တမန်တော်ဝတ္ထု 28 - ခေတ်သစ်မြန်မာ သမ္မာကျမ်းမေလိတေကျွန်းပေါ်သို့ ပေါလုရောက်ရှိခြင်း 1 ကျွန်ုပ်တို့သည် ကျွန်းပေါ်သို့ ဘေးကင်းလုံခြုံစွာ ရောက်ရှိသောအခါ ထိုကျွန်းကိုမေလိတေကျွန်းဟု ခေါ်ကြောင်းသိရှိရ၏။ 2 ကျွန်းသူကျွန်းသားများက ကျွန်ုပ်တို့အပေါ် အလွန်ကြင်နာကြ၏။ မိုးရွာ၍ ချမ်းအေးသောကြောင့် သူတို့သည်မီးဖိုပေးလျက် ကျွန်ုပ်တို့အားလုံးကို ကြိုဆိုဧည့်ခံကြ၏။ 3 ထို့နောက် ပေါလုသည်ထင်းတစ်စည်းကို ကောက်ယူကာ မီးဖိုထဲသို့ထည့်လိုက်သောအခါ မြွေပွေးတစ်ကောင်သည် ပူသောကြောင့် ထင်းစည်းထဲမှထွက်လာ၍ ပေါလု၏လက်ကို ကိုက်လေ၏။ 4 ကျွန်းသူကျွန်းသားများက ပေါလု၏လက်တွင် တွယ်ကပ်လျက်နေသောမြွေကို မြင်သောအခါ “ဤလူသည် လူသတ်သမားဖြစ်မည်။ သူသည်ပင်လယ်ဘေးမှ လွတ်လာသော်လည်း တရားမျှတသောနတ်ဘုရားမသည် သူ့ကိုအသက်ရှင်ခွင့်ပေးမည်မဟုတ်” ဟု အချင်းချင်းပြောဆိုကြ၏။ 5 သို့ရာတွင် ပေါလုသည် မြွေကို မီးဖိုထဲသို့ခါချလိုက်ပြီး ဘေးမသင့်ဘဲ ရှိနေလေ၏။ 6 ပေါလု၏လက်သည် ရောင်လာသဖြင့် ထိုသူတို့က ရုတ်တရက်လဲသေမည်ဟု စောင့်ကြည့်နေကြ၏။ သို့ရာတွင် အချိန်အတန်ကြာစောင့်ကြည့်သော်လည်း ပေါလု၌ မည်သည့်ဘေးအန္တရာယ်မှ မဖြစ်သည်ကို မြင်သောအခါ သူတို့၏ထင်မြင်ချက်ကို ပြောင်း၍ “ဤလူသည် ဘုရားတစ်ဆူဖြစ်သည်” ဟူ၍ ပြောဆိုကြ၏။ 7 ထိုနေရာ အနီးတစ်ဝိုက်တွင် ကျွန်းသူကြီး ပုဗလိပိုင်သည့် မြေကွက်များရှိ၏။ ထိုသူသည် ကျွန်ုပ်တို့ကို ကြိုဆိုလက်ခံ၍ သုံးရက်တိုင် ကောင်းမွန်စွာဧည့်ခံ၏။ 8 ပုဗလိ၏ဖခင်သည် ဖျားနာ၍ ဝမ်းကိုက်သဖြင့် အိပ်ရာ၌လဲလျောင်းနေ၏။ ပေါလုသည် သူ့ထံသို့သွား၍ ဆုတောင်းပေးပြီးမှ သူ့အပေါ်လက်ကိုတင်၍ ကျန်းမာစေ၏။ 9 ဤသို့ဖြစ်ပြီးနောက် ကျွန်းပေါ်ရှိ အခြားဖျားနာသောသူတို့သည်လည်း လာကြ၏။ ပေါလုသည် ထိုသူတို့ကို ကျန်းမာစေ၏။ 10 ထိုသူတို့သည် ကျွန်ုပ်တို့အား လက်ဆောင်များပေးကြ၏။ ထို့နောက် ကျွန်ုပ်တို့ထွက်ခွာမည့် အချိန်ရောက်သောအခါ၌လည်း သူတို့သည် ကျွန်ုပ်တို့လိုအပ်သည့်ရိက္ခာများကို သင်္ဘောပေါ်သို့ တင်ပေးလိုက်ကြ၏။ ရောမမြို့သို့ ပေါလုရောက်ရှိခြင်း 11 သုံးလကြာသော် ကျွန်ုပ်တို့သည် ထိုကျွန်း၌ဆောင်းကာလကတည်းက ရပ်နားထားသောသင်္ဘောဖြင့် ရွက်လွှင့်ကြ၏။ ထိုသင်္ဘောသည် အလက်ဇန်းဒါးမြို့မှ လာ၍ သင်္ဘောဦးတွင် နတ်ဘုရားအမြွာညီနောင်ရုပ် ပါရှိလေ၏။ 12 ထို့နောက် ကျွန်ုပ်တို့သည် သရကုတ်မြို့၌ဆိုက်ကပ်၍ ထိုမြို့၌ သုံးရက်တည်းခိုကြ၏။ 13 ထိုမြို့မှ တစ်ဖန်ရွက်လွှင့်ပြန်ရာ ရေဂျူမြို့သို့ရောက်ကြ၏။ တစ်ရက်ကြာသော် တောင်လေတိုက်သဖြင့် နောက်တစ်နေ့တွင် ပေါတယောလိမြို့သို့ ရောက်ကြ၏။ 14 ထိုမြို့တွင် ယုံကြည်သူတို့ကိုတွေ့သော် သူတို့က ခုနစ်ရက်ခန့် နေရန် တောင်းပန်သည့်အတိုင်း နေပြီးနောက် ကျွန်ုပ်တို့သည် ရောမမြို့သို့သွားကြ၏။ 15 ရောမမြို့ရှိယုံကြည်သူများသည် ကျွန်ုပ်တို့ရောက်လာမည့်အကြောင်းကိုကြားသဖြင့် တချို့သည် အပ္ပိဈေးတိုင်အောင်လည်းကောင်း၊ တချို့သည် ဧည့်ရိပ်သာသုံးဆောင်ဟု ခေါ်သောအရပ်တိုင်အောင်လည်းကောင်း လာရောက်ကြိုဆိုကြ၏။ ပေါလုသည် ထိုသူတို့ကို တွေ့မြင်သောအခါ ဘုရားသခင်၏ကျေးဇူးတော်ကိုချီးမွမ်း၍ အားတက်လေ၏။ 16 ရောမမြို့သို့ ကျွန်ုပ်တို့ရောက်သောအခါ ပေါလုသည် အကျယ်ချုပ်ဖြင့် သီးသန့်နေခွင့်ရပြီး သူ့အား စောင့်ကြပ်သည့်စစ်သားတစ်ဦးသည်လည်း သူနှင့်အတူ ရှိ၏။ ရောမမြို့၌ အစောင့်တပ်သားလက်အောက်တွင် ပေါလုတရားဟောခြင်း 17 သုံးရက်ကြာသော် ပေါလုသည် ဂျူးခေါင်းဆောင်များကို စုဝေးစေ၏။ သူတို့ရောက်ရှိလာသောအခါ ပေါလုက “ညီအစ်ကိုတို့… ကျွန်ုပ်သည် မိမိလူမျိုးကိုလည်းကောင်း၊ ဘိုးဘေးတို့၏ထုံးတမ်းစဉ်လာများကိုလည်းကောင်း ဆန့်ကျင်သည့်အရာတစ်စုံတစ်ခုကိုမျှ မပြုလုပ်ခဲ့သော်လည်း ဂျေရုဆလင်မြို့တွင် ဖမ်းဆီးခံရ၍ ရောမအစိုးရလက်သို့ အပ်နှံခံရ၏။ 18 ရောမအစိုးရတို့သည် ကျွန်ုပ်ကိုစစ်ဆေးကြသောအခါ သေဒဏ်ခံထိုက်သောပြစ်မှုမတွေ့သောကြောင့် ကျွန်ုပ်အားပြန်လွှတ်လိုကြ၏။ 19 သို့ရာတွင် ဂျူးလူမျိုးများက ကန့်ကွက်ကြသောအခါ ကျွန်ုပ်သည်ဆီဇာဘုရင်ထံ မလွဲသာ၍ အယူခံဝင်ရ၏။ ထိုသို့အယူခံဝင်ရခြင်းမှာ ကျွန်ုပ်၏လူမျိုးကို စွပ်စွဲရန် အကြောင်းတစ်စုံတစ်ရာရှိ၍ မဟုတ်ပါ။ 20 ဤအတွက်ကြောင့် ကျွန်ုပ်သည် သင်တို့နှင့်တွေ့ဆုံ၍ စကားပြောရန်တောင်းဆိုခြင်းဖြစ်၏။ အမှန်စင်စစ် ကျွန်ုပ်သည် အစ္စရေးလူမျိုးတို့မျှော်လင့်နေသော ခရစ်တော်ကြွလာသည့် အကြောင်းကို ယုံကြည်သောကြောင့် ဤသံကြိုးနှင့် ချည်နှောင်ခံနေရသည်” ဟု ဆိုလေ၏။ 21 ထိုအခါ သူတို့က “ကျွန်ုပ်တို့သည် ယုဒပြည်မှ သင့်အကြောင်းရေးသားထားသည့်စာများကို မရရှိပါ။ ထိုပြည်မှ ရောက်လာသော ဂျူးညီအစ်ကိုတို့တွင်လည်း သင့်အကြောင်း မကောင်းပြောသောသူ တစ်ယောက်မျှမရှိပါ။ 22 သို့ရာတွင် ဤဂိုဏ်းအကြောင်းနှင့်ပတ်သက်၍ နေရာအနှံ့တွင် ဆန့်ကျင်ပြောဆိုနေကြသည်ကို ကျွန်ုပ်တို့သိထားသောကြောင့် သင်၏ထင်မြင်ယူဆချက်ကို ကြားလိုပါသည်” ဟု ဆိုကြ၏။ 23 ထို့နောက် သူတို့သည် ပေါလုနှင့်တွေ့ဆုံရန် ရက်ချိန်းရွေးကြ၏။ ချိန်းသည့်နေ့ရောက်သော် သူတို့သည် လူပေါင်းများစွာနှင့်တကွ ပေါလုတည်းခိုရာနေရာသို့ရောက်လာကြ၏။ ပေါလုသည် နံနက်အချိန်မှ ညအချိန်တိုင်အောင် ထိုသူတို့အား ဘုရားသခင်၏နိုင်ငံတော်အကြောင်းကိုရှင်းပြလျက် သက်သေခံလေ၏။ မောရှေ၏ပညတ်တရားနှင့် ပရောဖက်ကျမ်းများကိုလည်း ကိုးကား၍ ယေရှုအကြောင်းကို လက်ခံယုံကြည်လာရန် ကြိုးစားဟောပြောလေ၏။ 24 တချို့သည် ပေါလု၏ဟောပြောချက်များကို လက်ခံယုံကြည်၍ တချို့မှာမယုံကြည်ဘဲ နေကြ၏။ 25 ထို့ကြောင့် သူတို့သည် အချင်းချင်းသဘောထားကွဲလွဲကြ၏။ ထို့နောက် ထိုသူတို့ထွက်သွားကြမည်ပြုစဉ် ပေါလုက “ပရောဖက်ဟေရှာယအားဖြင့် သန့်ရှင်းသောဝိညာဉ်တော်က သင်တို့ဘိုးဘေးတို့အား မှန်ကန်စွာမိန့်တော်မူသည်မှာ 26 ‘သင်တို့သည် ငါပြောသည့်စကားကို နားထောင်လျက်နှင့်ပင် နားမလည်ကြ။ ငါလုပ်ဆောင်သည့်အရာကို ကြည့်လျက်နှင့်ပင် သဘောမပေါက်နိုင်ကြဟု ဤလူမျိုးတို့ထံသို့ သွား၍ပြောကြားလော့။ 27 အဘယ်ကြောင့်ဆိုသော် ဤလူတို့၏စိတ်နှလုံးသည် ထုံထိုင်းလျက်၊ နားသည်ထိုင်းလျက်၊ မျက်စိသည်လည်း ပိတ်လျက်ရှိသောကြောင့်ဖြစ်၏။ ထို့ကြောင့် သူတို့၏မျက်စိသည် မမြင်နိုင်ကြ။ နားသည် မကြားနိုင်ကြ။ နားမလည်နိုင်သောကြောင့် စိတ်နှလုံးသည်လည်း ငါ့ထံသို့မပြောင်းလဲနိုင်ကြ။ ငါ့ကုသမှုကိုလည်း မခံယူနိုင်ကြ’ ဟူ၍ ဖြစ်၏။ 28 ထို့ကြောင့် ဘုရားသခင်ပေးတော်မူသော ဤကယ်တင်ခြင်းတရားကို လူမျိုးခြားတို့ထံသို့ ပို့တော်မူပြီဖြစ်၍ သူတို့သည် ထိုတရားကို လက်ခံယုံကြည်မည်ဖြစ်ကြောင်း သင်တို့သိမှတ်ကြလော့” ဟု ဆို၏။ 29 ဤစကားများကို ပေါလုပြောသောအခါ ဂျူးတို့သည် အချင်းချင်းပြင်းထန်စွာ ငြင်းခုံလျက် ထွက်သွားကြ၏။ 30 ထိုရောမမြို့၌ ပေါလုသည် မိမိငှားရမ်းထားသည့် အိမ်တွင် နှစ်နှစ်ပတ်လုံး နေ၍ မိမိထံသို့လာသမျှသောဧည့်သည်တို့ကို ဝမ်းမြောက်စွာကြိုဆိုလက်ခံလေ၏။ 31 ပေါလုသည် ဘုရားသခင်၏နိုင်ငံတော်အကြောင်းနှင့် သခင်ယေရှုခရစ်တော်အကြောင်းကို အတားအဆီးမရှိဘဲ ရဲရင့်စွာဟောပြောသွန်သင်လျက် နေလေ၏။ ရှင်လုကာရေးသားထားသော တမန်တော်ဝတ္ထု ပြီးပါပြီ။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.