ရှင်ယောဟန် 13 - ခေတ်သစ်မြန်မာ သမ္မာကျမ်းတပည့်တော်တို့၏ ခြေကို ဆေးတော်မူခြင်း 1 ထိုအချိန်သည် ပသခါပွဲတော်မတိုင်မီတစ်ရက် ဖြစ်၏။ ယေရှုသည် ဤလောကမှ ထွက်ခွာ၍ မိမိ၏ခမည်းတော်ထံသို့ ပြန်ကြွတော်မူရမည့် အချိန်ရောက်ပြီဖြစ်ကြောင်းကို သိတော်မူ၏။ ကိုယ်တော်သည် ဤလောက၌ ရှိသော မိမိတပည့်တို့ကို ချစ်တော်မူ၏။ သူတို့ကို အဆုံးတိုင်အောင် ချစ်တော်မူ၏။ 2 ကိုယ်တော်နှင့် တပည့်တော်တို့သည် ညစာစားလျက်နေကြ၏။ ထိုအချိန်တွင် ရှိမုန်ရှကာရုတ်၏သား ယုဒ၏စိတ်၌ ယေရှုကို သစ္စာဖောက်ရန် မာရ်နတ်သည် လှုံ့ဆော်ထားပြီးဖြစ်၏။ 3 ယေရှုသည် မိမိထံ၌ ခမည်းတော်က အခွင့်အာဏာအားလုံးကို အပ်နှံထားသည်ကိုလည်းကောင်း၊ မိမိသည် ဘုရားသခင်ထံမှ ကြွလာ၍ ဘုရားသခင်ထံသို့ ပြန်ကြွတော့မည်ကိုလည်းကောင်း သိတော်မူ၏။ 4 ထို့ကြောင့် စားပွဲမှ ထ၍ အပေါ်ဝတ်ရုံတော်ကို ချွတ်ပြီးလျှင် ပဝါကို ခါး၌ စည်းတော်မူ၏။ 5 ထို့နောက် ဇလုံတွင် ရေထည့်၍ တပည့်တော်တို့၏ ခြေကို ဆေးကြောပေးပြီးလျှင် ပဝါဖြင့် သုတ်တော်မူ၏။ 6 ရှိမုန်ပေတရု အလှည့်ရောက်သောအခါ ပေတရုက “သခင်… ကိုယ်တော်သည် အကျွန်ုပ်၏ ခြေကို ဆေးတော်မူမည်လော” ဟု မေးလျှောက်၏။ 7 ယေရှုက “ငါပြုသောအမှုကို သင်သည် ယခုနားမလည်သေးသော်လည်း နောင်တွင် နားလည်လိမ့်မည်” ဟု ဖြေတော်မူ၏။ 8 ပေတရုက “အကျွန်ုပ်၏ ခြေကို မည်သည့်အခါမျှ ဆေးတော်မမူပါနှင့်” ဟု ငြင်းဆန်လေ၏။ ယေရှုကလည်း “သင်၏ခြေကို ငါမဆေးရလျှင် သင်သည် ငါ့နှင့်မသက်ဆိုင်” ဟု မိန့်တော်မူ၏။ 9 ရှိမုန်ပေတရုက “သခင်… သို့ဖြစ်လျှင် အကျွန်ုပ်၏ ခြေကိုသာမက လက်နှင့် ဦးခေါင်းကိုပါ ဆေးတော်မူပါ” ဟု လျှောက်လေ၏။ 10 ယေရှုက “ရေချိုးပြီးသောသူသည် တစ်ကိုယ်လုံးစင်ကြယ်သည်ဖြစ်၍ ခြေကိုသာ ဆေးရန်လို၏။ ယခုမှာ သင်တို့သည် စင်ကြယ်ကြ၏။ သို့ရာတွင် လူတိုင်း စင်ကြယ်သည်မဟုတ်” ဟု မိန့်တော်မူ၏။ 11 ကိုယ်တော်သည် မိမိအား သစ္စာဖောက်မည့်သူကို သိတော်မူသောကြောင့် “လူတိုင်း စင်ကြယ်သည်မဟုတ်” ဟု မိန့်တော်မူခြင်းဖြစ်၏။ 12 တပည့်တော်တို့၏ ခြေကို ဆေးတော်မူပြီးနောက် ကိုယ်တော်သည် မိမိ၏ဝတ်ရုံတော်ကို ပြန်ဝတ်၍ စားပွဲတွင် ထိုင်တော်မူလျက် “ငါ့အပြုအမူကို သင်တို့ နားလည်ကြသလော။ 13 သင်တို့သည် ငါ့ကို ဆရာတော်ဟူ၍လည်းကောင်း၊ သခင်ဟူ၍လည်းကောင်း ခေါ်ဆိုကြ၏။ ငါသည် သင်တို့ခေါ်ဆိုသည့်အတိုင်းဖြစ်သောကြောင့် ထိုသို့ ခေါ်ဆိုသည်မှာ မှန်ကန်၏။ 14 ငါသည် သင်တို့၏သခင်လည်း ဖြစ်၏။ ဆရာလည်း ဖြစ်၏။ သို့ဖြစ်လျက်ပင် ငါသည် သင်တို့၏ ခြေကို ဆေးလျှင် သင်တို့သည်လည်း အချင်းချင်းတို့၏ခြေကို ဆေးကြရမည်။ 15 ငါသည် သင်တို့အတွက် စံနမူနာကို ငါပြခဲ့ပြီ။ သင်တို့ကို ငါပြုသကဲ့သို့ သင်တို့အချင်းချင်းသည်လည်း ပြုကြရမည်။ 16 သင်တို့အား ငါအမှန်ဆို၏။ ကျွန်သည် သခင်ထက် သာ၍ ကြီးမြတ်သည်မဟုတ်။ အစေလွှတ်ခံသည်လည်း စေလွှတ်သူထက် သာ၍ ကြီးမြတ်သည်မဟုတ်။ 17 ဤအရာများကို သင်တို့ ယခုသိကြပြီ။ သိသည့်အတိုင်း ကျင့်သုံးလျှင် မင်္ဂလာရှိကြ၏။ သစ္စာဖောက်ခြင်းခံရမည့်အကြောင်း ကြိုတင်ဟောတော်မူခြင်း 18 သင်တို့အားလုံးကို ရည်ညွှန်း၍ ငါပြောသည်မဟုတ်။ ငါရွေးချယ်ထားသောသူတို့ကို ငါသိ၏။ သို့ရာတွင် ‘ငါနှင့်အတူ လက်ဆုံစားသောသူသည် ငါ့ကို ပုန်ကန်လေပြီ’ ဟု ကျမ်းစာတွင် ဖော်ပြထားသည့်အတိုင်း ဖြစ်လာရမည်။ 19 ထိုအတိုင်း ဖြစ်လာသောအခါ ငါသည် ခရစ်တော်ဖြစ်ကြောင်းကို သင်တို့ယုံကြည်လာစေရန် ထိုအရာမဖြစ်ပျက်မီ ယခုအချိန်ကပင် သင်တို့ကို ကြိုတင်၍ ငါပြောနှင့်ပြီ။ 20 သင်တို့အား ငါအမှန်ဆို၏။ ငါ၏ အစေလွှတ်ခံကို လက်ခံကြိုဆိုသောသူသည် ငါ့ကို လက်ခံကြိုဆို၏။ ငါ့ကို လက်ခံကြိုဆိုသောသူသည်လည်း ငါ့ကို စေလွှတ်သော ခမည်းတော်ကို လက်ခံကြိုဆို၏” ဟု မိန့်တော်မူ၏။ 21 ဤအကြောင်းအရာများကို ပြောဆိုပြီးနောက် ယေရှုသည် အလွန်စိတ်ပူပန်တော်မူလျက် “သင်တို့အား ငါအမှန်ဆို၏။ သင်တို့အထဲမှ တစ်ယောက်သည် ငါ့ကို သစ္စာဖောက်လိမ့်မည်” ဟု မိန့်တော်မူ၏။ 22 မည်သူကို ရည်ညွှန်း၍ မိန့်တော်မူသည်ကို တပည့်တော်တို့သည် တွေးတောလျက် အချင်းချင်းတစ်ဦးကိုတစ်ဦး ကြည့်ကြ၏။ 23 ယေရှုချစ်တော်မူသောတပည့်တော်သည် ကိုယ်တော်၏နံဘေး၌ မှီလျက်နေ၏။ 24 ထို့ကြောင့် ရှိမုန်ပေတရုက ထိုတပည့်တော်ကို မျက်ရိပ်ပြ၍ “သခင်သည် မည်သူကို ရည်ညွှန်းတော်မူသနည်း” ဟု မေးလျှောက်စေ၏။ 25 ထိုတပည့်တော်သည် ယေရှုပေါ်သို့ မှီ၍ “သခင်… ထိုသူသည် မည်သူနည်း” ဟု မေးလျှောက်၏။ 26 ယေရှုက “ဤမုန့်တစ်ဖဲ့ကို ပန်းကန်တွင် ငါနှစ်၍ ပေးမည့်သူသည် ထိုသူဖြစ်သည်” ဟု ဖြေတော်မူ၏။ ထို့နောက် ယေရှုသည် မုန့်တစ်ဖဲ့ကို ပန်းကန်တွင် နှစ်၍ ရှိမုန်ရှကာရုတ်၏သား ယုဒအား ပေးတော်မူ၏။ 27 ယုဒသည် ထိုမုန့်ကို