ရှင်မာကု 13 - ခေတ်သစ်မြန်မာ သမ္မာကျမ်းအနာဂတ်အကြောင်း ကြိုတင်ဟောတော်မူခြင်း 1 ယေရှုသည် ဗိမာန်တော်မှ ထွက်ကြွတော်မူစဉ် တပည့်တော်တစ်ဦးက “ဆရာတော်… ကြည့်တော်မူပါ။ အံ့ဖွယ်အဆောက်အအုံများနှင့် အံ့ဖွယ်ကျောက်တုံးကြီးများပင် ဖြစ်ပါသည်” ဟု လျှောက်လေ၏။ 2 ယေရှုက “ဤအဆောက်အအုံများကို ယခု သင်မြင်ရ၏။ မဟုတ်လော။ ဤအဆောက်အအုံများသည် အကုန်အစင်ဖြိုဖျက်ခံရလိမ့်မည်။ ကျောက်တစ်ချပ်အပေါ်တွင် တစ်ချပ်မျှ တင်ကျန်နေလိမ့်မည် မဟုတ်” ဟု မိန့်တော်မူ၏။ 3 ထို့နောက် ယေရှုသည် သံလွင်တောင်ပေါ်၌ ဗိမာန်တော်ဘက်သို့ မျက်နှာမူလျက် ထိုင်တော်မူစဉ် ပေတရု၊ ယာကုပ်၊ ယောဟန်နှင့် အန္ဒြေတို့သည် အခြားသူများမပါဘဲ ယေရှုထံတော်သို့ ချဉ်းကပ်၍ 4 “ထိုအရာများအားလုံးသည် မည်သည့်အချိန်၌ ဖြစ်ပျက်ပါမည်နည်း။ ထိုအရာများ ဖြစ်ပျက်မည့်အချိန်တွင် မည်သည့်နိမိတ်လက္ခဏာများ ဖြစ်ပေါ်လိမ့်မည်နည်း” ဟု မေးလျှောက်ကြ၏။ 5 ယေရှုက “သင်တို့ကို မည်သူမျှ မလှည့်ဖြားစေရန် သတိပြုကြလော့။ 6 အဘယ်ကြောင့်ဆိုသော် လူများစွာတို့က ‘ငါသည် ခရစ်တော်ဖြစ်၏’ ဟု ငါ့အယောင်ဆောင်လျက် ရောက်လာကြလိမ့်မည်။ လူများစွာကိုလည်း လှည့်ဖြားကြလိမ့်မည်။ 7 သင်တို့သည် စစ်ပွဲများနှင့် စစ်ဖြစ်မည့်သတင်းများအကြောင်း ကြားကြလိမ့်မည်။ သို့ရာတွင် မတုန်လှုပ်ကြနှင့်။ အဘယ်ကြောင့်ဆိုသော် ထိုအရာများအားလုံးသည် ဖြစ်ပျက်ရမည်။ သို့သော် ကမ္ဘာကုန်ဆုံးချိန်သည် မကျရောက်သေးပါ။ 8 လူမျိုးတစ်မျိုးနှင့်တစ်မျိုး၊ နိုင်ငံတစ်နိုင်ငံနှင့်တစ်နိုင်ငံ အချင်းချင်းပုန်ကန်၍ စစ်ဖြစ်ကြလိမ့်မည်။ ကမ္ဘာ့နေရာအနှံ့အပြားတွင် အစာခေါင်းပါးခြင်းနှင့် ငလျင်လှုပ်ခြင်းတို့ ဖြစ်လိမ့်မည်။ သို့သော် ထိုအရာများအားလုံးသည် ကျရောက်လာမည့် ကြောက်မက်ဖွယ်သောဆင်းရဲဒုက္ခများ၏ အစမျှသာဖြစ်၏။ 9 ဤအရာများစတင် ဖြစ်ပွားလျှင် သတိရှိကြလော့။ လူတို့သည် သင်တို့ကို တရားရုံးများသို့ အပ်ကြလိမ့်မည်။ ဂျူးဝတ်ပြုဆောင်များတွင်လည်း ရိုက်နှက်ကြလိမ့်မည်။ ငါ၏နောက်လိုက်များဖြစ်သောကြောင့် သင်တို့ကို ရှင်ဘုရင်များနှင့် အစိုးရအာဏာပိုင်များရှေ့သို့ ခေါ်ဆောင်သွားကြလိမ့်မည်။ ဤအရာသည် သင်တို့ကို ငါ့အကြောင်းသက်သေခံရသောအခွင့် ဖြစ်စေလိမ့်မည်။ 10 သတင်းကောင်းကိုလည်း လူမျိုးအပေါင်းတို့အား ဦးစွာဟောပြောရကြမည်။ 11 လူတို့သည် သင်တို့ကို ဖမ်းဆီး၍ အမှုစစ်ကြသောအခါ မည်သို့ပြောဆိုရမည်ကို ကြိုတင်၍ မစိုးရိမ်ကြနှင့်။ ထိုအချိန်၌ သင်တို့စိတ်ထဲတွင် ဘုရားသခင် ဖော်ပြတော်မူမည့်စကားကိုသာ ပြောကြလော့။ သို့ဖြစ်၍ ထိုသို့ ပြောဆိုနေမည့်သူမှာ သင်တို့မဟုတ်ဘဲ သန့်ရှင်းသောဝိညာဉ်တော်ပင် ဖြစ်၏။ 12 ညီအစ်ကိုချင်း တစ်ဦးကိုတစ်ဦး သေစေရန် သစ္စာဖောက်လိမ့်မည်။ ဖခင်သည်လည်း မိမိသားသမီးကို သေစေရန် သစ္စာဖောက်လိမ့်မည်။ သားသမီးတို့သည်လည်း မိဘကို ပုန်ကန်၍ သေစေကြလိမ့်မည်။ 13 သင်တို့သည် ငါ၏နောက်လိုက်များဖြစ်သောကြောင့် လူအပေါင်းတို့သည် သင်တို့ကို မုန်းတီးကြလိမ့်မည်။ သို့သော် အဆုံးတိုင်အောင် ကြံ့ကြံ့ခံသောသူသည် ကယ်တင်ခံရလိမ့်မည်။ 14 ဖျက်ဆီးတတ်သည့် စက်ဆုပ်ရွံ့ရှာဖွယ်သောအရာသည် မရှိအပ်သောနေရာ၌ ရှိနေသည်ကို သင်တို့တွေ့မြင်ရမည့်နေ့ရက် ရောက်လာလိမ့်မည်။ (ဤအချက်ကို စာဖတ်သူ သတိပြုမိပါစေ။) ထို့နောက် ယုဒပြည်တွင် ရှိသောသူတို့သည် တောင်များပေါ်သို့ ပြေးကြရမည်။ 15 လသာဆောင်ပေါ်တွင် ရှိသောသူသည် မိမိအိမ်ထဲမှ ပစ္စည်းများကို မယူဘဲ အောက်သို့ ဆင်း၍ ထွက်ပြေးရမည်။ 16 လယ်၌ ရှိသောသူသည်လည်း သူ၏ ဝတ်ရုံကို ပြန်လှည့်မယူဘဲ ထွက်ပြေးရမည်။ 17 ထိုနေ့ရက်များတွင် ကိုယ်ဝန်ဆောင်အမျိုးသမီးများနှင့် နို့စို့ကလေးငယ်ရှိသောမိခင်များသည် အလွန်ဒုက္ခရောက်ကြလိမ့်မည်။ 18 သင်တို့ ထွက်ပြေးကြရမည့် အချိန်သည် ဆောင်းကာလ မဖြစ်စေရန် ဆုတောင်းကြလော့။ 19 အဘယ်ကြောင့်ဆိုသော် ဘုရားသခင် ဖန်ဆင်းတော်မူသည့် အချိန်မှစ၍ ယခုအချိန်အထိ မဖြစ်စဖူး၊ နောင်တွင်လည်း မည်သည့်အခါမျှ ကြုံတွေ့ရမည်မဟုတ်သည့် အလွန်ဆိုးရွားသောဆင်းရဲဒုက္ခသည် ထိုကာလ၌ ကျရောက်မည်ဖြစ်သောကြောင့် ဖြစ်၏။ 20 အကယ်၍ သခင်ဘုရားသည် ထိုနေ့ရက်ကာလများကို တိုတောင်းစေတော်မမူလျှင် မည်သူမျှ အသက်ဘေးမှ လွတ်နိုင်မည်မဟုတ်။ သို့ရာတွင် ကိုယ်တော်သည် မိမိရွေးချယ်ထားတော်မူသောသူများအတွက် ထိုနေ့ရက်များကို တိုတောင်းစေတော်မူမည်။ 21 ထိုအခါ တစ်စုံတစ်ဦးက သင်တို့အား ‘ကြည့်လော့။ ဤနေရာတွင် ခရစ်တော် ရှိသည်၊’ သို့မဟုတ် ‘ထိုနေရာတွင် ခရစ်တော် ရှိသည်’ ဟု ဆိုသော်လည်း မယုံကြနှင့်။ 22 ခရစ်တော်အတုအယောင်များနှင့် ပရောဖက်အတုအယောင်များ ပေါ်လာလိမ့်မည်။ ထိုသူတို့သည် ဖြစ်နိုင်ပါက ဘုရားသခင်ရွေးချယ်ထားသောသူများကိုပင် လှည့်ဖြားရန် နိမိတ်လက္ခဏာများနှင့် အံ့ဖွယ်ဖြစ်ရပ်များကို ပြုကြလိမ့်မည်။ 23 သတိပြုကြလော့။ ထိုအရာများမဖြစ်ပွားမီ ငါသည် သင်တို့ကို