ရှင်ယောဟန် 18 - ခေတ်သစ်မြန်မာ သမ္မာကျမ်းသစ္စာဖောက်ခံရတော်မူခြင်းနှင့် ဖမ်းဆီးခံရတော်မူခြင်း 1 ထိုသို့ ဆုတောင်းတော်မူပြီးနောက် ယေရှုသည် တပည့်တော်တို့နှင့်အတူ ကေဒြုန်ချိုင့်ဝှမ်းကို ဖြတ်၍ တစ်ဖက်တွင် ရှိသောဥယျာဉ်သို့ ကြွတော်မူ၏။ 2 ထိုဥယျာဉ်သို့ ယေရှုသည် တပည့်တော်တို့နှင့်အတူ မကြာခဏသွားလေ့ရှိသဖြင့် ယေရှုကို သစ္စာဖောက်သောယုဒသည် ထိုနေရာကို သိ၏။ 3 ထို့ကြောင့် ယုဒသည် ရောမတပ်ဖွဲ့တစ်ဖွဲ့ကိုလည်းကောင်း၊ ယဇ်ပုရောဟိတ်ခေါင်းဆောင်များနှင့် ဖာရိရှဲတို့လွှတ်လိုက်သော ဗိမာန်တော်အစောင့်များကိုလည်းကောင်း ခေါ်ဆောင်လာ၏။ သူတို့သည် မီးတုတ်များ၊ မီးအိမ်များနှင့် လက်နက်များကို ကိုင်ဆောင်၍ ထိုဥယျာဉ်သို့ ရောက်လာကြ၏။ 4 ယေရှုသည် မိမိကြုံတွေ့ရမည့် အရာအားလုံးကို သိနှင့်ပြီးဖြစ်သောကြောင့် ရှေ့သို့ကြွလာ၍ “မည်သူ့ကို ရှာကြသနည်း” ဟု ထိုသူတို့ကို မေးတော်မူ၏။ 5 ထိုသူတို့က “နာဇရက်မြို့သားယေရှုကို ရှာကြသည်” ဟု ဆိုကြ၏။ ယေရှုက “ငါသည် ထိုသူပင်ဖြစ်သည်” ဟု မိန့်တော်မူ၏။ ယေရှုကို သစ္စာဖောက်သောယုဒသည်လည်း ထိုသူတို့နှင့်အတူ ရပ်နေ၏။ 6 “ငါသည် ထိုသူဖြစ်သည်” ဟု ယေရှုမိန့်တော်မူသောအခါ သူတို့အားလုံးသည် နောက်သို့ဆုတ်၍ မြေပေါ်သို့ လဲကြ၏။ 7 ယေရှုက “မည်သူ့ကို ရှာကြသနည်း” ဟု ထပ်မံ၍ မေးတော်မူလျှင် သူတို့က “နာဇရက်မြို့သားယေရှုကို ရှာကြသည်” ဟု ဆိုကြပြန်၏။ 8 ယေရှုက “ ‘ငါသည် ထိုသူဖြစ်သည်’ ဟု သင်တို့ကို ငါပြောခဲ့ပြီ။ သင်တို့ ရှာသောသူမှာ ငါဖြစ်လျှင် ဤသူတို့သွားပါလေစေ” ဟု မိန့်တော်မူ၏။ 9 ဤသို့ မိန့်တော်မူခြင်းမှာ “ကိုယ်တော် အကျွန်ုပ်အား ပေးအပ်တော်မူခဲ့သောသူ တစ်ယောက်မျှ ပျက်စီးခြင်းမရှိပါ” ဟု ယခင်က မိမိမိန့်တော်မူခဲ့သောစကားတော် ဖြစ်လာရန်ပင်ဖြစ်၏။ 10 ထိုအခါ ရှိမုန်ပေတရုသည် ဓားကို ဆွဲထုတ်၍ ယဇ်ပုရောဟိတ်မင်း၏ အစေခံတစ်ဦးကို ခုတ်သဖြင့် ထိုသူ၏လက်ယာနားရွက် ပြတ်လေ၏။ ထိုအစေခံ၏ အမည်မှာ မာလခုဖြစ်၏။ 11 ယေရှုက ပေတရုအား “ဓားကို ဓားအိမ်၌ ပြန်ထည့်လော့။ ခမည်းတော်ပေးတော်မူသောဒုက္ခဝေဒနာခွက်ကို ငါမသောက်ဘဲ နေရမည်လော” ဟု မိန့်တော်မူ၏။ ယဇ်ပုရောဟိတ်မင်းအိမ်သို့ ရောက်ရှိတော်မူခြင်း 12 ထိုအခါ တပ်မှူး၊ ရောမစစ်သားများနှင့် ဂျူးလူမျိုးဗိမာန်တော်အစောင့်တို့သည် ယေရှုကို ဖမ်းဆီးချည်နှောင်ကာ 13 အန္နတ်ထံသို့ ဦးစွာခေါ်ဆောင်သွားကြ၏။ အန္နတ်သည် ထိုနှစ်တွင် ယဇ်ပုရောဟိတ်မင်းဖြစ်သော ကယာဖ၏ ယောက္ခမဖြစ်၏။ 14 ထိုကယာဖမှာ “လူထုကိုယ်စား လူတစ်ဦးတစ်ယောက်အသေခံခြင်းသည် ပို၍ကောင်းသည်” ဟူ၍ အခြားဂျူးခေါင်းဆောင်များကို အကြံပေးခဲ့သူဖြစ်၏။ ပထမအကြိမ် ပေတရုငြင်းဆိုခြင်း 15 ရှိမုန်ပေတရုနှင့် အခြားတပည့်တော်တစ်ဦးတို့သည် ယေရှုနောက်တော်သို့ လိုက်ကြ၏။ ထိုတပည့်တော်သည် ယဇ်ပုရောဟိတ်မင်းနှင့် သိကျွမ်းသူဖြစ်၍ ယေရှုနှင့်အတူ ယဇ်ပုရောဟိတ်မင်း၏ ရုံးတော်ဝင်းသို့ လိုက်ပါခွင့်ရလေ၏။ 16 ပေတရုမှာမူ ဝင်းတံခါး အပြင်၌ ရပ်နေ၏။ ထိုအခါ ယဇ်ပုရောဟိတ်မင်းနှင့် သိကျွမ်းသောတပည့်တော်က တံခါးစောင့်အမျိုးသမီးကို ခွင့်တောင်းကာ ပေတရုကို ရုံးတော်ဝင်းသို့ ခေါ်သွင်းလေ၏။ 17 အမျိုးသမီးက ပေတရုအား “သင်သည် ထိုသူ၏တပည့်များထဲမှတစ်ယောက် မဟုတ်လော” ဟု မေးလျှင် ပေတရုက “မဟုတ်ပါ” ဟု ငြင်းလေ၏။ 18 ထိုအချိန်တွင် အစောင့်တပ်သားများနှင့် အိမ်အစေခံများသည် ချမ်းသဖြင့် မီးခဲဖိုကာ ပတ်လည်၌ ရပ်လျက် မီးလှုံနေကြ၏။ ပေတရုသည်လည်း ထိုသူတို့နှင့်အတူ ရပ်လျက် မီးလှုံနေ၏။ ယေရှုကို ယဇ်ပုရောဟိတ်မင်း စစ်ဆေးမေးမြန်းခြင်း 19 ထိုအချိန်တွင် ယဇ်ပုရောဟိတ်မင်းသည် ယေရှုကို တပည့်တော်တို့၏အကြောင်းကိုလည်းကောင်း၊ ယေရှု၏သွန်သင်ချက်များအကြောင်းကိုလည်းကောင်း စစ်ဆေးမေးမြန်း၏။ 20 ယေရှုက “ငါသည် ဤလောကတွင် လူသိရှင်ကြားဟောပြောခဲ့ပြီ။ လူအပေါင်းတို့သည် ငါသွန်သင်သမျှကို သိကြ၏။ ငါသည် ဂျူးလူမျိုးတို့စုဝေးရာဖြစ်သော ဝတ်ပြုဆောင်များနှင့် ဗိမာန်တော်၌ အစဉ်အမြဲဟောပြောသွန်သင်ခဲ့၏။ မည်သည့်အရာကိုမျှ လျှို့ဝှက်စွာမဟောပြောခဲ့ပါ။ 21 သို့ဖြစ်၍ သင်သည် ဤမေးခွန်းကို အဘယ်ကြောင့် ငါ့ကို မေးသနည်း။ ငါသည် မည်သို့ဟောပြောခဲ့သည်ကို ကြားနာသောပရိသတ်တို့ကို မေးမြန်းလော့။ ငါ့ဟောပြောချက်များကို သူတို့သိကြ၏” ဟု ဖြေတော်မူ၏။ 22 အနီးတွင် ရပ်နေသောဗိမာန်တော်အစောင့်တပ်သားတစ်ဦးက “ယဇ်ပုရောဟိတ်မင်းကို ဤသို့ဖြေရမည်လော” ဟု ဆိုကာ ယေရှု၏ပါးတော်ကို ရိုက်လေ၏။ 23 ယေရှုက “ငါ့စကား မှားလျှင် မှားကြောင်းကို ထောက်ပြပါ။ မှန်လျှင် အဘယ်ကြောင့် ငါ့ကိုရိုက်သနည်း” ဟု မိန့်တော်မူ၏။ 24 ထို့နောက် အန္နတ်မင်းသည် ယေရှုကို ချည်နှောင်လျက် ယဇ်ပုရောဟိတ်မင်း ကယာဖထံသို့ ပို့လိုက်၏။ ဒုတိယနှင့် တတိယအကြိမ် ပေတရုငြင်းဆိုခြင်း 25 ထိုအချိန်၌ ရှိမုန်ပေတရုသည် ရပ်လျက် မီးလှုံနေစဉ် လူတို့က “သင်သည်လည်း သူ၏ တပည့်များထဲမှ တစ်ယောက်မဟုတ်လော” ဟု မေးကြ၏။ ပေတရုက “မဟုတ်ပါ” ဟု ငြင်းပြန်၏။ 26 သို့ရာတွင် ပေတရုခုတ်သဖြင့် နားရွက်ပြတ်သွားသူနှင့် ဆွေမျိုးတော်စပ်သည့် ယဇ်ပုရောဟိတ်မင်း၏ ကျွန်တစ်ဦးက “သင့်ကို ယေရှုနှင့်အတူ ဥယျာဉ်ထဲတွင် ငါတွေ့မြင်ခဲ့သည် မဟုတ်လော” ဟု ပေတရုကို ဆို၏။ 27 ပေတရုကလည်း ထပ်မံ၍ ငြင်းဆိုပြန်၏။ ထိုခဏချင်းတွင် ကြက်တွန်လေ၏။ ပိလတ်မင်းရှေ့တွင် စစ်ဆေးခံတော်မူခြင်း 28 ထို့နောက် နံနက်စောစောအချိန်တွင် လူတို့သည် ယေရှုကို ကယာဖထံမှ ဘုရင်ခံပိလတ်မင်း၏ ရုံးတော်သို့ ခေါ်ဆောင်သွားကြ၏။ ထိုသူတို့သည် ပသခါပွဲတော်ညစာကို စားနိုင်ရန်အတွက် ညစ်ညူးခြင်းမှ ရှောင်လိုသဖြင့် ရုံးတော်ထဲသို့ မဝင်ဘဲနေကြ၏။ 29 ထို့ကြောင့် ဘုရင်ခံပိလတ်မင်းသည် ထိုသူတို့ ရှိရာသို့ ထွက်လာ၍ “သင်တို့သည် ဤလူ အပေါ်၌ မည်သည့်စွဲချက်ကို တင်ကြသနည်း” ဟု မေး၏။ 30 သူတို့က “ဤသူသည် ရာဇဝတ်သားမဟုတ်လျှင် သူ့ကို အရှင့်ထံ အကျွန်ုပ်တို့ခေါ်ဆောင်လာမည်မဟုတ်ပါ” ဟု လျှောက်ကြ၏။ 31 ပိလတ်မင်းကလည်း “ဤသို့ဖြစ်လျှင် သူ့ကို ပြန်ခေါ်၍ သင်တို့၏တရားဥပဒေအတိုင်း စီရင်ကြလော့” ဟု ဆို၏။ ဂျူးခေါင်းဆောင်များက “အကျွန်ုပ်တို့သည် မည်သူ့ကိုမျှ သေဒဏ်ပေးပိုင်ခွင့်မရှိပါ” ဟု လျှောက်ကြ၏။ 32 ဤသည်မှာ မိမိမည်သို့အသေခံရမည်ကို ကြိုတင်ဟောခဲ့သော ယေရှု၏စကားတော်အတိုင်း ဖြစ်ပျက်လာခြင်းဖြစ်၏။ 33 ထိုအခါ ပိလတ်မင်းသည် ရုံးတော်ထဲသို့ ပြန်ဝင်၍ ယေရှုကို ခေါ်လာစေပြီးလျှင် “သင်သည် ဂျူးတို့၏ ရှင်ဘုရင်ဖြစ်သလော” ဟု မေးလေ၏။ 34 ယေရှုက “သင်သည် မိမိဆန္ဒအလျောက် ဤသို့မေးသလော။ သို့မဟုတ် အခြားသူတို့သည် ငါ့အကြောင်းကို သင့်အား ပြောကြသလော” ဟု မေးတော်မူ၏။ 35 ပိလတ်မင်းက “သင်သည် ငါ့ကို ဂျူးလူမျိုးတစ်ယောက်ဟု ထင်သလော။ သင့်လူမျိုးများနှင့် ယဇ်ပုရောဟိတ်ခေါင်းဆောင်များက ငါ့ထံသို့ သင့်ကို ဖမ်းဆီးခေါ်ဆောင်လာကြ၏။ မည်သည့်ပြစ်မှုကို သင်ကျူးလွန်ခဲ့သနည်း” ဟု မေး၏။ 36 ယေရှုက “ငါ့နိုင်ငံသည် လောကီနိုင်ငံမဟုတ်။ ဟုတ်လျှင် ဂျူးခေါင်းဆောင်များ၏ဖမ်းဆီးခြင်းကို ငါမခံရစေရန် ငါ့တပည့်တို့က တိုက်ခိုက်ကြလိမ့်မည်။ သို့ရာတွင် ငါ့နိုင်ငံသည် ဤကမ္ဘာလောကမှ မဟုတ်” ဟု မိန့်တော်မူ၏။ 37 ပိလတ်မင်းက “ဤသို့ ဆိုလျှင် သင်သည် ရှင်ဘုရင်လော” ဟု မေးလျှင် ယေရှုက “သင်ဆိုသည့်အတိုင်း ငါသည် ရှင်ဘုရင်ဖြစ်၏။ ငါသည် သမ္မာတရားကို သက်သေခံရန် မွေးဖွားခြင်းကိုခံ၍ ထိုအတွက်ပင် ဤလောကသို့ လာ၏။ သမ္မာတရားကို ချစ်မြတ်နိုးသူတိုင်းသည် ငါ့စကားမှန်ကန်ကြောင်းကို သိကြ၏” ဟု မိန့်တော်မူ၏။ 38 ပိလတ်မင်းက “သမ္မာတရားဆိုသည်မှာ အဘယ်နည်း” ဟု မေး၏။ ထို့နောက် ပိလတ်မင်းသည် ဂျူးလူမျိုးများရှိရာ အပြင်သို့ တစ်ဖန်ထွက်၍ “ဤသူ၌ မည်သည့်ပြစ်မှုကိုမျှ ငါမတွေ့။ 39 သို့ရာတွင် သင်တို့သည် နှစ်စဉ်ပသခါပွဲတော်ကျင်းပချိန်တွင် အကျဉ်းသားတစ်ဦးကို လွတ်ငြိမ်းချမ်းသာခွင့်ပေးရန် ငါ့ကို တောင်းဆိုသောဓလေ့ထုံးတမ်းရှိသည် မဟုတ်လော။ ထို့ကြောင့် ဤဂျူးတို့၏ရှင်ဘုရင်ဆိုသူကို လွှတ်ပေးစေလိုသလော” ဟု မေး၏။ 40 သူတို့က “သူ့ကို မလွှတ်ပါနှင့်။ ဗာရဗ္ဗကိုသာ လွှတ်ပေးပါ” ဟု အော်ဟစ်၍ ပြောဆိုကြ၏။ ဗာရဗ္ဗသည် ဓားပြတစ်ဦး ဖြစ်၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.