ယာကုပ် 2 - ခေတ်သစ်မြန်မာ သမ္မာကျမ်းမျက်နှာမလိုက်ရန် သတိပေးခြင်း 1 ညီအစ်ကိုမောင်နှမတို့… သင်တို့သည် ဘုန်းကြီးသော ကျွန်ုပ်တို့၏သခင် ယေရှုခရစ်တော်ကို ယုံကြည်သောသူများဖြစ်သည်နှင့်အညီ လူတို့ကို မျက်နှာလိုက်၍ မဆက်ဆံကြနှင့်။ 2 ဥပမာ သင်တို့၏ဝတ်ပြုဆောင်ထဲသို့ ဝင်လာသူနှစ်ဦးတွင် တစ်ဦးသည် ရွှေလက်ဝတ်ရတနာများနှင့် ဝတ်ကောင်းစားလှ ဝတ်ဆင်ထားသူဖြစ်ပြီး ကျန်တစ်ဦးမှာ ဆင်းရဲ၍ စုတ်ပြတ်နွမ်းပါးသောအဝတ်ကို ဝတ်ဆင်ထားသူဖြစ်သော် 3 သင်တို့သည် ဝတ်ကောင်းစားလှ ဝတ်ဆင်ထားသူကို အလေးပေးကာ “ဤနေရာကောင်းတွင် ထိုင်ပါ” ဟု ဆိုပြီး ဆင်းရဲသောသူကိုမူ “ထိုနေရာတွင် ရပ်ပါ၊” သို့မဟုတ် “ကျွန်ုပ်ခြေရင်းတွင် ထိုင်ပါ” ဟူ၍ ပြောဆိုကြလျှင် 4 သင်တို့သည် အချင်းချင်း ခွဲခြားဆက်ဆံလျက် မကောင်းသော အကြံအစည်ဖြင့် တရားစီရင်သောသူများ ဖြစ်ကြသည် မဟုတ်လော။ 5 ချစ်ခင်ရသော ညီအစ်ကိုမောင်နှမတို့… နားထောင်ကြလော့။ ဘုရားသခင်သည် ဤလောကတွင် ဆင်းရဲသောသူတို့ကို ယုံကြည်ခြင်း၌ ကြွယ်ဝစေ၍ မိမိကိုချစ်သောသူတို့အတွက် ကတိထားတော်မူသည့် နိုင်ငံတော်ကို အမွေဆက်ခံသူများဖြစ်စေရန် ရွေးချယ်တော်မူသည်မဟုတ်လော။ 6 သို့သော် သင်တို့သည် ဆင်းရဲသောသူတို့ကို ရှုတ်ချကြ၏။ သင်တို့ကို ဖိနှိပ်ချုပ်ချယ်၍ တရားရုံးသို့ ဆွဲခေါ်သွားသောသူတို့သည် ချမ်းသာသောသူများ မဟုတ်လော။ 7 သူတို့သည် သင်တို့ခံယူရရှိသည့် ကောင်းမြတ်သောနာမတော်ကို ရှုတ်ချသူများဖြစ်သည် မဟုတ်လော။ 8 ကျမ်းစာတွင် ပါသည့် “ကိုယ်နှင့်သက်ဆိုင်သောသူကို ကိုယ်နှင့်အမျှ ချစ်လော့” ဟူသော ရွှေပညတ်တော်ကို အမှန်တကယ် လိုက်နာကျင့်သုံးနိုင်လျှင် သင်တို့သည် မှန်ကန်စွာ ပြု၏။ 9 သို့သော် မျက်နှာလိုက်လျှင် သင်တို့သည် အပြစ်ကျူးလွန်သူဖြစ်၍ ပညတ်တရားကို ချိုးဖောက်သူအဖြစ် ပြစ်ဒဏ်ချမှတ်ခံရမည်။ 10 အဘယ်ကြောင့်ဆိုသော် ပညတ်တရားအလုံးစုံကို လိုက်နာစောင့်ထိန်းသော်လည်း ပညတ်ချက်တစ်ခုကို မလိုက်နာလျှင် အလုံးစုံတို့ကို ချိုးဖောက်ရာရောက်သောကြောင့်ဖြစ်၏။ 11 “သူတစ်ပါးသားမယားကို မပြစ်မှားနှင့်” ဟု ပညတ်တော်မူသောအရှင်က “လူ့အသက်ကို မသတ်နှင့်” ဟူ၍လည်း ပညတ်တော်မူသေး၏။ ထို့ကြောင့် သင်သည် သူတစ်ပါးသားမယားကို မပြစ်မှားသော်လည်း လူ့အသက်ကို သတ်လျှင် ပညတ်တရားကို ချိုးဖောက်သူဖြစ်၏။ 12 ထို့ကြောင့် သင်တို့အား လွတ်မြောက်စေမည့် ပညတ်တရားအားဖြင့် စီရင်ခံရမည့်သူများကဲ့သို့ ပြောဆိုပြုမူကြလော့။ 13 ကရုဏာကင်းမဲ့သောသူသည် ကရုဏာကင်းမဲ့စွာ တရားစီရင်ခြင်း ခံရမည်။ ကရုဏာထားသောသူသည် ဘုရားသခင်တရားစီရင်မည့်နေ့တွင် ကြောက်ရွံ့နေရန် မလိုပေ။ ယုံကြည်ခြင်းနှင့် လုပ်ဆောင်ခြင်း 14 ညီအစ်ကိုမောင်နှမတို့… တစ်စုံတစ်ယောက်က ငါ့ထံတွင် ယုံကြည်ခြင်းရှိ၏ ဟု ဆိုသော်လည်း လုပ်ဆောင်ခြင်းမရှိလျှင် မည်သည့်အကျိုး ရှိသနည်း။ ထိုသို့သောယုံကြည်ခြင်းသည် ထိုသူကို ကယ်တင်နိုင်သလော။ 15 ညီအစ်ကိုမောင်နှမတစ်ဦးဦးသည် အစားအစာနှင့် အဝတ်အထည် ချို့တဲ့ဆင်းရဲနေသောအခါ 16 သင်တို့ထဲမှ တစ်စုံတစ်ယောက်က “ငြိမ်းချမ်းစွာ သွားကြလော့။ နွေးထွေးစွာ နေ၍ ဝလင်စွာ စားကြလော့” ဟု ဆိုသော်လည်း သူတို့လိုအပ်သော အဝတ်အစားနှင့် စားစရာတို့ကို မပေးဘဲနေလျှင် မည်သည့်အကျိုး ရှိမည်နည်း။ 17 ထိုနည်းတူပင် ယုံကြည်ခြင်းတစ်ပါးတည်းသာဖြစ်လျှင် လုပ်ဆောင်ခြင်းမရှိသောကြောင့် အသေဖြစ်၏။ 18 တစ်စုံတစ်ဦးက “လူတချို့၌ ယုံကြည်ခြင်းရှိ၏။ လူတချို့၌ လုပ်ဆောင်ခြင်းရှိ၏” ဟု ပြောလိမ့်မည်။ သို့သော် ကျွန်ုပ်က “လုပ်ဆောင်ခြင်း မရှိလျှင် သင်၏ ယုံကြည်ခြင်းကို မည်သို့ပြနိုင်မည်နည်း။ ကောင်းသောလုပ်ဆောင်ခြင်းအားဖြင့် ကျွန်ုပ်၏ယုံကြည်ခြင်းကို ပြမည်” ဟု ပြန်ပြော၏။ 19 ဘုရားသခင်တစ်ဆူတည်းရှိသည်ဟု သင်ယုံကြည်၏။ ကောင်းပေ၏။ နတ်ဆိုးများပင် ယုံကြည်၍ ကြောက်ရွံ့ထိတ်လန့်ကြ၏။ 20 အို လူမိုက်… လုပ်ဆောင်ခြင်းမရှိသော ယုံကြည်ခြင်းသည် အသုံးမဝင်ကြောင်း အထောက်အထား လိုအပ်သလော။ 21 ကျွန်ုပ်တို့အဘအာဗြဟံသည် မိမိသားဣဇာက်ကို ယဇ်ပလ္လင်ပေါ်တွင် ပူဇော်သောအခါ ထိုလုပ်ဆောင်ခြင်းအားဖြင့် ဖြောင့်မတ်သည်ဟု သတ်မှတ်ခံရသည်မဟုတ်လော။ 22 သူ၏ယုံကြည်ခြင်းသည် သူ၏လုပ်ဆောင်ခြင်းနှင့်အတူ ဆောင်ရွက်သည်ကို သင်သိမြင်ရပြီး ထိုလုပ်ဆောင်ခြင်းဖြင့် သူ၏ယုံကြည်ခြင်းသည် ပြီးပြည့်စုံ၏။ 23 “အာဗြဟံသည် ဘုရားသခင်ကို ယုံကြည်သဖြင့် ထိုယုံကြည်ခြင်းကို ထောက်၍ ဘုရားသခင်သည် အာဗြဟံအား ဖြောင့်မတ်သူအဖြစ် သတ်မှတ်တော်မူ၏” ဟူသော ကျမ်းစကားသည် လက်တွေ့ဖြစ်လာ၏။ ဘုရားသခင်သည် အာဗြဟံအား “ငါ့မိတ်ဆွေ” ဟု ခေါ်တော်မူ၏။ 24 လူသည် ယုံကြည်ခြင်းအားဖြင့်သာ မဟုတ်ဘဲ လုပ်ဆောင်ခြင်းအားဖြင့် ဖြောင့်မတ်သည်ဟု သတ်မှတ်ခံရကြောင်း သင်တို့သိမြင်ကြ၏။ 25 ထိုနည်းတူ ပြည့်တန်ဆာရာခပ်သည်လည်း တမန်တို့ကို လက်ခံ၍ အခြားလမ်းဖြင့် လွှတ်လိုက်သောအခါ ထိုလုပ်ဆောင်ခြင်းအားဖြင့် ဖြောင့်မတ်ကြောင်း သတ်မှတ်ခံရသည်မဟုတ်လော။ 26 ဝိညာဉ်မရှိသော ကိုယ်ခန္ဓာသည် အသေဖြစ်သကဲ့သို့ လုပ်ဆောင်ခြင်းမရှိသော ယုံကြည်ခြင်းသည် အသေဖြစ်၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.