Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

တမန်တော်ဝတ္ထု 23 - ခေတ်သစ်​မြန်မာ သမ္မာကျမ်း

1 ပေါလု​သည် တရားလွှတ်တော်​အဖွဲ့ဝင်များ​ကို စေ့စေ့​ကြည့်​လျက် “ညီအစ်ကိုတို့… ကျွန်ုပ်​သည် ယနေ့​တိုင်အောင် ဘုရားသခင်​ရှေ့တော်​၌ လိပ်ပြာသန့်​စွာ အသက်ရှင်သည်” ဟု ဆို၏။

2 ထိုအခါ ယဇ်ပုရောဟိတ်မင်း​အာနနိ​သည် ပေါလု​အနား​၌ ရပ်နေသော​သူတို့​အား သူ​၏​နှုတ်​ကို ရိုက်​ရန်​အမိန့်ပေး၏။

3 ထို့ကြောင့် ပေါလု​က ယဇ်ပုရောဟိတ်မင်း​အား “အို အကျင့်ပျက်ခြစား​၍ သူတော်ကောင်း​ယောင်ဆောင်သူ… ဘုရားသခင်​သည် သင့်​ကို​ရိုက်တော်မူ​လိမ့်မည်။ သင်​သည် ပညတ်ကျမ်း​အတိုင်း ကျွန်ုပ်​ကို တရားစီရင်​ရန် ထိုင်​လျက်​နေစဉ် ထို​ပညတ်တရား​ကို ကိုယ်တိုင်​ချိုးဖောက်​၍ ကျွန်ုပ်​ကို ရိုက်​ရန် အမိန့်​ပေးသလော” ဟု ဆိုလေ၏။

4 အနီး​တွင် ရပ်​လျက်​ရှိသော လူ​တချို့​က “သင်​သည် ဘုရားသခင်​၏​ယဇ်ပုရောဟိတ်မင်း​ကို ပုတ်ခတ်​ပြောဆိုရဲသလော” ဟု ဆိုကြ၏။

5 ပေါလု​က “ညီအစ်ကိုတို့… သူ​သည် ယဇ်ပုရောဟိတ်မင်း​ဖြစ်သည်​ကို ကျွန်ုပ်​မသိပါ။ ကျမ်းစာ​၌ ရေးသားထားသည်​မှာ ‘သင်​၏​လူမျိုး​ကို အုပ်ချုပ်သူ​အား မကောင်း​မပြောရ’ ဟူ၍ ရေးသားထားသည်” ဟု တုံ့ပြန်လေ၏။

6 လွှတ်တော်​အဖွဲ့ဝင်​တချို့​မှာ ဇဒ္ဒုကဲများ​ဖြစ်​၍ တချို့​မှာ ဖာရိရှဲများ​ဖြစ်သည်​ကို ပေါလု​သိ​လျှင် “ညီအစ်ကိုတို့… ကျွန်ုပ်​သည် ဖာရိရှဲ​တစ်ဦး​ဖြစ်ပြီး ဖာရိရှဲ​၏​သား​လည်း ဖြစ်ပါ၏။ ကျွန်ုပ် စစ်ဆေး​မေးမြန်းခံရသည့်​အကြောင်းရင်း​မှာ သေလွန်သော​သူတို့​ရှင်ပြန်​ထမြောက်မည်​ဟူသော ကျွန်ုပ်​၏​မျှော်လင့်ချက်​ကြောင့် ဖြစ်ပါ၏” ဟု လွှတ်တော်​အစည်းအဝေး​တွင် အော်ဟစ်​၍ ပြောဆို၏။

7 ထိုသို့​ပြောဆို​သောအခါ ဖာရိရှဲတို့​နှင့် ဇဒ္ဒုကဲတို့​အကြား​တွင် အငြင်းအခုံ​ဖြစ်​၍ လွှတ်တော်​သည်လည်း နှစ်ဖွဲ့ကွဲလေ၏။

8 အဘယ်ကြောင့်ဆိုသော် ဇဒ္ဒုကဲတို့​က သေရာ​မှ ရှင်ပြန်​ထမြောက်ခြင်း​မရှိ၊ ကောင်းကင်တမန်​မရှိ၊ ဝိညာဉ်​လည်း​မရှိ​ဟု ဆိုကြ၏။ ဖာရိရှဲတို့​ကမူ ထို​အရာ​အားလုံး​ရှိသည်​ဟု လက်ခံယုံကြည်ကြ၏။

