Yuörö 30 - Bibilia Buk na Ŋun nagon koti luŋu a

Pirit ’yuret na bökur

¹ A do ködyö teteŋdi pirit ’yuret na bökur; a do teteŋdi lepeŋ ko kaden ’bokolot.

² A tojolan nanyit gwe a lokiliŋ geleŋ, ko tugalaŋ nanyit Köti a lokiliŋ geleŋ; a nye ködyö gwe jojo a regorego, a tojolan nanyit ki gwe a lokiliŋan murek; a oŋgwora kanyit gwe a ŋo geleŋ ko lepeŋ.

³ A do muluje lepeŋ ko dakap nake kanyit i kwe, ko i mara kanyit liŋ, se ko oŋgwora kanyit; a do tetenakiŋdye lepeŋ geŋesi logon a dakap lorga nye.

⁴ A do tetenakiŋdye lepeŋ re murek nagon a dakap; a do tetenakiŋdye se i lukak na gepesi kanyit, i mara kanyit murek a lo pelela; a turya logon ’do ’dokorikin sukine nyin.

⁵ a do ködyö teteŋdi ’bokolot a turya, a muluje se ko dakap.

⁶ A do tiŋdi ŋina pirit ’yuret i komor na boŋgo koret na gwon nyona ko saŋduk na ŋurupö tökoresi, kweja adi ko i komor na muket nagon toronjin lala kata nagon muggö nu saŋduk na ŋurupö tökoresi nu, i nu pirit nagon nan de momori ko do nu.

⁷ A Arona ködyö ’yuŋe bökur lo mon paleleŋ i ŋinu pirit ’yuret; a nye ’yuŋe bökur temba i ko ’bure na teteŋdi lepeŋ lombojin na.

⁸ A na togwi ’dikiŋdye Arona lombojin ki i sömukö nu, a nye ködyö ’yuŋe bökur; kweja adi bökur ti jaran ’yura ko MATAT i komor temba i nyakwariat kasu.

⁹ A ta kodyo tine wukiŋdya bökur nyu logon a ko ’buruki, kode rubaŋga lo ’yu ’yura ’buluŋ, kode ’doket na ’bolot; a ta tine ’bukökiŋdyö rubaŋga ’bu ’buket nyin.

¹⁰ A Arona ködyö koŋdi tokelet i oŋgwora kanyit daŋ geleŋ i kiŋa; a nye toke ’yi lepeŋ ko rima ti rubaŋga tokelet lo toron daŋ geleŋ i kiŋa temba i nyakwariat kasu. ŋina pirit ’yuret na bökur a nake parik na rurwan na MATAT.

Gurut tokelesi

¹¹ A MATAT kulyani ko Mose adi,

¹² Na keŋdi do Ŋutu ti Yisaraele gwoso i kenet nase nu, ti Ŋutu liŋ geleŋ geleŋ ŋadi tiŋdi MATAT daket nanyit na keŋdi do se nu, anyen nene tomiet gwon ’bayin kase kiden na keŋdi do se nu.

¹³ A se ködyö tiŋdi sona, kweja adi Ŋutu liŋ logon a laŋaddu i se logon aje kena kulo ködyö tiŋdu sekele nagon temuŋdya a swöt, gwoso i sekele na pirit nake na rurwan (adi sekele geleŋ gwon ko gerajin merya murek); ŋina swöt na sekele ’dokarikin MATAT.

¹⁴ Ŋutu liŋ logon a laŋaddu i se logon aje kena kulo, suluja i Ŋutu logon ko kiŋajin merya murek tojo ko ŋerot kulo ködyö tiŋdu MATAT ’doket.

¹⁵ A kwörinikö tine tiŋdu jore lwölwöŋgu, a lomerika tine tiŋdu ku ’dik lwölwöŋ swöt na sekele, na tiŋdi ta MATAT ’dokesi nu anyen ta totokela.

¹⁶ A do ’dumuŋdye gurut tokelesi i Ŋutu ti Yisaraele, a do ködyö kitari se i kita na kemia torumet; anyen se tiŋdu Ŋutu ti Yisaraele i yeyeö ko MATAT i komor, anyen tokelarikin ta.

Lalaet

¹⁷ A MATAT kulyani ko Mose adi,

¹⁸ Do kodyö teteŋdya lalaet nagon a mölwö, a mukök nanyit gwe a mölwö, anyen nye lalarikin. A do tiŋdi lepeŋ i kiden na kemia torumet ko na pirit ’yuret na rubaŋgajin, a do tiŋdi pioŋ nyin.

