Yuörö 37 - Bibilia Buk na Ŋun nagon koti luŋu a

Tetena na saŋduk

¹ A Besalela teteŋdi kaden ’bokolot a saŋduk. Tojolan nanyit a lokiliŋan murek ko swöt, ko tugalaŋ nanyit a lokiliŋ geleŋ ko swöt, ko tojolan nanyit ki a lokiliŋ geleŋ ko swöt.

² A nye muluje lepeŋ ko dakap nake lukata ko kaŋo nanyit Köti, a nye tetenakiŋdye kanyit loki geŋesi logon a dakap lorga nye.

³ A nye nitökiŋdye lepeŋ re Iŋwan nagon a dakap nagon a ti goŋesi kanyit Iŋwan; re murek a ti lele merete lonyit geleŋ, ko kunie re murek a ti lele merete lonyit.

⁴ A nye teteŋdi turya logon a kaden ’bokolot, a muluje se ko dakap,

⁵ a nye sukiŋdye kilo turya i re lukata na gwon i mara ti saŋduk kune, anyen ’dokorikin ŋina saŋduk.

⁶ A nye teteŋdi muket na saŋduk ko dakap nake, ŋina muket toronjin lala kata. Tojolan na ŋina muket a lokiliŋan murek ko swöt, ko tugalaŋ nanyit a lokiliŋ geleŋ ko swöt.

⁷ A nye niddye dakap a kerubajin murek; a nye tetenakiŋdye se i ’dutesi murek ti muket nagon toronjin lala kata na,

⁸ keruba geleŋ i nene ’dutet keruba geleŋ i nene ’dutet; a nye tete-nuŋdye kilo kerubajin murek a ŋo na geleŋ ko muket nagon toronjin lala kata na i ’dutesi kanyit murek kune.

⁹ A kerubajin pakiŋdye köpukön kase ki i muggö na muket nagon toronjin lala kata na, a komorsikan kase todire todir; a komorsikan kase diŋe muket nagon toronjin lala kata na.

Tetena na misa

¹⁰ A nye teteŋdi kaden ’bokolot a misa. Tojolan nanyit a lokiliŋan murek, ko tugalaŋ nanyit a lokiliŋ geleŋ, a tojolan nanyit ki gwe a lokiliŋ geleŋ ko swöt;

¹¹ a nye muluje lepeŋ ko dakap nake. a nye teteŋdi geŋesi logon a dakap lorga nye.

¹² A nye tetenakiŋdye lepeŋ ko kaden nagon görötikin mara kanyit, nagon tugalaŋ nase a ’dapanit geleŋ na könin; a nye tetenakiŋdye kine görösi geŋesi logon a dakap lorga se.

¹³ A nye nitökiŋdye ŋina misa re Iŋwan nagon a dakap, a tiŋdi kine re i goŋesi Iŋwan i mokosi kanyit Iŋwan kulo.

¹⁴ Kine re diŋö ko görösi kune, kita nase sŋorikin turya logon ’dököri ŋina misa.

¹⁵ A nye teteŋdi kaden ’bokolot a turya logon ’dokorikin misa, a muluje se ko dakap.

¹⁶ A nye teteŋdi tito na gwon i nu misa loki kune ko dakap nake, kweja adi kalabajin kanyit ko ’yulukutan kanyit nagon a ti bökur, ko lulurön kanyit ko lupunikö kanyit logon a ti rubaŋgajin ’bu ’bukesi.

Tetena na gwo ’diet lo lombojin

¹⁷ A nye Köti teteŋdi dakap nake a gwo ’diet lo lombojin. Mukök nanyit ko ködini lonyit tetena ko dakap na ninitö; a kalabajin kanyit nagon gwoso köturön, nagon a ŋaju kutusen a gwe ko mukökö kase a natulurak kune gwe a ŋo geleŋ ko lepeŋ.

¹⁸ A kenia kanyit gwe buker gwoso na wilun kaŋo kanyit i mara; kenia ti gwo ’diet lo lombojin kune musala i swöt lonyit geleŋ, ko kunie musala i lele swöt lonyit.

¹⁹ A kalabajin musala na gweya gwoso köturön ti sakeda, nagon a ŋaju kutusen a gwe ko mukökö kase a natulurak kune gwe i kene geleŋ, a kalabajin musala na gweya gwoso köturön ti sakeda, nagon a ŋaju kutusen a gwe ko mukökö kase a natulurak kune gwe i nene kene geleŋ. Nyena a kenia buker liŋ na meta gwoso na wilun kaŋo i lu gwo ’diet lo lombojin kune gwe sona.

²⁰ A i lu gwo ’diet i ködini lonyit, a gwe a kalabajin Iŋwan na gweya gwoso köturön ti sakeda, nagon a ŋaju kutusen a gwe ko mukökö kase a natulurak kune;

²¹ a ŋo natulurak gwoso mukökö ti kine köturön nagon a ŋo geleŋ ko ködini kune, gwe geleŋ i mukök na kenia murek geleŋ i mukök na kenia murek, i kine kenia buker liŋ nagon meta gwoso na wilun kaŋo i lu gwo ’diet lo lombojin.

²² Kweja adi kine ŋo natulurak nagon gwoso mukökö ti köturön, se ko kenia nagon meta gwoso a wilun i ködini kune gwon a ŋo geleŋ ko ŋilo ködini, a iŋge nitwe i dakap nake.

²³ a nye teteŋdi lombojin kanyit buryo ko ŋwakesi kanyit, ko ta ’doka kanyit ko dakap nake.

²⁴ a nye teteŋdi lepeŋ se ko tito kanyit liŋ ko dakap nake nagon temuŋdya a talenta geleŋ.

Tetena na pirit ’yuret na bökur

²⁵ A nye teteŋdi kaden ’bokolot a pirit ’yuret na bökur. Tojolan nanyit a lokiliŋ geleŋ, ko tugalaŋ nanyit a lokiliŋ geleŋ; a nye gwe jojo a regorego, a tojolan nanyit ki gwe a lokiliŋan murek; a oŋgwora kanyit gwe a ŋo geleŋ ko lepeŋ.

²⁶ A nye muluje lepeŋ ko dakap nake kanyit i kwe ko i mara kanyit liŋ se ko oŋgwora kanyit; a nye teteŋdi geŋesi logon a dakap lorga nye.

²⁷ A nye teteŋdi re murek nagon a dakap i lukak na geŋesi kanyit, i mara kanyit murek a lo pelela, a turya logon ’do ’dokorikin kulo sukine nyin.

²⁸ a nye teteŋdi kaden ’bokolot a turya, a muluje se ko dakap.

Tetena na welet na welaki ’e Ŋutu i kita ko na bökur

²⁹ A nye koti teteŋdi welet nake na lurwan na wewelarikin, ko bökur loke lo mon paleleŋ, gwoso na ŋo ’yi bodo lo riya ko koŋon na.