တမန်တော်ဝတ္ထု 12 - ခေတ်သစ်မြန်မာ သမ္မာကျမ်းယာကုပ်အသတ်ခံရခြင်းနှင့် ပေတရုအကျဉ်းချခံရခြင်း 1 ထိုအချိန်တွင် ဟေရုဒ်မင်းသည် အသင်းတော်မှ လူတချို့ကို ညှဉ်းပန်းနှိပ်စက်ရန် စီစဉ်လေ၏။ 2 သူသည် ယောဟန်၏အစ်ကို ယာကုပ်ကို ဓားဖြင့်ကွပ်မျက်လေ၏။ 3 ထိုအမှုကို ဂျူးလူမျိုးများက နှစ်ထောင်းအားရကြောင်း မြင်သောအခါ သူသည် ပေတရုကိုလည်း ဖမ်းဆီးရန် ဆက်လက်ဆောင်ရွက်လေ၏။ ထိုအချိန်သည် တဆေးမဲ့မုန့်ပွဲတော် ကာလအတွင်းဖြစ်၏။ 4 ဟေရုဒ်မင်းသည် ပေတရုအား ဖမ်းဆီးပြီးနောက် ထောင်အတွင်းထည့်ကာ သူ့ကို စစ်သားလေးဦးဖြင့်ဖွဲ့ထားသော အစောင့်တပ်လေးစုထံသို့ အပ်ထားလေ၏။ ပသခါပွဲတော်ပြီးလျှင် ပေတရုကို လူအများရှေ့သို့ ထုတ်၍ စစ်ဆေးရန် ဟေရုဒ်ကြံစည်လေ၏။ 5 ထိုသို့ ပေတရုသည် ထောင်ထဲတွင်ရှိနေစဉ် အသင်းတော်သည် သူ့အတွက် ဘုရားသခင်ထံ စိတ်အားပြင်းပြစွာ ဆုတောင်းလေ၏။ ပေတရု ထောင်မှအံ့အားသင့်ဖွယ်လွတ်မြောက်ခြင်း 6 ဟေရုဒ်မင်းသည် ပေတရုကို အပြင်ထုတ်မည့်နေ့မတိုင်မီ ညတွင် ပေတရုသည် သံကြိုးနှစ်ချောင်းဖြင့် ချည်နှောင်ခံထားရပြီး စစ်သားနှစ်ဦးအလယ်တွင် အိပ်ပျော်လျက်ရှိ၏။ အစောင့်များသည်လည်း ထောင်တံခါးရှေ့တွင် စောင့်ကြပ်လျက် ရှိနေကြ၏။ 7 ထိုအခါ ထာဝရဘုရား၏ကောင်းကင်တမန်သည် ရုတ်တရက်ပေါ်လာသဖြင့် အချုပ်ခန်းထဲတွင် အလင်းရောင်ထွန်းလင်းလေ၏။ ထို့နောက် ပေတရုနံဘေးကို ပုတ်နှိုး၍ “အလျင်အမြန်ထလော့” ဟု ဆိုလေ၏။ ထိုအခါ သံကြိုးများသည် ပေတရု၏လက်မှ ကျွတ်ကျလေ၏။ 8 ကောင်းကင်တမန်က “သင်၏ခါးပတ်ကို ပတ်၍ ဖိနပ်ကိုလည်းစီးလော့” ဟု ဆိုလျှင် သူသည် ထိုအတိုင်းလုပ်ဆောင်လေ၏။ ထို့နောက် ပေတရုအား “သင့်ဝတ်ရုံကို ခြုံ၍ ငါ့နောက်သို့လိုက်လော့” ဟု ဆိုပြန်၏။ 9 ပေတရုသည် ထွက်၍ သူ၏နောက်သို့ လိုက်လေ၏။ ကောင်းကင်တမန်လုပ်ဆောင်မှုအားဖြင့် ဖြစ်ပျက်နေသောအရာသည် အမှန်ဖြစ်ကြောင်းမသိဘဲ ရူပါရုံကို မြင်နေရသည်ဟုသာ ပေတရုထင်မှတ်လေ၏။ 10 သူတို့သည် ပထမနှင့်ဒုတိယ အစောင့်တို့ကိုဖြတ်ကျော်ပြီးနောက် မြို့ဝင်သံတံခါးရှေ့သို့ ရောက်ရှိလာကြ၏။ ထိုတံခါးသည် အလိုအလျောက်ပွင့်သွားသဖြင့် သူတို့သည်လည်းအပြင်ထွက်၍ လမ်းကျဉ်းတစ်ခုအတိုင်းလျှောက်ကြစဉ် ကောင်းကင်တမန်သည် ပေတရုထံမှ ရုတ်တရက် ထွက်ခွာသွားလေ၏။ 11 ထိုအခါ ပေတရုသည် သတိဝင်လာ၍ “သခင်ဘုရားသည် မိမိ၏ကောင်းကင်တမန်ကို စေလွှတ်၍ ဟေရုဒ်မင်း၏လက်မှလည်းကောင်း၊ ဂျူးတို့၏အကြံအစည်မှလည်းကောင်း ငါ့ကို ကယ်တင်တော်မူကြောင်း ယခုငါအမှန်တကယ်သိရပြီ” ဟု ဆိုလေ၏။ 12 ထိုသို့ သိလျှင်သိချင်း ယောဟန်မာကု၏မိခင်ဖြစ်သူ မာရိအိမ်သို့ သွားလေ၏။ ထိုနေရာတွင် လူများစွာစုဝေးလျက် ဆုတောင်းနေကြ၏။ 13 ပေတရုသည် ခန်းမတံခါးကို ခေါက်ရာ ရောဒေအမည်ရှိ အိမ်အကူအမျိုးသမီးငယ်တစ်ယောက်သည် တံခါးဖွင့်ရန် ရောက်လာ၏။ 14 သူသည် ပေတရု၏အသံကို မှတ်မိလေ၏။ ထို့ကြောင့် ဝမ်းသာသဖြင့် တံခါးကိုပင်မဖွင့်ဘဲ အထဲသို့ပြေးဝင်၍ တံခါးရှေ့တွင် ပေတရုရပ်နေသည်ဟု အကြောင်းကြားလေ၏။ 15 ထိုသူတို့က “သင်သည်ရူးနေပေပြီ” ဟု ဆိုသော်လည်း ထိုအမျိုးသမီးငယ်က အမှန်ဖြစ်ကြောင်း အခိုင်အမာပြောလေ၏။ သူတို့က “ထိုသူသည် ပေတရု၏ကောင်းကင်တမန်ဖြစ်လိမ့်မည်” ဟု ဆိုကြ၏။ 16 သို့သော် ပေတရုက တံခါးကို ဆက်၍ခေါက်နေသဖြင့် သူတို့သည်ဖွင့်ကြရာ သူ့ကို တွေ့မြင်လျှင် အံ့ဩကြ၏။ 17 ပေတရုကလည်း တိတ်ဆိတ်စွာနေရန် လက်ရိပ်ပြ၍ ဘုရားသခင်သည် သူ့ကို ထောင်မှ မည်သို့ခေါ်ထုတ်လာကြောင်း ထိုသူတို့အား ပြောပြလေ၏။ ထို့နောက် သူက “ဤအရာများကို ယာကုပ်နှင့် အခြားညီအစ်ကိုမောင်နှမတို့အား ပြန်ပြောကြလော့” ဟု ဆိုပြီးလျှင် အခြားနေရာသို့ ထွက်ခွာသွားလေ၏။ 18 မိုးလင်းသောအခါ ပေတရုမည်သို့ဖြစ်သွားသနည်းဟူ၍ စစ်သားများအကြား ရုန်းရင်းဆန်ခတ်ဖြစ်ကြ၏။ 19 ဟေရုဒ်မင်းသည် ပေတရုကို ရှာ၍မတွေ့သောအခါ အစောင့်များကို စစ်ဆေးပြီးမှ သေဒဏ်ပေးရန် အမိန့်ချ၏။ ထို့နောက် သူသည် ယုဒပြည်မှ ဆီဇာရီးယားမြို့သို့ဆင်းသွား၍ ထိုမြို့တွင်နေလေ၏။ ဟေရုဒ်မင်း သေဆုံးခြင်း 20 ထို့နောက် ဟေရုဒ်မင်းသည် တိုင်ရာမြို့သားများနှင့်ဆီဒုန်မြို့သားများကို အမျက်ထွက်လေ၏။ ထို့ကြောင့် ထိုသူတို့သည် ညီညွတ်စွာ လာရောက်ခစား၍ ဗလတ္တုအမည်ရှိသော မင်းကြီး၏အတွင်းဝန်ကို စည်းရုံးကာ ငြိမ်းချမ်းရေးအတွက် တောင်းဆိုကြ၏။ အဘယ်ကြောင့်ဆိုသော် သူတို့၏ပြည်သည် အစာရေစာအတွက် ဟေရုဒ်မင်း၏တိုင်းပြည်ကို အမှီပြုနေရသောကြောင့်ဖြစ်၏။ 21 ချိန်းဆိုထားသောနေ့တွင် ဟေရုဒ်မင်းသည် မင်းဝတ်တန်ဆာများကို ဝတ်ဆင်လျက် ရာဇပလ္လင်ပေါ်တွင်ထိုင်ကာ လူထုအား မိန့်ခွန်းပြောလေ၏။ 22 လူထုက “ဤအသံသည် လူ၏အသံမဟုတ်ဘဲ ဘုရားတစ်ပါး၏အသံဖြစ်ပေသည်” ဟု ကြွေးကြော်ကြ၏။ 23 ထိုအခါ သူသည် ဘုရားသခင်၏ဘုန်းတော်ကိုမချီးမြှောက်သောကြောင့် ထာဝရဘုရား၏ကောင်းကင်တမန်သည် ချက်ချင်းပင် ဒဏ်ခတ်သဖြင့် ပိုးများကိုက်စားခြင်းခံရ၍ သေဆုံးလေ၏။ 24 ဘုရားသခင်၏နှုတ်ကပတ်တရားတော်မှာမူ ဆက်လက်ပျံ့နှံ့၍ ယုံကြည်သူများ တိုးပွားလာ၏။ ဗာနဗနှင့် ရှောလုတို့ကို စေလွှတ်ခြင်း 25 ထို့နောက် ဗာနဗနှင့် ရှောလုသည် ဆောင်ရွက်စရာအမှုများကို အပြီးသတ်ပြီးလျှင် ယောဟန်မာကုကို မိမိတို့နှင့်တကွ ခေါ်ခဲ့၍ ဂျေရုဆလင်မြို့မှ ပြန်လာကြ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.