တမန်တော်ဝတ္ထု 17 - ခေတ်သစ်မြန်မာ သမ္မာကျမ်းသက်သာလောနိတ်မြို့တွင် ပေါလု တရားဟောပြောခြင်း 1 ပေါလုနှင့်သိလတို့သည် အံဖိပေါလိမြို့နှင့် အာပေါလောနိမြို့ကို ဖြတ်သွား၍ သက်သာလောနိတ်မြို့သို့ ရောက်ကြ၏။ ထိုမြို့တွင် ဂျူးဝတ်ပြုဆောင်ရှိ၏။ 2 ပေါလုသည် မိမိပြုလေ့ရှိသည့်အတိုင်း ဝတ်ပြုဆောင်သို့သွား၍ ဥပုသ်နေ့သုံးရက်တိုင် ကျမ်းစာကိုအမှီပြုကာ ထိုသူတို့နှင့်အတူ ဆွေးနွေးပြောဆို၏။ 3 ခရစ်တော်သည် ဒုက္ခဝေဒနာကိုခံစားရပြီး သေခြင်းမှ ရှင်ပြန်ထမြောက်ရမည်ဖြစ်ကြောင်း အထောက်အထားများနှင့်တကွ ရှင်းလင်းဖော်ပြပြီးလျှင် “သင်တို့အား ကျွန်ုပ်ပြောပြသောယေရှုသည် ခရစ်တော်ပင်ဖြစ်သည်” ဟု ပြောလေ၏။ 4 အချို့သောသူတို့သည် ယုံကြည်သဖြင့် ပေါလု၊ သိလတို့နှင့် ပေါင်းဖော်ကြ၏။ ဘုရားသခင်ကို ကိုးကွယ်သော ဂရိလူမျိုးများနှင့် ထင်ရှားသော အမျိုးသမီးများသည်လည်း ယုံကြည်လာကြ၏။ 5 သို့သော် ဂျူးလူမျိုးတချို့သည် မနာလိုသဖြင့် ဈေးအရပ်များရှိ ဆိုးသွမ်းသူများကို စုစည်း၍ မြို့ထဲ၌ ရုန်းရင်းဆန်ခတ်ဖြစ်စေကြ၏။ ယာသုန်၏အိမ်ကိုလည်း နိုင်ထက်စီးနင်းပြု၍ ပေါလုနှင့် သိလတို့ကို လူများရှေ့သို့ ဆွဲခေါ်လာရန် ရှာဖွေကြလေ၏။ 6 ထိုအိမ်၌ မတွေ့သဖြင့် ယာသုန်နှင့် အခြားယုံကြည်သူများကို အိမ်အတွင်းမှ ဆွဲထုတ်ကာ မြို့အာဏာပိုင်များရှေ့သို့ ခေါ်ဆောင်သွားပြီးလျှင် “ကမ္ဘာလောကကို မှောက်လှန်နေသူများသည် ယခု ဤမြို့သို့ ရောက်ကြပါပြီ။ 7 ယာသုန်သည်လည်း ထိုသူတို့ကို လက်ခံကြိုဆိုပါပြီ။ သူတို့သည် ယေရှုဟူသော အခြားရှင်ဘုရင်တစ်ပါးရှိကြောင်း ပြောဆိုလျက် ဆီဇာဘုရင်၏အမိန့်တော်ကို ဆန့်ကျင်ကြပါ၏” ဟု အော်ဟစ်ကြ၏။ 8 လူထုနှင့် မြို့အာဏာပိုင်တို့သည် ထိုအကြောင်းအရာကိုကြားသောအခါ စိတ်အနှောင့်အယှက်ဖြစ်ကြသဖြင့် 9 ယာသုန်နှင့် အခြားသူများကို အာမခံကြေးပေးဆောင်စေပြီးနောက် ပြန်လွှတ်လိုက်ကြ၏။ ဗေရိမြို့တွင် ပေါလုနှင့်သိလ ဟောပြောခြင်း 10 