9 ဆူညံအော်ဟစ်သံများ​ကျယ်လောင်လာ​သဖြင့် ဖာရိရှဲ​အဖွဲ့ဝင် ကျမ်းတတ်ဆရာ​တချို့​က ထ​၍ “ဤ​လူ​နှင့်​ပတ်သက်​၍ မှားယွင်းသော​အရာ တစ်စုံတစ်ခု​မှ​မတွေ့ပါ။ ဝိညာဉ်​တစ်ပါး၊ သို့မဟုတ် ကောင်းကင်တမန်​တစ်ပါး​က သူ့​ကို​စကားပြောခြင်း​လည်း ဖြစ်ကောင်း​ဖြစ်နိုင်သည်” ဟု ပြင်းထန်​စွာ ငြင်းခုံပြောဆိုကြ၏။

10 ငြင်းခုံမှု​ပို၍​ပြင်းထန်လာ​သဖြင့် တပ်မှူးကြီး​က ပေါလု​အပိုင်းပိုင်း​ဆွဲဖြတ်ခံရမည်​ကို စိုးရိမ်လေ၏။ ထို့ကြောင့် သူ​က “ပေါလု​ကို သူတို့​ထံမှ အတင်း​ခေါ်ဆောင်လာ​၍ စခန်း​အတွင်း​သို့ ခေါ်ဆောင်သွားကြလော့” ဟု စစ်သားများ​အား အမိန့်ပေးလေ၏။

11 ထို​ည​တွင် ဘုရားသခင်​သည် ပေါလု​အနား​၌​ရပ်​လျက် “စိတ်မပူနှင့်။ သင်​သည် ငါ့​အကြောင်း​ကို ဂျေရုဆလင်မြို့​၌ သက်သေခံသည်​နည်းတူ ရောမမြို့​၌လည်း သက်သေခံရ​လိမ့်မည်” ဟု မိန့်တော်မူ၏။


ပေါလု​ကို​သတ်​ရန် လျှို့ဝှက်ကြံစည်ခြင်း

12 နောက်​တစ်နေ့​တွင် ဂျူးတို့​သည် အတူတကွ​တွေ့ဆုံ​ပြီးလျှင် ပေါလု​ကို​မသတ်ရ​မချင်း မစား​မသောက်ဘဲ​နေ​ရန် အချင်းချင်း​သစ္စာဆိုကြ၏။

13 ထို​လျှို့ဝှက်​ပူးပေါင်း​ကြံစည်မှု​တွင် အယောက်​လေးဆယ်ကျော် ပါဝင်ကြ၏။

14 ထို​သူတို့​သည် ယဇ်ပုရောဟိတ်​ခေါင်းဆောင်များ​နှင့် အကြီးအကဲများ​ထံသို့ သွား​၍ “ကျွန်ုပ်တို့​သည် ပေါလု​ကို​မသတ်ရ​မချင်း မစား​မသောက်ဘဲ​နေ​ရန် အလေးအနက်​သစ္စာဆိုထားကြပါ၏။

15 ထို့ကြောင့် သင်တို့​သည် တရားလွှတ်တော်​အဖွဲ့​နှင့်အတူ ပေါလု​၏​အမှု​ကို ပို​၍​စေ့စပ်သေချာ​စွာ စစ်ဆေး​လိုဟန်​ပြု​လျက် ပေါလု​ကို သင်တို့​ထံသို့​ခေါ်ဆောင်လာပေး​ရန် တပ်မှူးကြီး​ထံ ခွင့်တောင်းလော့။ ကျွန်ုပ်တို့​သည်လည်း ဤ​နေရာ​သို့​မရောက်​မီ သူ့​ကို​သတ်​ရန် အဆင်သင့်​စောင့်နေပါမည်” ဟု ပြောဆိုကြ၏။

16 သို့သော်လည်း ပေါလု​၏​တူ​သည် ထို​သူတို့​ချောင်းမြောင်းတိုက်ခိုက်မည့်​အကြောင်း​ကို ကြား​သဖြင့် စခန်း​ထဲသို့​ဝင်​၍ ပေါလု​အား ပြောပြလေ၏။

17 ပေါလု​သည် တပ်မှူး​တစ်ဦး​အား ခေါ်​၍ “ဤ​လူငယ်​သည် တပ်မှူးကြီး​အား​သတင်းပို့​ရန်​ရှိ​သဖြင့် သူ့​အား တပ်မှူးကြီး​ထံသို့​ခေါ်သွားပါ” ဟု ပြောလေ၏။

