လုကာ 12 - ခေတ်သစ်မြန်မာ သမ္မာကျမ်းသူတော်ကောင်းယောင်ဆောင်ခြင်းကို သတိပေးခြင်း 1 ထိုအချိန်အတွင်း ထောင်ပေါင်းများစွာသောလူတို့သည် စုဝေးလာကြ၍ တစ်ဦးအပေါ်တစ်ဦးပင် နင်းမိကြ၏။ ယေရှုသည် ဦးစွာ တပည့်တော်တို့အား “သူတော်ကောင်းယောင်ဆောင်ခြင်းဟူသောဖာရိရှဲတို့၏တဆေးကို သတိပြုကြလော့။ 2 ဖုံးကွယ်ထားသမျှသည် ဖော်ထုတ်ခံရလိမ့်မည်။ လျှို့ဝှက်ထားသမျှတို့သည် ပေါ်လာလိမ့်မည်။ 3 ထို့ကြောင့် အမှောင်၌ သင်တို့ပြောသမျှတို့ကို အလင်းတွင် ကြားရလိမ့်မည်။ သင်တို့အိမ်တွင်းတံခါးပိတ်၍ တီးတိုးပြောသမျှကို လသာဆောင်ပေါ်မှ ကြေညာကြလိမ့်မည်။ 4 မိတ်ဆွေတို့… သင်တို့အား ငါပြောမည်။ ကိုယ်ခန္ဓာကိုသာ သတ်၍ နောက်ထပ်အဘယ်အရာကိုမျှမသတ်နိုင်သောသူတို့ကို မကြောက်ကြနှင့်။ 5 သို့သော်လည်း သင်တို့ကြောက်ရမည့်သူကို ငါပြောမည်။ ကိုယ်ခန္ဓာကို သတ်၍ ငရဲသို့ပစ်ချနိုင်သော ဘုရားသခင်ကိုသာ ကြောက်ကြလော့။ မှန်ပါ၏။ သင်တို့ကြောက်ရွံ့ရမည်သူမှာ ထိုအရှင်ဖြစ်၏။ 6 စာကလေးငါးကောင်ကို ကြေးဒင်္ဂါးလေးနှစ်ပြားနှင့်သာ ဝယ်ရသည်မဟုတ်လော။ သို့သော်လည်း ဘုရားသခင်သည် ထိုစာကလေးတစ်ကောင်ကိုမျှ မေ့လျော့သည်မဟုတ်။ 7 ထိုမျှမက သင်တို့၏ဦးခေါင်းမှ ဆံပင်ရှိသမျှကိုလည်း ရေတွက်ထားတော်မူ၏။ ထို့ကြောင့် မကြောက်ကြနှင့်။ သင်တို့သည် စာကလေးများစွာထက် ပို၍အဖိုးတန်၏။ 8 သင်တို့အား ငါပြောမည်။ လူတို့ရှေ့တွင် ငါ့ကို ထုတ်ဖော်ဝန်ခံသူ ရှိသမျှတို့အား လူသားသည်လည်း ဘုရားသခင်၏ကောင်းကင်တမန်များရှေ့တွင် ထုတ်ဖော်ဝန်ခံမည်။ 9 လူတို့ရှေ့တွင် ငါ့ကို ငြင်းပယ်သောသူအား ဘုရားသခင်၏ကောင်းကင်တမန်များရှေ့တွင် ငါသည် ငြင်းပယ်မည်။ 10 လူသားကို နှုတ်နှင့်ပြစ်မှားသောသူသည် ခွင့်လွှတ်တော်မူခြင်းခံရသော်လည်း သန့်ရှင်းသောဝိညာဉ်တော်အား နှုတ်ဖြင့် ပြစ်မှားပြောဆိုသောသူသည် ခွင့်လွှတ်တော်မူခြင်းမခံရ။ 11 လူတို့သည် သင်တို့ကို ဝတ်ပြုဆောင်များသို့လည်းကောင်း၊ အစိုးရမင်းများ၊ အာဏာပိုင်များထံသို့လည်းကောင်း ခေါ်ဆောင်သွားသောအခါ သင်တို့သည် မိမိကိုယ်ကိုယ် မည်သို့ခုခံပြောဆိုရမည်ကို မစိုးရိမ်ကြနှင့်။ 12 သန့်ရှင်းသောဝိညာဉ်တော်သည် သင်တို့ပြောသင့်သည့်အရာများကို