ထိုညတွင် ယုံကြည်သူတို့သည် ပေါလုနှင့်သိလတို့ကို ဗေရိမြို့သို့ ချက်ချင်းထွက်ခွာသွားစေကြ၏။ ထိုမြို့သို့ရောက်လျှင် သူတို့သည် ဂျူးဝတ်ပြုဆောင်သို့ သွားကြ၏။ 11 ဗေရိမြို့သားတို့သည် သက်သာလောနိတ်မြို့သားတို့ထက် ပို၍ စိတ်သဘောထားပြည့်ဝကြ၏။ အကြောင်းမှာ သူတို့သည် နှုတ်ကပတ်တရားတော်ကို စိတ်အားထက်သန်စွာခံယူကြ၍ ထိုဟောပြောချက်များ မှန်သည်၊ မမှန်သည်ကိုသိမြင်ရန် ကျမ်းစာကို နေ့စဉ်နေ့တိုင်း လေ့လာ၍ ဆန်းစစ်ကြ၏။ 12 ထိုသို့အားဖြင့် ဂျူးလူမျိုးများစွာတို့သည် ယုံကြည်သက်ဝင်လာကြ၏။ ဂုဏ်သရေရှိဂရိအမျိုးသား၊ အမျိုးသမီးတို့သည်လည်း ယုံကြည်သက်ဝင်လာကြ၏။ 13 သို့သော် ဗေရိမြို့တွင် ပေါလုသည် ဘုရားသခင်၏နှုတ်ကပတ်တရားတော်ဟောနေကြောင်းကို သက်သာလောနိတ်မြို့ရှိ ဂျူးလူမျိုးများသည် ကြားသောအခါ ထိုမြို့သို့ လိုက်လာ၍ လူထုပရိသတ်တို့ကို ဆူပူထကြွအောင် လှုံ့ဆော်ကြပြန်၏။ 14 ထိုအခါ ယုံကြည်သူတို့သည် ပေါလုကို ပင်လယ်ကမ်းခြေသို့ ပို့ဆောင်ကြ၏။ သို့ရာတွင် သိလနှင့်တိမောသေတို့သည် ထိုမြို့၌ နေရစ်ခဲ့ကြ၏။ 15 ပေါလုကို လိုက်ပို့သူများသည် အေသင်မြို့တိုင်အောင် ပို့ကြပြီးလျှင် သိလနှင့် တိမောသေတို့အား အလျင်အမြန်လိုက်လာစေရန် မှာကြားချက်ကို ရရှိသဖြင့် ဗေရိမြို့သို့ ပြန်သွားကြ၏။ အေသင်မြို့တွင် ပေါလု တရားဟောပြောခြင်း 16 ပေါလုသည် အေသင်မြို့တွင် သိလနှင့်တိမောသေတို့ကို စောင့်ဆိုင်းနေရစဉ် ထိုမြို့သည် ရုပ်တုများနှင့် ပြည့်လျက်ရှိသည်ကို တွေ့မြင်သော် အလွန်စိတ်သောကရောက်လေ၏။ 17 ထို့ကြောင့် သူသည် ဂျူးဝတ်ပြုဆောင်တွင်ရှိသော ဂျူးလူမျိုးများမှစ၍ ဘုရားသခင်ကိုကိုးကွယ်သော လူမျိုးခြားများနှင့် ဆွေးနွေး၏။ ထို့ပြင် ဈေးအရပ်တွင် နေ့တိုင်းရှိနေကြသောလူတို့နှင့်လည်း နေ့စဉ်ဆွေးနွေးလေ၏။ 18 ဧပိကုရု၏တပည့်များနှင့် သတောအိတ်အတွေးခေါ်ပညာရှင် တချို့သည်လည်း သူနှင့်အတူ အချေအတင်ငြင်းခုံဆွေးနွေးကြ၏။ တချို့က “ဤစကားအိုးသည် မည်သည့်အရာကို