Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

ဗျာ​ဒိတ် 21 - ခေတ်သစ်​မြန်မာ သမ္မာကျမ်း


ကောင်းကင်သစ်​နှင့် မြေကြီးသစ်

1 ထို့နောက် ကောင်းကင်သစ်​နှင့် မြေကြီးသစ်​ကို ကျွန်ုပ်​မြင်ရ၏။ ပထမ​ကောင်းကင်​နှင့် ပထမ​မြေကြီး​သည် ကွယ်ပျောက်သွား​၍ ပင်လယ်​သည်လည်း မရှိတော့ပေ။

2 သန့်ရှင်းသော​မြို့တော်​ဖြစ်သော ဂျေရုဆလင်​မြို့သစ်​သည် သတို့သား​အတွက် လှပ​စွာ ဝတ်ဆင်ထားသော သတို့သမီး​တစ်ဦး​ကဲ့သို့ ပြင်ဆင်​လျက် ဘုရားသခင်​ထံတော် ကောင်းကင်ဘုံ​မှ ဆင်းသက်လာသည်​ကို ကျွန်ုပ်​မြင်ရ၏။

3 ထို့နောက် ရာဇပလ္လင်တော်​မှ ကျယ်လောင်သော​အသံ​ကို ကျွန်ုပ်​ကြားရ၏။ ထို​အသံ​မှာ “ကြည့်လော့။ ဘုရားသခင် စံမြန်းရာ​နေရာ​သည် လူတို့​တွင် ရှိ​၍ သူတို့​နှင့်အတူ စံမြန်းတော်မူမည်။ သူတို့​သည် ကိုယ်တော်​၏​လူများ​ဖြစ်ကြပြီး ဘုရားသခင်​ကိုယ်တိုင် သူတို့​နှင့်အတူ ရှိနေ​၍ သူတို့​၏​ဘုရားသခင် ဖြစ်တော်မူ​လိမ့်မည်။

4 ကိုယ်တော်​သည် သူတို့​၏ မျက်လုံး​မှ မျက်ရည်​ရှိသမျှ​ကို သုတ်တော်မူ​လိမ့်မည်။ သေခြင်း၊ ညည်းတွားခြင်း၊ ငိုကြွေးခြင်း၊ နာကျင်ခြင်း​တို့​သည် မရှိတော့ပေ။ ရှေးယခင်​က ဖြစ်ခဲ့သော​အရာတို့​သည် ကွယ်ပျောက်ကြပြီ” ဟူ၍ ဖြစ်၏။

5 ရာဇပလ္လင်တော်​ပေါ်၌ ထိုင်တော်မူသော​အရှင်​က “ငါ​သည် အရာ​အားလုံး​ကို အသစ်​ဖြစ်စေ၏” ဟု မိန့်တော်မူ​ပြီးနောက် “ဤ​စကားတို့​သည် သစ္စာ​စကား၊ မှန်သော​စကား​ဖြစ်​သောကြောင့် ရေးထားလော့” ဟူ၍​လည်း မိန့်တော်မူ၏။

6 ကိုယ်တော်​က “အမှု​ပြီးပြီ။ ငါ​သည် အာလဖာ​နှင့် အိုမီဂါ၊ အစဦးဆုံးသောသူ​နှင့် နောက်ဆုံးသောသူ​ဖြစ်၏။ ရေငတ်သော​သူ​အား အသက်​စမ်းရေ​ကို အခမဲ့ ငါ​ပေးမည်။

7 အောင်မြင်သော​သူ​သည် ဤ​အရာများ​ကို အမွေခံရ​လိမ့်မည်။ ငါ​သည် သူ​၏​ဘုရားသခင်​ဖြစ်မည်။ သူတို့​သည် ငါ​၏​သားသမီးများ​ဖြစ်ကြ​လိမ့်မည်။

8 သို့ရာတွင် ကြောက်တတ်သူများ၊ မယုံကြည်သူများ၊ စက်ဆုပ်ရွံ့ရှာဖွယ်​ကောင်းသူများ၊ လူသတ်သမားများ၊ တရား​နှင့်​မညီသော မေထုန်​ကို ပြုသူများ၊ ပြုစားတတ်သူများ၊ ရုပ်တု​ကိုးကွယ်သူများ​နှင့် လိမ်လည်သူများ​အားလုံးတို့​သည် ကန့်​နှင့် လောင်သော​မီးအိုင်​ထဲသို့ ပစ်ချခြင်း​ခံကြရမည်။ မီးအိုင်​သည် ဒုတိယ​သေခြင်း​ဖြစ်၏” ဟု​မိန့်တော်မူ၏။


