Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

ရော​မ 16 - ခေတ်သစ်​မြန်မာ သမ္မာကျမ်း


ရှင်ပေါလု​၏ နှုတ်ဆက်စကား

1 ကင်ခြေမြို့​ရှိ အသင်းတော်​၏ အမှုတော်လုပ်ငန်း​ကို ဆောင်ရွက်နေသော ကျွန်ုပ်တို့​၏​နှမ ဖိဗေ​ကို သင်တို့​နှင့် မိတ်ဆက်​ပေးလိုက်ပါ၏။

2 ယုံကြည်သူတို့​ပြုအပ်သည့်​အတိုင်း သခင်ဘုရား​ကို​ထောက်​၍ သူ့​ကို ကြိုဆိုကြလော့။ သူ​လိုအပ်​သမျှ​ကို ကူညီကြလော့။ အဘယ်ကြောင့်ဆိုသော် သူ​သည် လူများစွာ​နှင့် ကျွန်ုပ်​ကိုလည်း ကူညီခဲ့သူ​ဖြစ်၏။

3 ယေရှု​ခရစ်တော်​၏ အမှုတော်​ကို ဆောင်ရွက်သည့် ကျွန်ုပ်​၏ လုပ်ဖော်ကိုင်ဖက်များ​ဖြစ်ကြသော ပြစ်ကိလ​နှင့် အာကုလ​တို့​ကို နှုတ်ဆက်ပေးကြလော့။

4 သူတို့​သည် ကျွန်ုပ်​အတွက် သက်စွန့်​ကြိုးပမ်း​ဆောင်ရွက်ခဲ့ကြ​သူများ ဖြစ်ကြ၏။ ကျွန်ုပ်​တစ်ဦးတည်း​သာမက လူမျိုးခြား​အသင်းတော်​အပေါင်းတို့​သည်လည်း သူတို့​ကို ကျေးဇူးတင်ကြ၏။

5 သူတို့​အိမ်​၌ စုဝေးကြသည့် အသင်းတော်​ကိုလည်း နှုတ်ဆက်ပေးကြလော့။ အာရှပြည်​တွင် ပထမဦးဆုံး ခရစ်တော်​ကို ယုံကြည်​လက်ခံသူ​ဖြစ်သည့် ကျွန်ုပ်​ချစ်သော ဧပဲနက်​ကို နှုတ်ဆက်ပေးကြလော့။

6 သင်တို့​အတွက် အလုပ်​အလွန်​ကြိုးစားသော မာရိ​ကို နှုတ်ဆက်ပေးကြလော့။

7 ကျွန်ုပ်​နှင့်အတူ အကျဉ်း​ချခံခဲ့ဖူးသည့် ကျွန်ုပ်​၏​အမျိုးသားချင်း​ဖြစ်သော အန္ဒြောနိတ်​နှင့် ယုနိ​ကို နှုတ်ဆက်ပေးကြလော့။ ထို​သူတို့​သည် တမန်တော်​ထဲ၌ အလွန်​ထင်ပေါ်သော​သူများ​ဖြစ်ကြ၏။ ကျွန်ုပ်​ထက်​စော​၍ ခရစ်တော်​ကို ယုံကြည်​လက်ခံလာသူများ​လည်း ဖြစ်ကြ၏။

8 သခင်ဘုရား​၌ ကျွန်ုပ်​ချစ်သော အမ္ပလိ​ကို နှုတ်ဆက်ပေးကြလော့။

9 ခရစ်တော်​၏ အမှုတော်​ကို ဆောင်ရွက်သည့် ကျွန်ုပ်​၏ လုပ်ဖော်ကိုင်ဖက်များ​ဖြစ်ကြသော ဥရဗန်​နှင့် ကျွန်ုပ်​ချစ်သော​မိတ်ဆွေ သတာခု​ကို နှုတ်ဆက်ပေးကြလော့။

10 ခရစ်တော်​အပေါ် သစ္စာရှိသော အပေလေ​ကို နှုတ်ဆက်ပေးကြလော့။ အရိတ္တောဗုလု​၏ အိမ်သူအိမ်သားတို့​ကို နှုတ်ဆက်ပေးကြလော့။