18 ထို့ကြောင့် ထို​တပ်မှူး​သည် လူငယ်​ကို တပ်မှူးကြီး​ထံသို့​ခေါ်ဆောင်​၍ “အကျဉ်းသား​ပေါလု​က ကျွန်ုပ်​ကို​ခေါ်​၍ ဤ​လူငယ်​သည် သတင်းပို့​ရမည်​ဖြစ်​သောကြောင့် သူ့​ကို​တပ်မှူးကြီး​ထံသို့ ခေါ်ဆောင်ပေး​ရန် တောင်းဆိုပါသည်” ဟု လျှောက်လေ၏။

19 တပ်မှူးကြီး​သည် လူငယ်​၏​လက်​ကို ဆွဲ​ကာ သီးခြား​ခေါ်​၍ “ငါ့​ကို မည်သည့်​သတင်း​ပြောစရာ​ရှိသနည်း” ဟု မေး၏။

20 ထို​လူငယ်​ကလည်း “ဂျူးတို့​သည် ပေါလု​ကို ပို၍​စေ့စပ်သေချာ​စွာ စစ်ဆေး​လိုဟန်​ပြု​လျက် မနက်ဖြန်​တရားလွှတ်တော်​အစည်းအဝေး​တွင် သူ့​ကို​ခေါ်ဆောင်လာပေး​ရန် တပ်မှူးကြီး​အား​တောင်းဆိုမည်​ဟု သဘောတူထားကြပါ၏။

21 ထို့ကြောင့် သူတို့​တောင်းဆိုချက်​အတိုင်း မလိုက်လျောပါနှင့်။ အဘယ်ကြောင့်ဆိုသော် သူတို့​ထဲမှ လူ​လေးဆယ်ကျော်​သည် ပေါလု​ကို ချောင်းမြောင်းသတ်ပစ်​ရန် စောင့်နေကြ​သောကြောင့်​ဖြစ်၏။ သူတို့​သည် ပေါလု​ကို​မသတ်ရ​မချင်း မစား​မသောက်ဘဲ​နေ​ရန် သစ္စာဆိုထားကြပါ၏။ ယခု သူတို့​သည်​အဆင်သင့်​ရှိ​၍ တပ်မှူးကြီး​၏​သဘောတူညီချက်​ကို စောင့်ဆိုင်းနေကြသည်” ဟု လျှောက်လေ၏။

22 ထိုအခါ တပ်မှူးကြီး​က “ငါ့​အား ဤ​အကြောင်းအရာများ​ကို သတင်းပေး​ကြောင်း မည်သူ့​ကို​မျှ​မပြောနှင့်” ဟု ထို​လူငယ်​အား​အမိန့်ပေး​၍ ပြန်လွှတ်လိုက်၏။


ပေါလု​ကို ဆီဇာရီးယားမြို့​သို့ ပို့ဆောင်ခြင်း

23 တပ်မှူးကြီး​သည် တပ်မှူး​နှစ်ဦး​ကို ခေါ်​၍ “ည​ကိုးနာရီ​အချိန်​၌ ဆီဇာရီးယားမြို့​သို့​သွား​ရန် စစ်သား​နှစ်ရာ၊ မြင်းစီး​တပ်သား​ခုနစ်ဆယ်​နှင့် လှံကိုင်​တပ်သား​နှစ်ရာ​တို့​ကို အဆင်သင့်​ပြင်ဆင်ကြလော့။

24 ပေါလု​စီး​ရန် မြင်းများ​ကိုလည်း ပြင်ဆင်ပေးပြီး သူ့​ကို ဘုရင်ခံ​ဖေလဇ်မင်း​ထံသို့ ဘေးကင်းလုံခြုံ​စွာ​ပို့ဆောင်လော့” ဟု မှာကြား​ပြီးနောက်

25 စာတစ်စောင်​ကို ရေးပေးလိုက်၏။ ထို​စာ​တွင် ဤသို့ ရေးထား၏။

26 အကျွန်ုပ်​ကလောဒိလုသိ​သည် မြတ်သော​ဘုရင်ခံ​ဖေလဇ်မင်း​ထံသို့ နှုတ်ခွန်းဆက်သပါ၏။

27 ဤ​သူ​ကို ဂျူးလူမျိုးများ​က ဖမ်းဆီး​၍ သတ်မည်​ပြု​စဉ် သူ​သည်​ရောမနိုင်ငံသား​ဖြစ်ကြောင်း​ကို အကျွန်ုပ်​ကြားသိရ​သဖြင့် စစ်သားများ​နှင့်အတူ​သွား​၍ သူ့​ကို​ကယ်တင်ခဲ့ပါ၏။