ထိုအချိန်၌ပင် သွန်သင်တော်မူလိမ့်မည်” ဟူ၍ မိန့်တော်မူ၏။ မိုက်မဲသော သူဌေးကြီးပုံဥပမာ 13 ထိုအချိန်တွင် လူစုထဲမှ လူတစ်ဦးက “ဆရာတော်… အကျွန်ုပ်၏အစ်ကိုအား မိသားစုနှင့်ဆိုင်သော အမွေကို ခွဲပေးရန် အမိန့်ရှိတော်မူပါ” ဟု လျှောက်လေ၏။ 14 ယေရှုက ထိုသူအား “မိတ်ဆွေ… မည်သူသည် ငါ့ကို တရားသူကြီးအဖြစ်၊ သို့မဟုတ် အမွေခွဲပေးသူအဖြစ် ခန့်ထားသနည်း” ဟု မိန့်တော်မူ၏။ 15 ထို့နောက် သူတို့အား “သတိပြုလော့။ အမျိုးမျိုးသော လောဘတို့ကို သတိနှင့် ရှောင်ကြဉ်ကြလော့။ လူတစ်ဦး၏အသက်သည် စည်းစိမ်ကြွယ်ဝချမ်းသာမှုပေါ်တွင် မူတည်သည်မဟုတ်” ဟု မိန့်တော်မူ၏။ 16 တစ်ဖန် ကိုယ်တော်သည် ဥပမာတစ်ခုဖြင့် မိန့်တော်မူသည်မှာ “သူဌေးတစ်ဦးတွင် အသီးအနှံများစွာ ဖြစ်ထွန်းသောလယ်တစ်ခုရှိ၏။ 17 သူက ‘ငါ၏ကောက်ပဲသီးနှံများကို သိုလှောင်ရန် နေရာမရှိတော့ပြီ။ ထို့ကြောင့် မည်သို့ ပြုလုပ်ရမည်နည်း’ ဟူ၍ တစ်ကိုယ်တည်း တွေးတောလေ၏။ 18 ထို့နောက် သူက ‘ငါ၏စပါးကျီများကို ဖျက်ပြီးလျှင် ပို၍ ကြီးသောစပါးကျီများကို ဆောက်၍ ရှိသမျှစပါးနှင့် ကောက်ပဲသီးနှံတို့ကို သိုလှောင်ထားမည်။ 19 ငါ့ကိုယ်ငါလည်း “အို မိတ်ဆွေ… သင့်ထံ၌ နှစ်ပေါင်းများစွာဇိမ်ခံရန် ပစ္စည်းဥစ္စာများ အလျှံပယ်ရှိပြီဖြစ်၍ အပန်းဖြေလျက် စားသောက်လျက် ပျော်မြူးပါလော့” ဟူ၍ပြောမည်’ ဟု ဆိုလေ၏။ 20 သို့ရာတွင် ဘုရားသခင်က ‘အို လူမိုက်… ယနေ့ညပင် သင်သည် သေရလိမ့်မည်။ သို့ဖြစ်လျှင် သင်ပြင်ဆင်ထားသမျှသော စည်းစိမ်ဥစ္စာများသည် မည်သူ့အတွက် ဖြစ်မည်နည်း’ ဟု မိန့်တော်မူ၏။ 21 ထိုကဲ့သို့ပင် မိမိအတွက် စည်းစိမ်ဥစ္စာများကို စုသိမ်းထားသော်လည်း ဘုရားသခင်ရှေ့တွင် ဆင်းရဲသောသူသည် ထိုသူဌေးနှင့်တူ၏” ဟု မိန့်တော်မူ၏။ ငွေကြေးနှင့်စည်းစိမ်ဥစ္စာအကြောင်းကို သွန်သင်တော်မူခြင်း 22 ထို့နောက် တပည့်တော်တို့အား “ထို့ကြောင့် သင်တို့အား ငါပြောဆိုသည်မှာ သင်တို့အသက်ရှင်ရန်အတွက် မည်သည့်အရာစားရမည်ကိုလည်းကောင်း၊ သင်တို့ကိုယ်ခန္ဓာအတွက် မည်သည့်အရာဝတ်ရမည်ကိုလည်းကောင်း မစိုးရိမ်ကြနှင့်။ 23 အသက်သည် အစာထက်မြတ်၏။ ကိုယ်ခန္ဓာသည် အဝတ်ထက်မြတ်၏။ 24 ကျီးကန်းများကို ကြည့်ရှုဆင်ခြင်ကြလော့။ သူတို့သည် မျိုးစေ့ကို