ဂျေရုဆလင်​မြို့သစ်

9 နောက်ဆုံးသော​ဘေးဒဏ် ခုနစ်ပါး​နှင့်​ပြည့်နေသော ဖလား​ခုနစ်လုံး​ကို ကိုင်ဆောင်ထားသည့် ကောင်းကင်တမန်​ခုနစ်ပါး​အနက် တစ်ပါး​သည် လာ​၍ “လာလော့။ သိုးသငယ်​၏​ဇနီးလောင်း​ဖြစ်သူ သတို့သမီး​ကို ငါ​ပြမည်” ဟု ကျွန်ုပ်​အား​ဆို၏။

10 ကျွန်ုပ်​အပေါ် ဝိညာဉ်တော်​သက်ရောက်လာ​သဖြင့် ကောင်းကင်တမန်​သည် ကျွန်ုပ်​ကို ကြီးမား​၍ မြင့်မားသော​တောင်​သို့ ခေါ်ဆောင်သွား​ကာ ဘုရားသခင်​ထံ ကောင်းကင်ဘုံ​မှ ဆင်းသက်သည့် သန့်ရှင်းသော​မြို့တော် ဂျေရုဆလင်မြို့​ကို ကျွန်ုပ်​အား ပြ၏။

11 ထို​မြို့​သည် ဘုရားသခင်​၏ ဘုန်းအသရေတော်​နှင့် ထွန်းတောက်​ပြီး ၎င်း​၏ ထွန်းလင်း​တောက်ပမှု​သည် ကျောက်သလင်း​သဖွယ် ကြည်လင်သည့် နဂါးသွဲ့​ကဲ့သို့ အလွန်​အဖိုးတန်သော​ကျောက်မျက်​ရတနာ​နှင့်​တူ၏။

12 ၎င်း​တွင် ကြီးမား​၍ မြင့်မားသော​မြို့ရိုး​ရှိပြီး တံခါး​ဆယ့်နှစ်ပေါက်​ပါ၏။ တံခါးဝတို့​တွင် ကောင်းကင်တမန်​ဆယ့်နှစ်ပါး​ရှိပြီး တံခါး​အသီးသီး​ပေါ်တွင် အစ္စရေး​မျိုးနွယ်စု ဆယ့်နှစ်စုတို့​၏ အမည်​အသီးသီး​ကို ရေးထား၏။

13 အရှေ့​ဘက်တွင် တံခါး​သုံးပေါက်၊ မြောက်​ဘက်တွင် သုံးပေါက်၊ တောင်​ဘက်တွင် သုံးပေါက်၊ အနောက်​ဘက်တွင် သုံးပေါက်​ပါရှိ၏။

14 မြို့ရိုး​သည် အုတ်မြစ်​ဆယ့်နှစ်ခု​ရှိ​၍ ၎င်းတို့​အသီးသီး​ပေါ်​တွင် သိုးသငယ်​၏ တမန်တော်​ဆယ့်နှစ်ပါးတို့​၏ အမည်​အသီးသီး​ကို ရေးထား၏။

15 ကျွန်ုပ်​နှင့် စကားပြောသော​ကောင်းကင်တမန်​သည် ထို​မြို့၊ မြို့တံခါး​နှင့် မြို့ရိုးတို့​ကို တိုင်းထွာ​ရန် ရွှေ​ကျူရိုး​ကို ကိုင်ဆောင်ထား၏။

16 မြို့​သည် စတုရန်း​ပုံသဏ္ဌာန်​ရှိ​၍ အလျား​နှင့်​အနံ​သည် တူညီ၏။ ထို​ကောင်းကင်တမန်​သည် မြို့​ကို ရွှေ​ကျူရိုး​ဖြင့် တိုင်းထွာ​ရာ အလျား၊ အနံ​နှင့် အမြင့်တို့​မှာ မိုင်​တစ်ထောင့်လေးရာ​ခန့် အသီးသီး​ကျယ်ဝန်းသည်​ကို တွေ့ရ၏။

17 ကောင်းကင်တမန်​သည် လူတို့​၏​အတိုင်းအတာ​ဖြင့် မြို့ရိုး​ကို တိုင်းတာ​ရာ အမြင့်​နှစ်ရာ​တစ်ဆယ့်ခြောက်ပေ ရှိ၏။

18 မြို့ရိုး​ကို နဂါးသွဲ့ကျောက်​ဖြင့် တည်ဆောက်ထား၏။ မြို့တော်​မှာ ဖန်​ကဲ့သို့ သန့်စင်သော​ရွှေစင်​ဖြင့် တည်သော​မြို့​ဖြစ်၏။

19 မြို့ရိုး​အုတ်မြစ်များ​ကို ကျောက်မျက်​ရတနာ​အမျိုးမျိုး​ဖြင့် အလှဆင်ထား၏။ ပထမ​အုတ်မြစ်​မှာ နဂါးသွဲ့၊ ဒုတိယ​အုတ်မြစ်​မှာ နီလာ၊ တတိယ​အုတ်မြစ်​မှာ မဟူရာ၊ စတုတ္ထ​အုတ်မြစ်​မှာ မြ၊

