Marko 4 - Apam Foforɔ

Mfantoho a ɔfa abaguo ho

¹ Na afei nso, Yesu hyɛɛ aseɛ maa nkyerɛkyerɛ po he ho. Nnipadɔm betwaa ne ho hyiaeɛ ma ɔkɔforoo kodoɔ bi po he so na ɔtenaa mu, berɛ a na nnipadɔm he tete po he ano.

² Ɔhyɛɛ aseɛ de mfantoho kyerɛkyerɛɛ bɛ nnoɔma pii, ne nkyerɛkyerɛ he mu he, ɔka kyerɛɛ bɛ sɛ,

³ “Hontie! Gufoɔ bi koguu aba.

⁴ Na oogu he, aba he bi koguu kwane nkyɛne, na nnomaa bediiɛ.

⁵ Aba he bi nso koguu abotane so, baabi a nɛteɛ nni papa, esiane sɛ nɛteɛ he mu nnɔ nti ofifirii ntɛm.

⁶ Na awia bɔeɛ he, ɔhyee no; na ɔnam sɛ onni nhini nti otwintwameeɛ.

⁷ Na aba he bi koguu nkasɛem, na nkasɛe he nyiniiɛ he, omiaa no, na anso aba biaa.

⁸ Afei, aba he bi nso koguu asaase pa mu, na ɔsoo aba, onyiniiɛ, yɛɛ akɛseɛ, na ofirii aseɛ sõõ aba mmɔho aduasa, aduosia ne mmɔho ha.”

⁹ Na ɔkaa sɛ, “Ma nea ɔwɔ aso betie biaa ntie.”

Mfantoho he Nkyerɛaseɛ

¹⁰ Berɛ a Yesu nkoaa ya hɔ he, bɛ a na bɛya ne nkyɛne he ne n’asuafoɔ dummienu he bisaa no mfantoho he ho asɛm.

¹¹ Na ɔka kyerɛɛ bɛ sɛ, “Ho deɛ, bɛde Nyankopɔn ahennie he ho ahintasɛm ama ho, na bɛ a bɛya wiase he deɛ, bɛde bibiaa ama bɛ mfantoho mu;

¹² sɛnea ɔbɛyɛ a, ‘bɛbɛhwɛ paa deɛ nso benhu, na bɛatie paa nso bɛnte aseɛ; na bɛansakra annya bɔne fakyɛ.’ ”

¹³ Na obisaa bɛ sɛ, “Honnte mfantoho yi ase? Na ɔbɛyɛ na ho ate mfantoho a aka he nyinaa ase.

¹⁴ Gufoɔ he guu asɛm he.

¹⁵ Na aba a oguu kwane nkyɛne he gyina hɔ ma nnipa a bɛte asɛm he a, ɔnkyerɛ na Satan abeyi asɛm a bɛagu ne bɛ mu he kɔ.

¹⁶ Na yeinom ne nea beguu ne abotane mu he: bɛne nnipa a sɛ bɛte asɛm he a, bɛde anigye gye no ntɛm so.

¹⁷ Nso ɔnam sɛ benni nhini nti, begyina kakra bi, na sɛ haw anaa taa ba bɛ so ɔnam asɛm he nti a, bɛhwe ase ntɛm so.

¹⁸ Na aba a oguu nkasɛe mu he gyina hɔ ma nnipa a sɛ bɛte asɛm he a,

¹⁹ wiase mu dadwene ne ahonya ho nnadaa ne nnoɔma a aka ho akɔnnɔ ba bemia asɛm he, na ɔmma no nso aba biaa.

²⁰ Na nea beguu no asaase pa mu he gyina hɔ ma nnipa a bɛte asɛm he a bɛgye na bɛsõ aba mmɔho aduasa ne aduosia ne mmɔho ha.”

Kanea a ɔhyɛ Atam Ase

²¹ Hohwɛeɛ yi, bɛde kanea ba sɛ bɛ ɔɔbɛhyɛ atam anaa mpa ase, a ɔnyɛ kanea dua so ne bɛde oobisi?

