ယာကုပ် 4 - ခေတ်သစ်မြန်မာ သမ္မာကျမ်းဘုရားသခင်ထံ ချဉ်းကပ်ခြင်း 1 မည်သည့်အကြောင်းကြောင့် သင်တို့ထဲတွင် စစ်ပွဲများနှင့် ရန်ပွဲများဖြစ်ကြသနည်း။ သင်တို့ကိုယ်ခန္ဓာထဲ၌ ဆန့်ကျင်တိုက်ခိုက်နေသော အပျော်အပါးလိုက်စားလိုသည့်ဆန္ဒများကြောင့် ဖြစ်ကြသည်မဟုတ်လော။ 2 သင်တို့သည် မိမိတို့လိုချင်တပ်မက်သောအရာကို မရသဖြင့် လူသတ်ကြ၏။ တစ်စုံတစ်ခုကို အလွန်လိုချင်သောစိတ် ရှိသော်လည်း မရနိုင်သောအခါ ခိုက်ရန်ဖြစ်၍ တိုက်ခိုက်ကြ၏။ သင်တို့မရကြသည့် အကြောင်းမှာ ဘုရားသခင်ထံ မတောင်းလျှောက်သောကြောင့်ဖြစ်၏။ 3 တောင်းလျှောက်သောအခါ၌လည်း အပျော်အပါးလိုက်စားနိုင်ရန်အတွက် လွဲမှားစွာ တောင်းလျှောက်သောကြောင့် မရကြ။ 4 သစ္စာမရှိသောသူတို့… လောကနှင့်မိတ်သဟာယဖွဲ့ခြင်းသည် ဘုရားသခင်နှင့် ရန်ဘက်ပြုခြင်းဖြစ်ကြောင်း နားမလည်ကြသလော။ ထို့ကြောင့် လောကနှင့် မိတ်ဆွေဖြစ်လိုသောသူသည် ဘုရားသခင်၏ ရန်သူဖြစ်၏။ 5 “ဘုရားသခင်သည် ကျွန်ုပ်တို့အထဲ၌ ရှင်သန်စေတော်မူသည့် လူ့စိတ်ဝိညာဉ်အား မိမိကိုသာ ကိုးကွယ်စေလိုသောသဝန်တိုစိတ်ဖြင့် တောင့်တတော်မူ၏” ဟူ၍ ကျမ်းစာ၌ အကြောင်းမဲ့ ဖော်ပြသည်ဟု သင်တို့ထင်သလော။ 6 သို့သော် ကိုယ်တော်သည် ကျွန်ုပ်တို့အား များပြားသောကျေးဇူးတော်ကို ပေးတော်မူ၏။ ထို့ကြောင့် ကျမ်းစာ၌ “မာနထောင်လွှားသောသူတို့ကို ဘုရားသခင်သည် ဆန့်ကျင်၍ နှိမ့်ချသောသူတို့ကိုမူ ကျေးဇူးပြုတော်မူ၏” ဟု ဆိုထား၏။ 7 ထို့ကြောင့် ဘုရားသခင်ကို နာခံကြလော့။ မာရ်နတ်ကို ဆန့်ကျင်ကြလော့။ သို့ပြုလျှင် သူသည် သင်တို့ထံမှ ထွက်ပြေးသွားလိမ့်မည်။ 8 ဘုရားသခင်ထံသို့ ချဉ်းကပ်လော့။ သို့ပြုလျှင် ဘုရားသခင်သည် သင်တို့ထံသို့ ချဉ်းကပ်တော်မူလိမ့်မည်။ အပြစ်သားတို့… သင်တို့လက်ကို ဆေးကြောကြလော့။ စိတ်နှစ်ခွရှိသောသူတို့… သင်တို့၏စိတ်နှလုံးသားကို သန့်ရှင်းစေကြလော့။ 9 ဝမ်းနည်း၍ ညည်းတွားမြည်တမ်းလျက် ငိုကြွေးကြလော့။ ရယ်မောနေမည့်အစား ညည်းတွားမြည်တမ်းကြလော့။ ဝမ်းမြောက်နေမည့်အစား ဝမ်းနည်းပူဆွေးကြလော့။ 10 သခင်ဘုရားရှေ့တော်၌ မိမိကိုယ်ကိုယ် နှိမ့်ချကြလော့။ သို့ပြုလျှင် ကိုယ်တော်သည် သင်တို့ကို ချီးမြှောက်တော်မူလိမ့်မည်။ သူတစ်ပါးကို အပြစ်မစီရင်ရန် သတိပေးခြင်း 11 ညီအစ်ကိုမောင်နှမတို့… အချင်းချင်း မပုတ်ခတ်ကြနှင့်။ ညီအစ်ကိုမောင်နှမချင်း ပုတ်ခတ်ပြောဆိုသူ၊ သို့မဟုတ် အပြစ်စီရင်တတ်သောသူသည် ပညတ်တရားတော်ကို ပုတ်ခတ်၍ စီရင်သောသူဖြစ်၏။ ပညတ်တရားကို စီရင်လျှင် ပညတ်တရားကို လိုက်နာကျင့်သုံးသောသူမဟုတ်ဘဲ စီရင်သောသူဖြစ်၏။ 12 ပညတ်တရားကို ပေးတော်မူသောအရှင်၊ တရားစီရင်တော်မူသောအရှင် တစ်ပါးတည်းသာ ရှိ၏။ ထိုအရှင်သည် ကယ်တင်နိုင်စွမ်းနှင့် ဖျက်ဆီးနိုင်စွမ်း ရှိသောဘုရားသခင်ဖြစ်တော်မူ၏။ သို့သော် သင်သည် မည်သူဖြစ်၍ သူတစ်ပါးကို စီရင်ရသနည်း။ မကြွားဝါရန် သတိပေးခြင်း 13 “ယနေ့၊ သို့မဟုတ် မနက်ဖြန် ဤမည်သောမြို့သို့ သွား၍ တစ်နှစ်ပတ်လုံး နေကြမည်။ ထိုမြို့တွင် ကုန်သွယ်၍ ငွေရှာကြမည်” ဟု ပြောသောသူတို့… နားထောင်ကြလော့။ 14 သင်တို့သည် မနက်ဖြန်တွင် မည်သို့ဖြစ်မည်ကိုပင် မသိကြ။ သင်တို့၏ အသက်သည် မည်သို့နည်း။ ခေတ္တမျှ ပေါ်လာပြီးနောက် ပျောက်ကွယ်တတ်သော အခိုးအငွေ့နှင့်တူ၏။ 15 သို့ဖြစ်၍ “ထာဝရဘုရားအလိုတော်ရှိလျှင် ကျွန်ုပ်တို့သည် အသက်ဆက်ရှင်၍ ဤအမှု၊ သို့မဟုတ် ထိုအမှုကို ပြုပါမည်” ဟုသာ သင်တို့ပြောသင့်၏။ 16 ယခုတွင်မူ သင်တို့သည် လုပ်ဆောင်မည့်အစီအစဉ်အကြောင်း မာနထောင်လျက် ကြွားဝါတတ်ကြ၏။ ထိုသို့သော ကြွားဝါခြင်းမှန်သမျှသည် မကောင်းမှုဖြစ်၏။ 17 ထို့ကြောင့် ကောင်းမှုကို လုပ်ဆောင်သင့်ကြောင်း သိလျက်နှင့် မလုပ်ဆောင်ဘဲ နေလျှင် အပြစ်ရှိ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.