တမန်တော်ဝတ္ထု 14 - ခေတ်သစ်မြန်မာ သမ္မာကျမ်းဣကောနိမြို့တွင် ပေါလုနှင့် ဗာနဗ ဟောပြောခြင်း 1 ဣကောနိမြို့တွင်လည်း ပေါလုနှင့် ဗာနဗတို့သည် ဂျူးဝတ်ပြုဆောင်သို့ ဝင်၍ ဟောပြောသဖြင့် ဂျူးလူမျိုးနှင့်ဂရိလူမျိုး အမြောက်အမြားသည် ယုံကြည်သက်ဝင်လာကြ၏။ 2 သို့ရာတွင် ယုံကြည်သက်ဝင်မှုမရှိသောဂျူးများက လူမျိုးခြားတို့ကို သွေးထိုးလှုံ့ဆော်၍ ယုံကြည်သူများအပေါ် မုန်းတီးစိတ်ဖြစ်စေကြ၏။ 3 သူတို့သည် အချိန်ကြာမြင့်စွာနေ၍ သခင်ဘုရား၏အကြောင်းကို ရဲရင့်စွာဟောပြောကြ၏။ သခင်ဘုရားသည် နိမိတ်လက္ခဏာများနှင့် အံ့ဖွယ်ဖြစ်ရပ်များကို သူတို့အား ပြုခွင့်ပေးခြင်းဖြင့် မိမိ၏ကျေးဇူးတော်နှင့်ဆိုင်သော နှုတ်ကပတ်တရားတော်မှန်ကန်ကြောင်း သက်သေပြတော်မူ၏။ 4 သို့သော် မြို့သူမြို့သားတို့သည် အုပ်စုကွဲကာ တချို့မှာ ဂျူးတို့ဘက်ပါ၍ တချို့မှာ တမန်တော်တို့ဘက်ပါကြ၏။ 5 လူမျိုးခြားတချို့နှင့် ဂျူးတို့သည် သူတို့၏အာဏာပိုင်များနှင့်အတူ တမန်တော်တို့ကို နှိပ်စက်၍ ကျောက်ခဲနှင့်ပေါက်ရန် ကြံစည်အားထုတ်ကြ၏။ 6 ထိုအကြောင်းကို တမန်တော်တို့သိကြသောအခါ လုကောနိပြည်ရှိ လုတ္တရမြို့၊ ဒေရဗေမြို့နှင့် အနီးတစ်ဝိုက်ရှိ ဒေသများသို့ ထွက်ပြေးတိမ်းရှောင်၍ 7 ထိုနေရာများတွင်လည်း သတင်းကောင်းကို ဆက်လက်ဟောပြောကြ၏။ လုတ္တရမြို့နှင့် ဒေရဗေမြို့တွင် ပေါလုနှင့် ဗာနဗတို့ ဟောပြောခြင်း 8 လုတ္တရမြို့တွင် မွေးရာပါ ခြေမသန်သဖြင့် တစ်ခါမျှ လမ်းမလျှောက်နိုင်သောသူတစ်ဦးရှိ၏။ 9 ထိုသူသည် ထိုင်လျက် ပေါလုဟောပြောသည်ကို နားထောင်နေ၏။ ပေါလုသည် ထိုသူကို သေချာစွာ ကြည့်လျှင် သူ့ထံ၌ အကောင်းပကတိအတိုင်းဖြစ်ရန် ယုံကြည်ခြင်းရှိသည်ကို တွေ့မြင်သဖြင့် 10 “ထ၍ မတ်တတ်ရပ်လော့” ဟု ကျယ်လောင်သောအသံဖြင့် ပြောလေ၏။ ထိုအခါ သူသည် ထခုန်၍ လမ်းလျှောက်လေ၏။ 11 လူထုကြီးသည် ပေါလုပြုသောအမှုကို မြင်သောအခါ “ဘုရားများသည် လူယောင်ဆောင်၍ ငါတို့ထံဆင်းကြွလာပြီ” ဟု လုကောနိဘာသာစကားဖြင့် အော်ဟစ်ပြောဆိုကြ၏။ 12 သူတို့က ဗာနဗကို ဂရိနတ်ဘုရား ဇုသဟု ခေါ်၍ ပေါလုကိုမူ အဓိကဟောပြောသူဖြစ်သောကြောင့် ဟေရမဟု ခေါ်ကြ၏။ 13 ဇုသနတ်ဘုရား၏ဗိမာန်သည် မြို့ပြင်တွင် ရှိ၏။ ထိုနတ်ဘုရား၏ယဇ်ပုရောဟိတ်သည် လူထုနှင့်အတူ တမန်တော်တို့အား ယဇ်ပူဇော်လိုသဖြင့် နွားနှင့် ပန်းကုံးများကို မြို့အဝင်တံခါးသို့ ယူလာလေ၏။ 14 ထိုအကြောင်းကို တမန်တော်ပေါလုနှင့် ဗာနဗတို့ကြားသောအခါ မိမိတို့၏အဝတ်များကို ဆုတ်ဖြဲ၍ လူအုပ်ထဲသို့ ပြေးဝင်ကာ 15 “မိတ်ဆွေတို့… အဘယ်ကြောင့် ဤသို့ပြုကြသနည်း။ ကျွန်ုပ်တို့သည်လည်း သင်တို့ကဲ့သို့ သာမန်လူများပင် ဖြစ်ကြ၏။ သင်တို့သည် ဤအဓိပ္ပာယ်မဲ့သောအရာများကို ကျောခိုင်း၍ ကောင်းကင်၊ မြေကြီး၊ ပင်လယ်နှင့် ထိုအရပ်တို့၌ ရှိသမျှသောအရာများကို ဖန်ဆင်းတော်မူသည့် အသက်ရှင်သောဘုရားသခင်ထံသို့ လှည့်လာကြစေရန် ကျွန်ုပ်တို့သည် သင်တို့ထံ သတင်းကောင်းယူလာရခြင်းဖြစ်၏။ 16 လွန်ခဲ့သောအချိန်တွင် ဘုရားသခင်သည် လူမျိုးတိုင်းကို မိမိတို့၏အလိုဆန္ဒအတိုင်း နေထိုင်ရန် ခွင့်ပြုထားတော်မူ၏။ 17 သို့သော်လည်း ဘုရားသခင်သည် သင်တို့အား ကျေးဇူးပြုလျက် ကောင်းကင်မှမိုး ရွာစေ၍ အသီးအနှံကို ဖြစ်ထွန်းစေတော်မူ၏။ စားစရာကိုလည်း ပေး၍ စိတ်ရွှင်လန်းဝမ်းမြောက်စေတော်မူ၏။ ဤသို့ဖြင့် ဘုရားသခင်သည် မိမိရှိတော်မူကြောင်းကို အစဉ်သက်သေပြတော်မူ၏” ဟု အော်ဟစ်ပြောဆိုကြလေ၏။ 18 သူတို့သည် ထိုသို့ပြောဆိုလျက် မိမိတို့အားယဇ်မပူဇော်ရန် လူထုကို ခက်ခဲစွာ တားမြစ်ကြရ၏။ 19 သို့သော် အန္တိအုတ်မြို့နှင့် ဣကောနိမြို့မှ ဂျူးများရောက်လာ၍ လူထုကို သိမ်းသွင်းပြီးလျှင် ပေါလုအား ကျောက်ခဲနှင့်ပေါက်ကာ သေပြီအထင်ဖြင့် မြို့ပြင်သို့ဆွဲထုတ်ကြ၏။ 20 တပည့်တော်တို့ ဝန်းရံထားကြစဉ် ပေါလုသည် ထ၍ မြို့ထဲသို့ ဝင်လေ၏။ နောက်တစ်နေ့တွင် ဗာနဗနှင့်အတူ ဒေရဗေမြို့သို့ထွက်သွားလေ၏။ ဆီးရီးယားပြည်ရှိ အန္တိအုတ်မြို့သို့ ပေါလုနှင့်ဗာနဗ လှည့်ပြန်ခြင်း 21 သူတို့သည် ဒေရဗေမြို့တွင် သတင်းကောင်းကို ဟောပြော၍ တပည့်တော်များစွာ မွေးထုတ်ပြီးနောက် လုတ္တရမြို့၊ ဣကောနိမြို့နှင့် ပိသိဒိပြည်ရှိအန္တိအုတ်မြို့သို့ လှည့်ပြန်ကြ၏။ 22 သူတို့က “ကျွန်ုပ်တို့သည် ဆင်းရဲဒုက္ခများစွာခံရခြင်းအားဖြင့် ဘုရားသခင်၏နိုင်ငံတော်သို့ ဝင်ရောက်ကြရမည်” ဟု ဆိုလျက် ထိုမြို့များရှိ တပည့်တော်တို့၏ စိတ်ကို ကြံ့ခိုင်စေကြ၏။ ယုံကြည်ခြင်းတွင်လည်း ဆက်လက်ရပ်တည်ရန် ခွန်အားပေးကြ၏။ 23 အသင်းတော်တိုင်းတွင် အကြီးအကဲများကိုခန့်ထားကြ၏။ ထို့နောက် အစာရှောင်ဆုတောင်း၍ ထိုအကြီးအကဲများကို သူတို့ယုံကြည်သော သခင်ဘုရားထံ အပ်နှံကြ၏။ 24 ထို့နောက် ပိသိဒိပြည်ကို ဖြတ်၍ ပံဖုလိပြည်သို့ ရောက်ကြ၏။ 25 ပေရဂေမြို့တွင် နှုတ်ကပတ်တရားတော်ကို ဟောပြောကြပြီးမှ အတ္တလိမြို့သို့ ဆင်းသွားကြ၏။ 26 ထိုအတ္တလိမြို့မှတစ်ဆင့် ရွက်လွှင့်၍ အန္တိအုတ်မြို့သို့ ပြန်သွားကြ၏။ ထိုအန္တိအုတ်မြို့သည် ယခုဆောင်ရွက်ပြီးစီးသွားသောအမှုအတွက် ဘုရားသခင်၏ကျေးဇူးတော်၌ အပ်နှံခဲ့သော မြို့ဖြစ်၏။ 27 အန္တိအုတ်မြို့သို့ ရောက်ကြသောအခါ အသင်းသားများကို စုဝေးစေလျက် မိမိတို့အားဖြင့် ဘုရားသခင်ပြုတော်မူသောအရာအားလုံးကိုလည်းကောင်း၊ လူမျိုးခြားတို့ ယုံကြည်လာစေရန် ဘုရားသခင်လမ်းဖွင့်ပေးတော်မူကြောင်းကိုလည်းကောင်း ပြောပြကြ၏။ 28 ထိုမြို့တွင် တပည့်တော်များနှင့်အတူ ကြာမြင့်စွာ နေကြ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.