11 ကျွန်ုပ်​၏​အမျိုးသားချင်း​ဖြစ်သော ဟေရောဒျုန်​ကို နှုတ်ဆက်ပေးကြလော့။ သခင်ဘုရား​၏ တပည့်တော်များ​ဖြစ်သော နာကိသု​၏​အိမ်သူအိမ်သားတို့​ကို နှုတ်ဆက်ပေးကြလော့။

12 သခင်ဘုရား​၏ အမှုတော်​ကို ကြိုးစား​လုပ်ဆောင်ကြသည့် အမျိုးသမီးများ​ဖြစ်သော တရုဖဲန​နှင့် တရုဖောသ​ကို​လည်းကောင်း၊ အလုပ်​အလွန်​ကြိုးစားသည့် ချစ်သော ပေရသိ​ကို​လည်းကောင်း နှုတ်ဆက်ပေးကြလော့။

13 သခင်ဘုရား​၏ အမှုတော်​အတွက် သခင်ဘုရား​ကိုယ်တိုင် ရွေးကောက်တော်မူသော ရုဖု​နှင့် ကျွန်ုပ်​အတွက် မိခင်​သဖွယ်​ဖြစ်သောသူ​၏​မိခင်​ကို နှုတ်ဆက်ပေးကြလော့။

14 အသုံကြိတ်၊ ဖလေကုန်၊ ဟေရမ၊ ပတ်ရောဘ၊ ဟေရမေ​မှစ၍ သူတို့​နှင့်အတူ​ရှိသော ညီအစ်ကို​မောင်နှမများ​ကို နှုတ်ဆက်ပေးကြလော့။

15 ဖိလောလုပ်၊ ယုလိ၊ နေရု၊ နေရု​နှမ​နှင့် ဩလုမ္ပ​မှစ၍ သူတို့​နှင့်အတူ​ရှိသော ယုံကြည်သူ​အပေါင်းတို့​ကို နှုတ်ဆက်ပေးကြလော့။

16 အချင်းချင်း တစ်ဦး​ကို တစ်ဦး သန့်ရှင်းသော​အနမ်း​ဖြင့် နှုတ်ဆက်ကြလော့။ ခရစ်တော်​၏ အသင်းတော်​အပေါင်းတို့​သည် သင်တို့​ကို နှုတ်ဆက်လိုက်ပါ၏။


ရှင်ပေါလု​၏ နောက်ဆုံး​ညွှန်ကြားချက်များ

17 ညီအစ်ကို​မောင်နှမတို့… သင်တို့​သင်ယူထားသော သွန်သင်ချက်​ကို ဆန့်ကျင်​၍ စိတ်ဝမ်းကွဲစရာ​နှင့် မှားယွင်းစရာတို့​ကို ဖြစ်စေသော​သူတို့​အား သတိပြု​လျက် ရှောင်ရှား​ရန် ကျွန်ုပ်​တိုက်တွန်း​နှိုးဆော်လို၏။

18 ထို​သူတို့​သည် ကျွန်ုပ်တို့​သခင်​ခရစ်တော်​၏ အမှု​ကို မဆောင်ရွက်ဘဲ ကိုယ်ကျိုး​ကိုသာ ဆောင်ရွက်သော​သူများ ဖြစ်ကြ၏။ ထို​သူတို့​သည် ချိုသာသောစကား​နှင့် မြှောက်ပင့်သော​စကား​ဖြင့် ရိုးသားသော​သူတို့​၏ စိတ်​ကို လှည့်ဖြားတတ်ကြ၏။

19 ဘုရားသခင်​ကို သင်တို့​နာခံကြောင်း လူတိုင်း​သိကြ​သဖြင့် ကျွန်ုပ်​ဝမ်းမြောက်၏။ သင်တို့​သည် ကောင်းမှု​နှင့်​ပတ်သက်​လျှင် ပညာသတိ​ရှိ​၍ မကောင်းမှု​နှင့်​ပတ်သက်​လျှင် အပြစ်ကင်းကြ​ရန် ကျွန်ုပ်​အလိုရှိ၏။

