ပညတ်တရား၏ထုံးတမ်းစဉ်လာအတိုင်း သူငယ်ယေရှုကို ဗိမာန်တော်၌ ဆက်ကပ်ရန် ရောက်လာကြ၏။ 28 ထိုအခါ ရှိမောင်သည် သူငယ်ကို ပွေ့ချီလျက်ဘုရားသခင်၏ဂုဏ်တော်ကို ချီးမွမ်း၍ 29 “အရာအားလုံးကို အုပ်စိုးတော်မူသောအရှင်ဘုရားသခင်… ကိုယ်တော်၏ကတိတော်အတိုင်း ကိုယ်တော်၏အစေခံ အကျွန်ုပ်ကို ငြိမ်းချမ်းစွာ သေရသောအခွင့်ကို ယခုပေးတော်မူပြီ။ 30 အဘယ်ကြောင့်ဆိုသော် အကျွန်ုပ်သည် ကိုယ်တော်ထံမှ လာသော ကယ်တင်ရှင်ကို မြင်ရပြီဖြစ်သောကြောင့်ပင်။ 31 ကိုယ်တော်သည် ထိုကယ်တင်ရှင်ကို လူအပေါင်းတို့ရှေ့၌ ပြင်ဆင်ထားတော်မူပြီ။ 32 ထိုကယ်တင်ရှင်သည် လူမျိုးခြားတို့အား ကိုယ်တော့်အကြောင်းကို ဖော်ပြပေးမည့်အလင်းနှင့် ကိုယ်တော်၏လူမျိုးတော်ဖြစ်သော အစ္စရေးလူမျိုးတို့၏ ဘုန်းအသရေအတွက် အလင်းဖြစ်တော်မူ၏” ဟု ဆိုလေ၏။ 33 သူငယ်တော်၏မိဘတို့သည် သူငယ်တော်နှင့်ပတ်သက်၍ ပြောဆိုသောအကြောင်းအရာများကို ကြားသောအခါ အံ့ဩလျက် နေကြ၏။ 34 ထို့နောက် ရှိမောင်သည် သူတို့ကို ကောင်းချီးပေး၍ မိခင်မာရိအား “ဤသူငယ်သည် အစ္စရေးလူမျိုးထဲမှ လူများစွာကို လဲစေရန်သော်လည်းကောင်း၊ များစွာကို ထစေရန်သော်လည်းကောင်း ခန့်အပ်ခြင်းခံရသောသူဖြစ်၏။ ဆန့်ကျင်ခြင်းခံရမည့် နိမိတ်လက္ခဏာအဖြစ် စေလွှတ်ခံရသောသူလည်းဖြစ်၏။ 35 သို့ဖြစ်၍ သူသည် လူများစွာတို့၏စိတ်နှလုံးတွေးတောကြံစည်မှုများကို ပေါ်လွင်စေမည်။ သင့်စိတ်နှလုံးသည်လည်း ဓားဖြင့် ထိုးခံရသကဲ့သို့ ဖြစ်လိမ့်မည်” ဟု ဆိုလေ၏။ အန္န၏သက်သေခံချက် 36 ထိုနေရာ၌ အာရှာအနွယ်၊ ဖနွေလ၏သမီး အန္နဟု ခေါ်သော အသက်အရွယ်ကြီးရင့်သည့် ပရောဖက်အမျိုးသမီးတစ်ဦးရှိ၏။ ထိုအမျိုးသမီးသည် ငယ်ရွယ်စဉ်တွင် အိမ်ထောင်ကျ၏။ ခင်ပွန်းနှင့် ခုနစ်နှစ်ခန့်သာ ပေါင်းသင်းနေထိုင်ပြီးလျှင် 37 ရှစ်ဆယ့်လေးနှစ်တိုင်တိုင် မုဆိုးမဘဝနှင့် အသက်ရှင်နေသူဖြစ်၏။ ထိုအမျိုးသမီးသည် ဗိမာန်တော်အတွင်း၌ နေ့ရောညပါ ဘုရားဝတ်ပြု၊ ဆုတောင်း၊ အစာရှောင်လျက် နေ၏။ 38 ရှိမောင်သည် မာရိနှင့် ယောသပ်တို့အား စကားပြောနေချိန်တွင် အန္နသည် ရောက်လာကာ ထာဝရဘုရား၏ကျေးဇူးတော်ကို ချီးမွမ်းလေ၏။ ထို့နောက် ဂျေရုဆလင်မြို့ ရွေးနုတ်ကယ်တင်ခံရမည်ကို စောင့်မျှော်လျက်ရှိသောသူအပေါင်းတို့အား ထိုသူငယ်အကြောင်းကို ပြောလေ၏။ 