စားပြီးသောအခါ စာတန်သည် သူ၏စိတ်ထဲသို့ ဝင်လေ၏။ ထိုအခါ ယေရှုက “သင်ပြုရမည့်အမှုကို အလျင်အမြန်ပြုလော့” ဟု သူ့ကို မိန့်တော်မူ၏။ 28 အဘယ်ကြောင့် ယုဒအား ထိုသို့မိန့်တော်မူသည်ကို စားပွဲတွင် ထိုင်နေကြသောသူတို့တွင် မည်သူမျှမသိကြ။ 29 ယုဒသည် ငွေကို စီမံရသူဖြစ်သောကြောင့် ပွဲတော်အတွက် လိုအပ်သောအရာများကို ဝယ်ယူရန် သို့မဟုတ် ဆင်းရဲသားများကို ငွေလှူဒါန်းရန် ယေရှုစေခိုင်းတော်မူသည်ဟူ၍ တပည့်တော်တချို့က ထင်မှတ်ကြ၏။ 30 မုန့်တစ်ဖဲ့ကို စားပြီးလျှင် ယုဒသည် ချက်ချင်းထွက်သွားလေ၏။ သူထွက်သွားသောအချိန်သည် ညအချိန်ဖြစ်၏။ ပေတရုငြင်းဆိုမည့်အကြောင်း ကြိုတင်ဟောတော်မူခြင်း 31 ယုဒထွက်သွားပြီးနောက် ယေရှုက “လူသားသည် ဘုန်းတော်ထင်ရှားမည့် အချိန် ယခုကျရောက်ပြီ။ ဘုရားသခင်သည်လည်း လူသားအားဖြင့် ဘုန်းထင်ရှားတော်မူလိမ့်မည်။ 32 ဘုရားသခင်သည် လူသားအားဖြင့် ဘုန်းထင်ရှားတော်မူလျှင် ဘုရားသခင်သည် ကိုယ်တိုင် လူသားကို ချက်ချင်းပင် ဘုန်းကြီးစေတော်မူလိမ့်မည်။ 33 ချစ်သားတို့… ငါသည် သင်တို့နှင့်အတူ ခဏမျှသာနေရတော့မည်။ သင်တို့သည် ငါ့ကို ရှာကြလိမ့်မည်။ သို့ရာတွင် ‘ငါသွားမည့်အရပ်သို့ သင်တို့လိုက်နိုင်ကြမည်မဟုတ်’ ဟု ဂျူးဘာသာရေးခေါင်းဆောင်တို့အား ငါပြောနှင့်ခဲ့ပြီးသည့်အတိုင်း သင်တို့အား ယခုငါပြော၏။ 34 ထို့ကြောင့် ‘သင်တို့သည် အချင်းချင်းချစ်ကြလော့။ ငါသည် သင်တို့ကို ချစ်သည့်နည်းတူ သင်တို့သည်လည်း အချင်းချင်းချစ်ကြလော့’ ဟူသော ပညတ်အသစ်ကို သင်တို့အား ငါပေး၏။ 35 သင်တို့အချင်းချင်းချစ်ကြလျှင် လူအပေါင်းတို့က ထိုချစ်ခြင်းမေတ္တာကို ထောက်၍ သင်တို့သည် ငါ့တပည့်ဖြစ်ကြောင်းကို သိကြလိမ့်မည်” ဟု မိန့်တော်မူ၏။ 36 ရှိမုန်ပေတရုက “သခင်… အဘယ်အရပ်သို့ ကြွတော်မူမည်နည်း” ဟု မေးလျှောက်၏။ ယေရှုက “ငါသွားရာအရပ်သို့ ယခုသင်မလိုက်နိုင်။ နောက်မှ လိုက်ရလိမ့်မည်” ဟု ဖြေတော်မူ၏။ 37 ပေတရုက “သခင်… အဘယ်ကြောင့် အကျွန်ုပ် ယခုမလိုက်နိုင်ရပါသနည်း။ သခင့်အတွက် အသက်စွန့်ရန် အကျွန်ုပ်အသင့်ရှိနေပါသည်” ဟု လျှောက်၏။ 38 ယေရှုက “ငါ့အတွက် အသက်စွန့်မည်လော။ သင့်အား ငါအမှန်ဆို၏။ ကြက်မတွန်မီ သင်သည် ငါ့ကို မသိဟု သုံးကြိမ်တိုင်အောင် ငြင်းဆိုလိမ့်မည်” ဟု မိန့်တော်မူ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.