Adiyisɛm 19 - Apam Foforɔ

Sorofoɔ dii ahurisie

¹ Yei akyi he, metee bibi a ɔte sɛ nnipakuo bebree nne firii soro sɛ: “Haleluya! Nkwagyeɛ ne animuonyam ne tumi yɛ yɛ Nyankopɔn dea

² efiri sɛ, n’atemmuo yɛ nɔkorɛ na ɔtene sɛ obuu dwamanfoɔ kɛseɛ a ɔde n’adwamammɔ asɛe asaase he atɛne, na ɔtɔɔ ne nkoa mogyaa so werɛ ne nsa mu.”

³ Na afei bɛteaam bio sɛ, “Haleluya! Na wusie a ofiri ne mu he kɔ soro daa daa.”

⁴ Mpanyimfoɔ aduonu nnan ne ateasefoɔ nnan he butubutu Nyankopɔn a ɔte n’ahennwa so he anim somm no. Na bɛteaam sɛ, “Amen, Haleluya!”

⁵ Afei nne bi firi ahennwa he so baa sɛ, “Honkamfo yɛ Nyankopɔn, ho a hoyɛ ne nkoa, ne ho a hosuro no nyinaa, akɛseɛ ne nkumaa!”

⁶ Afei metee nne bi te sɛ nnipadɔm nne, ne nsuo nworosoɔ ne apranaa a ɔɔpaepae a ɔɔteam sɛ, “Haleluya! Yɛ Tumfoɔ Awurade Nyankopɔn di hene.

⁷ Homma yɛ ho nsɛpɛ yɛ na yɛ ani nnye na yɛnhyɛ no animuonyam, efiri sɛ, dwammaa he ayefohyia aduru, na ne yerɛ asiesie ne ho.

⁸ Bɛde nwera pa a ani hyerɛn na ani te maa no sɛ ɔnhyɛ.” Nwera pa he ne ahoteefoɔ tenenee adeyɔ.

⁹ Afei bɔfoɔ he ka kyerɛɛ me sɛ, “Twerɛ sɛ, Nhyira nka bɛ a bɛato nsa afrɛ bɛ dwammaa he ayefohyia apontoɔ ase.” Na ɔka kaa ho sɛ, “Yei yɛ Nyankopɔn asɛm turodoo.”

¹⁰ Afei mebutuu ne nane ase sɔree no. Nso ɔka kyerɛɛ me sɛ, “Nyɔ saa, efiri sɛ, meyɛ akoa te sɛ wo ne wo nuanom a bedi Yesu ho adanseɛ heaa, Nyankopɔn mmom ne koto sɔre no! Na Yesu adanseɛ ne yɛ adiyie honhom he.”

Gyefoɔ he ho anisoadehunu kɛseɛ

¹¹ Afei mehuu sɛ soro abie a pɔnkɔ fitaa ya hɔ. Na nea ɔte ne so he dini de “Ɔseadeɛyɔ ne Nɔkwafoɔ,” na tenenee ne ogyina so bu atɛne ko ne ko nso.

¹² N’ani te sɛ gya a ɔɔdɛre, na na ɔbɔ ahemmotire bebree. Na bɛatwerɛ ne dini bi a biaa nnim gye sɛ ɔno nkoaa.

¹³ Na bɛde n’ataadeɛ a ɔhyɛ he anu mogyaa mu. Dini a bɛde frɛ no ne “Nyankopɔn Asɛm.”

¹⁴ Soro asraafoɔ a bɛhyehyɛ nwera fitaa a ani te a bɛtete pɔnkɔ fitaa so dii n’akyi.

¹⁵ Afei nkrantɛ nnamnnam a ɔde bedi amane so firi n’anum baeɛ. Ɔde dadeɛ poma ne bedi bɛ so. Obetiatia Nyankopɔn a ɔyɛ adeɛ nyinaa so tumfoɔ he abufuo a ɔdene he nsa-kyi-amena he so.

¹⁶ Na bɛatwerɛ dini “Ahene mu Hene ne awuranom mu Awurade” agu n’ataadeɛ mu ne ne nane ho.

Bedii aboa he ne n’asraafoɔ he so nkunim

¹⁷ Afei mehuu bɔfoɔ bi a ogyina awia mu. Ɔteaam guu nnomaa a bɛnam wiem nyinaa so sɛ, “Hommra mmehyiam Nyankopɔn apontoɔ kɛseɛ he ase.

¹⁸ Hommedi ahemfo nam ne asafohene nam ne atumfoɔ nam ne apɔnkɔ ne bɛ a bɛtete bɛ so nam ne adehyeɛ ne nkoa ne akɛseɛ ne nkumaa nyinaa nam.”

¹⁹ Afei mehuu aboa he ne asaase so ahemfo ne bɛ asraafoɔ a bɛaboa bɛ ano ɔɔkɔko atia nea ɔte pɔnkɔ he so he ne ne dɔm.

²⁰ Bɛkyee aboa he ne ne diyifoɔ torɔfoɔ a ɔyɔɔ anwanwadeɛ n’anim he de no too afiase. Saa anwanwadeɛ he so ne ɔnam daadaa bɛ a bɛde aboa he ahyɛ bɛ agyinaeɛ ne bɛ a bɛsom aboa he honyini he. Bɛtoo aboa he ne diyifoɔ torɔfoɔ he anikann guu gya tadeɛ a sɔfe ɔɔdɛre mu he mu.

²¹ Bɛde nkrantɛ a ofiri pɔnkɔkafoɔ he anum kukuu bɛ asraafoɔ, na nnomaa he dii bɛ nam meeɛ.