တမန်တော်ဝတ္ထု 19 - ခေတ်သစ်မြန်မာ သမ္မာကျမ်းပေါလု၏ တတိယမြောက် သာသနာပြုခရီးစဉ် 1 အာပေါလုသည် ကောရိန္သုမြို့၌ ရှိနေစဉ် ပေါလုသည် ကုန်းတွင်းပိုင်းမြို့များကို ဖြတ်၍ ဧဖက်မြို့သို့ ရောက်လာ၏။ ထိုမြို့၌ တပည့်တော်တချို့ကို တွေ့လျှင် 2 ပေါလုက “သင်တို့သည် ယုံကြည်သူများ ဖြစ်လာကြသောအခါ သန့်ရှင်းသောဝိညာဉ်တော်ကို လက်ခံရရှိကြသလော” ဟု မေး၏။ ထိုသူတို့က “မရကြပါ။ သန့်ရှင်းသောဝိညာဉ်တော်ဟူ၍ ရှိသည်ကိုပင် ကျွန်ုပ်တို့မကြားဖူးသေးပါ” ဟု ပြန်ဖြေကြ၏။ 3 ပေါလုကလည်း “ထိုသို့ဖြစ်လျှင် မည်သည့်နှစ်ခြင်းမင်္ဂလာကို သင်တို့ခံယူကြသနည်း” ဟု မေးလျှင် သူတို့က “ယောဟန်ပေးသော နှစ်ခြင်းမင်္ဂလာ ဖြစ်ပါသည်” ဟု ဖြေကြ၏။ 4 ပေါလုက “ယောဟန်သည် နောင်တနှင့် သက်ဆိုင်သော နှစ်ခြင်းမင်္ဂလာကို ပေးလျက် သူ့နောက် ကြွလာမည့်သူကို ယုံကြည်ရမည်ဟု လူတို့အား သွန်သင်လေ၏။ ထိုသို့ဆိုရာ၌ ယေရှုကို ဆိုလိုသည်” ဟု ပြောလေ၏။ 5 ဤအကြောင်းအရာကို ကြားလျှင် သူတို့သည် သခင်ယေရှု၏အမည်နာမ၌ နှစ်ခြင်းမင်္ဂလာခံယူကြ၏။ 6 ပေါလုသည် သူတို့အပေါ် လက်ကိုတင်သောအခါ သန့်ရှင်းသောဝိညာဉ်တော် သက်ရောက်သဖြင့် သူတို့သည် အမျိုးမျိုးသောဘာသာစကားများကို ပြောလျက် ပရောဖက်ပြုကြ၏။ 7 သူတို့သည် စုစုပေါင်းဆယ့်နှစ်ယောက်ခန့် ရှိကြ၏။ ဧဖက်မြို့တွင် ပေါလုသာသနာပြုခြင်း 8 ပေါလုသည် သုံးလတိုင်တိုင် ဂျူးဝတ်ပြုဆောင်တွင် ရဲရင့်စွာဟောပြောလျက် ဘုရားသခင်၏နိုင်ငံတော်အကြောင်းကို ဆွေးနွေးဖလှယ်ကာ ယုံကြည်လာစေရန် ကြိုးစားအားထုတ်လျက်နေ၏။ 9 သို့သော် တချို့သည် ယုံကြည်ရန် ခေါင်းမာစွာ ငြင်းဆိုလျက် လူတို့ရှေ့တွင် ထိုခရစ်တော်၏တရားလမ်းကို ကဲ့ရဲ့ပြောဆိုကြ၏။ ထို့ကြောင့် ပေါလုသည် တပည့်တော်များနှင့်အတူ ထိုသူတို့ထံမှ ထွက်ခွာပြီးလျှင် တုရန္နုစာသင်ခန်းမ၌ နေ့စဉ် ဆွေးနွေးပြောဆိုလေ၏။ 10 ထိုသို့ နှစ်နှစ်တိုင်တိုင် ဆွေးနွေးပြောဆိုရာ အာရှပြည်တွင် နေထိုင်ကြသော ဂျူးလူမျိုးနှင့် ဂရိလူမျိုးများအားလုံးတို့သည် သခင်ဘုရား၏နှုတ်ကပတ်တရားတော်ကို ကြားနာကြရ၏။ 