ကြိုတင်သတိပေးနှင့်ပြီ။ 24 ဆင်းရဲဒုက္ခခံရမည့် ထိုနေ့ရက်များ ကုန်ဆုံးပြီးနောက် နေမင်းသည် မှောင်မိုက်၍ လသည် အလင်းရောင်ကို မပေးဘဲနေလိမ့်မည်။ 25 ကြယ်တို့သည်လည်း ကောင်းကင်မှ ကြွေကျ၍ ကောင်းကင်တန်ခိုးတို့သည် တုန်လှုပ်ကြလိမ့်မည်။ 26 ထိုအခါ လူသားသည် ကြီးမားသည့်တန်ခိုးတော်နှင့် ဘုန်းတော်တို့ဖြင့် ကောင်းကင်မှ မိုးတိမ်စီးလျက် ကြွလာသည်ကို လူတို့မြင်ကြရလိမ့်မည်။ 27 ထို့နောက် လူသားသည် ကောင်းကင်နှင့်မြေကြီးအရှေ့စွန်းမှသည် အနောက်စွန်းတိုင်အောင်၊ အရပ်လေးမျက်နှာမှ မိမိရွေးချယ်ထားသောသူတို့ကို စုစည်းရန် ကောင်းကင်တမန်များကို စေလွှတ်တော်မူလိမ့်မည်။ 28 သဖန်းပင်မှ သင်ခန်းစာ ယူကြလော့။ သဖန်းပင်တွင် အကိုင်းအခက်သစ်များ ထွက်လာ၍ ရွက်နုများ ထွက်ပြူလာသောအခါ နွေကာလ ရောက်လုနီးပြီဖြစ်ကြောင်းကို သင်တို့သိကြ၏။ 29 ထိုနည်းတူ ဖော်ပြခဲ့သောအခြင်းအရာများကို သင်တို့မြင်ရသောအခါ လူသားသည် တံခါးဝအနီးသို့ ရောက်နေပြီဖြစ်ကြောင်းကို သိမှတ်ကြလော့။ 30 သင်တို့အား ငါအမှန်ဆို၏။ ဤအရာများအားလုံး မဖြစ်ပျက်မီအချိန်ထိ ယခုရှိသောမျိုးဆက် ကွယ်ပျောက်လိမ့်မည်မဟုတ်ပေ။ 31 ကောင်းကင်နှင့်မြေကြီး တည်မြဲမည်မဟုတ်သော်လည်း ငါ့စကား တည်မြဲလိမ့်မည်။ 32 သို့သော် ထိုအရာများသည် မည်သည့်နေ့ရက်၊ မည်သည့်အချိန်နာရီ၌ ဖြစ်ပျက်လာမည်ကို မည်သူမျှ မသိ။ ကောင်းကင်ဘုံရှိ ကောင်းကင်တမန်များလည်း မသိ။ သားတော်လည်း မသိ။ ခမည်းတော်တစ်ပါးတည်းသာလျှင် သိတော်မူ၏။ 33 ထိုနေ့ရက်သည် မည်သည့်အချိန်ကာလ၌ ကျရောက်မည်ကို သင်တို့မသိသောကြောင့် သတိနှင့် စောင့်နေကြလော့။ 34 လူသားကြွလာခြင်းအကြောင်းသည် ခရီးထွက်မည့် လူတစ်ဦးက မိမိအိမ်မှ မထွက်ခွာမီ သူ၏ အစေခံများအား လုပ်ဆောင်ရန် တာဝန်များကို ပေးအပ်၍ တံခါးစောင့်အား မိမိပြန်လာချိန်ကို စောင့်ရမည်ဟု မှာကြားသည်နှင့် တူ၏။ 35 ထို့ကြောင့် အိမ်ရှင်သည် ညနေ၊ သို့မဟုတ် သန်းခေါင်၊ သို့မဟုတ် အရုဏ်မတက်မီ၊ သို့မဟုတ် မိုးလင်းချိန်တို့တွင် မည်သည့်အချိန်၌ ကြွလာမည်ကို သင်တို့မသိသောကြောင့် သတိနှင့် စောင့်နေကြလော့။ 36 ထိုသို့ မစောင့်ပါက သူသည် ရုတ်တရက်ရောက်လာသောအခါ သင်တို့အိပ်ပျော်နေသည်ကို တွေ့လိမ့်မည်။ 37 သတိနှင့် စောင့်နေကြလော့ဟူ၍ သင်တို့ကို သတိပေးသည့်အတိုင်း လူအပေါင်းတို့ကို ငါသတိပေးတော်မူ၏” ဟု မိန့်တော်မူ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.