Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

ရော​မ 10 - ခေတ်သစ်​မြန်မာ သမ္မာကျမ်း

1 ချစ်သော ညီအစ်ကို​မောင်နှမတို့… ကျွန်ုပ်​၏ ပြင်းပြသော စိတ်ဆန္ဒ​နှင့် ဘုရားသခင်​ထံ တောင်းသော ဆု​မှာ အစ္စရေးလူမျိုးများ ကယ်တင်ခံရ​ရန် ဖြစ်၏။

2 ထို​သူတို့​သည် ဘုရားသခင်​အတွက် စိတ်အားထက်သန်မှု​ရှိ​ကြောင်း ကျွန်ုပ်​သက်သေခံ၏။ သို့သော်လည်း ထို​ထက်သန်သော စိတ်​သည် အသိပညာ​အားဖြင့် မဟုတ်။

3 ထို​သူတို့​သည် ဘုရားသခင်​က ဖြောင့်မတ်သည်​ဟု သတ်မှတ်ပေး​တော်မူသော နည်းလမ်း​ကို နားမလည်​သောကြောင့် ထို​နည်းလမ်း​ကို မလိုက်ဘဲ မိမိတို့​၏​ကိုယ်ပိုင် လမ်းစဉ်​ကို လိုက်ကြ၏။

4 ခရစ်တော်​သည် ပညတ်တရား​ကို အဆုံးသတ်​စေတော်မူပြီ​ဖြစ်​သောကြောင့် ယုံကြည်သော​သူတို့​သည် ဖြောင့်မတ်သည်​ဟု သတ်မှတ်ခြင်း​ခံရကြ၏။


လူသား​အားလုံး​အတွက် ကယ်တင်ခြင်း

5 ပညတ်တရား​၏ နည်းလမ်း​အရ လူတစ်ဦး​သည် ဘုရားသခင်​ရှေ့တော်​၌ ဖြောင့်မတ်သည်​ဟု သတ်မှတ်​ခံရ​ရန် ထို​ပညတ်​အားလုံး​ကို လိုက်နာရမည်​ဖြစ်ကြောင်း မောရှေ​ရေးသားထား၏။

6 သို့ရာတွင် ယုံကြည်ခြင်း​နည်းလမ်း​အရ ဘုရားသခင်​ရှေ့တော်​၌ ဖြောင့်မတ်သည်​ဟု သတ်မှတ်​ခံရခြင်း​ကမူ “ ‘ခရစ်တော်​ကို ဤ​လောက​သို့ ခေါ်ဆောင်​ရန် ကောင်းကင်ဘုံ​သို့ မည်သူ​တက်မည်နည်း’ ဟူ၍ သင့်​စိတ်​ထဲ၌ မပြောဆိုနှင့်။

7 သို့မဟုတ် ‘ခရစ်တော်​ကို သေခြင်း​မှ ထမြောက်​စေတော်မူ​ရန် တွင်းနက်ကြီး​ထဲသို့ မည်သူ​ဆင်းမည်နည်း’ ဟူ၍ မပြောဆိုနှင့်” ဟု ဆိုထား၏။

8 ထို့ပြင် “တရားတော်​သည် သင့်​အနီး​၌ ရှိ၏။ ၎င်း​သည် သင့်​နှုတ်​၌​လည်းကောင်း၊ သင့်​စိတ်နှလုံး​၌​လည်းကောင်း ရှိ၏” ဟု ဆိုထား၏။ ထို​တရားတော်​မှာ ကျွန်ုပ်တို့​ဟောပြောသော ယုံကြည်ခြင်း​တရား ဖြစ်၏။

9 သင်​သည် ယေရှု​ကို အရှင်သခင်​ဖြစ်ကြောင်း နှုတ်​ဖြင့် ဝန်ခံ​၍ ဘုရားသခင်​သည် ထို​အရှင်​ကို သေခြင်း​မှ ထမြောက်စေတော်မူကြောင်း​ကို စိတ်နှလုံး​ထဲ၌ ယုံကြည်​လျှင် ကယ်တင်ခြင်း​ခံရ​လိမ့်မည်။

10 အဘယ်ကြောင့်ဆိုသော် လူ​သည် စိတ်နှလုံး​ဖြင့် ယုံကြည်​၍ ဘုရားသခင်​ရှေ့တော်​၌ ဖြောင့်မတ်သည်​ဟု သတ်မှတ်ခံရပြီး နှုတ်​ဖြင့် ဝန်ခံ​၍ ကယ်တင်ခြင်း​ခံရ​သောကြောင့် ဖြစ်၏။

11 ကျမ်းစာ​ကလည်း “ထို​အရှင်​ကို ယုံကြည်သောသူ​သည် အရှက်ရ​လိမ့်မည်​မဟုတ်” ဟု ဆိုထား၏။

12 ဂျူးလူမျိုး၊ ဂရိလူမျိုး​ဟူ၍ ခွဲခြားခြင်း​မရှိ။ သူတို့​၌ သခင်​တစ်ပါးတည်း ရှိ​၍ ထို​သခင်​ထံ ဆုတောင်းသော​သူတို့​အား ရက်ရော​စွာ ပေးသနားတော်မူ၏။