11 ဘုရားသခင်သည် ပေါလုလက်အားဖြင့် အလွန်ထူးကဲသော အံ့ဖွယ်တန်ခိုးများကို လုပ်ဆောင်ပြသတော်မူ၏။ 12 ပေါလုသုံးသော လက်ကိုင်ပဝါ၊ သို့မဟုတ် ခါးစည်းအဝတ်ကို ဖျားနာသူများအပေါ် တင်သောအခါ သူတို့၏အနာရောဂါများ ပျောက်ကင်းကြ၏။ နတ်ဆိုးများလည်း ထွက်သွားကြကုန်၏။ 13 နေရာဒေသအသီးသီးသို့ လှည့်လည်နေကြသော ဂျူးပယောဂဆရာတချို့သည် သခင်ယေရှု၏အမည်နာမကို စွဲကိုင်လျက် နတ်ဆိုးများကို နှင်ထုတ်ရန် ကြိုးပမ်းကြ၏။ ထိုသို့ ကြိုးပမ်းရာတွင် သူတို့က “ပေါလုဟောပြောနေသော ယေရှု၏အမည်နာမ၌ သင့်ကို ထွက်လာရန် အမိန့်ပေး၏” ဟု ပြောကြ၏။ 14 ထိုသို့ပြုကြသူများမှာ ဂျူးယဇ်ပုရောဟိတ်မင်း သကေဝ၏သားခုနစ်ယောက်တို့ ဖြစ်ကြ၏။ 15 သို့ရာတွင် နတ်ဆိုးက “ယေရှုကို ငါသိ၏။ ပေါလုကိုလည်း ငါသိ၏။ သို့သော် သင်တို့မှာ မည်သူတို့နည်း” ဟု တုံ့ပြန်ပြောဆိုလေ၏။ 16 နတ်ဆိုးပူးဝင်ခြင်းခံနေရသူသည် ထိုသူတို့အပေါ် ခုန်အုပ်၍ တိုက်ခိုက်အနိုင်ယူသဖြင့် သူတို့သည် ထိခိုက်ဒဏ်ရာရလျက် အဝတ်ဗလာနှင့် ထိုအိမ်မှ ထွက်ပြေးရ၏။ 17 ဤသတင်းကို ဧဖက်မြို့တွင် နေထိုင်ကြသော ဂျူးလူမျိုးများနှင့် ဂရိလူမျိုးများ ကြားသိသောအခါ သူတို့သည် ကြောက်ရွံ့၍ သခင်ယေရှု၏အမည်နာမကို ချီးမွမ်းကြ၏။ 18 ယုံကြည်သောသူတို့သည်လည်း လာ၍ သူတို့ပြုလုပ်ခဲ့သော အရာများကို လူအများရှေ့တွင် ဖော်ပြကာ ဝန်ခံကြ၏။ 19 စုန်းအတတ်ပညာကို ကျင့်သုံးသောသူများစွာတို့သည် သူတို့၏ဂါထာစာအုပ်များကို သယ်ယူလာပြီးလျှင် လူအများရှေ့တွင် မီးရှို့ကြ၏။ ထိုစာအုပ်များ၏တန်ဖိုးကို တွက်ချက်သောအခါ ငွေဒင်္ဂါးငါးသောင်းဖိုးရှိကြောင်း တွေ့ရှိကြ၏။ 20 ထိုသို့ဖြင့် သခင်ဘုရား၏နှုတ်ကပတ်တရားတော်သည် တန်ခိုးအာဏာတော်နှင့်ကြီးထွား၍ ပျံ့နှံ့လွှမ်းမိုးလေ၏။ 21 ဤအရာများ ဖြစ်ပျက်ပြီးနောက် ပေါလုသည် ဝိညာဉ်တော်အားဖြင့် မာကေဒေါနိပြည်နှင့် အခါယပြည်တစ်လျှောက်သွားပြီးလျှင် ဂျေရုဆလင်မြို့သို့ သွားရန် ဆုံးဖြတ်၏။ ထို့နောက် ပေါလုက “ထိုမြို့သို့သွားပြီးလျှင် ငါသည် ရောမမြို့သို့လည်း သွားရမည်” ဟု ပြောလေ၏။ 22 