မကြဲ။ သီးနှံကိုလည်း မရိတ်သိမ်းကြ။ သူတို့သည် စပါးကျီမရှိ။ သိုလှောင်စရာ နေရာလည်းမရှိ။ သို့သော် ဘုရားသခင်သည် သူတို့ကို ကျွေးမွေးတော်မူ၏။ သင်တို့သည် ထိုငှက်များထက် များစွာအဖိုးတန်သည်မဟုတ်လော။ 25 မည်သူသည် စိုးရိမ်ခြင်းအားဖြင့် မိမိ၏အသက်ကို အနည်းငယ်ရှည်စေနိုင်သနည်း။ 26 သင်တို့သည် ထိုသေးငယ်သောအမှုကိုပင် မတတ်နိုင်လျှင် အဘယ်ကြောင့် အခြားသောအရာများအတွက် စိုးရိမ်ကြသနည်း။ 27 နှင်းပန်းပင်များမည်သို့ကြီးထွားသည်ကို ကြည့်ရှုဆင်ခြင်ကြလော့။ ထိုအပင်တို့သည် ပင်ပန်းစွာအလုပ်မလုပ်။ ချည်လည်း မငင်။ သို့သော် ဘုန်းကြီးသောရှောလမုန်မင်းကြီးပင်လျှင် ထိုနှင်းပန်းပင်တစ်ပင်ကဲ့သို့ မဝတ်ဆင်ခဲ့ရဟု သင်တို့အား ငါပြောဆို၏။ 28 ယုံကြည်ခြင်းအားနည်းသောသူတို့… ယနေ့ရှင်သန်၍ မနက်ဖြန်မီးဖိုထဲသို့ ပစ်ချခံရသည့် တောပန်းပင်ကို ဘုရားသခင်သည် ထိုမျှဆင်မြန်းတော်မူလျှင် သင်တို့ကိုသာ၍ ဆင်မြန်းတော်မူမည်မဟုတ်လော။ 29 မည်သည့်အရာကို စားရမည်နည်း မည်သည့်အရာကို သောက်ရမည်နည်းဟူ၍ မတွေးတောကြနှင့်။ ထိုအရာများအတွက် စိုးရိမ်ပူပန်ခြင်းမရှိကြနှင့်။ 30 ဘုရားသခင်ကို မကိုးကွယ်သောလောကီလူသားများအားလုံးသည် ထိုအရာများကို ကြိုးစားရှာဖွေတတ်ကြ၏။ သို့ရာတွင် သင်တို့၏ကောင်းကင်ဘုံရှင်အဖသည် ထိုအရာများကို သင်တို့လိုအပ်ကြောင်း သိမြင်တော်မူ၏။ 31 ဘုရားသခင်၏နိုင်ငံတော်ကို ဦးစွာ ရှာကြလော့။ သို့ပြုလျှင် သင်တို့လိုအပ်သော အရာအားလုံးကို ပေးတော်မူလိမ့်မည်။ 32 အို သိုးစုငယ်… မကြောက်နှင့်။ သင်တို့၏အဖသည် သင်တို့အား နိုင်ငံတော်ကို ပေးရန် အလိုတော်ရှိတော်မူ၏။ 33 သင်တို့၏ဥစ္စာပစ္စည်းများကို ရောင်း၍ ဆင်းရဲသောသူတို့အား ပေးကမ်းကြလော့။ သင်တို့အတွက် မဆွေးမြေ့နိုင်သည့် ပိုက်ဆံအိတ်များကို ပြုလုပ်၍ သူခိုးမကပ်၊ ပိုးမဖျက်ဆီးနိုင်သည့် ကောင်းကင်ဘုံ၌ မကုန်ခန်းနိုင်သောဘဏ္ဍာကို သိုထားကြလော့။ 34 အဘယ်ကြောင့်ဆိုသော် သင်တို့၏ဘဏ္ဍာရှိသောနေရာသို့ သင်တို့စိတ်နှလုံး ရောက်တတ်သောကြောင့်ဖြစ်၏။ ဘုရားသခင်၏ကြွလာခြင်းအတွက် အဆင်သင့်ဖြစ်စေခြင်း 35 ခါးပတ်ကို ပတ်လျက် ဆီမီးခွက်ကိုလည်း အသင့်ထွန်းညှိထားလော့။ 36 