ရောမ 9 - ခေတ်သစ်မြန်မာ သမ္မာကျမ်းအစ္စရေးလူမျိုးကို ဘုရားသခင်ရွေးချယ်တော်မူခြင်း 1-2 ကျွန်ုပ်သည် အလွန်ဝမ်းနည်းလျက် စိတ်နှလုံးထဲ၌လည်း ဖြေဆည်၍ မရနိုင်သော ကြေကွဲခြင်းရှိကြောင်း ခရစ်တော်ကို တိုင်တည်၍ အမှန်ကိုပြော၏။ လိမ်လည်၍ မပြော။ ထိုသို့ အမှန်ပြောကြောင်းကို သန့်ရှင်းသောဝိညာဉ်တော်အားဖြင့် လိပ်ပြာသန့်စွာ အတည်ပြု၏။ 3 လူ့အသွေးသားအရ ကျွန်ုပ်၏ အမျိုးသားချင်းဖြစ်သော ဂျူးညီအစ်ကိုမောင်နှမများ၏ အကျိုးအတွက် ကျွန်ုပ်ကိုယ်တိုင် ခရစ်တော်နှင့် ကင်းကွာလျက် ကျိန်ဆိုခြင်းကိုပင် ခံရန် အလိုရှိ၏။ 4 သူတို့သည် ဘုရားသခင်၏ သားသမီးအဖြစ် ရွေးချယ်ခြင်းခံရသော အစ္စရေးလူမျိုးများ ဖြစ်ကြ၏။ ဘုရားသခင်သည် မိမိ၏ဘုန်းအသရေတော်ကို သူတို့အား ဖော်ပြတော်မူ၏။ သူတို့နှင့် ပဋိညာဉ်များဖွဲ့၍ ပညတ်တရားကိုလည်း ပေးတော်မူ၏။ ကိုးကွယ်ရမည့်နည်းနှင့် မိမိ၏ကတိတော်များကို သူတို့အား ပေးတော်မူ၏။ 5 အာဗြဟံ၊ ဣဇာက်နှင့် ယာကုပ်တို့သည် သူတို့၏ ဘိုးဘေးများဖြစ်၏။ ခရစ်တော်ကိုယ်တိုင်သည်လည်း လူသားအနေဖြင့် သူတို့၏ အမျိုးဖြစ်၏။ ခရစ်တော်သည် အရာခပ်သိမ်းကို အုပ်စိုး၍ ထာဝရမင်္ဂလာရှိသော ဘုရားသခင်လည်း ဖြစ်တော်မူ၏။ အာမင်။ 6 သို့ရာတွင် ဘုရားသခင်သည် အစ္စရေးလူမျိုးတို့အား ပေးခဲ့သောကတိတော်ကို တည်ရန် ပျက်ကွက်တော်မူသလော။ ပျက်ကွက်တော်မမူ။ အဘယ်ကြောင့်ဆိုသော် အစ္စရေးလူမျိုး တစ်မျိုးလုံးသည် ဘုရားသခင်၏ လူမျိုးအစစ်အမှန် ဖြစ်သည်ဟု မဆိုနိုင်သောကြောင့်ဖြစ်၏။ 7 အာဗြဟံ၏ မျိုးဆက်များဖြစ်သောကြောင့် အာဗြဟံ၏ သားသမီးအစစ်အမှန် ဖြစ်ကြသည်ဟု မဆိုနိုင်။ အာဗြဟံ၌ အခြားသားသမီးများ ရှိသော်လည်း ကျမ်းစာ၌ “ဣဇာက်အားဖြင့် သင်၏ မျိုးဆက်တည်လိမ့်မည်” ဟု ဖော်ပြထား၏။ 8 ဆိုလိုသည်မှာ အာဗြဟံ၏သွေးသားအားဖြင့် မွေးဖွားလာသောသူတိုင်းသည် ဘုရားသခင်၏ သားသမီးများဖြစ်ကြသည်မဟုတ်။ ဘုရားသခင်၏ကတိတော်အတိုင်း မွေးဖွားလာသောသားသမီးသာလျှင် အာဗြဟံ၏ သားသမီးအစစ်အမှန် ဖြစ်ကြ၏။ 9 ဘုရားသခင်၏ ကတိတော်စကားမှာ “နှောင်နှစ် ဤသို့သောအချိန်တွင် ငါပြန်လာမည်။ စာရာသည် သားကို မွေးဖွားလိမ့်မည်” ဟူ၍ ဖြစ်၏။ 10 ထိုသားမှာ ကျွန်ုပ်တို့၏ ဘိုးဘေးဣဇာက်ဖြစ်၏။ ဣဇာက်သည် ရေဗက္ကနှင့် လက်ထပ်၍ ရေဗက္ကသည် အမြွှာနှစ်ဦးကို မွေးခဲ့၏။ 11-12 သို့သော် ထိုသားနှစ်ဦး မမွေးမီနှင့် ထိုသားနှစ်ဦး အဆိုးအကောင်းတို့ကို