သူသည် မိမိအား ကူညီဆောင်ရွက်ပေးသူ တိမောသေနှင့် ဧရတ္တုကို မာကေဒေါနိပြည်သို့ စေလွှတ်၍ အာရှပြည်၌ ကာလအနည်းငယ်ဆက်နေလေ၏။ ဧဖက်မြို့ရုန်းရင်းဆန်ခတ်ဖြစ်ခြင်း 23 ထိုအချိန်တွင် ခရစ်တော်၏တရားလမ်းနှင့်ပတ်သက်၍ ကြီးမားသော ဆူပူလှုပ်ရှားမှုတစ်ရပ် ပေါ်ပေါက်လာ၏။ 24 ဒေမေတရိဟု ခေါ်သော ငွေပန်းထိမ်ဆရာတစ်ယောက်သည် အာတေမိနတ်ဘုရားမ၏ငွေဗိမာန်ငယ်များကို ထုလုပ်၍ ပန်းထိမ်လုပ်သားများအတွက် များစွာစီးပွားဖြစ်ထွန်းစေသောသူ ဖြစ်၏။ 25 သူသည် ထိုလုပ်သားတို့နှင့်တကွ အလားတူလုပ်ငန်းကိုလုပ်သော အလုပ်သမားများကို စုဝေးစေပြီးလျှင် “လုပ်ဖော်ကိုင်ဖက်တို့… ဤလုပ်ငန်းအားဖြင့် ကျွန်ုပ်တို့၏စီးပွားဖြစ်ထွန်းခဲ့သည်ကို သင်တို့သိကြ၏။ 26 သို့သော် ဧဖက်မြို့သာမက အာရှပြည်တစ်ပြည်လုံးတွင်ရှိသောသူတို့အား ဤပေါလုဆိုသူက လူ့လက်ဖြင့် ထုလုပ်သောဘုရားများသည် ဘုရားလုံးဝမဟုတ်ကြောင်း ဖြားယောင်းသွေးဆောင်၍ လမ်းလွဲစေလျက်ရှိသည်ကို သင်တို့လည်း မြင်ကြကြားကြရပြီ။ 27 ဤသို့ဖြင့် ကျွန်ုပ်တို့၏စီးပွားလုပ်ငန်းသည် နာမည်ပျက်နိုင်ချေရှိမည်။ ထိုမျှမက ကြီးမြတ်သောအာတေမိနတ်ဘုရားမ၏ဗိမာန်ကျောင်းကို ဂရုမပြုတော့ဘဲ အာရှပြည်တစ်ပြည်လုံးနှင့် ကမ္ဘာတစ်ဝန်းလုံးရှိသူများ ယုံကြည်ကိုးကွယ်သော ထိုနတ်ဘုရားမ၏ထည်ဝါမှုပင် ကျဆင်းနိုင်ချေရှိမည်ကိုလည်း စိုးရိမ်ဖွယ်ရှိပါသည်” ဟု ပြောလေ၏။ 28 ထိုစကားကိုကြားလျှင် သူတို့သည် ဒေါသထွက်လျက် “ဧဖက်မြို့၏အာတေမိနတ်ဘုရားမသည် ကြီးမြတ်၏” ဟု ဟစ်အော်ကြလေ၏။ 29 တစ်မြို့လုံးဝရုန်းသုန်းကားဖြစ်လျက် လူတို့သည် ပေါလု၏ခရီးသွားဖော်များဖြစ်ကြသော မာကေဒေါနိပြည်သား ဂါယုနှင့် အာရိတ္တာခုတို့ကို ဖမ်းဆီးပြီးလျှင် ဇာတ်ရုံထဲသို့ တစ်ဟုန်ထိုးပြေးဝင်သွားကြ၏။ 30 ပေါလုသည် လူအုပ်ထံ သွား၍ ရင်ဆိုင်လိုသော်လည်း တပည့်များက တားဆီးကြ၏။ 31 ပေါလု၏မိတ်ဆွေများ ဖြစ်ကြသော အာရှပြည်၏အရာရှိတချို့ကလည်း ထိုဇာတ်ရုံထဲသို့ စွန့်စား၍ မဝင်ရန် တောင်းပန်ကြ၏။ 32 ထိုအချိန်၌ လူအစုအဝေးတို့သည် ရှုပ်ထွေးကြကုန်၍ တစ်ယောက်တစ်မျိုး ဟစ်အော်လျက်နေကြ၏။ လူအများစုသည် မည်သည့်အကြောင်းကြောင့် မိမိတို့အတူတကွစုဝေးနေသည်ကိုပင် မသိကြ။ 33 လူအုပ်ထဲမှ တချို့သည် အလက်ဇန်းဒါးကို လမ်းညွှန်လျက် ဂျူးတို့သည် သူ့အား လူများရှေ့သို့ထွက်စေသဖြင့် အလက်ဇန်းဒါးက ငြိမ်သက်ရန်လက်ရိပ်ပြ၍ လူအစုအဝေးကို ခုခံကာကွယ်ပြောဆိုရန် ကြိုးစားလေ၏။ 34 သို့သော် သူသည် ဂျူးလူမျိုးဖြစ်သည်ကို လူအစုအဝေးတို့က သတိပြုမိလာကြသောအခါ “ဧဖက်မြို့၏အာတေမိနတ်ဘုရားမသည် ကြီးမြတ်၏” ဟု နှစ်နာရီခန့်မျှ တစ်သံတည်းဖြင့် ကြွေးကြော်ကြ၏။ 35 သို့သော် မြို့စာရေးသည် လူထုကို တိတ်ဆိတ်စေပြီးနောက် “ဧဖက်မြို့သားအပေါင်းတို့… ဧဖက်မြို့သည် ကြီးမြတ်သော အာတေမိနတ်ဘုရားမ၏ဗိမာန်နှင့် ကောင်းကင်မှကျသော ဆင်းတုတော်၏ကာကွယ်ရာနေရာဖြစ်ကြောင်းကို မသိသေးသောသူ တစ်စုံတစ်ဦးရှိသလော။ 36 ဤအကြောင်းအရာများသည် မငြင်းဆန်နိုင်သောအရာများ ဖြစ်သောကြောင့် သင်တို့သည် တိတ်ဆိတ်စွာနေ၍ မဆင်မခြင်မပြုသင့်ပါ။ 37 ဤနေရာသို့ သင်တို့ ခေါ်ဆောင်လာသောသူများသည် ဗိမာန်တော်ထဲသို့ ဝင်၍ လုယက်သူများမဟုတ်သကဲ့သို့ ကျွန်ုပ်တို့နတ်ဘုရားမ၏ဂုဏ်အသရေကို ရှုတ်ချသူများလည်းမဟုတ်ကြပါ။ 38 ဒေမေတရိနှင့် အပေါင်းပါပန်းထိမ်လုပ်သားတို့သည် တစ်စုံတစ်ယောက်ကို တရားစွဲဆိုရန် ရှိလျှင် သူတို့ကို စွဲချက်တင်ရန် တရားရုံးများနှင့် မြို့ဝန်မင်းများသည် အသင့်ရှိကြပါ၏။ သူတို့အား ရုံးတော်တွင်သာ တရားဥပဒေအတိုင်း ဆောင်ရွက်စေလော့။ 39 သို့ရာတွင် သင်တို့၌ အခြားအမှုကိစ္စများ တောင်းဆိုရန် ရှိပါကလည်း တရားဝင်အစည်းအဝေးများ၌ ဆောင်ရွက်ပါလိမ့်မည်။ 40 ယနေ့ဖြစ်ခဲ့သော ရုန်းရင်းဆန်ခတ်ပြုခြင်းအမှုကြောင့် ကျွန်ုပ်တို့သည် စွပ်စွဲခံရမည်ကို စိုးရိမ်စရာရှိ၏။ ခိုင်လုံသောအကြောင်းပြချက် တစ်စုံတစ်ရာမျှ မရှိသောကြောင့် ဤသို့ဆူပူအုံကြွခြင်းအမှုအတွက်လည်း ဖြေရှင်းချက် ပေးနိုင်မည်မဟုတ်ပါ” ဟု ပြောဆိုလေ၏။ 41 ထိုသို့ပြောဆိုပြီးနောက် သူသည် လူအစုအဝေးကို ပြန်လွှတ်လိုက်၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.