39 သူငယ်၏မိဘတို့သည် ထာဝရဘုရား၏ပညတ်တရားနှင့်အညီ ပြုလုပ်ရမည့်အရာအားလုံးကို ဆောင်ရွက်ပြီးသောအခါ သူငယ်ကို ခေါ်၍ ဂါလိလဲပြည် နာဇရက်မြို့သို့ ပြန်သွားကြ၏။ 40 သူငယ်သည်လည်း ကြီးပြင်း၍ ကြံ့ခိုင်သန်စွမ်းလျက် ဉာဏ်ပညာနှင့်ပြည့်စုံ၏။ ဘုရားသခင်၏မျက်နှာသာပေးခြင်းကိုလည်း ခံရလေ၏။ ဗိမာန်တော်တွင် ကျမ်းတတ်ဆရာများနှင့် တရားဆွေးနွေးတော်မူခြင်း 41 ယေရှု၏မိဘတို့သည် ပသခါပွဲတော် ပါဝင်ဆင်နွှဲရန် ဂျေရုဆလင်မြို့သို့ နှစ်စဉ်သွားလေ့ရှိ၏။ 42 ယေရှုအသက် ဆယ့်နှစ်နှစ် ရှိသောအခါ၌လည်း ထုံးစံရှိသည့်အတိုင်း ဂျေရုဆလင်မြို့သို့ သွားကြ၏။ 43 ပွဲကျင်းပ ပြီးဆုံးချိန်၌ သူတို့သည် နာဇရက်မြို့သို့ ပြန်ကြ၏။ သို့သော် သူငယ်ယေရှုသည် ဂျေရုဆလင်မြို့၌ပင် နေရစ်လေ၏။ မိဘတို့သည် သူတို့နှင့်အတူ ယေရှုမပါကြောင်းကို မသိကြ။ 44 ခရီးသွား လူစုထဲတွင် ယေရှုပါလာလိမ့်မည်ဟု ထင်မှတ်လျက် တစ်နေ့တာခရီးပြုကြ၏။ ထို့နောက် ယေရှုကို မတွေ့ရသောအခါဆွေမျိုး အသိအကျွမ်းများထဲတွင် ရှာကြ၏။ 45 မိဘတို့သည် မတွေ့သဖြင့် ဂျေရုဆလင်မြို့သို့ ပြန်၍ သွားရှာကြ၏။ 46 သုံးရက်ကြာသောအခါ ယေရှုသည် ဗိမာန်တော်အတွင်း ဆရာများအလယ်၌ထိုင်၍ သူတို့၏စကားကို နားထောင်ကာ ဆွေးနွေးမေးမြန်းလျက်နေသည်ကို တွေ့ရှိကြလေ၏။ 47 ယေရှု၏စကားကို ကြားသောသူအပေါင်းတို့သည် သူ၏ဉာဏ်ပညာနှင့် ဖြေကြားချက်များကို အံ့သြကြ၏။ 48 မိဘတို့သည် ယေရှုကို တွေ့သောအခါ အံ့အားသင့်၍ မိခင်က “ငါ့သား… သင်သည် အဘယ်ကြောင့် ငါတို့ကို ဤသို့ ပြုရသနည်း။ ငါနှင့် သား၏ဖခင်သည် သားကို အလွန်စိတ်ပူ၍ နေရာအနှံ့လိုက်ရှာခဲ့ရ၏” ဟု ပြောလေ၏။ 49 ယေရှုကလည်း “အဘယ်ကြောင့် အကျွန်ုပ်ကို ရှာကြသနည်း။ အကျွန်ုပ်သည် ခမည်းတော်၏အိမ်တော်၌ ရှိနေရမည်ကို မသိကြသလော” ဟု ပြန်ဖြေလေ၏။ 50 သို့သော် မိဘတို့သည် ယေရှုပြောသောစကား၏အဓိပ္ပာယ်ကို နားမလည်ကြပေ။ 51 ထို့နောက် ယေရှုသည် မိဘတို့နှင့်အတူ နာဇရက်မြို့သို့ ပြန်သွား၍ သူတို့၏စကားကို နားထောင်လျက် နေလေ၏။ မိခင်သည် ဖြစ်ပျက်ခဲ့သမျှကို စိတ်နှလုံးထဲ၌ မှတ်ထားလေ၏။ 52 ယေရှုသည်လည်း ခန္ဓာကာယနှင့် ဉာဏ်ပညာဖွံ့ဖြိုး၍ ဘုရားသခင်ရှေ့၊ လူတို့ရှေ့တွင် မျက်နှာရတော်မူ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.