ဗျာဒိတ် 16 - ခေတ်သစ်မြန်မာ သမ္မာကျမ်းဘုရားသခင်၏ အမျက်တော်ဖလား ခုနစ်လုံး 1 ထို့နောက် ဗိမာန်တော်ထဲမှ “သွားလော့။ ဘုရားသခင်၏ အမျက်တော်နှင့်ပြည့်နေသောဖလား ခုနစ်လုံးကို ကမ္ဘာမြေပေါ်သို့ သွန်းလောင်းလော့” ဟု ကောင်းကင်တမန်ခုနစ်ပါးတို့အား ကျယ်လောင်စွာ ပြောသည့်အသံကို ကျွန်ုပ်ကြားရ၏။ 2 ပထမကောင်းကင်တမန်သည် သူ၏ ဖလားကို ကမ္ဘာမြေကြီးပေါ်သို့ သွန်းလောင်းလိုက်သောအခါ သားရဲ၏ အမှတ်တံဆိပ်ရှိသောသူတို့နှင့် သားရဲ၏ရုပ်တုကို ကိုးကွယ်သောသူတို့၌ အလွန်ဆိုးရွားသောအနာစိမ်းများ ပေါက်လေ၏။ 3 ဒုတိယကောင်းကင်တမန်သည် သူ၏ ဖလားကို ပင်လယ်ပေါ်သို့ သွန်းလောင်းလိုက်သောအခါ ရေသည် လူသေ၏ သွေးကဲ့သို့ ဖြစ်သွားပြီး ပင်လယ်၌ရှိသော သတ္တဝါအားလုံး သေကုန်လေ၏။ 4 တတိယကောင်းကင်တမန်သည် သူ၏ ဖလားကို မြစ်များနှင့် စမ်းရေတွင်းများပေါ်သို့ သွန်းလောင်းလိုက်သောအခါ ရေသည် သွေးဖြစ်သွား၏။ 5 ထို့နောက် ရေကို အုပ်စိုးသောကောင်းကင်တမန်က “အို သန့်ရှင်းတော်မူသောအရှင်… ကိုယ်တော်သည် ယခုရှိလျက်၊ ယခင်ကလည်းရှိတော်မူပြီး ကိုယ်တော်၏ တရားစီရင်ခြင်းသည် တရားမျှတပါ၏။ 6 ထိုသူတို့သည် သန့်ရှင်းသူတို့နှင့် ပရောဖက်တို့၏ သွေးကို သွန်းခဲ့ကြသဖြင့် ထိုသူတို့နှင့် ထိုက်တန်သည့်အတိုင်း ကိုယ်တော်သည် ထိုသွေးကို သူတို့အား တိုက်တော်မူ၏” ဟုပြောသည်ကို ကျွန်ုပ်ကြားရ၏။ 7 ထို့နောက် “မှန်ပါ၏။ အို အနန္တတန်ခိုးရှင် ဘုရားသခင်… ကိုယ်တော်၏ စီရင်တော်မူချက်တို့သည် မှန်ကန်၍ တရားမျှတပါ၏” ဟူ၍ ယဇ်ပလ္လင်မှ ထွက်လာသောအသံကို ကျွန်ုပ်ကြားရ၏။ 8 ထို့နောက် စတုတ္ထကောင်းကင်တမန်သည် သူ၏ ဖလားကို နေပေါ်သို့ သွန်းလောင်းလိုက်သောအခါ နေသည် လူတို့အား မီးလောင်ရသောအခွင့်ကို ရလေ၏။ 9 လူတို့သည် ပြင်းထန်သော အပူရှိန်ကြောင့် လောင်ကျွမ်းခြင်းကို ခံရသဖြင့် ဤဘေးဒဏ်များကျရောက်စေရန် အခွင့်အာဏာရှိသော ဘုရားသခင်၏ နာမတော်ကို ကျိန်ဆဲကြ၏။ သူတို့သည် နောင်တလည်း မရကြ။ ကိုယ်တော်၏ဂုဏ်တော်ကိုလည်း မချီးမွမ်းကြ။ 10 ထို့နောက် ပဉ္စမကောင်းကင်တမန်သည် သူ၏ ဖလားကို သားရဲ၏ ရာဇပလ္လင်ပေါ်သို့ သွန်းလောင်းလိုက်သောအခါ သားရဲ၏ နိုင်ငံသည် မှောင်မိုက်သွား၏။ လူတို့သည် ပြင်းထန်သောဝေဒနာကြောင့် လျှာကို ကိုက်ထားကြရ၏။ 11 