မိမိသခင်သည် မင်္ဂလာဆောင်ပွဲမှ ပြန်လာ၍ တံခါးခေါက်လျှင် ချက်ချင်းဖွင့်ပေးနိုင်ရန် အသင့်စောင့်နေသော အစေခံကဲ့သို့ ဖြစ်ကြလော့။ 37 ထိုသို့ သခင်၏အိမ်အပြန်ကို အသင့်စောင့်နေကြသောအစေခံတို့သည် မင်္ဂလာရှိကြ၏။ ငါအမှန်ဆိုရလျှင် ထိုသခင်သည် အစေခံများအား ထိုင်စေ၍ ခါးစည်းကို ဝတ်လျက် မိမိကိုယ်တိုင် ဧည့်ခံကျွေးမွေးလိမ့်မည်။ 38 သခင်သည် သန်းခေါင်ယံအချိန်၌ဖြစ်စေ၊ မိုးမလင်းမီအချိန်၌ဖြစ်စေ ပြန်လာသောအခါ အသင့်စောင့်နေကြသောအစေခံတို့သည် မင်္ဂလာရှိကြ၏။ 39 အိမ်ရှင်သည် သူခိုးလာမည့်အချိန်ကို သိလျှင် သူ၏အိမ်ကို ဖောက်ထွင်းခွင့်ပြုမည်မဟုတ်ကြောင်း သိမှတ်ကြလော့။ 40 သင်တို့လည်း အသင့်ရှိစေကြလော့။ လူသားသည် မမျှော်လင့်သောအချိန်တွင် ကြွလာမည်” ဟု မိန့်တော်မူ၏။ 41 ပေတရုကလည်း “သခင်… ဤဥပမာသည် ကျွန်ုပ်တို့အတွက် မိန့်တော်မူသလော။ ဤလူအားလုံးအတွက် မိန့်တော်မူသလော” ဟု မေးလျှောက်လေ၏။ 42 ထိုအခါ သခင်ဘုရားက “သစ္စာရှိ၍ ပညာအလိမ္မာနှင့်ပြည့်စုံသောစီမံခန့်ခွဲသူသည် မည်သူနည်း။ ထိုသူသည် အစေခံများကို အုပ်ချုပ်ရန်နှင့် အချိန်တန်သောအခါ စားနပ်ရိက္ခာကို ခွဲဝေစေရန် သခင်ခန့်ထားသောသူဖြစ်၏။ 43 သခင်သည် ပြန်လာသောအခါ ထိုသို့ အလုပ်လုပ်နေသော အစေခံကို တွေ့မြင်လျှင် ထိုအစေခံသည် မင်္ဂလာရှိ၏ 44 သင်တို့အား ငါအမှန်ဆို၏။ သခင်သည် ထိုအစေခံအား စည်းစိမ်ဥစ္စာရှိသမျှကို စီမံကွပ်ကဲရန် ခန့်အပ်လိမ့်မည်။ 45 သို့သော် ထိုအစေခံက ‘ငါ၏သခင်သည် အိမ်ပြန်နောက်ကျလိမ့်မည်’ ဟု စိတ်တွင်ထင်မှတ်၍ အခြားသောအစေခံယောက်ျား၊ အစေခံမိန်းမတို့အား ရိုက်နှက်ကာ သောက်စားမူးယစ်လျက်နေလျှင် 46 သူ၏သခင်သည် သူမမျှော်လင့်သောအချိန်နှင့် သူမသိသောနေ့ရက်တွင် ရောက်လာလိမ့်မည်။ ထိုအခါ သူ့အား ပြင်းထန်စွာ ပြစ်ဒဏ်ပေး၍ သစ္စာဖောက်သူတို့နှင့်အတူ နေရာချထားလိမ့်မည်။ 47 မိမိသခင်၏အလိုကို သိလျက် သခင်အလိုရှိသောအရာကို အသင့်မပြင်ဆင်သော အစေခံသည် ရိုက်နှက်ခြင်းကို ပြင်းစွာခံရလိမ့်မည်။ 48 သို့သော် မိမိသခင်၏အလိုကို မသိဘဲ ရိုက်နှက်ခြင်းဒဏ်နှင့်ခံထိုက်သောအမှုကို ကျူးလွန်မိသောသူသည် အနည်းငယ်သာ ရိုက်နှက်ခြင်းခံရလိမ့်မည်။ များစွာရရှိထားသောသူထံမှ များစွာတောင်းဆိုလိမ့်မည်။ များစွာအပ်နှံခံရသော သူထံမှ ပို၍ တောင်းလိမ့်မည်။ ကွဲပြားစေတော်မူခြင်း 49 ဤကမ္ဘာမြေကြီးသို့ မီးကျစေရန် ငါလာ၏။ ယခု မီးလောင်ကျွမ်းပြီးသားဖြစ်ရန်ပင် ငါအလိုရှိလှ၏။ 50 ငါခံရမည့် နှစ်ခြင်းမင်္ဂလာတစ်ပါးရှိ၏။ ထိုနှစ်ခြင်းမင်္ဂလာကို မခံမီအထိ ငါသည် အလွန်စိတ်ဖိစီးလှ၏။ 51 ဤလောကသို့ ငြိမ်းချမ်းခြင်းကို ယူဆောင်လာရန် ငါလာသည်ဟု သင်တို့ထင်ကြသလော။ မဟုတ်ပါ။ သင်တို့အား ငါပြောမည်။ ငါသည် ကွဲပြားစေရန်လာ၏။ 52 ယခုမှစ၍ ငါးဦးရှိသောအိမ်ထောင်တစ်စုတွင် သုံးဦးသည် နှစ်ဦးကိုလည်းကောင်း၊ နှစ်ဦးသည် သုံးဦးကိုလည်းကောင်း ဆန့်ကျင်၍ ကွဲပြားကြလိမ့်မည်။ 53 ထိုအိမ်ထောင်တွင် ဖခင်သည် သားကိုလည်းကောင်း၊ သားသည် ဖခင်ကိုလည်းကောင်း၊ မိခင်သည် သမီးကိုလည်းကောင်း၊ သမီးသည် မိခင်ကိုလည်းကောင်း၊ ယောက္ခမသည် ချွေးမကိုလည်းကောင်း၊ ချွေးမသည် ယောက္ခမကိုလည်းကောင်း အချင်းချင်းဆန့်ကျင်ကြလိမ့်မည်” ဟု မိန့်တော်မူ၏။ 54 ယေရှုက ပရိသတ်တို့အား “အနောက်ဘက်တွင် မိုးတိမ်တက်လာသည်ကို သင်တို့မြင်သောအခါ ‘မိုးရွာတော့မည်’ ဟု ချက်ချင်း ပြောဆိုတတ်ကြ၏။ သင်တို့ ပြောဆိုသည့်အတိုင်းလည်း မိုးရွာတတ်၏။ 55 တောင်လေတိုက်လာသောအခါ သင်တို့က ‘ပူအိုက်တော့မည်’ ဟု ပြောဆိုတတ်ကြ၏။ သင်တို့ပြောဆိုသည့်အတိုင်းလည်း ပူအိုက်တတ်၏။ 56 သူတော်ကောင်းယောင်ဆောင်သူတို့… သင်တို့သည် ကောင်းကင်နှင့် မြေကြီးကို ကြည့်၍ မိုးလေဝသအခြေအနေကို ပိုင်းခြားသိမြင်နိုင်ကြ၏။ သို့သော်လည်း ယခုကာလကို အဘယ်ကြောင့် မပိုင်းခြားနိုင်ကြသနည်း။ 57 သင်တို့သည် မှန်ကန်သောအရာကို အဘယ်ကြောင့် ကိုယ်တိုင်မဆုံးဖြတ်နိုင်ကြသနည်း။ 58 သင်သည် တရားလိုနှင့်အတူ တရားသူကြီးထံသို့ သွားသောအခါ လမ်း၌အမှုကျေအေးစေရန် ကြိုးစားအားထုတ်လော့။ ထိုသို့မဟုတ်လျှင် သူသည် သင့်ကို တရားသူကြီးရှေ့သို့ ဆွဲခေါ်သွားလိမ့်မည်။ ထိုမှတစ်ဖန် တရားသူကြီးသည်လည်း အရာရှိထံသို့ အပ်ကာ ထိုအရာရှိသည် သင့်ကို ထောင်ချလိမ့်မည်။ 59 ထိုသို့ဖြစ်လျှင် သင်ဆပ်ရမည့်ငွေကို အကုန်အစင်မဆပ်သရွေ့ ထောင်မှ လုံးဝလွတ်နိုင်မည်မဟုတ်” ဟု မိန့်တော်မူ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.