တမန်တော်ဝတ္ထု 9 - ခေတ်သစ်မြန်မာ သမ္မာကျမ်းရှောလု ပြောင်းလဲခြင်း 1 သို့ရာတွင် ရှောလုသည် သခင်ဘုရား၏တပည့်တော်များကို ခြိမ်းခြောက်၍ သတ်ဖြတ်ရန် စိတ်ပြင်းပြနေသေး၏။ သူသည် ယဇ်ပုရောဟိတ်မင်းထံ သွား၍ 2 ခရစ်တော်၏တရားလမ်းသို့လိုက်သော အမျိုးသား၊ အမျိုးသမီးများကိုတွေ့ရှိပါက ဖမ်းဆီး၍ ဂျေရုဆလင်မြို့သို့ ခေါ်ဆောင်လာရေးအတွက် ဒမတ်စကပ်မြို့ရှိ ဂျူးဝတ်ပြုဆောင်များသို့ အမှာစာများရေးပေးရန် တောင်းခံလေ၏။ 3 ဤသို့ဖြင့် ခရီးပြုရာတွင် ဒမတ်စကပ်မြို့အနီးသို့ ရောက်သောအခါ ကောင်းကင်မှအလင်းသည် သူ၏ပတ်လည်တွင် ရုတ်တရက်ထွန်းတောက်လေ၏။ 4 သူသည် မြေပြင်ပေါ်သို့ လဲကျသွားပြီးနောက် “ရှောလု၊ ရှောလု ငါ့ကို အဘယ်ကြောင့် ညှဉ်းပန်းနှိပ်စက်သနည်း” ဟု သူ့အား ပြောဆိုသောစကားသံကို ကြားရ၏။ 5 ရှောလုကလည်း “သခင်… ကိုယ်တော်သည် မည်သူဖြစ်ပါသနည်း” ဟု လျှောက်၏။ ထိုအသံရှင်က “ငါသည် သင်ညှဉ်းပန်းနှိပ်စက်နေသောယေရှုဖြစ်၏။ 6 သို့သော်လည်း ထ၍ မြို့ထဲသို့ဝင်လော့။ သင်မည်သို့ဆောင်ရွက်ရမည်ကို ပြောပြလိမ့်မည်” ဟု တုံ့ပြန်တော်မူ၏။ 7 ရှောလုနှင့်အတူ ခရီးသွားကြသောသူတို့သည် အသံကိုသာ ကြား၍ မည်သူ့ကိုမျှ မမြင်ရသောကြောင့် နှုတ်ဆိတ်အံ့ဩလျက် ရပ်နေကြ၏။ 8 ရှောလုသည် မြေပြင်မှထ၍ မျက်စိကို ဖွင့်သော်လည်း မည်သည့်အရာကိုမျှ မမြင်ရပေ။ ထို့ကြောင့် ထိုသူတို့က သူ့အား တွဲခေါ်၍ ဒမတ်စကပ်မြို့သို့ ခေါ်ဆောင်သွားကြ၏။ 9 သူသည် သုံးရက်တိုင်တိုင် မျက်စိကွယ်ပြီး မစားမသောက်ဘဲနေလေ၏။ 10 ထိုဒမတ်စကပ်မြို့တွင် အာနနိအမည်ရှိသော တပည့်တော်တစ်ဦးရှိ၏။ သခင်ဘုရားကသူ့အား ရူပါရုံတွင် “အာနနိ” ဟု ခေါ်ရာ သူက “အကျွန်ုပ်ရှိပါ၏သခင်ဘုရား” ဟု လျှောက်၏။ 11 သခင်ဘုရားက “သင်သည် ထ၍ လမ်းဖြောင့်ဟု ခေါ်သော လမ်းထဲသို့ သွားလော့။ ထိုနေရာရှိ ယုဒ၏အိမ်တွင် တာရှုမြို့သားရှောလုအမည်ရှိသောသူကို ရှာလော့။ ယခု သူသည် ဆုတောင်းနေ၏။ 12 သူ၏မျက်စိပြန်မြင်ရန် အာနနိအမည်ရှိသူ ဝင်လာ၍ သူ့အပေါ်လက်တင်ကြောင်းကို