သူတို့သည် ခံစားရသောဝေဒနာနှင့် အနာစိမ်းတို့ကြောင့် ကောင်းကင်ဘုံရှင်ဘုရားသခင်ကို ကျိန်ဆဲကြ၏။ မိမိတို့၏အကျင့်ဆိုးများအတွက်လည်း နောင်တမရကြ။ 12 ဆဋ္ဌမကောင်းကင်တမန်သည် သူ၏ ဖလားကို ယူဖရေးတီးမြစ်ကြီးပေါ်သို့ သွန်းလောင်းလိုက်သောအခါ မြစ်ရေခန်းခြောက်သွား၏။ ထို့ကြောင့် အရှေ့ပြည်၌ရှိသော ဘုရင်များအတွက် လမ်းပွင့်သွား၏။ 13 ထို့နောက် ဖားနှင့်တူသော နတ်ဆိုးသုံးကောင်ကို ကျွန်ုပ်မြင်ရ၏။ ထိုနတ်ဆိုးတို့သည် နဂါး၊ သားရဲနှင့် ပရောဖက်အတုအယောင်တို့၏ ခံတွင်းအသီးသီးမှ ထွက်လာကြ၏။ 14 သူတို့သည် နိမိတ်လက္ခဏာများကို ပြနိုင်သော နတ်ဆိုးတို့၏ဝိညာဉ်များဖြစ်ကြ၏။ ၎င်းတို့သည် အနန္တတန်ခိုးရှင် ဘုရားသခင်၏ တရားစီရင်ရာနေ့ရက်ကြီးတွင် ဆင်နွှဲမည့်စစ်ပွဲအတွက် ကမ္ဘာတစ်ဝန်းလုံးရှိ ရှင်ဘုရင်များကို စုဝေးရန် ထွက်ခွာသွားကြ၏။ 15 “ကြည့်လော့။ သူခိုးကဲ့သို့ ငါလာမည်။ သို့ဖြစ်၍ အဝတ်မပါဘဲ သွားလာသဖြင့် အရှက်ကွဲခြင်းမျိုး မဖြစ်စေရန် မိမိ၏ အဝတ်ကို အသင့်ဝတ်ဆင်လျက် နိုးကြားနေသောသူသည် မင်္ဂလာရှိ၏။” 16 ထိုနတ်ဆိုးတို့သည် ရှင်ဘုရင်များအားလုံးကို ဟေဗြဲဘာသာစကားဖြင့် “အာမဂေဒုန်” ဟု ခေါ်သောအရပ်တွင် စုဝေးစေ၏။ 17 ထို့နောက် သတ္တမကောင်းကင်တမန်သည် သူ၏ ဖလားကို လေထဲသို့ သွန်းလောင်းလိုက်သောအခါ “အမှုပြီးမြောက်ပြီ” ဟု ဗိမာန်တော်အတွင်းရှိ ရာဇပလ္လင်တော်မှ ကျယ်လောင်စွာ ပြောဆိုသောအသံ ထွက်လာ၏။ 18 ထိုအခါ လျှပ်စီးလက်ခြင်း၊ အသံမြည်ဟည်းခြင်း၊ မိုးခြိမ်းခြင်းတို့ ဖြစ်ပေါ်လာပြီးနောက် ပြင်းထန်သောငလျင်လှုပ်လေ၏။ ကမ္ဘာမြေပေါ်တွင် လူတို့ပေါ်ပေါက်လာသည့်အချိန်မှစ၍ ဤမျှ ပြင်းထန်သောငလျင်မျိုး မလှုပ်ခဲ့ဖူးပေ။ 19 မြို့ကြီးသည် သုံးပိုင်းကွဲ၍ တိုင်းနိုင်ငံများ၏ မြို့များသည်လည်း ပြိုပျက်ကုန်၏။ ဘုရားသခင်သည် ဘေဘီလုံမြို့ကြီး၏ အပြစ်များကို သတိရတော်မူလျက် အမျက်တော်နှင့် ပြည့်နေသော စပျစ်ဝိုင်ကို ထိုမြို့အား တိုက်တော်မူ၏။ 20 ထိုအခါ ကျွန်းများအားလုံးသည် ပျောက်ကွယ်သွား၍ တောင်များသည်လည်း ပျောက်ပျက်ကုန်၏။ 21 အလေးချိန်ပေါင်တစ်ရာခန့် ရှိသော မိုးသီးတို့သည် ကောင်းကင်မှ လူတို့အပေါ်သို့ ကျလေ၏။ ထိုမိုးသီးဘေးဒဏ် အလွန်ပြင်းထန်သောကြောင့် လူတို့သည် ဘုရားသခင်ကို ကျိန်ဆဲကြ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.