Yuörö 32 - Bibilia Buk na Ŋun nagon koti luŋu a

¹ A nagon Ŋutu kulo ko mete adi Mose a karakin i ŋo nanyit kak i mere nu, a se momoruŋdye ’borik ko Arona ni, a kulyani ko lepeŋ adi, Ŋine ki, tetenaki yi punyen logon nyömbu yi; kogwon ŋilo Mose lo joŋdya yi kaŋo i jur lo Ejipeto lo, yi ti den ko nyo a ŋokin ko leperi.

² A Arona takiŋdye lepeŋat adi, ’Dumuŋdye ta kaŋo re nagon a dakap na gwon ko wate kasu i swö kine, ko i swö ti ŋwajik kasu lulyan ko nawate, ko joŋdi ta se köyö ni.

³ Nyena a Ŋutu liŋ ’dumbe kine re nagon a dakap na gwon kase i swö kune kaŋo, a joŋdi se ko Arona ni.

⁴ A nye kirut wuyuŋdye se kase i könisi, a tolusoggi se, a niddye se a tagwok; a se kulyani adi, Ta Ŋutu ti Yisaraele, makilo punyen kasu logon a joŋdya ta kaŋo i jur lo Ejipeto kulo.

⁵ A Arona ko meddi, a teteŋdi pirit ’yuret na rubaŋgajin ko ŋina tagwok i komor, a Arona laije adi, Kotumalu gwon a rorwe logon konaki MATAT.

⁶ A ko ’bure kobubut a se pine ki, a ’yuŋe rubaŋgajin lo ’yu ’yura ’buluŋ, a joŋdi rubaŋgajin ti taliŋ; a kirut Ŋutu kulo si ’dani kak i nyesu ko i möju, a pine ki i gwoja.

⁷ A MATAT kulyani ko Mose adi, Iŋgo iti, lulurara kak; kogwon Ŋutu kulök logon do a jon kaŋo i jur lo Ejipeto kulo aje köŋu ’börik;

⁸ se aje girara kaŋo ’de ’de i kiko logon nan a saŋi se lo; se aje tetenakiŋdya ’börik tagwok na ninitö, se aje kwakwaddu lepeŋ ko aje ’dupökiŋdyö lepeŋ rubaŋga kulya adi, Ta Ŋutu ti Yisaraele, makilo punyen kasu logon a joŋdya ta kaŋo i jur lo Ejipeto kulo!

⁹ A MATAT kulyani ko Mose adi, Nan aje met kilo Ŋutu adi se a Ŋutu logon ko murutö a nawo ’dupak;

¹⁰ nyena soŋinana kölöki nan, anyen woran nio tulekin pape kase loki, anyen nan ködyo tototum lepeŋat a nan tetenakiŋdye do a jur duma lo Ŋutu.

¹¹ Ama a Mose momo ’yi MATAT Ŋun lonyit adi, ŋon MATAT, nyo nagon woran inot tulekin pape i Ŋutu kulök logon do a jon kaŋo i jur lo Ejipeto ko riŋit duma ko könin iŋgo?

¹² Nyö Ŋutu ti Ejipeto ködyö kulya adi, Nye a joŋga lepeŋat kaŋo ko yeyeet naron i tatuja na lepeŋat i merya, ko i totumbö na se kaŋo i na kak? Böŋö wör iŋuŋdye kaŋo i woran inot na pape, ko löpuŋge töili i ŋina ŋo naron nagon do a yeyeju konakiŋdya Ŋutu kulök na.

¹³ Yeyene Abarayama, ko Yisaka, ko Yisaraele köliŋönök kulök, logon do aje milyekin se ’diŋdya mugun inot adi, ’Diri ’diri nan mo tupöijö nyakwariat kasu gwoso kaser ti ki, a nan mo tiŋdi nyakwariat kasu na kak liŋ nagon nan aje jambu i kulya kanyit na, anyen gwon a lomore nase ŋupi ŋupi.

¹⁴ A MATAT löpuŋge töili i ŋina ŋo naron nagon nye a kulya adi nye kökonakin Ŋutu kanyit na.

¹⁵ A kirut Mose wöripöni wöripö, a kiyene kak i mere, a ŋurupö na ’dayatak murek nagon a tökoresi kune gwe kanyit i könisi, kine ŋurupö a wurö i pelela kase murek liŋ; iŋkoi, a wurö i na pele ko i nu pele liŋ.

¹⁶ Kine ŋurupö na ’dayatak a kita na Ŋun, wuresi kulo gwe a wuresi ti Ŋun, a gigiruki i kine ŋurupö.

