Mateo 4 - Apam Foforɔ

Yesu sɔhwɛ

¹ Na afei Honhom he dii Yesu anim de no kɔɔ serɛ so sɛ Bronsam nkɔ sɔ no nhwɛ.

² Odii mmuada adaduannan, awia ne anadwo, na yei akyi he kɔm dee no.

³ Na sɔhwɛfoɔ he ba bɛka kyerɛɛ no sɛ, “Sɛ wo ne Nyankopɔn ba he a, hyɛ ma aboɔ yi nnane paanoo.”

⁴ Nso ɔmaa no mmuaeɛ sɛ, “Bɛatwerɛ sɛ ɔnyɛ paanoo nkoaa so ne nipa nam benya nkwa, na mmom asɛm biaa ofiri Nyankopɔn anum nso.”

⁵ Afei Bronsam de no kɔɔ kuro kronkron he mu de no kosii asɔredane he atifi,

⁶ na ɔka kyerɛɛ no sɛ, “Sɛ wo ne Nyankopɔn ba he a, to wo ho hwe fam; na bɛatwerɛ sɛ, Ɔbɛhyɛ n’abɔfoɔ ama wo na bɛbɛsɔ wo bɛ nsam, na wo nane ɔmpem boɔ.”

⁷ Yesu ka kyerɛɛ no sɛ, “Bɛatwerɛ bio sɛ, ‘Nsɔ Awurade wo Nyankopɔn nhwɛ.’ ”

⁸ Afei nso, Bronsam faa no de no kosii bepɔ tentene bi atifi, na ɔkyerɛɛ no wiase ahennie ne mu afɛfɛdeɛ nyinaa,

⁹ na ɔka kyerɛɛ no sɛ, “Sɛ wobɛkoto asɔre me a, nka mede saa nnoɔma yi nyinaa bɛma wo.”

¹⁰ Yesu ka kyerɛɛ no sɛ: Firi hɔ, Satan! Na bɛatwerɛ sɛ: “Awurade wo Nyankopɔn nkoaa ne sɔre no, na ɔno nkoaa nso ne som no.”

¹¹ Yei akyi he, Bronsam gyaa no hɔ, na afei abɔfoɔ ba bɛsomm no.

Yesu kɔɔ Galilea

¹² Na afei Yesu tee sɛ bɛakye Yohane he, osiim kɔɔ Galilea.

¹³ Ofirii Nasaret na ɔkɔtenaa Kapernaum po he ho, Sebulon ne Naftali, mpɔtamu,

¹⁴ sɛdeɛ ɔbɛyɛ a nkɔmhyɛ a ɔnam diyifoɔ Yesaia so baeɛ he bɛba mu sɛ:

¹⁵ “Sebulon asaase, Naftali asaase, po ho kwane so, Yordan agya amanamane mufoɔ Galilea—

¹⁶ nkurofoɔ a na bɛte sum mu he bɛahu hann kɛseɛ, na bɛ a bɛte sum mu he, bɛahu hann kɛseɛ bi; na bɛ a bɛte wuo sunsum asaase so he, hann apie bɛ so.”

¹⁷ Ofiri saa mmerɛ he ɔɔkɔ he, Yesu firii aseɛ pae mu kaa sɛ, “Honsakra ho adwene na soro ahennie he abɛne.”

Yesu frɛɛ asuafoɔ nnan bi

¹⁸ Na Yesu nam Galilea po ho he, ohuu anuanom mmienu, Simon, a bɛfrɛ no Petro, ɔne ne nua Andrea, sɛ beegu asau po he mu—efiri sɛ na bɛyɛ apofofoɔ.

¹⁹ Na ɔka kyerɛɛ bɛ sɛ, “Honni m’akyi, na mɛma hoayɛ nnipa yifoɔ.”

²⁰ Amonom hɔaa begyaa bɛ asau he hɔ kodii n’akyi.

²¹ Na ofirii hɔ he, ohuu anuanom mmienu bi, Yakobo, Sebedeo ba ne ne nua Yohane, sɛ bɛ ne bɛ papa Sebedeo te kodoɔ mu a beesiesie bɛ asau, na ɔfrɛɛ bɛ.

²² Amonom hɔaa begyaa bɛ kodoɔ ne bɛ papa hɔ, na bekodii n’akyi.

Yesu kaa Nyankopɔn asɛm na ɔsaa yareɛ ya Galilea

²³ Yesu kyinkyinii Galilea nyinaa, kyerɛkyerɛɛ bɛ hyia adane mu, na ɔpae mu kaa ahennie he ho asɛmpa na ɔsaa bɛ a bɛyare nyinaa yadeɛ.

²⁴ Nti ne ho asɛm trɛɛ Siria nyinaa, na bɛde ayarefoɔ, bɛ a bɛyare yadeɛ ahodoɔ ne bɛ a bɛ honam tutu bɛ, ne bɛ a honhom fi ne twerɛ ya bɛ so, ɔne mmubuafoɔ nyinaa, baa ne nkyɛne. Na ɔsaa bɛ nyinaa yadeɛ.

²⁵ Na nkurofoɔ akuoakuo pii firi Galilea, Dekapoli, Yerusalem, Yudea, ne Yordan agya nyinaa dii n’akyi.