28 ဂျူးလူမျိုးများ​က မည်သည့်​ပြစ်မှု​ဖြင့် စွပ်စွဲသည်​ကို အကျွန်ုပ်​သည်​သိလို​သောကြောင့် သူ့​ကို သူတို့​၏​တရားလွှတ်တော်​အစည်းအဝေး​သို့ ခေါ်ဆောင်သွားပါ၏။

29 သူ​သည် ပညတ်တရား​နှင့်ဆိုင်သော မေးခွန်းများ​နှင့်​ပတ်သက်​၍ စွပ်စွဲခံရခြင်း​ဖြစ်ပြီး သူ​၌ သေဒဏ်၊ သို့မဟုတ် ထောင်ဒဏ်​ကျခံထိုက်သော​အပြစ်​မရှိကြောင်း အကျွန်ုပ်​တွေ့ရပါ၏။

30 သို့ရာတွင် ဂျူးလူမျိုးများ​သည် သူ့​ကို​သတ်​ရန် လျှို့ဝှက်ကြံစည်သည့်​အကြောင်း​ကို အကျွန်ုပ်​ကြားရ​သောအခါ အရှင့်​ထံသို့ သူ့​ကို​ချက်ချင်း​စေလွှတ်လိုက်ပါ၏။ စွပ်စွဲသော​သူများ​ကိုလည်း သူ့​အပေါ်​စွပ်စွဲထားသည့်​အချက်များ​ကို အရှင့်​ထံသို့​တင်ပြ​ရန် ညွှန်ကြားထားပါ၏။

31 ထို့ကြောင့် စစ်သားတို့​သည် သူတို့​အား​မှာကြားထားသည့်​အတိုင်း ပေါလု​ကို​ခေါ်​၍ ည​အချိန်​၌ပင် အန္တိပတရိမြို့​သို့ ပို့ကြ၏။

32 နောက်​တစ်နေ့​တွင် စစ်သားတို့​သည် ပေါလု​ကို​မြင်းစီးတပ်သား​တို့​နှင့်အတူ ခရီး​ဆက်သွားစေ​၍ သူတို့​သည်​စခန်း​သို့ ပြန်ကြ၏။

33 မြင်းစီးတပ်သားတို့​သည် ဆီဇာရီးယားမြို့​သို့​ရောက်​လျှင် စာ​ကို​ဘုရင်ခံ​ထံသို့​ပေးအပ်​၍ ပေါလု​ကိုလည်း သူ့​ထံသို့​အပ်နှံကြ၏။

34 ဘုရင်ခံ​သည် စာ​ကို​ဖတ်ပြီး​သောအခါ ပေါလု​သည် မည်သည့်​ပြည်သား​ဖြစ်ကြောင်း​ကို မေးမြန်း၏။ ဆီလီဆီးယားပြည်သား​ဖြစ်ကြောင်း​ကို ကြားသိ​လျှင်

35 “သင့်​ကို စွပ်စွဲသူများ​ရောက်လာ​သောအခါ သင်​၏​အမှု​ကို ငါ​ကြားနာမည်” ဟု ဆို၏။ ထို့နောက် ဘုရင်ခံ​သည် ပေါလု​ကို ဟေရုဒ်မင်း​၏​ရုံးတော်​၌ စောင့်ကြပ်ထား​ရန် အမိန့်ပေးလေ၏။

ခေတ်သစ်​မြန်မာ သမ္မာကျမ်း™

မူပိုင်ခွင့်၊ © Biblica Inc. ၁၉၈၅၊ ၂၀၂၄

ခွင့်ပြုချက်​ဖြင့် အသုံးပြုသည်။ ကမ္ဘာတစ်ဝန်း​မူပိုင်ခွင့်များ​ရယူပြီးဖြစ်သည်။

Burmese Contemporary Bible™

Copyright © 1985, 2024 by Biblica, Inc.

Used with permission. All rights reserved worldwide.

Biblica, Inc.
ကြှနျုပျတို့နောကျလိုကျပါ:



ကြော်ငြာတွေ