ရှင်မာကု 14 - ခေတ်သစ်မြန်မာ သမ္မာကျမ်းဗေသနိရွာတွင် ယေရှု၏ ခေါင်းတော်ပေါ်သို့ ဆီမွှေးသွန်းလောင်းခြင်း 1 ပသခါပွဲတော်နှင့် တဆေးမဲ့မုန့်ပွဲတော်များ မကျင်းပမီ နှစ်ရက်အလိုတွင် ယဇ်ပုရောဟိတ်ခေါင်းဆောင်များနှင့် ကျမ်းတတ်ဆရာများသည် ယေရှုကို တိတ်တဆိတ် ဖမ်းဆီး၍ သတ်ရန် အခွင့်ကောင်းကို ရှာကြ၏။ 2 သူတို့က “လူထုအကြား ရုန်းရင်းဆန်ခတ် ဖြစ်မည်ကို စိုးရိမ်ရသောကြောင့် ပွဲတော်ရက်အတွင်း မဖမ်းဆီးကြနှင့်” ဟု ပြောဆိုကြ၏။ 3 ယေရှုသည် ဗေသနိရွာရှိ အနာကြီးရောဂါစွဲကပ်ဖူးသူ ရှိမုန်၏အိမ်၌ ရှိတော်မူစဉ် အမျိုးသမီးတစ်ဦးသည် အလွန်တန်ဖိုးကြီးသည့် နာဒုဆီမွှေးအစစ်ထည့်ထားသော ကျောက်ဖြူဘူးတစ်လုံးကို ကိုင်၍ ရောက်လာ၏။ ထို့နောက် သူသည် ဘူးကို ခွဲဖွင့်ပြီးလျှင် ထိုဆီမွှေးကို ယေရှု၏ ခေါင်းတော်ပေါ်၌ လောင်းလေ၏။ 4 ထိုအခါ လူတချို့သည် ဒေါသထွက်၍ “အဘယ်ကြောင့် တန်ဖိုးကြီးသောဆီမွှေးကို ဤသို့ဖြုန်းတီးရသနည်း။ 5 ဤဆီမွှေးကို ငွေဒင်္ဂါးပြားသုံးရာဖြင့်ရောင်း၍ ဆင်းရဲသားများအား လှူဒါန်းသင့်သည်” ဟု အချင်းချင်းပြောဆိုကာ ထိုအမျိုးသမီးကို အပြစ်တင်ကြ၏။ 6 သို့သော် ယေရှုက “ရှိပါစေ။ ငါ့အတွက် ကောင်းမှုပြုသော ဤအမျိုးသမီးကို အဘယ်ကြောင့် ဝေဖန်ကြသနည်း။ 7 ဆင်းရဲသားများသည် သင်တို့နှင့်အတူ အစဉ်အမြဲရှိကြ၏။ ထို့ကြောင့် သင်တို့စိတ်ဆန္ဒရှိသည့်အခါတိုင်း သူတို့ကို ကူညီနိုင်၏။ သို့ရာတွင် ငါသည် သင်တို့နှင့်အတူ အစဉ်အမြဲ ရှိနေမည်မဟုတ်။ 8 ဤအမျိုးသမီးသည် သူတတ်နိုင်သမျှကို ပြုပြီ။ ငါ့ကို သင်္ဂြိုဟ်ရန်အတွက် ငါ့ကိုယ်ခန္ဓာပေါ်၌ ကြိုတင်၍ ဆီမွှေးလိမ်းပြီ။ 9 သင်တို့အား ငါအမှန်ဆို၏။ သတင်းကောင်းကို ကြေညာသည့် ကမ္ဘာတစ်ဝန်းလုံးတွင် ဤအမျိုးသမီး၏ လုပ်ဆောင်ချက်ကိုလည်း အစဉ်အောက်မေ့သတိရ၍ ပြောဆိုကြလိမ့်မည်” ဟု မိန့်တော်မူ၏။ ယေရှုကို သစ္စာဖောက်ရန် ယုဒသဘောတူခြင်း 10 ထို့နောက် တပည့်တော်ဆယ့်နှစ်ပါးတွင် တစ်ပါးဖြစ်သော ယုဒရှကာရုတ်သည် ယဇ်ပုရောဟိတ်ခေါင်းဆောင်များလက်သို့ ယေရှုကို အပ်ရန် သူတို့ထံသို့ ထွက်သွားလေ၏။ 11 ယဇ်ပုရောဟိတ်ခေါင်းဆောင်များက ယုဒရှကာရုတ်လာရခြင်းအကြောင်းကို ကြားသောအခါ ဝမ်းမြောက်၍ သူ့အား ငွေပေးရန် ကတိပြုကြ၏။ ထို့ကြောင့် ယုဒသည် ယေရှုကို ထိုသူတို့လက်သို့ အပ်နှံရန် အခွင့်ကောင်းကို ရှာကြံလျက်နေ၏။ နောက်ဆုံးသောညစာ 12 တဆေးမဲ့မုန့်ပွဲတော်ပထမနေ့ဖြစ်သည့် ပသခါသိုးသငယ်ကို ယဇ်ပူဇော်ရသောနေ့တွင် ယေရှု၏ တပည့်တော်တို့က “သခင့်အတွက် ပသခါပွဲတော်ညစာကို အကျွန်ုပ်တို့ မည်သည့်နေရာသို့ သွား၍ ပြင်ဆင်ရပါမည်နည်း” ဟု မေးလျှောက်ကြ၏။ 13 ယေရှုက တပည့်တော်နှစ်ပါးအား “သင်တို့သည် မြို့ထဲသို့ ဝင်သောအခါ ရေအိုးထမ်းလာသောလူတစ်ဦးနှင့် ဆုံလိမ့်မည်။ ထိုသူနောက်သို့လိုက်၍ သူဝင်သည့်အိမ်သို့ ဝင်ကြလော့။ 14 ထို့နောက် အိမ်ရှင်အား ‘ဆရာတော်က “ငါ၏ တပည့်တို့နှင့်အတူ ပသခါပွဲတော်ညစာကို စားရမည့် ဧည့်ခန်းသည် မည်သည့်နေရာတွင်ရှိသနည်း” ဟု သင့်အား မေးလိုက်ပါသည်’ ဟု ပြောကြလော့။ 15 ထိုသူသည် သင်တို့အား ခင်းကျင်းထားသော အိမ်အပေါ်ထပ်ခန်းမကြီးကို ပြလိမ့်မည်။ ထိုအခန်းတွင် ပြင်ဆင်ကြလော့” ဟု မိန့်တော်မူ၏။ 16 ထို့နောက် တပည့်တော်နှစ်ပါးတို့သည် မြို့ထဲသို့ သွားကြရာ ယေရှုမိန့်မှာသည့်အတိုင်း တွေ့မြင်၍ ပသခါပွဲတော်ကို ပြင်ဆင်ကြ၏။ 17 ညနေချမ်းအချိန် ရောက်သောအခါ ကိုယ်တော်သည် တပည့်တော် ဆယ့်နှစ်ပါးနှင့်အတူ ကြွလာတော်မူ၏။ 18 သူတို့သည် စားပွဲ၌ ထိုင်လျက် စားသောက်နေကြစဉ် ယေရှုက “သင်တို့အား ငါအမှန်ဆို၏။ ငါနှင့်အတူ စားနေသော သင်တို့အထဲမှ တစ်ယောက်သည် ငါ့ကို သစ္စာဖောက်လိမ့်မည်” ဟု မိန့်တော်မူ၏။ 19 ထိုအခါ တပည့်တော်တို့သည် အလွန်စိတ်ထိခိုက်လျက် “သခင်ဘုရား… ထိုသူသည် အကျွန်ုပ်လော” ဟု တစ်ဦးပြီးတစ်ဦး မေးလျှောက်ကြ၏။ 20 ကိုယ်တော်က “ထိုသူသည် သင်တို့ဆယ့်နှစ်ပါးထဲမှ ဖြစ်၍ ငါ့နှင့်အတူ ပန်းကန်တွင် မုန့်ကို