ပြောလိုသနည်း” ဟု ပြောကြ၏။ အခြားသူတို့ကလည်း “သူသည် တိုင်းတစ်ပါး နတ်ဘုရားများအကြောင်းကို ပြောပြနေဟန်ရှိ၏” ဟု ဆိုကြ၏။ ဤသို့ပြောဆိုခြင်းမှာ ပေါလုသည် ယေရှုအကြောင်းနှင့် သေရာမှပြန်ရှင်ခြင်းအကြောင်းတို့ကို ဟောပြောနေသောကြောင့်ဖြစ်၏။ 19 ထို့နောက် သူတို့သည် ပေါလုကို အာရေပါဂုတရားလွှတ်တော်သို့ ခေါ်သွားကြပြီးလျှင် သူတို့က “သင်ဟောပြောနေသော အယူဝါဒသစ်အကြောင်းကို ငါတို့သိပါရစေ။ 20 ထိုအရာများသည် ငါတို့အတွက် အသစ်အဆန်းဖြစ်နေသောကြောင့် မည်သည့်အဓိပ္ပာယ်ဖြစ်သည်ကို ကြားချင်ပါသည်” ဟု ပြောဆိုကြ၏။ 21 အေသင်မြို့သားများနှင့် ထိုမြို့တွင်ရှိသော နိုင်ငံရပ်ခြား ဧည့်သည်များအားလုံးတို့သည် အသစ်သော သတင်းစကားများကို ပြောဆိုကြားနာခြင်းဖြင့်သာ အချိန်ကိုအသုံးချတတ်ကြ၏။ 22 ထို့ကြောင့် ပေါလုသည် အာရေပါဂုတရားလွှတ်တော်တွင်ရပ်လျက် “အေသင်မြို့သားတို့… သင်တို့သည် အရာရာ၌ ဘာသာရေးအလွန်ကိုင်းရှိုင်းသူများဖြစ်ကြောင်း ကျွန်ုပ်တွေ့ရှိပါ၏။ 23 အကြောင်းမှာ ငါသည် မြို့ထဲသို့သွား၍ သင်တို့တည်ထားကိုးကွယ်သောဘုရားများကို ဂရုတစိုက်လှည့်ပတ်ကြည့်ရှုစဉ် ‘အမည်မသိသောဘုရားအတွက်’ ဟူ၍ ရေးထိုးထားသော ဘုရားစင်တစ်ခုကို မြင်ပါ၏။ ဤသို့ သင်တို့မသိမမြင်ဘဲ ကိုးကွယ်နေသော ထိုဘုရားအကြောင်းကို ယခု ကျွန်ုပ်ဟောပြောနေခြင်းဖြစ်၏။ 24 ဘုရားသခင်သည် ကမ္ဘာလောကနှင့်တကွ ကမ္ဘာပေါ်တွင် ရှိသမျှသောအရာတို့ကို ဖန်ဆင်းတော်မူ၍ ကောင်းကင်နှင့်မြေကြီးတို့၏အရှင်သခင်ဖြစ်သောကြောင့် လူ့လက်ဖြင့် ဆောက်လုပ်သော ဘုံဗိမာန်တို့တွင် စံမြန်းတော်မမူ။ 25 ထိုနည်းတူ ဘုရားသခင်သည် မည်သည့်အရာကိုမျှ လိုအပ်တော်မမူသောကြောင့် လူ့လက်ဖြင့် လုပ်ကျွေးပြုစုခြင်းကိုလည်း ခံယူရန်မလိုပေ။ ထိုအရှင်သည် လူအပေါင်းတို့အား အသက်နှင့်တကွ ထွက်သက်ဝင်သက်နှင့် အရာအားလုံးကို ပေးတော်မူသောဘုရားဖြစ်၏။ 26 ဘုရားသခင်သည် လူတစ်ဦးကို ဖန်ဆင်းပြီး ထိုလူမှ လူမျိုးရှိသမျှကို တိုးပွားစေ၍ ကမ္ဘာမြေကြီးတစ်ခုလုံးတွင် နေထိုင်ပျံ့နှံ့စေတော်မူ၏။ ထိုသူတို့နေထိုင်ရာ အချိန်ကာလနှင့် နယ်နိမိတ်များကိုလည်း သတ်မှတ်ပိုင်းခြားတော်မူ၏။ 27 ဤသို့ပြုသည်မှာ လူတို့သည် ဘုရားသခင်ကို တွေ့လိုတွေ့ငြား စမ်းသပ်ရှာဖွေကြစေရန်အတွက် ဖြစ်၏။ သို့ရာတွင် ဘုရားသခင်သည် ကျွန်ုပ်တို့မည်သူတစ်ဦးတစ်ယောက်နှင့်မျှ ဝေးကွာနေသည်မဟုတ်ပါ။ 28 ကျွန်ုပ်တို့သည် ဘုရားသခင်အားဖြင့် ရှင်သန်လှုပ်ရှား၍ ဖြစ်တည်ကြ၏။ သင်တို့အထဲမှ လင်္ကာဆရာတချို့ကလည်း ‘ကျွန်ုပ်တို့မှာ ဘုရားမျိုးသာ ဖြစ်ကြပါ၏’ ဟု စပ်ဆိုခဲ့ကြ၏။ 29 ထိုသို့ ကျွန်ုပ်တို့သည် ဘုရားသခင်၏သားသမီးများဖြစ်သည်နှင့်အညီ ဘုရားသခင်သည် လူ့စွမ်းရည်နှင့် ပုံဖော်တီထွင်ထားသော ရွှေရုပ်တု၊ ငွေရုပ်တု၊ ကျောက်ရုပ်တုများ ဖြစ်သည်ဟု မယူဆသင့်ပါ။ 30 ဤသို့ ယခင်အချိန်ကာလများတွင် လူတို့၏မသိနားမလည်ခြင်းကို ဘုရားသခင်သည် အမှုမထားခဲ့သော်လည်း ယခုမှာ နေရာအသီးသီးတွင်ရှိသော လူအပေါင်းတို့ကို နောင်တရရန် အမိန့်ပေးတော်မူ၏။ 31 အဘယ်ကြောင့်ဆိုသော် ဘုရားသခင်သည် မိမိခန့်အပ်သော အရှင်အားဖြင့် လောကကို မှန်ကန်စွာ တရားစီရင်ရန် နေ့တစ်နေ့ကို သတ်မှတ်ထားတော်မူသောကြောင့်ဖြစ်၏။ ထိုအရှင်ကိုလည်း သေရာမှ ထမြောက်စေတော်မူခြင်းဖြင့် ထိုသို့ဖြစ်မည့်အကြောင်းကို ကျွန်ုပ်တို့အား သက်သေပြတော်မူပြီ” ဟု ဟောပြောလေ၏။ 32 သေလွန်သောသူတို့ထမြောက်ခြင်းအကြောင်းကို ကြားရသောအခါ တချို့က လှောင်ပြောင်ကဲ့ရဲ့ကြ၏။ သို့သော် တချို့မှာ “ဤအကြောင်းကို နောက်တစ်ကြိမ် ထပ်၍ ကြားနာလိုပါသည်” ဟု ပြောကြ၏။ 33 ထိုအခါ ပေါလုသည် သူတို့ထံမှ ထွက်ခွာသွား၏။ 34 သို့ရာတွင် လူတချို့သည် ပေါလုနှင့် ပေါင်းဖော်၍ ယုံကြည်သက်ဝင်သူများ ဖြစ်လာကြ၏။ ထိုသူတို့အထဲတွင် အာရေပါဂုတရားလွှတ်တော်အဖွဲ့ဝင် ဒယောနုသိနှင့် ဒမာရိအမည်ရှိသူ အမျိုးသမီးမှစ၍ အခြားသူများလည်း ပါဝင်ကြ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.