20 ငြိမ်းချမ်းခြင်း​အရှင် ဘုရားသခင်​သည် မကြာမီ စာတန်​ကို သင်တို့​၏ ခြေ​အောက်​တွင် ကြေမွစေတော်မူ​လိမ့်မည်။ ကျွန်ုပ်တို့​သခင်​ယေရှု​ခရစ်တော်​၏ ကျေးဇူးတော်​သည် သင်တို့​နှင့်အတူ ရှိပါစေသော။

21 ကျွန်ုပ်​၏​လုပ်ဖော်ကိုင်ဖက် တိမောသေ​မှစ၍ ကျွန်ုပ်​၏​အမျိုးသားချင်း​ဖြစ်ကြသော လုကိ၊ ယာသုန်၊ သောသိပရု​တို့​သည် သင်တို့​ကို နှုတ်ဆက်လိုက်ပါ၏။

22 ပေါလု​အတွက် ဤ​စာ​ကို ရေးသော ကျွန်ုပ်​တေရတိ​သည်လည်း သခင်ဘုရား​၏​တပည့်တော်​တစ်ဦး​အနေဖြင့် သင်တို့​ကို နှုတ်ဆက်လိုက်ပါ၏။

23 ကျွန်ုပ်​နှင့် အသင်းသား​အပေါင်းတို့​ကို ဧည့်ခံသော အိမ်ရှင်​ဂါယု​သည် သင်တို့​ကို နှုတ်ဆက်လိုက်ပါ၏။ မြို့တော်​ဘဏ္ဍာထိန်း​ဧရတ္တု​နှင့် ကျွန်ုပ်တို့​၏​ညီ ကွာတု​တို့​သည် သင်တို့​ကို နှုတ်ဆက်လိုက်ပါ၏။

24 ကျွန်ုပ်တို့​သခင်​ယေရှု​ခရစ်တော်​၏ ကျေးဇူးတော်​သည် သင်တို့​အားလုံး​နှင့်အတူ ရှိပါစေသော။ အာမင်။

25 ကျွန်ုပ်​ဟောသော သတင်းကောင်း​၌​ဆိုထားသည့်​အတိုင်း သင်တို့​အား ခိုင်ခံ့မြဲမြံ​စေနိုင်တော်မူသော ဘုရားသခင်​သည်သာ ဘုန်းကြီးတော်မူ၏။ ယေရှု​ခရစ်တော်​အကြောင်း​ဖြစ်သော ဤ​သတင်းကောင်း​က ကာလ​ကြာမြင့်စွာ ကွယ်ဝှက်ထားသည့် ကိုယ်တော်​၏ လျှို့ဝှက်​နက်နဲသော​အကြံအစည်တော်​ကို လူမျိုးခြား​ဖြစ်သော သင်တို့​အား ဖော်ပြပေး၏။

26 လူမျိုးခြားတို့​သည်လည်း ယုံကြည်​၍ နာခံလာ​စေရန် ပရောဖက်များ​ကြိုတင်​ဟောပြောထားသည့်​အတိုင်း ထာဝရ​ဘုရားသခင်​၏ အမိန့်တော်​အားဖြင့် ယခု​အချိန်​တွင် ထို​သတင်းကောင်း​ကို လူမျိုးခြား​အပေါင်းတို့​ထံ ဖော်ပြလေပြီ။

27 ဉာဏ်ပညာတော်​နှင့် ပြည်စုံတော်မူသည့် တစ်ဆူတည်းသော​ဘုရားသခင်​သည် ယေရှု​ခရစ်တော်​အားဖြင့် ထာဝရ​ဘုန်းကြီးတော်မူပါစေသော။ အာမင်။ ရောမ​ဩဝါဒစာ ပြီးပါပြီ။

ခေတ်သစ်​မြန်မာ သမ္မာကျမ်း™

မူပိုင်ခွင့်၊ © Biblica Inc. ၁၉၈၅၊ ၂၀၂၄

ခွင့်ပြုချက်​ဖြင့် အသုံးပြုသည်။ ကမ္ဘာတစ်ဝန်း​မူပိုင်ခွင့်များ​ရယူပြီးဖြစ်သည်။

Burmese Contemporary Bible™

Copyright © 1985, 2024 by Biblica, Inc.

Used with permission. All rights reserved worldwide.

Biblica, Inc.
ကြှနျုပျတို့နောကျလိုကျပါ:



ကြော်ငြာတွေ