ဗျာဒိတ် 8 - ခေတ်သစ်မြန်မာ သမ္မာကျမ်းသတ္တမတံဆိပ်ကို ဖွင့်ခြင်း 1 သိုးသငယ်တော်သည် သတ္တမတံဆိပ်ကိုဖွင့်သောအခါ ကောင်းကင်ဘုံ၌ နာရီဝက်ခန့် တိတ်ဆိတ်နေ၏။ 2 ထို့နောက် ဘုရားသခင်၏ရှေ့တော်၌ ရပ်နေသော ကောင်းကင်တမန် ခုနစ်ပါးကို ကျွန်ုပ်မြင်ရ၏။ ဘုရားသခင်သည် သူတို့အားတံပိုးခရာခုနစ်ခုကို ပေးတော်မူ၏။ 3 ကောင်းကင်တမန်တစ်ပါးသည် ရွှေလင်ပန်းကို ကိုင်လျက် ရှေ့သို့လာ၍ ယဇ်ပလ္လင်နားမှာ ရပ်နေ၏။ ရာဇပလ္လင်တော်ရှေ့၌ရှိသော ရွှေယဇ်ပလ္လင်ပေါ်တွင် သန့်ရှင်းသူတို့၏ ဆုတောင်းချက်များနှင့်အတူ ပူဇော်ဆက်ကပ်ရန် သူ့အား အမွှေးနံ့သာများစွာကို ပေးအပ်ထား၏။ 4 အမွှေးနံ့သာမှ အခိုးအငွေ့သည် သန့်ရှင်းသူတို့၏ ဆုတောင်းချက်များနှင့်အတူ ကောင်းကင်တမန်၏လက်မှ ဘုရားသခင်ထံတော်သို့ တက်လေ၏။ 5 ထို့နောက်ကောင်းကင်တမန်သည် ယဇ်ပလ္လင်ပေါ်မှ မီးကို အမွှေးနံ့သာပူဇော်ရာခွက်ထဲသို့ ထည့်၍ ကမ္ဘာမြေပေါ်သို့ ပစ်ချလိုက်ရာ မိုးခြိမ်းခြင်း၊ အသံမြည်ဟည်းခြင်း၊ လျှပ်စီးလက်ခြင်း၊ မြေငလျင်လှုပ်ခြင်းတို့ဖြစ်ပေါ်လာ၏။ ကောင်းကင်တမန်များ တံပိုးခရာမှုတ်ခြင်း 6 ထိုအချိန်၌ တံပိုးခရာခုနစ်ခုကိုင်ထားသော ကောင်းကင်တမန်ခုနစ်ပါးတို့သည်လည်း တံပိုးခရာမှုတ်ရန် ပြင်ဆင်ကြ၏။ 7 ပထမကောင်းကင်တမန်သည် တံပိုးခရာမှုတ်သောအခါ သွေးနှင့်ရောသော မိုးသီးနှင့်မီးတို့သည် ကမ္ဘာမြေပေါ်သို့ကျလေ၏။ ကမ္ဘာမြေ၏သုံးပုံတစ်ပုံ၊ သစ်ပင်သုံးပုံတစ်ပုံနှင့် စိမ်းစိုသောမြက်ပင်ရှိသမျှတို့သည် လောင်ကျွမ်းကုန်၏။ 8 ဒုတိယကောင်းကင်တမန်သည် တံပိုးခရာမှုတ်သောအခါ မီးလောင်နေသည့်တောင်ကြီးကဲ့သို့သောအရာသည် ပင်လယ်ထဲသို့ ပစ်ချခြင်းခံရ၏။ ပင်လယ်ရေသုံးပုံတစ်ပုံသည် သွေးအဖြစ်သို့ ပြောင်းလဲသွား၏။ 9 ပင်လယ်၌ရှိသော သက်ရှိသတ္တဝါသုံးပုံတစ်ပုံသေ၍ သင်္ဘောသုံးပုံတစ်ပုံသည်လည်း ပျက်စီးသွား၏။ 10 တတိယကောင်းကင်တမန်သည် တံပိုးခရာမှုတ်သောအခါ မီးတုတ်ကဲ့သို့ တောက်လောင်နေသော ကြယ်ကြီးတစ်လုံးသည် ကောင်းကင်မှ ကြွေကျ၍ မြစ်သုံးပုံတစ်ပုံနှင့် စမ်းရေတွင်းများပေါ်သို့ ကျလေ၏။ 11 ထိုကြယ်၏အမည်မှာ “ဒေါန” ဖြစ်၍ ရေ၏ သုံးပုံတစ်ပုံသည် ဒေါနကဲ့သို့ ခါးသွား၏။ ထိုရေခါးကို သောက်သောလူများစွာသည် သေဆုံးကြ၏။ 12 စတုတ္ထကောင်းကင်တမန်သည် တံပိုးခရာမှုတ်သောအခါ နေ၊ လ၊ ကြယ်တို့၏ သုံးပုံတစ်ပုံသည် ထိခိုက်ပျက်စီးသွားသဖြင့် ၎င်းတို့၏အလင်းသည် သုံးပုံတစ်ပုံ လျော့နည်းသွား၏။ နေ့၏သုံးပုံတစ်ပုံနှင့် ည၏သုံးပုံတစ်ပုံသည် အလင်းရောင်မရကြ။ 13 ထို့နောက် ကောင်းကင်အလယ်၌ ပျံဝဲနေသည့် လင်းယုန်ငှက်တစ်ကောင်ကို ကျွန်ုပ်မြင်ရ၏။ ထိုလင်းယုန်က “ကျန်ရှိသောကောင်းကင်တမန်သုံးပါးတို့၏ တံပိုးခရာမှုတ်တော့မည့်အသံကြောင့် ကမ္ဘာလောက၌ နေထိုင်ကြသောသူတို့သည် အမင်္ဂလာရှိကြလိမ့်မည်။ အမင်္ဂလာရှိကြလိမ့်မည်။ အမင်္ဂလာရှိကြလိမ့်မည်” ဟုကျယ်လောင်စွာ ကြွေးကြော်သည်ကို ကျွန်ုပ်ကြားရ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.