Mateo 8 - Apam Foforɔ

Yesu saa kwatani bi yadeɛ

¹ Berɛ a Yesu siane firii mmepɔ he so he, nnipadɔm pii dii n’akyi.

² Na hwɛ, kwatani bi baa ne hɔ bebuu nkotodwe n’anim, kaa sɛ, “Awurade, sɛ wopɛ a, wobetumi ama me ho afiri.”

³ Na Yesu tenee ne nsa de kaa no, kaa sɛ, “Mepɛ. Wo ho mfiri!” Amonom hɔaa ne kwata he firii ne ho.

⁴ Na Yesu ka kyerɛɛ no sɛ, “Hwɛ na woanka ankyerɛ nipa biaa; afei kɔ, fa wo ho kɔkyerɛ sɔfo, na bɔ afɔdeɛ a Mose hyɛeɛ he, na ɔnyɛ adansedie mma bɛ.”

Yesu saa asraafoɔ ha so panyini bi akoa yadeɛ

⁵ Na oduruu Kapernaum he, asraafoɔ ha so panyini bi baa ne hɔ, srɛɛ no

⁶ sɛ, “Awurade, m’akoa abubu gu fie a ohu amane paa.”

⁷ Na ɔka kyerɛɛ no sɛ, “Mɛba abɛsa no yadeɛ.”

⁸ Na asraafoɔ ha so panyini he buaa sɛ, “Owura, memfata sɛ wobɛba me fie; kasa kɛkɛ, na m’akoa he ho bɛtɔ no.

⁹ Na me nso meyɛ bi a me di tumi a asraafoɔ hyɛ m’ase; sɛ meka kyerɛ baako sɛ, “Kɔ a ɔkɔ,” na meka kyerɛ foforɔ nso sɛ, “Bra,” a ɔba, na mehyɛ m’akoa so sɛ, “Yɔ yei” a, ɔyɔ.”

¹⁰ Na Yesu tee deɛ ɔkaeɛ he, ne ho dwirii no, na ɔka kyerɛɛ bɛ a bedi n’akyi he sɛ, “Nɔkorɛ meeka akyerɛ ho, menhu biaa Israel mu a ɔwɔ gyidie sei.

¹¹ Meeka akyerɛ ho, nnipa bebree firi apieeɛ ne atɔeɛ bɛba ne Abraham ne Isak ne Yakob abɛtena soro ahennie mu abedidi,

¹² na ahennie he mma paa deɛ bɛbɛto bɛ atwene sum kabii mu, baabi a suu ne benabɔ ya.”

¹³ Na Yesu ka kyerɛɛ asraafoɔ ha so panyini he sɛ, “Kɔ; ɔnyɔ hɔ ma wo sɛdeɛ wo gyidie teɛ.” Na akoa he ho tɔɔ no saa dɔnhwere heaa mu.

Yesu saa nnipa bebree yadeɛ ya Petro fie

¹⁴ Na afei Yesu kɔɔ Petro fie, na abunu akye Petro ase baa da hɔ.

¹⁵ Yesu sɔɔ ne nsa, na abunu he gyaeɛ, na ɔsɔreeɛ, na ɔyɔɔ no ahɔhoyɛ.

¹⁶ Saa anwummerɛ he bɛde nnipa bebree a bɛwɔ ahohommɔne braa no; ɔde tumi a ɔya n’asɛm mu tutuu ahohommɔne he, na ɔsaa bɛ a bɛyare nyinaa yadeɛ.

¹⁷ Yei maa deɛ diyifoɔ Yesaia kaeɛ he baam sɛ, “Ɔfaa yɛ mmerɛyɛ na ɔsoaa yɛ yadeɛ.”

Yesu daakye akyidifoɔ

¹⁸ Afei Yesu huu nnipadɔm pii sɛ bɛatwa ne ho ahyia he, ɔhyɛɛ sɛ bentwa nkɔ fa nohoaa.

¹⁹ Twerɛfoɔ bi baa ne nkyɛne sɛ, “Kyerɛkyerɛni, medi w’akyi baabi a wobɛkɔ biaa.”

²⁰ Na Yesu ka kyerɛɛ no sɛ, “Sakramane wɔ bɔno, na nnomaa a bɛya wiem wɔ pirebuo; nso Nipa Ba he deɛ onni baabi a ɔde ne ti bɛto mpo.”

²¹ Na suani foforɔ nso kaa sɛ, “Awurade, mma me kwane na menni kane nkosie me papa.”

²² Nso Yesu ka kyerɛɛ no sɛ, “Di m’akyi, na ma awufoɔ nsie bɛ awufoɔ.”

Yesu brɛɛ ahum ase

²³ Na Yesu tenaa kodoɔ he mu he, n’asuafoɔ dii n’akyi.

²⁴ Ahum kɛseɛ bi bɔ faa po he so, na ano dene nti asorɔkye he baa kodoɔ he mu; nso na Yesu ada.

²⁵ Na asuafoɔ he baa ne nkyɛne bɛyanee no, sɛ, “Awurade, gye yɛ! Yɛɛhwere yɛ nkwa!”

²⁶ Na ɔka kyerɛɛ bɛ sɛ, “Mmɛ ntia ho suro yi, ho a ho gyidie sua?” Na ɔsɔreeɛ na ɔteateaa mframa ne po he; na bɛyɛɛ dinn koraa.

²⁷ Na yei yɛɛ bɛ nwanwa, na bɛkaa sɛ, “Abɛ nipa di a, mframa ne po mpo yɔ setie ma no yi?”

Yesu tutuu ahonhommɔne ya Gadarene

²⁸ Na Yesu duruu asuogya hɔ he, Gadarenefoɔ asaase so he, nnipa mmienu a bɛwɔ honhommɔne firi afunsieɛ behyiaa no. Na bɛ ho hu nti, na nnipa biaa ntumi ntwam saa kwane he so.

²⁹ Amonom hɔaa bɛteateam sɛ, Mmɛ ne wo ne yɛ wɔ yɔ, Nyankopɔn Ba? Woaba ha sɛ wobɛha yɛ ansa na mmerɛ he aduru anaa?

³⁰ Saa mmerɛ he na mprakokuo bebree bi oodidi nkyɛne hɔ.

³¹ Na ahohommɔne he srɛɛ no sɛ, “Sɛ wotutu yɛ a, ma yɛnkɔ mprakokuo yi mu.”

³² Na ɔka kyerɛɛ bɛ sɛ, “Honkɔ!” Nti bɛkɔ kɔ wuraa mprakokuo he mu; na hɔaa, mprako he nyinaa bɔɔ bum sianee monku he mu koguu po he mu ma bɛ ase hyeeɛ.

³³ Na bɛ a bɛɛhwɛ mprakokuo he dwane kɔɔ kurom hɔ, kaa deɛ asi fa bɛ a na bɛwɔ ahohommɔne he ho kyerɛɛ bɛ.

³⁴ Na afei kuro mu he nyinaa ba behyiaa Yesu; na behuu no he, bɛsrɛɛ no sɛ ommfiri bɛ mpɔtamu hɔ nkɔ.