မပြုမီကပင် ဘုရားသခင်သည် ရေဗက္ကအား “သင်၏ သားကြီးသည် သားငယ်ထံ၌ အစေခံလိမ့်မည်” ဟု မိန့်တော်မူခဲ့၏။ ဤစကားတော်ကို ထောက်၍ ဘုရားသခင်သည် မိမိအကြံအစည်တော်အတိုင်း လူများကို ရွေးကောက်တော်မူကြောင်း ကျွန်ုပ်တို့သိရ၏။ ထိုသို့ ရွေးချယ်ရာတွင် ဘုရားသခင်သည် လူတို့၏ အကျင့်သီလအဆိုးအကောင်းအပေါ် မူတည်၍ ရွေးချယ်တော်မမူပေ။ 13 ကျမ်းစာ၌လည်း “ယာကုပ်ကို ငါချစ်၏။ သို့သော် ဧသောကိုမူ ငါမုန်း၏” ဟု ရေးသားထား၏။ 14 သို့ဖြစ်လျှင် ကျွန်ုပ်တို့က ဘုရားသခင်သည် တရားမျှတမှုမရှိ ဟု ဆိုရမည်လော။ ထိုသို့ မဆိုရ။ 15 ဘုရားသခင်သည် မောရှေအား “ငါကျေးဇူးပြုလိုသောသူကို ကျေးဇူးပြုမည်။ ငါသနားလိုသောသူကို သနားမည်” ဟု မိန့်တော်မူ၏။ 16 ထို့ကြောင့် ကျေးဇူးပြုရန် ဆုံးဖြတ်ပိုင်ခွင့်ရှိသူသည် ဘုရားသခင်သာ ဖြစ်တော်မူ၏။ ကျွန်ုပ်တို့အနေနှင့် ရွေးချယ်ပိုင်ခွင့်မရှိသကဲ့သို့ လုပ်ဆောင်နိုင်စွမ်းလည်း မရှိကြ။ 17 ကျမ်းစာ၌ ဘုရားသခင်က ဖာရောဘုရင်အား “သင့်ကို ဘုရင်အဖြစ် ခန့်အပ်သော ရည်ရွယ်ချက်မှာ ငါ့တန်ခိုးကို ပြရန်အတွက်နှင့် ကမ္ဘာတစ်ဝန်းလုံးတွင် ငါ့အမည်နာမ ကျော်စောရန်အတွက် ဖြစ်၏” ဟု မိန့်တော်၏။ 18 ထို့ကြောင့် ဘုရားသခင်သည် ကျေးဇူးပြုလိုသောသူကို ကျေးဇူးပြုတော်မူ၏။ ခေါင်းမာစေလိုသောသူကို ခေါင်းမာစေတော်မူ၏။ 19 ထိုအခါ သင်က “သို့ဖြစ်လျှင် ဘုရားသခင်သည် လူတို့အား အဘယ်ကြောင့် အပြစ်တင်တော်မူသေးသနည်း။ ဘုရားသခင်၏ အလိုတော်ကို မည်သူ ဆန့်ကျင်နိုင်သနည်း” ဟု ဆိုလိမ့်မည်။ 20 သို့သော် သင်သည် မည်သူဖြစ်၍ ဘုရားသခင်ကို ဝေဖန်မည်နည်း။ ပုံသွင်းခံရသောအရာက ပုံသွင်းသောသူအား “အဘယ်ကြောင့် ငါ့ကို ဤသို့ဖန်ဆင်းသနည်း” ဟု မေးသင့်သလော။ 21 အိုးလုပ်သူသည် ရွှံ့ဖြင့် အိုးကို ပြုလုပ်သောအခါ ထိုရွှံ့တုံး တစ်ခုတည်းမှ အိုးကောင်း၊ အိုးညံ့ စသဖြင့် ပြုလုပ်ပိုင်ခွင့်ရှိသည် မဟုတ်လော။ 22 ထိုနည်းတူ ဘုရားသခင်သည် မိမိ၏ အမျက်တော်နှင့် တန်ခိုးတော်တို့ကို ပြပိုင်ခွင့်ရှိ၏။ သို့သော်လည်း ဘုရားသခင်သည် မိမိ၏ အမျက်တော်သင့်၍ ဖျက်ဆီးခံရမည့်သူများအပေါ် အလွန်သည်းခံတော်မူ၏။ 23 ဤသို့ပြုတော်မူခြင်းမှာ ဘုရားသခင်သည် မိမိဘုန်းတော်၏ကြွယ်ဝခြင်းကို မိမိကရုဏာထားတော်မူသောသူတို့ သိစေရန် ဖြစ်၏။ ထိုသူတို့မှာ ဘုန်းတော်အတွက် ကြိုတင်ပြင်ဆင်ထားခြင်းခံရသောသူများ ဖြစ်ကြ၏။ 24 ဘုရားသခင်သည် ကျွန်ုပ်တို့ကို