²² Na bibiaa nni hɔ a ahinta a bemmie so, anaa bibiaa nni hɔ a ahinta a ɔmma hann mu.

²³ Ma deɛ ɔwɔ aso a bɛde tie he ntie!”

²⁴ Na ɔka kyerɛɛ bɛ sɛ, “Honhwɛ nea hote yie, sɛnea wobesusu de ama he, saa ne wobenya, na mpo bɛde bi bɛka ho ama wo.

²⁵ Na nea ɔde bi ma he bɛbɛma no bebree aka ho, na nea ɔmma hwee he, deɛ ɔwɔ he mpo bɛbɛgye afiri ne nsam.”

Aba ɔnoaa fifiri ho Mfantoho

²⁶ Ɔkaa bio sɛ, “Soro ahennie te sɛ bi a wakogu aba asaase so,

²⁷ na ɔkɔda anadwo sɔre anɔpa, na aba he fifiri na onyini a onnim kwane a ɔfa so yɔ saa.

²⁸ Asaase heaa ma onyini, nea odi kane ne dua he, na afei tire he, ansa na aburoo he ankasa.

²⁹ Nso aburoo he nyini wie a, ntɛmaa ɔde ne twa-sekane kɔ mu efiri sɛ twaberɛ aduru.”

Sinapi aba ho Mfantoho

³⁰ Ɔkaa bio sɛ, “Mmɛ ne yebetumi de atoto Nyankopɔn ahennie he ho, anaa mmɛ mfantoho ne yɛbɛyɔ afa ahennie he ho?

³¹ Ɔte sɛ sinapi aba a sɛ bedua ne asaase mu a, ɔno ne aba a osua paa asaase so aba nyinaa mu;

³² nso sɛ bedua a, onyini bɛyɛ nnua mu dua kɛseɛ paa, na ɔnya mmane akɛseɛ bebree, na wiem nnomaa atumi ayɛ prebuo ne nwunum.”

Mfantoho he ho asekyerɛ

³³ Ɔde mfantoho bebree maa bɛ nkyerɛkyerɛ, sɛnea na bebetumi ate aseɛ.

³⁴ Wankasa ankyerɛ bɛ a na mfantoho nka ho; na ɔka ɔne n’asuafoɔ he nkoaa a, ɔkyerɛkyerɛ bibiaa mu kyerɛ bɛ.

Yesu aaa po mframa yɛɛ dinn

³⁵ Saa da he, berɛ a na nnwunu adwo he, ɔka kyerɛɛ bɛ sɛ, “Homma yentware nkɔ fa nohoaa.”

³⁶ Nti begyaa nnipadɔm he kwane wieeɛ he, bɛde Yesu tenaa kodoɔ he mu kɔeɛ; na akodoɔ foforɔ nso ka ho. Na akodoɔ binom ka ne ho.

³⁷ Nsuframa kɛseɛ bi bɔeɛ; na mframa he bɔ baa kodoɔ he mu maa nsuo begyinaa kodoɔ he mu.

³⁸ Nso na Yesu ada summiiɛ so ya kodoɔ he mu; na benyanee no bisaa no sɛ, “Kyerɛkyerɛfoɔ, yɛɛyera yi, ɔmfa wo ho?”

³⁹ Onyaneeɛ, na ɔkaa mframa he anim ka kyerɛɛ po he sɛ, “Gyae, yɛ dinn!” Na mframa he ano brɛɛ ase, na ɔyɛɛ dinn.

⁴⁰ Obisaa bɛ sɛ, “Ɛɛne nti ne hosuro? Nti obesi nnɛ yi honni gyidie?”

⁴¹ Na bɛ ho dwirii bɛ kɛse na bɛkeka kyerɛɛ bɛ ho bɛ ho sɛ, “Abɛ nipa koraa di a mframa ne po mpo tie no yi?”