¹⁹ A Arona se ko ŋwajik kanyit lalaji könisi kase ko mokosi kase i ŋina lalaet.

²⁰ Temba i diŋit na lupöri se i kemia torumet, kode na mijuŋdye se nyona ko pirit ’yuret na rubaŋgajin i kita, kweja adi i ’yurakiŋdya na MATAT rubaŋga nu, se ködyö lalaju ko pioŋ an se twatwa.

²¹ iŋkoi, se ködyö lalaju könisi ko mokosi an se twatwa; a ŋilo ŋupi gwe a saret lo wuröki Arona ko ŋwajik kanyit temba i nyakwariat kase liŋ.

Welet na welaki ’e Ŋutu i kita na se ko bökur

²² A MATAT takiŋdye Mose adi,

²³ ’Dumuŋdye kwakwa ti kaden na ’but parik na mon paleleŋ, kweja adi mur nawin nagon temuŋdya a sekelejin miajin mukanat, a do temuŋdye girpat na mon paleleŋ nagon a swöt na temet na mur, kweja adi a sekelejin miajin murek ko merya mukanat, ko döru lo mon paleleŋ logon temuŋdya a sekelejin miajin murek ko merya mukanat,

²⁴ ko kidda nagon temuŋdya a sekelejin miajin mukanat gwoso i sekele na pirit nake na rurwan, ko welet na jeitun nagon temuŋdya a yin geleŋ;

²⁵ a do teteŋdi se a welet nake na rurwan na wewelarikin, kweja adi a riya lo ŋola ko koŋon na bodo lo riya; kweja adi ŋina a welet nake na rurwan na wewelarikin.

²⁶ a do we ’yi kemia torumet se ko saŋduk na ŋurupö tökoresi,

²⁷ ko misa ko tito kanyit liŋ, ko gwo ’diet lo lombojin ko tito kanyit, se ko pirit ’yuret na bökur,

²⁸ ko pirit ’yuret na rubaŋgajin lo ’yu ’yura ’buluŋ ko tito kanyit liŋ, se ko lalaet ko mukök nanyit;

²⁹ a do geluŋdye se kaŋo anyen se gwon a nake parik na rurwan; a ŋo liŋ na ’bo ’yu se kune ködyö gelwene a nake na rurwan.

³⁰ A do we ’yi Arona se ko ŋwajik kanyit, a geluŋdye se anyen se ködyö kitakiŋdya nan a koanejin.

³¹ A do takiŋdye Ŋutu ti Yisaraele adi, ŋina gwon a welet nio nake na wewelarikin temba i nyakwariat kasu.

³² Nye ti bulö welaki ko ŋuto kana i mugun. Köti ta ti bulö teteŋdya nene welet gwoso lepeŋ, i temuŋdya na ŋo ka ’de ka ’de ko i ŋo ’ya na se anyen gwon gwoso ŋina welet. Kweja adi ŋina welet a nake na rurwan, a nye Köti gwe kasu a nake.

³³ a ko lele ŋuto a ŋo ’ya nene welet gwoso na, kode a we ’ya lele lepetyo ko nye, a nye ködyö riköjine kaŋo i Ŋutu kanyit.

³⁴ A MATAT takiŋdye Mose adi, ’Dumuŋdye ŋo na mon paleleŋ, kweja adi lele gweyari lo mur, ko ladana, ko memelan kalabena, tiŋdi bökur lokwe loke logon adi lor i kine ŋo na mon paleleŋ. Temet na kine ŋo liŋ geleŋ geleŋ gwon jojo.

³⁵ A do teteŋdi se a bökur, gwoso na teteŋdi bodo lo riya ko koŋon nanyit na, a ŋolaki ’balaŋ nyin, a lotulöŋ a loke lo rurwan;

³⁶ a do ŋaŋayaggi kunie kase a na ’di ’dik parik, a do tiŋdi lele swöt lose i komor na ŋurupö tökoresi i kemia torumet lukata, i pirit na momori nan ko do nu; a nye gwe konut a loke parik lo rurwan.

³⁷ A ta ködyö tine tetenakiŋdya ’börik bökur logon do teten gwoso i temet na ŋo ka ’de ka ’de nagon do ŋoŋo na anyen gwon a losu; nye ködyö gwon kasu a loke lo rurwan lo MATAT.

³⁸ A ko lele Ŋutu a teteŋdya lele bökur lo mon gwoso ŋilo a lonyit, a nye ködyö riköjine kaŋo i Ŋutu kanyit.