ရူပါရုံတွင်မြင်ရပြီ” ဟု မိန့်တော်မူ၏။ 13 သို့သော်လည်း အာနနိက “သခင်ဘုရား… ထိုသူသည် ဂျေရုဆလင်မြို့တွင် ယုံကြည်သောသူတို့အား မည်မျှဆိုးရွားစွာပြုခဲ့ကြောင်းကို လူအများထံမှ အကျွန်ုပ်ကြားသိရပါပြီ။ 14 ဤဒေသတွင်လည်း သူသည် သခင်ဘုရား၏အမည်နာမတော်ကို အမှီပြုဆုတောင်းသောသူရှိသမျှတို့ကို ဖမ်းဆီးချုပ်နှောင်ရန် ယဇ်ပုရောဟိတ်ခေါင်းဆောင်များထံမှ အခွင့်အာဏာရရှိထားပါ၏” ဟု လျှောက်လေ၏။ 15 သို့သော် သခင်ဘုရားက “သွားလော့။ ထိုသူသည် လူမျိုးခြားများ၊ ဘုရင်များနှင့် အစ္စရေးလူမျိုးတို့ရှေ့တွင် ငါ့အကြောင်းကို ပြောကြားရန် ငါရွေးကောက်ထားသော တန်ဆာပလာဖြစ်၏။ 16 သူသည် ငါ့အမည်နာမကြောင့် မည်မျှဒုက္ခခံရမည်ကို ငါကိုယ်တိုင် သူ့အားပြမည်” ဟု မိန့်တော်မူ၏။ 17 ထို့ကြောင့် အာနနိသည် သွား၍ အိမ်ထဲသို့ ဝင်လေ၏။ သူ၏လက်ကို ရှောလုပေါ်သို့ တင်လျက် “ငါ့ညီရှောလု… သင်လာသောလမ်းတွင် သင့်အားကိုယ်ထင်ပြသော သခင်ယေရှုက သင့်မျက်စိပြန်မြင်စေရန်နှင့် သင့်ကို သန့်ရှင်းသောဝိညာဉ်တော်နှင့်ပြည့်ဝစေရန် ငါ့ကိုစေလွှတ်လိုက်ပါ၏” ဟု ပြော၏။ 18 ချက်ချင်းပင် ငါးအကြေးခွံကဲ့သို့သော အရာသည် ရှောလု၏မျက်စိမှ ကွာကျ၍ မျက်စိပြန်မြင်လေ၏။ ထိုအခါ သူသည် ထ၍ နှစ်ခြင်းမင်္ဂလာ ခံယူပြီးနောက် 19 အစာစားသဖြင့် ခွန်အားပြန်လည် ပြည့်လေ၏။ ရှောလုသည် ဒမတ်စကပ်မြို့မှ တပည့်တော်များနှင့် ရက်အနည်းငယ် နေထိုင်လေ၏။ ဒမတ်စကပ်မြို့နှင့် ဂျေရုဆလင်မြို့တွင် ရှောလုဟောပြောခြင်း 20 ထို့နောက် ချက်ချင်းပင် ရှောလုက “ယေရှုသည် ဘုရားသားတော်ဖြစ်ပေသည်” ဟူ၍ ဂျူးဝတ်ပြုဆောင်များတွင် ဟောပြောလေ၏။ 21 ကြားသောသူအပေါင်းတို့သည် အံ့အားသင့်၍ “ဤသူသည် ဂျေရုဆလင်မြို့ရှိ ယေရှု၏နောက်လိုက်များကို ဖျက်ဆီးသူမဟုတ်လော။ ဤမြို့တွင်လည်း ထိုသူတို့ကို ဖမ်းဆီး၍ ယဇ်ပုရောဟိတ်ခေါင်းဆောင်များထံ ပို့ဆောင်ရန် ဤနေရာသို့ ရောက်လာသည်မဟုတ်လော” ဟု ပြောဆိုကြ၏။ 22 ရှောလုသည်လည်း ပိုမို၍ စိတ်အားထက်သန်လာကာ ယေရှုသည် ခရစ်တော်ဖြစ်ကြောင်း သက်သေထူခြင်းအားဖြင့် ဒမတ်စကပ်မြို့ရှိ ဂျူးလူမျိုးများအား အံ့ဩတွေဝေစေ၏။ 23 အချိန်ကြာလာသောအခါ ဂျူးတို့က သူ့ကို သတ်ရန် ကြံစည်ကြ၏။ 24 သို့သော် သူတို့၏အကြံအစည်ကို ရှောလုသည်ကြားသိလေ၏။ ထိုသူတို့ကလည်း ရှောလုကို သတ်နိုင်ရန် နေ့ညမပြတ် မြို့တံခါးများကို စောင့်ကြည့်နေကြ၏။ 25 သို့သော် ရှောလု၏တပည့်များက ညအချိန်၌ သူ့ကို ခြင်းတောင်းတစ်ခုတွင်ထည့်ကာ မြို့ရိုးမှ လျှောချကြ၏။ 26 ဂျေရုဆလင်မြို့သို့ ရောက်သောအခါ တပည့်တော်များနှင့် ပူးပေါင်းရန် ကြိုးပမ်းသော်လည်း သူတို့က ရှောလုသည် တပည့်တော်ဖြစ်ကြောင်းကို မယုံကြည်ဘဲ ကြောက်ကြ၏။ 27 သို့သော် ဗာနဗသည် သူ့ကိုတမန်တော်များထံသို့ ခေါ်ဆောင်လာခဲ့ပြီး ရှောလုသည် လမ်းခရီးတွင် သခင်ဘုရားကို မည်သို့ တွေ့မြင်ခဲ့ပုံ၊ သခင်ဘုရားက သူ့အား မည်သို့မိန့်တော်မူခဲ့ပုံနှင့် ဒမတ်စကပ်မြို့တွင်လည်း ယေရှု၏အမည်နာမကိုအမှီပြု၍ ရဲဝံ့စွာဟောပြောခဲ့ပုံတို့ကို ပြောပြလေ၏။ 28 ထို့ကြောင့် ရှောလုသည် သူတို့နှင့်အတူနေလျက် ဂျေရုဆလင်မြို့အတွင်း ဝင်ထွက်သွားလာကာ သခင်ဘုရား၏အမည်နာမကိုအမှီပြု၍ ရဲဝံ့စွာ ဟောပြောလျက်နေ၏။ 29 သူသည် ဂရိစကားပြောသောဂျူးတို့နှင့် အချေအတင်ပြောဆိုဆွေးနွေးလေ၏။ သို့သော် သူတို့က ရှောလုကို သတ်ရန် ကြိုးပမ်းကြ၏။ 30 ထိုအကြောင်းကို ယုံကြည်သူတို့ ကြားသိသောအခါ သူ့အား ဆီဇာရီးယားမြို့သို့ ခေါ်ဆောင်လာပြီး တာရှုမြို့သို့ လွှတ်လိုက်ကြ၏။ 31 ထို့နောက် ယုဒပြည်၊ ဂါလိလဲပြည်နှင့် ရှမာရိပြည်တစ်လျှောက်၌ အသင်းတော်သည် ငြိမ်းချမ်း၍ တည်တံ့ခိုင်မြဲလာ၏။ သခင်ဘုရားကို ကြောက်ရွံ့ခြင်းနှင့် သန့်ရှင်းသောဝိညာဉ်တော်၏နှစ်သိမ့်အားပေးခြင်းတို့ဖြင့် ရှင်သန်၍ အသင်းသားအရေအတွက်သည်လည်း တိုးပွားလာ၏။ ပေတရုက အဲနေကို ကျန်းမာစေခြင်းနှင့် ဒေါ်ကာကို အသက်ပြန်ရှင်စေခြင်း 32 ပေတရုသည် အရပ်ရပ်သို့ လှည့်လည်သွားလာပြီး လုဒ္ဒမြို့ရှိ ယုံကြည်သူများထံသို့ ရောက်လေ၏။ 33 