တို့စားသောသူဖြစ်၏။ 21 ကျမ်းစာ၌ ရေးထားသည့်အတိုင်း လူသားသည် အသေခံရမည်။ သို့ရာတွင် လူသားကို သစ္စာဖောက်သောသူသည် အမင်္ဂလာရှိ၏။ ထိုသူသည် မွေးဖွားမလာခဲ့လျှင် ပို၍ကောင်းသည်” ဟု မိန့်တော်မူ၏။ 22 ထို့နောက် သူတို့သည် အစာသုံးဆောင်လျက် နေကြစဉ် ယေရှုသည် မုန့်ကိုယူ၍ ဘုရားသခင်၏ ကျေးဇူးတော်ကို ချီးမွမ်းတော်မူ၏။ မုန့်ကိုဖဲ့၍ တပည့်တော်တို့အား ပေးတော်မူလျက် “ယူ၍ စားကြလော့။ ဤမုန့်သည် ငါ၏ကိုယ်ခန္ဓာဖြစ်၏” ဟု မိန့်တော်မူ၏။ 23 စပျစ်ရည်ခွက်ကိုလည်း ယူ၍ ကျေးဇူးတော်ကို ချီးမွမ်းပြီးနောက် တပည့်တော်တို့အား ပေးတော်မူလျှင် သူတို့အားလုံးသည် သောက်ကြ၏။ 24 ယေရှုက “ဤစပျစ်ရည်သည် လူများစွာတို့အတွက် သွန်းလောင်းသော ငါ၏သွေးကို ပုံဆောင်၏။ ငါ၏သွေးသည် ဘုရားသခင်နှင့် လူများအကြား ဖွဲ့သော ပဋိညာဉ်သစ်ကို သက်သေပြု၏။ 25 သင်တို့အား ငါအမှန်ဆို၏။ ဘုရားသခင်၏ နိုင်ငံတော်၌ သင်တို့နှင့်အတူ ထပ်မံသောက်ရသည့်နေ့ မတိုင်မီအထိ ဤစပျစ်ရည်ကို ငါမသောက်” ဟု မိန့်တော်မူ၏။ 26 ထို့နောက် သူတို့သည် ဓမ္မသီချင်းတစ်ပုဒ်ကို သီဆိုကြပြီးနောက် သံလွင်တောင်သို့ ထွက်သွားကြ၏။ ပေတရုငြင်းဆိုမည့်အကြောင်း ကြိုတင်ဟောတော်မူခြင်း 27 ထိုအခါ လမ်း၌ ယေရှုက “ကျမ်းစာတွင် ‘ငါသည် သိုးထိန်းကို ရိုက်တော်မူသဖြင့် သိုးတို့သည် ကွဲလွင့်သွားကြရမည်’ ဟု ရေးထားသည့်အတိုင်း သင်တို့သည် ငါ့ကို စွန့်ခွာသွားကြလိမ့်မည်။ 28 သို့ရာတွင် ငါသည် သေခြင်းမှ ထမြောက်ပြီးနောက် ဂါလိလဲပြည်သို့ သင်တို့ထက် ဦးစွာသွားမည်” ဟု မိန့်တော်မူ၏။ 29 ထိုအခါ ပေတရုက “အခြားသူအပေါင်းတို့သည် သခင့်ကို စွန့်ခွာကြလျှင်လည်း အကျွန်ုပ်သည် မည်သည့်အခါမျှ စွန့်ခွာမည်မဟုတ်ပါ” ဟု လျှောက်လေ၏။ 30 ယေရှုက “သင့်အား ငါအမှန်ဆို၏။ ယနေ့ည၌ပင် ကြက်နှစ်ကြိမ်မတွန်မီ သင်သည် ငါ့ကို သုံးကြိမ်တိုင်တိုင် ငြင်းဆိုလိမ့်မည်” ဟု မိန့်တော်မူ၏။ 31 ပေတရုက “အကျွန်ုပ်သည် သခင်နှင့်အတူ သေရမည်ဆိုလျှင်ပင် သခင့်ကို အကျွန်ုပ် မည်သည့်အခါမျှ ငြင်းပယ်မည်မဟုတ်” ဟု အလေးအနက်လျှောက်လေ၏။ အခြားတပည့်တော်တို့သည်လည်း ထိုနည်းတူလျှောက်ကြ၏။ ဂေသရှေမန်ဥယျာဉ်တွင် ဆုတောင်းတော်မူခြင်း 32 ထို့နောက် ယေရှုနှင့် တပည့်တော်တို့သည် ဂေသရှေမန်အမည်ရှိသော အရပ်သို့ ရောက်တော်မူ၏။ ယေရှုက တပည့်တော်တို့အား “ငါဆုတောင်းနေစဉ် ဤနေရာ၌ သင်တို့ထိုင်နေကြလော့” ဟု မိန့်တော်မူပြီးလျှင် 33 ပေတရု၊ ယာကုပ်နှင့် ယောဟန်တို့ကို ခေါ်သွားတော်မူ၏။ ယေရှုသည် အလွန်စိတ်ပူပင်သောကရောက်တော်မူသဖြင့် 34 တပည့်တော်တို့အား “ငါ၏စိတ်ဝိညာဉ်သည် သေလုမတတ်ဝမ်းနည်းလျက်ရှိ၏။ ဤနေရာတွင် နေ၍ သတိနှင့် စောင့်နေကြလော့” ဟု မိန့်တော်မူ၏။ 35-36 ထို့နောက် ရှေ့သို့ အနည်းငယ် ကြွသွား၍ မြေပေါ်တွင် ပျပ်ဝပ်တော်မူပြီးလျှင် “အို အဖခမည်းတော်… ကိုယ်တော်သည် အရာခပ်သိမ်းကို တတ်နိုင်တော်မူ၏။ ဤခွက်ကို အကျွန်ုပ်ထံမှ ဖယ်ရှားပေးတော်မူပါ။ သို့သော်လည်း အကျွန်ုပ်၏ အလိုဆန္ဒအရ မဟုတ်ဘဲ ကိုယ်တော်၏ အလိုတော်အတိုင်းသာဖြစ်စေတော်မူပါ” ဟု မိမိရင်ဆိုင်ရမည့် ကြောက်မက်ဖွယ်အချိန်နာရီကို ဖြစ်နိုင်လျှင် လွန်သွားစေတော်မူရန်အတွက် ဆုတောင်းတော်မူ၏။ 37 ထို့နောက် တပည့်တော်တို့ထံသို့ ပြန်ကြွသောအခါ သူတို့သည် အိပ်ပျော်နေကြသည်ကို တွေ့မြင်တော်မူသဖြင့် ပေတရုအား “ရှိမုန်… သင်သည် အိပ်ပျော်နေသလော။ တစ်နာရီမျှပင် သတိနှင့် မစောင့်နိုင်သလော။ 38 ဖြားယောင်းသွေးဆောင်ခြင်းထဲသို့ လိုက်ပါမသွားစေရန် သတိနှင့် စောင့်နေလျက် ဆုတောင်းကြလော့။ စိတ်ဝိညာဉ်သည် ဆန္ဒရှိသော်လည်း ကိုယ်ခန္ဓာမှာမူ အားနည်း၏” ဟု မိန့်တော်မူ၏။ 39 တစ်ဖန် ယေရှုသည် ကြွတော်မူ၍ ယခင်ကအတိုင်း ဆုတောင်းတော်မူ၏။ 40 ထို့နောက် တပည့်တော်တို့ထံ ပြန်ကြွသောအခါ သူတို့သည် ငိုက်မျဉ်း၍ အိပ်ပျော်နေကြသည်ကို တွေ့မြင်တော်မူ၏။ သူတို့သည် ကိုယ်တော်အား မည်သို့ပြန်လည်ဖြေကြားကြရမည်ကို