Yuörö 18 - Bibilia Buk na Ŋun nagon koti luŋu a

Yetero a ’yö ’yu Mose

¹ A Yetero koane lo Midiyan ŋogwo lo Mose iŋge yiŋ ŋo liŋ nagon ŋun a konakin Mose se ko Ŋutu kanyit ti Yisaraele kunu, adi MATAT a joŋdya Ŋutu ti Yisaraele kaŋo Ejipeto yu.

² A Yetero ŋogwo lo Mose köju joŋgi Sipora nakwan na Mose i mukök nagon Mose aje paju lepeŋ nu.

³ A Yetero Köti iŋge joŋga ŋwajik murek ti Sipora kulo, lele karin kanyit a Geresom (kogwon Mose a kulya adi, Nan a gwon a ŋuto logon a lepetyo i jur lo lepelok),

⁴ a karin ti lele gwe a Eliejer (kogwon Mose a kulya adi, Ŋun lo baba a kaparanit liŋ, ko a pisaddu nan kaŋo i baŋdu lo Paro).

⁵ A Yetero ŋogwo lo Mose, ko ŋwajik ti Mose, se ko nakwan na Mose iti i yöbu ko Mose yu na gwoŋdi lepeŋ i mera i mere lo ŋun nu.

⁶ A ŋuto takiŋdye Mose adi, Mete, ŋogwo ilot Yetero ŋilu ’du ’dur konut ni baruŋdya nakwan inot se ko ŋwajik kanyit.

⁷ A Mose iti i rum ko ŋogwo lonyit, a rosokakine kak kanyit i komor a rome ko lepeŋ ko ’bi ’biyet; a se totopine ko ’börik i kulya ti gwon nase, a se lupöni i kemia lukata.

⁸ A Mose nyönyökökiŋdye ŋogwo lonyit ŋo liŋ nagon MATAT a konakin Paro se ko Ŋutu ti Ejipeto kune kogwon kulya ti Ŋutu ti Yisaraele, ko ŋoŋga nase liŋ nagon a pokin ko Ŋutu i kiko na, ko MATAT a lwökun se ada ko riŋit.

⁹ A Yetero lyöŋi lyöŋön kogwon po liŋ na ’but nagon MATAT a konakin Ŋutu ti Yisaraele kune, kogwon nye a lwökuŋdyö se kaŋo ko riŋit ko Ŋutu ti Ejipeto i könisi.

¹⁰ A Yetero kulyani adi, Ti MATAT purani ŋura logon a lwökuŋdyö ta kaŋo ko riŋit i könisi ti Ŋutu ti Ejipeto ko i könin lo Paro lo.

¹¹ Sopinana nan a kurun adi MATAT a duma lwölwöŋ punyen liŋ, kogwon nye a lwökuŋdyö Ŋutu kulo kapo ko riŋit i könisi ti Ŋutu ti Ejipeto na konakiŋdye se lepeŋat ko tukapan nu.

¹² A Yetero ŋogwo lo Mose joŋdi turu ’buti a lo rubaŋga lo ’yura ’bukuluŋ se ko kulye toro ’bo lo ’dupöki Ŋun a rubaŋgajin; a Arona se ko temejik liŋ ti Yisaraele poŋdi i nyesu na kinyo ko ŋogwo lo Mose ko Ŋun i komor.

Wulwe na ka ’dugök ti putesi

¹³ A ko gwe sona i ko ’bure nanyit, a Mose si ’dakine i ’duŋgö na putesi ti Ŋutu, a Ŋutu kulo gömökiŋdye Mose kiden suluja i ko ’bure tojo ko sömukö.

¹⁴ A ŋogwo lo Mose ko meddi po liŋ nagon Mose a konakin Ŋutu kune, a nye pipije adi, Ŋo a nyo nagon do konakin Ŋutu? Nyö do si ’da geleŋ a Ŋutu liŋ gömökiŋdye do kiden suluja i ko ’bure tojo ko sömukö?

¹⁵ A Mose waddi ŋogwo adi, Kulo Ŋutu a po köyö ni i ga ’yu na kulya kase ko Ŋun;

¹⁶ ko se gwon ko rerenya kase kiden, a se poŋdi köyö ni, a nan ’duŋge kulya i kiden na ŋuto ko marate lonyit, a nan todiniki-ŋdyese saresi lo wurö ti ŋunse ko ŋo na ’duŋ lepeŋ kune.

¹⁷ A ŋogwo lo Mose kulyani ko lepeŋ adi, Ŋo na kon do kine ti gwon a na ’but.

¹⁸ Do tudaraju mugun, Ŋutu lo gwon ko do i pirit na geleŋ kulo Köti tudaraju ’börik, kogwon ŋina a kita na pömöni konut, a do tine bulö koŋdya do geleŋ.

¹⁹ Sopinana yiŋge gworo liŋ; nan lo jujuja do, ko ti Ŋun gwe ko do! Gwe do i kiden na Ŋutu ko Ŋun i komor, ko ti do jaki Ŋun kulya kase;

²⁰ a do de todinikiŋdye se saresi lo wurö se ko ŋo na ’duŋ lepeŋ kune, a do de kwekiŋdye se kiko logon se ködyö wöwöröri lo, se ko kita nagon se ködyö kökon na.

²¹ Nyenagon wuluŋdye Ŋutu i kiden na kilo Ŋutu liŋ logon a mirya i teteŋdya na kulya, logon kukuk Ŋun, logon a Ŋutu ti to ’diri, logon maman po na ropaki a lwön. Tiŋdi Ŋutu gwoso kilo i gwon a kasarak ti Ŋutu aliŋan, ko ti miajin, ko ti merya mukanat se ko ti puök.

²² Ti se lo ’duŋge kulya ti Ŋutu i diŋitan liŋ; a mo gwe sona adi se mo yeyeka-kiŋdya do kulya na pömöni liŋ, ama ti se ko ’börik ’duŋge kulya liŋ na pa ’de ’de; nyena a mo gwe pölilyö konut, nyena a se mo paruŋdye kine kulya na ŋömöni ko do i pirit na geleŋ.

²³ Ko do mo kökon kine kulya, Köti ko Ŋun lo sarakiŋdya do sona, nyena a do bulöni bulö yeŋoro, a kilo Ŋutu liŋ mo yitöni kase i piritön ko töilyet lo ’but.

²⁴ Nyena a Mose yiŋge kulya nagon ŋogwo lonyit a jujukin nye kune, a koŋdi ŋo liŋ na kulyari nye kune.

²⁵ A Mose wuluŋdye Ŋutu logon a mirya i teteŋdya na kulya kulo i kiden na Ŋutu liŋ ti Yisaraele, a tiŋdi se a kusik ti Ŋutu, ko a kasarak ti Ŋutu aliŋan, ko ti miajin, ko ti merya mukanat se ko ti puök.

²⁶ A se ’duŋge putesi ti Ŋutu i diŋitan liŋ, ama a se yeggi kulya na pömöni ko Mose ni, ama a se ko ’börik ’duoŋge kulya na pa ’de ’de.

²⁷ a Mose kölöddi ŋogwo lonyit, a morgi kiko lonyit tojo kase i jur.