ဂလာတိ 1 - ခေတ်သစ်မြန်မာ သမ္မာကျမ်းရှင်ပေါလု၏ နှုတ်ခွန်းဆက်စကား 1 လူတို့၏ အခွင့်အာဏာဖြင့် မဟုတ်၊ ကြားခံလူအားဖြင့်လည်း မဟုတ်၊ ယေရှုခရစ်တော်နှင့် ထိုသခင်ကို သေခြင်းမှ ရှင်ပြန်ထမြောက်စေတော်မူသည့် ခမည်းတော်ဘုရားသခင်အားဖြင့် တမန်တော်အဖြစ် ခန့်အပ်ခံရသူဖြစ်သော ကျွန်ုပ်ပေါလု စာရေးလိုက်ပါ၏။ 2 ဤစာသည် ကျွန်ုပ်အပါအဝင် ကျွန်ုပ်နှင့်အတူရှိသော ညီအစ်ကိုမောင်နှမတို့က ဂလာတိပြည်၌ ရှိသော အသင်းတော်များထံသို့ ပို့လိုက်သောစာ ဖြစ်၏။ 3 ကျွန်ုပ်တို့၏ အဖဘုရားသခင်နှင့် သခင်ယေရှုခရစ်တော်တို့ထံမှ ကျေးဇူးတော်နှင့် ငြိမ်းချမ်းခြင်းသည် သင်တို့အပေါ် သက်ရောက်ပါစေသော။ 4 ခရစ်တော်သည် ကျွန်ုပ်တို့ အဖဘုရားသခင်၏ အလိုတော်အတိုင်း ဤဆိုးညစ်သောကာလထဲမှ ကျွန်ုပ်တို့ကို ကယ်နုတ်ရန် ကျွန်ုပ်တို့၏ အပြစ်များအတွက် အသက်ပေးတော်မူ၏။ 5 အဖဘုရားသခင်သည် အစဉ်ထာဝရ ဘုန်းကြီးတော်မူပါစေသော။ အာမင်။ အခြားသောသတင်းကောင်းမရှိ 6 ခရစ်တော်၏ ကျေးဇူးတော်ကို ခံစားစေရန် သင်တို့ကို ခေါ်တော်မူသော ဘုရားသခင်အား သင်တို့သည် လျင်မြန်စွာ စွန့်ပယ်၍ အခြားသတင်းကောင်းကို လက်ခံကြသောကြောင့် ကျွန်ုပ်အံ့ဩရ၏။ 7 အမှန်တွင်မူ အခြားသတင်းကောင်းဟူ၍ မရှိပါ။ အချို့က သင်တို့ကို စိတ်ရှုပ်ထွေးစေ၍ ခရစ်တော်၏ သတင်းကောင်းကို မှောက်လှန်လိုခြင်းသာ ဖြစ်၏။ 8 သို့သော် ကျွန်ုပ်တို့ဖြစ်စေ၊ ကောင်းကင်ဘုံမှ ကောင်းကင်တမန်ဖြစ်စေ သင်တို့အား ကျွန်ုပ်တို့ဟောပြောခဲ့သော သတင်းကောင်းမဟုတ်သည့် အခြားသတင်းကောင်းကို ဟောပြောလျှင် ဟောပြောသောသူသည် ကျိန်ဆိုခြင်းကို ခံရပါစေ။ 9 တစ်စုံတစ်ယောက်သည် သင်တို့လက်ခံခဲ့သော သတင်းကောင်းမဟုတ်သည့် အခြားသတင်းကောင်းကို ဟောပြောလျှင် သူသည် ကျိန်ဆိုခြင်းကို ခံရပါစေ ဟု ယခင်က ကျွန်ုပ်တို့ပြောခဲ့သည့်အတိုင်း ယခုတစ်ဖန် ကျွန်ုပ်ပြော၏။ 10 ကျွန်ုပ်သည် လူတို့၏ မျက်နှာသာပေးခြင်းကို ရရန် ကြိုးစားနေသလော။ ဘုရားသခင်၏ မျက်နှာသာပေးခြင်းကို ရရန် ကြိုးစားနေသလော။ လူတို့ နှစ်သက်သဘောကျစေရန် ကြိုးစားနေသလော။ လူတို့ နှစ်သက်သဘောကျစေရန် ကြိုးစားနေသေးလျှင် ကျွန်ုပ်သည် ခရစ်တော်၏ အစေအပါးတစ်ယောက် မဟုတ်ပေ။ ပေါလုဟောသည့်သတင်းကောင်းသည် ခရစ်တော်ထံမှ လာသော သတင်းကောင်းဖြစ်ခြင်း 11 ညီအစ်ကိုမောင်နှမတို့… ကျွန်ုပ်ဟောပြောခဲ့သော သတင်းကောင်းမှာ လူတို့ဖန်တီးထားသောသတင်းကောင်း မဟုတ်ကြောင်း သင်တို့အား သိစေလို၏။ 12 ထိုသတင်းကောင်းကို မည်သူတစ်ဦးတစ်ယောက်ထံကမျှ ကျွန်ုပ်လက်ခံရရှိသည်မဟုတ်။ သင်ယူခဲ့ရသည်လည်း မဟုတ်။ ယေရှုခရစ်တော်၏ ဗျာဒိတ်တော်ဖွင့်ပြခြင်းမှ ရရှိခဲ့ခြင်းဖြစ်၏။ 13 ယခင်က ကျွန်ုပ်သည် ဂျူးဘာသာဝင်အဖြစ် နေထိုင်အသက်ရှင်ခဲ့စဉ်က ဘုရားသခင်၏ အသင်းတော်ကို ပြင်းထန်စွာ ညှဉ်းဆဲပြီး ဖျက်ဆီးရန် ကြိုးစားခဲ့သည်ကို သင်တို့ကြားသိကြ၏။ 14 ကျွန်ုပ်သည် ဂျူးဘာသာ၏ ယုံကြည်မှုကို လိုက်နာကျင့်သုံးရာတွင် ကျွန်ုပ်၏ လူမျိုးထဲမှ သက်တူရွယ်တူများထက် သာလွန်ပြီး ဘိုးဘေးတို့၏ ထုံးတမ်းစဉ်လာများကို ထိန်းသိမ်းရာတွင်လည်း အလွန်စိတ်အားထက်သန်ခဲ့သူ ဖြစ်၏။ 15 သို့သော် မိခင်ဗိုက်ထဲ၌ ရှိစဉ်ကပင် ဘုရားသခင်သည် ကျွန်ုပ်ကို ကျေးဇူးတော်အားဖြင့် ရွေးချယ်တော်မူ၍ အစေခံရန် ခေါ်တော်မူ၏။ 16 ထို့နောက် သားတော်၏ သတင်းကောင်းကို လူမျိုးခြားတို့ထံ ဟောပြောနိုင်ရန် အလိုတော်နှင့်အညီ ကျွန်ုပ်ကို သားတော်နှင့် သိကျွမ်းစေတော်မူ၏။ ထိုအခါ ကျွန်ုပ်သည် မည်သူ့ထံကမျှ အကြံဉာဏ်မတောင်းခဲ့။ 17 ကျွန်ုပ်ထက် စော၍ တမန်တော်ဖြစ်သော သူတို့ရှိရာ ဂျေရုဆလင်မြို့သို့လည်း မသွား။ သို့သော် အာရပ်ပြည်သို့ သွားပြီးနောက် ဒမတ်စကပ်မြို့သို့ ပြန်လာခဲ့၏။ 18 ထို့နောက် သုံးနှစ်ကြာသော် ကျွန်ုပ်သည် ပေတရုနှင့် အကျွမ်းဝင်ရန် ဂျေရုဆလင်မြို့သို့ သွား၍ သူနှင့်အတူ ဆယ့်ငါးရက် နေထိုင်ခဲ့၏။ 19 သို့သော် သူနှင့် သခင်ဘုရား၏ ညီတော် ယာကုပ်မှလွဲ၍ အခြားမည်သည့် တမန်တော်ကိုမျှ ကျွန်ုပ်မတွေ့ခဲ့။ 20 သင်တို့ထံသို့ ရေးသောစာ၌ လိမ်လည်သည့်အကြောင်းအရာမပါကြောင်း ဘုရားသခင်ကို တိုင်တည်၍ ကျွန်ုပ်ပြောဆိုဝံ့၏။ 21 ထို့နောက်တွင်မူ ဆီးရီးယားပြည်နှင့် ဆီလီဆီးယားပြည်သို့ ကျွန်ုပ်သွားခဲ့၏။ 22 ထိုအချိန်တွင် ခရစ်တော်ကို ယုံကြည်သော ယုဒပြည်ရှိ အသင်းတော်ဝင်များသည် ကျွန်ုပ်နှင့် လူချင်း မတွေ့ဆုံကြသေးပေ။ 23 “ယခင်က ငါတို့ကို ညှဉ်းဆဲခဲ့သောသူသည် တစ်ချိန်က သူကိုယ်တိုင် ဖျက်ဆီးရန် ကြိုးစားခဲ့သော ယုံကြည်ခြင်းတရားကို ဟောပြောနေသည်” ဟု လူတို့ ပြောဆိုသံကို သာလျှင် ထိုသူတို့ ကြားသိရ၏။ 24 ထိုအခါ သူတို့သည် ကျွန်ုပ်ကြောင့် ဘုရားသခင်ကို ချီးမွမ်းကြ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.