မသိကြ။ 41 သူတို့ထံသို့ တတိယအကြိမ် ပြန်ကြွလာတော်မူပြီးနောက် ယေရှုက “သင်တို့သည် ယခုတိုင်အောင် အိပ်ပျော်လျက် နားနေကြသေးသလော။ တော်လောက်ပေပြီ။ လူသားကို အပြစ်သားတို့၏ လက်ထဲသို့ အပ်နှံရသောအချိန် ရောက်လာပြီ။ 42 ထကြ။ သွားကြစို့။ ငါ့ကို သစ္စာဖောက်အပ်နှံမည့်သူ ရောက်နေပြီ” ဟု မိန့်တော်မူ၏။ သစ္စာဖောက်ခံရတော်မူခြင်းနှင့် ဖမ်းဆီးခံရတော်မူခြင်း 43 ထိုသို့ မိန့်တော်မူစဉ် တပည့်တော်ဆယ့်နှစ်ပါးအနက် တစ်ပါးဖြစ်သော ယုဒသည် တုတ်နှင့်ဓားများကို ကိုင်ဆောင်သောလူအုပ်ကြီးနှင့်အတူ ရောက်လာ၏။ ထိုသူတို့သည် ယဇ်ပုရောဟိတ်ခေါင်းဆောင်များ၊ ကျမ်းတတ်ဆရာများနှင့် အကြီးအကဲတို့မှ လွှတ်လိုက်သောလူအုပ် ဖြစ်၏။ 44 ယေရှုကို သစ္စာဖောက်၍ အပ်နှံသော ယုဒက “ငါနမ်း၍ နှုတ်ဆက်သောသူသည် ယေရှုဖြစ်၏။ သူ့ကို ဖမ်းဆီးကာ စောင့်ကြပ်၍ ခေါ်ဆောင်သွားကြလော့” ဟု သူတို့အား အချက်ပြအမှတ်အသားပေးထား၏။ 45 သူသည် ရောက်လျှင် ယေရှုထံတော်သို့ ချက်ချင်း လာ၍ “ဆရာတော်…” ဟု ခေါ်ဆိုလျက် နမ်းလေ၏။ 46 ထိုအခါ လူတို့သည် ယေရှုကို ဖမ်းဆီးချုပ်နှောင်ကြ၏။ 47 သို့သော် ယေရှုနှင့်အတူ ရှိနေသောသူတစ်ဦးသည် ဓားကို ဆွဲထုတ်၍ ယဇ်ပုရောဟိတ်မင်း၏ အစေခံတစ်ဦးကို ခုတ်သဖြင့် ထိုသူ၏နားရွက် ပြတ်လေ၏။ 48 ယေရှုက “သင်တို့သည် ဓားပြတစ်ဦးကို ဖမ်းဆီးသကဲ့သို့ ငါ့ကို ဖမ်းဆီးရန် တုတ်များ၊ ဓားများနှင့် လာကြရသလော။ 49 ငါသည် နေ့စဉ်နေ့တိုင်း သင်တို့နှင့်အတူ ရှိလျက် ဗိမာန်တော်တွင် ဟောပြောသွန်သင်နေခဲ့သော်လည်း သင်တို့သည် ငါ့ကို မဖမ်းဆီးဘဲနေကြ၏။ သို့သော် ဤသို့ဖြစ်ပျက်ရခြင်းမှာ ကျမ်းစာတွင် ငါနှင့်ပတ်သက်၍ ဖော်ပြထားသည့် အကြောင်းအရာများ ဖြစ်ပျက်လာစေရန်ပင် ဖြစ်သည်” ဟု မိန့်တော်မူ၏။ 50 ထိုအခါ တပည့်တော်ရှိသမျှတို့သည် ယေရှုကို စွန့်ခွာ၍ ထွက်ပြေးကြ၏။ 51 လူငယ်တစ်ဦးသည် ပိတ်ချောထည်ကိုသာ ခြုံလျက် ယေရှု၏နောက်တော်မှ လိုက်၏။ လူတို့သည် ထိုလူငယ်ကို