20 ပဉ္စမ​အုတ်မြစ်​မှာ ကြောင်၊ ဆဋ္ဌမ​အုတ်မြစ်​မှာ ပတ္တမြား၊ သတ္တမ​အုတ်မြစ်​မှာ သလင်းဝါ၊ အဋ္ဌမ​အုတ်မြစ်​မှာ မျက်ရွဲ၊ နဝမ​အုတ်မြစ်​မှာ ဥဿဖရား၊ ဒသမ​အုတ်မြစ်​မှာ မဟူရာစိမ်း၊ ဧက​ဒသမ​အုတ်မြစ်​မှာ နီလာရင့်ရောင်​ကျောက်​နှင့် ဒွာဒသမ​အုတ်မြစ်​မှာ နီလာခရမ်း​ဖြစ်၏။

21 မြို့တံခါး​တစ်ခုစီ​ကို ပုလဲ​တစ်လုံးစီ​ဖြင့် ပြုလုပ်ထား​၍ တံခါး​ဆယ့်နှစ်ပေါက်​တွင် ပုလဲ​ဆယ့်နှစ်လုံး​ရှိ၏။ မြို့တော်​၏​လမ်းမကြီး​ကို ဖောက်ထွင်း​မြင်ရသည့်​ဖန်​ကဲ့သို့ သန့်စင်သော​ရွှေ​ဖြင့် ပြုလုပ်ထား၏။

22 မြို့​ထဲ၌ ဗိမာန်တော်​ကို ကျွန်ုပ်​မမြင်ရ။ အဘယ်ကြောင့်ဆိုသော် အနန္တ​တန်ခိုးရှင် ဘုရားသခင်​နှင့် သိုးသငယ်တော်​သည် မြို့​၏​ဗိမာန်​ဖြစ်တော်မူ​သောကြောင့်​ပင်။

23 ဘုရားသခင်​၏​ဘုန်းအသရေတော်​သည် အလင်း​ပေးတော်မူ​၍ သိုးသငယ်တော်​သည် ထို​မြို့​၏ ဆီမီး​သဖွယ် ဖြစ်​သောကြောင့် မြို့​သည် နေ​နှင့်​လတို့​၏​အလင်း​ကို မလိုအပ်ပေ။

24 လူမျိုး​အပေါင်းတို့​သည် ထို​မြို့​၏ အလင်း​ကို အမှီပြု​၍ သွားလာကြ​လိမ့်မည်။ လောကီ​ရှင်ဘုရင်တို့​သည် မိမိတို့​၏ ဘုန်းအသရေ​ကို ထို​မြို့​ထဲသို့ ယူဆောင်လာကြ​လိမ့်မည်။

25 မြို့တံခါးများ​ကို မပိတ်ဘဲ တစ်နေ့လုံး​ဖွင့်ထား​လိမ့်မည်။ အဘယ်ကြောင့်ဆိုသော် ထို​မြို့​၌ ည​ဟူ၍ မရှိ​သောကြောင့်​ဖြစ်၏။

26 လူအပေါင်းတို့​သည် မိမိတို့​၏ ဘုန်းအသရေ​နှင့် ဂုဏ်အသရေ​ကို ထို​မြို့​ထဲသို့ ယူဆောင်လာကြ​လိမ့်မည်။

27 မည်သည့်​ညစ်ညမ်းသော​အရာ​မျှ ထို​မြို့​ထဲသို့ ဝင်ရ​လိမ့်မည်​မဟုတ်။ စက်ဆုပ်​ရွံရှာဖွယ်​အမှု​ကို ပြုသူ​နှင့် လိမ်လည်သူ​သည်လည်း ဝင်ရ​လိမ့်မည်​မဟုတ်။ သိုးသငယ်တော်​၏ အသက်​စာစောင်​တွင် စာရင်း​ဝင်သော​သူတို့​သာလျှင် ဝင်ကြရ​လိမ့်မည်။

ခေတ်သစ်​မြန်မာ သမ္မာကျမ်း™

မူပိုင်ခွင့်၊ © Biblica Inc. ၁၉၈၅၊ ၂၀၂၄

ခွင့်ပြုချက်​ဖြင့် အသုံးပြုသည်။ ကမ္ဘာတစ်ဝန်း​မူပိုင်ခွင့်များ​ရယူပြီးဖြစ်သည်။

Burmese Contemporary Bible™

Copyright © 1985, 2024 by Biblica, Inc.

Used with permission. All rights reserved worldwide.

Biblica, Inc.
ကြှနျုပျတို့နောကျလိုကျပါ:



ကြော်ငြာတွေ