¹⁷ A Yosua ko yiŋge woŋon na Ŋutu na woŋgi se nu, a nye takiŋdye Mose adi, Woŋon na mörö nu gwon i mera yu.

¹⁸ Ama a Mose waddi adi, Kinu ti gwon a siraesi ti Ŋutu katelak, kode a gwiesi ti se logon tetela kulo, ama nan yiŋga Ŋutu i yolo.

¹⁹ A ko gwe sona nagon nye gwe nyona ko ’durökin i mera nu, a nye meddi nu tagwok ko gwoja na Ŋutu, a woran na Mose iŋge tule pape, a nye gubakiŋdye kine ŋurupö kak kanyit i könisi a gwagwalaggi se i mere mukök.

²⁰ A nye joŋgi ŋina tagwok na teten se na, a ’yuŋe nye ko kimaŋ, a nyö ’buŋe a naliliŋök, a nye kwikwikiŋdye se i pioŋ loki, a ripakiŋdye Ŋutu ti Yisaraele i möju na se.

²¹ A Mose pipije Arona adi, Kilo Ŋutu a konakin do nyo anyen do jakiŋdye lepeŋat na toron duma?

²² a Arona waddi adi, Ti woran inot ŋon duma liŋ gwe ti tule pape; do deden kulo Ŋutu adi töilyet kase yeyeju ŋo narok.

²³ Kogwon se a jambu ko nan adi, Tetenaki yi punyen logon nyömbu yi; kogwon ŋilo Mose lo joŋdya yi kaŋo i jur lo Ejipeto lo, yi ti den ko nyo nagon a ŋokin ko lepeŋ.

²⁴ Nyena a nan kulyani ko lepeŋat adi, Ko pa lo gwon ko dakap, a ti se ’dumuŋdye se kaŋo; nyena a se tiŋdi nan, a nan gubakiŋdye se i kimaŋ, a kirut ŋina tagwok na puku.

²⁵ A nagon Mose ko meddi kulu Ŋutu i koŋdya a wuya nu, (kogwon Arona aje kölökin se i koŋdya abur a merok kase lauŋdye lepeŋat),

²⁶ nyena a Mose gwo ’de i kötumit na mera, a laije adi, Ko ŋa logon a ti MATAT, a ti se ŋoŋdi köyö ni. A Ŋutu liŋ ti Lewi momoruŋdye ’börik kanyit ni.

²⁷ A nye kulyani ko lepeŋat adi, MATAT ŋun lo Yisaraele lo kulya adi, Ta liŋ geleŋ geleŋ torakiŋdye ta baŋdujin kasu i mukökö, ko iti ta i mera liŋ suluja i nene kötumit tojo i nene, ko ti ta liŋ geleŋ geleŋ tatuje luŋasirik kasu, ko julin kasu, ko maratejin kasu.

²⁸ A Ŋutu ti Lewi koŋdi gwoso na kulyari Mose na; nyenagon Ŋutu gwoso aliŋan musala a toliki i ŋilu lor.

²⁹ A Mose kulyani adi, Ta aje geluŋdya ’börik i lo lor a ti MATAT, kogwon ta liŋ geleŋ geleŋ aje tolikiŋdyö ŋwajik kasu, ko luŋasirik kasu, nyena ta aje jakiŋdya ’börik ’boriet i lo lor.

³⁰ A ko gwe sona i ko ’bure, a Mose kulyani ko kilo Ŋutu adi, Ta kilo aje toroŋdya toron a duma. Soŋinana nan lo kiyaddi i mere ko MATAT yu; kode ŋona nan de titin toronjin kasu i tokela.

³¹ A Mose yitöni ko MATAT yu, a kulyani adi, Wöidiö! Kilo Ŋutu aje toroŋdya toron a duma parik; se aje tetenakiŋdya ’börik ŋunyen logon a dakap.

³² Ama kiyaŋ, ko do ŋona de pitökiŋdyö toronjin kase—nyena ko ködyö ’bayin sona, böŋö seyara nan kaŋo i buk inot lukata nagon do aje wur na.

³³ Ama a MATAT waddi Mose adi, Ko lon ŋuto logon a toroŋdya nan, a nan mo seyaddi lepeŋ kaŋo köyö i buk.

³⁴ Nyena soŋinana iti, nyömöddi kilo Ŋutu tojo i nu pirit na jamakin nan do nu; meddi, malaikatat liŋ mo tutu konut ŋerot. Ama kudyakan i lor logon nan mo tu i meddya lu, a nan mo ropakiŋdye toronjin kase kase i kusik.

³⁵ A kirut MATAT tomije kulu Ŋutu, kogwon se a kwakwaddu ŋina tagwok na teten Arona na.