13 အဘယ်ကြောင့်ဆိုသော် ကျမ်းစာ​၌ “ထာဝရဘုရား​၏ အမည်​နာမ​ကို အမှီပြု​၍ ဆုတောင်းသော​သူ​အပေါင်းတို့​သည် ကယ်တင်ခြင်း​ခံရ​လိမ့်မည်” ဟု ဖော်ပြထား​သောကြောင့် ဖြစ်၏။

14 သို့သော် ထို​အရှင်​ကို မယုံကြည်​လျှင် ထို​အရှင်​ထံ မည်သို့ ဆုတောင်း​နိုင်မည်နည်း။ ထို​အရှင်​၏ အကြောင်း​ကို မကြားဖူး​လျှင် ထို​အရှင်​ကို မည်သို့ ယုံကြည်​နိုင်မည်နည်း။ ဟောပြောသော​သူ မရှိ​လျှင် မည်သို့ ကြား​နိုင်မည်နည်း။

15 ဟောပြော​ရန် စေလွှတ်ခြင်း မခံရ​လျှင် မည်သို့ ဟောပြော​နိုင်မည်နည်း။ ကျမ်းစာ​၌ “သတင်းကောင်း​ကို ယူဆောင်လာသော​သူတို့​၏ ခြေတို့​သည် အလွန်​တင့်တယ်ပေ၏” ဟု ရေးသားထား၏။

16 သို့သော်လည်း သတင်းကောင်း​ကို လူတိုင်း လက်ခံသည် မဟုတ်။ ပရောဖက်​ဟေရှာယ​က “အို ထာဝရဘုရား… အကျွန်ုပ်တို့​ဟောပြောသော သတင်းစကား​ကို မည်သူ​ယုံပါသနည်း” ဟု ဆိုခဲ့၏။

17 ထို့ကြောင့် ယုံကြည်ခြင်း​သည် သတင်းကောင်း​ဟူသော ခရစ်တော်​၏ အကြောင်း​ကို ကြားနာခြင်း​မှ ဖြစ်လာ၏။

18 သို့သော် အစ္စရေးလူမျိုးတို့​သည် သတင်းကောင်း​ကို မကြားခဲ့​ရသလော​ဟု ကျွန်ုပ်​မေးလို၏။ အမှန်​ပင် ကြားခဲ့ရ၏။ ကျမ်းစာ​၌ “ထို​သတင်းကောင်း​သည် ကမ္ဘာ​တစ်ဝန်းလုံး​သို့ ပျံ့နှံ့​၍ တရား​စကား​သည်လည်း ကမ္ဘာ​စွန်း​တိုင် ရောက်လေပြီ” ဟု ဖော်ပြထား၏။

19 အစ္စရေးလူမျိုးတို့​သည် အမှန်ပင်​မသိကြသလော​ဟု ကျွန်ုပ် ထပ်မံ၍ မေးလို၏။ အမှန်​ပင် သိကြ၏။ အဘယ်ကြောင့်ဆိုသော် မောရှေ​ခေတ်ကာလ​၌ ဘုရားသခင်​က “ငါ​သည် လူမျိုးစု​ပင်​မဟုတ်သော လူတို့​အားဖြင့် သင်တို့​၌ မနာလိုစိတ်​ဖြစ်ပေါ်စေမည်။ ပညာမဲ့သော လူမျိုးခြားများ​အားဖြင့်​လည်း သင်တို့​ကို ဒေါသထွက်​စေမည်” ဟု မိန့်တော်မူ​သောကြောင့် ဖြစ်၏။

20 ထို့နောက် ဘုရားသခင်​က “ငါ့​ကို မရှာသော​သူတို့​သည် ငါ့​ကို တွေ့ကြ၏။ ငါ့​အကြောင်း​ကို မမေးသော​သူတို့​အား ငါ​သည် ကိုယ်ထင်ပြ၏” ဟု မိန့်တော်မူကြောင်း ဟေရှာယ​သည် ရဲဝံ့စွာ ဖော်ပြထား၏။

21 သို့သော် အစ္စရေးလူမျိုးတို့​နှင့်​ပတ်သက်​၍ ဘုရားသခင်​က “တစ်နေ့လုံး ငါ့​လက်​ကို ကမ်းထား​သော်လည်း သူတို့​သည် ငါ့​ကို မနာခံဘဲ ဆန့်ကျင်​ပုန်ကန်ကြ၏” ဟု မိန့်တော်မူ၏။

ခေတ်သစ်​မြန်မာ သမ္မာကျမ်း™

မူပိုင်ခွင့်၊ © Biblica Inc. ၁၉၈၅၊ ၂၀၂၄

ခွင့်ပြုချက်​ဖြင့် အသုံးပြုသည်။ ကမ္ဘာတစ်ဝန်း​မူပိုင်ခွင့်များ​ရယူပြီးဖြစ်သည်။

Burmese Contemporary Bible™

Copyright © 1985, 2024 by Biblica, Inc.

Used with permission. All rights reserved worldwide.

Biblica, Inc.
ကြှနျုပျတို့နောကျလိုကျပါ:



ကြော်ငြာတွေ