ဖမ်းဆီးရန် ကြိုးစားသောအခါ 52 သူသည် ပိတ်ချောထည်ကိုပစ်၍ အဝတ်မပါဘဲ ထွက်ပြေးလေ၏။ တရားလွှတ်တော်၌ စစ်ဆေးခံရတော်မူခြင်း 53 ထိုသူတို့သည် ယေရှုကို ယဇ်ပုရောဟိတ်မင်း၏ အိမ်သို့ ခေါ်ဆောင်သွားကြ၏။ ထိုအိမ်၌ ယဇ်ပုရောဟိတ်ခေါင်းဆောင်များ၊ အကြီးအကဲများနှင့် ကျမ်းတတ်ဆရာများသည် စုဝေးလျက် ရှိကြ၏။ 54 ထိုအချိန်တွင် ပေတရုသည် ယဇ်ပုရောဟိတ်မင်း၏ ရုံးတော်ဝင်းတိုင်အောင် မလှမ်းမကမ်းမှ လိုက်လေ၏။ သူသည် အတွင်းသို့ ဝင်၍ အစောင့်တပ်သားများနှင့်အတူ ထိုင်ကာ မီးလှုံလျက် နေ၏။ 55 ယဇ်ပုရောဟိတ်ခေါင်းဆောင်များ၊ အကြီးအကဲများနှင့် တရားလွှတ်တော်တစ်ရပ်လုံးသည် ယေရှုကို သေဒဏ်ချမှတ်နိုင်ရန် သက်သေကို ရှာဖွေကြသော်လည်း မတွေ့ကြ။ 56 လူများစွာတို့သည် ယေရှုနှင့်ပတ်သက်၍ မမှန်သောသက်သေများ ထွက်ဆိုကြသော်လည်း သူတို့၏ထွက်ဆိုချက်များမှာ တစ်ခုနှင့်တစ်ခု ကိုက်ညီမှုမရှိကြပေ။ 57 နောက်ဆုံး၌ လူတချို့သည် ထ၍ 58 “ဤသူက ‘လူ့လက်ဖြင့် ဆောက်လုပ်သော ဤဗိမာန်တော်ကို ငါဖြိုဖျက်၍ လူ့လက်ဖြင့် မဆောက်လုပ်သော ဗိမာန်တော်ကို သုံးရက်အတွင်း ငါတည်ဆောက်မည်’ ဟူ၍ ပြောဆိုသည်ကို အကျွန်ုပ်တို့ ကြားရပါသည်” ဟု မဟုတ်မမှန်ထွက်ဆိုကြ၏။ 59 သို့သော် ထိုသူတို့၏ ထွက်ဆိုချက်များသည် ကိုက်ညီမှုမရှိပေ။ 60 ထိုအခါ ယဇ်ပုရောဟိတ်မင်းသည် လူတို့ရှေ့တွင် ထ၍ “သင့်အား ဤသို့ စွပ်စွဲသောထွက်ဆိုချက်များကို တစ်ခွန်းမျှ မတုံ့ပြန်ဘဲနေမည်လော။ သင်၏ အမူကိစ္စနှင့်ပတ်သက်၍ မည်သို့ပြောလိုသနည်း” ဟု ယေရှုကို မေးလေ၏။ 61 သို့ရာတွင် ယေရှုသည် မေးခွန်းကို ဖြေတော်မမူဘဲ တိတ်ဆိတ်စွာ နေတော်မူ၏။ တစ်ဖန် ယဇ်ပုရောဟိတ်မင်းက “သင်သည် မင်္ဂလာရှိသော ဘုရားသခင်၏သားတော် ခရစ်တော်ဖြစ်သလော” ဟု ယေရှုအား မေးလေ၏။ 62 ယေရှုက “မှန်ပါ၏။ လူသားသည် တန်ခိုးရှင်၏လက်ယာတော်ဘက်၌ ထိုင်၍ ကောင်းကင်မှ မိုးတိမ်စီးလျက် ကြွလာသည်ကို သင်တို့မြင်ကြရလိမ့်မည်” ဟု ပြန်၍ မိန့်တော်မူ၏။ 63 ထိုအခါ ယဇ်ပုရောဟိတ်မင်းသည် မိမိဝတ်ရုံကို ဆုတ်ဖြဲလျက် “အခြား မည်သည့်သက်သေ လိုတော့မည်နည်း။ 64 ဘုရားသခင်ကို စော်ကားသော သူ၏စကားကို သင်တို့အားလုံး ယခုကြားကြရလေပြီ။ သင်တို့ မည်သို့ထင်မြင်ကြသနည်း” ဟု မေးလျှင် သူတို့အားလုံးက “သူသည် သေဒဏ်ခံထိုက်ပါသည်” ဟု ဖြေဆိုကြ၏။ 65 ထို့နောက် လူတချို့သည် ယေရှုကို တံတွေးနှင့် ထွေးကြ၏။ မျက်နှာတော်ကို ဖုံးအုပ်ပြီးလျှင် ကိုယ်တော်ကို လက်သီးဖြင့် ထိုးနှက်၍ “ပရောဖက်ပြု၍ ဟောတော်မူပါ” ဟု ဆိုကြ၏။ အစောင့်တပ်သားတို့ကလည်း ယေရှု၏ပါးတော်ကို ရိုက်ပုတ်ကြ၏။ ယေရှုကို မသိကြောင်း ပေတရုငြင်းဆိုခြင်း 66 ထိုအချိန်တွင် ပေတရုသည် ရုံးတော်ဝင်းအတွင်း၌ ထိုင်နေစဉ် ယဇ်ပုရောဟိတ်မင်း၏ အစေခံအမျိုးသမီးတစ်ဦးသည် ရောက်လာ၏။ 67 ထို့နောက် သူသည် မီးလှုံနေသောပေတရုကို မြင်သော် သေချာစွာကြည့်ပြီးလျှင် “သင်သည်လည်း နာဇရက်မြို့သားယေရှုနှင့် အတူရှိခဲ့သောသူ ဖြစ်သည်” ဟု ဆိုလေ၏။ 68 သို့သော် ပေတရုက “သင်ပြောဆိုနေသည့်အရာကို ငါမသိပါ” ဟု ငြင်းဆိုလျက် ခြံအဝင်ဝဘက်သို့ ထွက်သွားလေ၏။ ထိုအချိန်တွင် ကြက်တွန်လေ၏။ 69 ထိုအစေခံမိန်းကလေးသည် ပေတရုရပ်နေသည်ကို မြင်ပြန်သောအခါ “ဤလူသည် ထိုသူတို့ထဲမှ တစ်ယောက်ဖြစ်သည်” ဟု ဆို၏။ 70 သို့သော် ပေတရုသည် ထပ်မံငြင်းဆိုလေ၏။ အချိန်အနည်းငယ်ကြာသော် ထိုနေရာ၌ ရပ်နေသောသူတို့က “သင်သည်လည်း အမှန်ပင်ထိုသူတို့ထဲမှ တစ်ယောက်ဖြစ်၏။ အဘယ်ကြောင့်ဆိုသော် သင်သည် ဂါလိလဲပြည်သားဖြစ်သည်” ဟု ပေတရုကို ဆိုကြ၏။ 71 ပေတရုကလည်း “သင်တို့ပြောဆိုနေသောသူကို ငါမသိပါ” ဟု ကျိန်ဆို၏။ 72 ထိုခဏချင်းတွင် ဒုတိယအကြိမ်ကြက်တွန်လေ၏။ ထိုအခါ ပေတရုသည် “ကြက်နှစ်ကြိမ်မတွန်မီ သင်သည် ငါ့ကို သုံးကြိမ်တိုင်တိုင် ငြင်းဆိုလိမ့်မည်” ဟူသော ယေရှုမိန့်တော်မူခဲ့သည့် စကားကို ပြန်လည်သတိရသဖြင့် ငိုကြွေးလေ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.