ထိုမြို့တွင် ရှစ်နှစ်ပတ်လုံး လေဖြတ်၍ အိပ်ရာထဲ၌လှဲနေရသည့် အဲနေအမည်ရှိသောသူကို တွေ့ရ၏။ 34 ပေတရုက ထိုသူအား “အဲနေ၊ ယေရှုခရစ်တော်သည် သင့်ကို ကျန်းမာစေပြီ။ ထ၍ အိပ်ရာသိမ်းလော့” ဟု ဆိုသော် သူသည်ချက်ချင်းထလေ၏။ 35 လုဒ္ဒမြို့နှင့် ရှာရုန်ဒေသရှိလူများသည်လည်း အဲနေကို မြင်၍ သခင်ဘုရားထံတော်သို့ ပြောင်းလဲလာကြ၏။ 36 ယုပ္ပေမြို့တွင် ဂရိဘာသာစကားအားဖြင့် ဒေါ်ကာဟု ခေါ်သော၊ တဗိသအမည်ရှိသည့် တပည့်တော်မတစ်ယောက်ရှိ၏။ ထိုအမျိုးသမီးသည် အကျင့်သီလကောင်း၍ အလှူအတန်းရက်ရောသူဖြစ်၏။ 37 ထိုနေ့ရက်များတွင် သူသည် နာမကျန်းဖြစ်ပြီး ကွယ်လွန်သွား၏။ လူတို့က သူ၏အလောင်းကို ဆေးကြောသန့်စင်ကာ အပေါ်ထပ်အခန်း၌ ထားကြ၏။ 38 လုဒ္ဒမြို့သည် ယုပ္ပေမြို့နှင့် နီးသဖြင့် ပေတရုသည် လုဒ္ဒမြို့တွင် ရောက်ရှိနေကြောင်း ကြားသိသောတပည့်တော်များက လူနှစ်ယောက်ကို ပေတရုထံသို့လွှတ်၍ “ကျွန်ုပ်တို့ထံ အလျင်အမြန်လာပါ” ဟု တောင်းပန်ကြ၏။ 39 ထို့ကြောင့် ပေတရုသည် သူတို့နှင့် လိုက်သွားလေ၏။ အိမ်သို့ရောက်သောအခါ သူတို့က အပေါ်ထပ်အခန်းသို့ ခေါ်ဆောင်သွားကြ၏။ မုဆိုးမတို့သည် ပေတရုအနားတွင် ရပ်ကာငိုကြွေးလျက် သူတို့နှင့်အတူရှိစဉ်က တဗိသချုပ်ပေးခဲ့သော အင်္ကျီနှင့်အဝတ်အစားများကို ပြကြလေ၏။ 40 ပေတရုသည် ထိုသူအားလုံးတို့ကို အပြင်သို့ထွက်စေပြီး ဒူးထောက်လျက် ဆုတောင်းလေ၏။ အလောင်းရှိရာသို့ လှည့်၍ “တဗိသ… ထလော့” ဟု ဆို၏။ တဗိသသည်လည်း မျက်စိကိုဖွင့်ရာ ပေတရုကိုတွေ့မြင်သဖြင့် ထထိုင်လေ၏။ 41 ပေတရုသည် မိမိလက်ကိုကမ်း၍ သူ့ကိုဆွဲထူပြီးလျှင် ယုံကြည်သူများနှင့် မုဆိုးမများကိုခေါ်ကာ အသက်ရှင်လျက်ရှိသောတဗိသကို သူတို့အား အပ်လေ၏။ 42 ထိုသတင်းသည် ယုပ္ပေတစ်မြို့လုံး ပျံ့နှံ့သွား၍ လူများစွာတို့သည် သခင်ဘုရားအား ယုံကြည်သက်ဝင်လာကြ၏။ 43 ပေတရုသည်လည်း ယုပ္ပေမြို့သားဖြစ်သော သားရေအလုပ်သမား ရှိမုန်ထံ၌ ရက်ပေါင်းများစွာ တည်းခိုလေ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.