ဂျူးလူမျိုးများထဲမှသာမက လူမျိုးခြားများထဲမှလည်း ရွေးကောက်ထားတော်မူ၏။ 25 လူမျိုးခြားများနှင့် ပတ်သက်၍ ဟောရှေ၏ ပရောဖက်ကျမ်းတွင် ဘုရားသခင် မိန့်တော်မူထားသည်မှာ “ငါ့လူမျိုးမဟုတ်သောသူတို့ကို ငါ့လူမျိုး ဟု ခေါ်မည်။ ငါမချစ်ခဲ့သောသူတို့ကိုလည်း ငါချစ်မည်။ 26 ထို့ပြင် ‘သင်တို့သည် ငါ့လူမျိုးမဟုတ်’ ဟု ပြောဆိုခံခဲ့ရသော ထိုအရပ်၌ပင် သူတို့သည် ‘အသက်ရှင်တော်မူသော ဘုရားသခင်၏ သားသမီးများ’ ဟု အခေါ်ခံရကြလိမ့်မည်” ဟူ၍ ဖြစ်၏။ 27 အစ္စရေးလူမျိုးများနှင့် ပတ်သက်၍ ပရောဖက်ဟေရှာယက “အစ္စရေးလူမျိုးတို့သည် ပင်လယ်ကမ်းခြေရှိ သဲပွင့်နှင့်အမျှ များပြားသော်လည်း လူနည်းစုသာ ကယ်တင်ခြင်းခံရလိမ့်မည်။ 28 အဘယ်ကြောင့်ဆိုသော် ထာဝရဘုရားသည် ကမ္ဘာကို လျင်မြန်ပြတ်သားစွာ စီရင်တော်မူမည်ဖြစ်သောကြောင့် ဖြစ်၏” ဟူ၍ ကြွေးကြော်ခဲ့၏။ 29 ထို့ပြင် ဟေရှာယက “ကောင်းကင်ဗိုလ်ခြေအရှင် ထာဝရဘုရားသည် ကျွန်ုပ်တို့အတွက် မျိုးဆက်ကို ချန်ထားတော်မမူခဲ့လျှင် ကျွန်ုပ်တို့သည် သောဒုံမြို့ကဲ့သို့ ဖယ်ရှားခြင်းခံရ၍ ဂေါမောရမြို့ကဲ့သို့ ဖျက်ဆီးခြင်းကို ခံရကြလိမ့်မည်” ဟု ပရောဖက်ပြုဟောပြောခဲ့၏။ အစ္စရေးလူမျိုးတို့၏ မယုံကြည်နိုင်ခြင်း 30 ထိုအကြောင်းအရာများမှာ မည်သို့ ဆိုလိုသနည်း။ လူမျိုးခြားတို့မှာ ဘုရားသခင်သတ်မှတ်တော်မူသည့် ဖြောင့်မတ်ခြင်းစံနှုန်းတို့ကို မီအောင် မလိုက်နိုင်သော်လည်း ဖြောင့်မတ်သည်ဟု သတ်မှတ်ခြင်းခံရကြ၏။ ထိုသို့ သတ်မှတ်ခံရခြင်းမှာ ယုံကြည်ခြင်းအားဖြင့်သာ ဖြစ်၏။ 31 သို့သော် ဘုရားသခင်၏ ပညတ်တရားကို လိုက်နာကျင့်သုံးခြင်းအားဖြင့် ဖြောင့်မတ်သည်ဟု သတ်မှတ်ခြင်းခံရရန် ကြိုးပမ်းကြသော အစ္စရေးလူမျိုးတို့မှာ မည်သည့်အခါမျှ မအောင်မြင်ကြ။ 32 အဘယ်ကြောင့်နည်း။ ထိုသူတို့သည် ဖြောင့်မတ်ကြောင်း သတ်မှတ်ခံရရန် ဘုရားသခင်ကို ယုံကြည်မည့်အစား ပညတ်တရားကို လိုက်နာကျင့်သုံးခြင်းအားဖြင့် ကြိုးပမ်းကြသောကြောင့် ဖြစ်၏။ သူတို့သည် ကျမ်းစာတွင် ဖော်ပြထားသည့် ဆူးငြောင့်ခလုတ်ဖြစ်သောကျောက်ကို တိုက်မိကြ၏။ 33 ကျမ်းစာ၌ “ငါသည် ဆူးငြောင့်ခလုတ်ဖြစ်သော ကျောက်တုံးကို ဇိအုန်မြို့တွင် ချထား၏။ ထိုကျောက်သည် လူတို့ကို လဲကျစေလိမ့်မည်။ သို့သော် ထိုအရှင်ကို ယုံကြည်သောသူသည် အရှက်ရလိမ့်မည် မဟုတ်” ဟု ဖော်ပြထား၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.