Yuörö 16 - Bibilia Buk na Ŋun nagon koti luŋu a

Ŋun a tunyeju Ŋutu ko mana

¹ A se ŋiörö kapo Elim yu, a i perok puök wot mukanat ti yapa tomurek na yuöddi se kaŋo i jur lo Ejipeto nu, a momoret liŋ na Ŋutu ti Yisaraele ’dure i yöbu na Siyin, na gwon i kiden na Elim ko Sinai.

² A momoret liri na Ŋutu ti Yisaraele poki i woŋon ko Mose ko Arona i yöbu yu,

³ woŋon ko se adi, Ködyö a na ’but ko MATAT a tatuja yi i jur lo Ejipeto na gwoŋdi yi ko kalabajin ti lokorio a nyesi kinyojin a yimönö nu; kogwon ta aje joŋdya yi ni i na yöbu i tatuja na momoret na Ŋutu liŋ ko magor.

⁴ A MATAT kulyani ko Mose adi, Mete, nan mo toto ’dukin ta ambata na po ki; a Ŋutu iti kaŋo i ’du ’dumba na koresi kase ti lor temba i perok liŋ, anyen nan böŋö temba lepeŋat ko se mo wörö i saresi kwe kode ’bayin.

⁵ A mo gwe sona i lor tobuker, na pepeŋdi se kine ambatajin na ’du ’dumun se kune, a ködyö gwe a koresi daŋin murek na ’du ’dumbe se temba i lor nu.

⁶ A Mose ko Arona kulyani ko Ŋutu liŋ ti Yisaraele adi, Temba i sömukö a ta mo dene den adi MATAT lepeŋ aje joŋdya ta kaŋo i jur lo Ejipeto,

⁷ a i ko ’bure a ta mo meddi minyo lo MATAT, kogwon nye a yiŋ woŋon nasu na woŋgi ta ko nye MATAT nu. A yi gwe a ko ŋa logon ta wowoŋgi yi?

⁸ A Mose kulyani adi, Ko MATAT titiŋdu ta lokore na nyenyei i sömukö, ko ambata na totoyimönöju i ko ’bure, kogwon MATAT a yio woŋesi nagon ta a woŋgi ko lepeŋ kunu—a yi kulo gwe a ko ŋa? Ta ti woŋon koyi ama ta woŋon ko MATAT.

⁹ A Mose kulyani ko Arona adi, Taki momoret liŋ na Ŋutu ti Yisaraele adi, Miju ta nyona ko MATAT i komor kogwon nye a yio woŋesi kasu.

¹⁰ A ko gwe sona na jambi Arona ko momoret liŋ na Ŋutu ti Yisaraele nu, a se boŋgi yöbu a meddi minyo lo MATAT puku kaŋo i luru lukata.

¹¹ A MATAT kulyani ko Mose adi,

¹² Nan a yio woŋesi ti Ŋutu ti Yisaraele. Taki se adi, I sömukö ta de nyenyesu lokore, ko ’bure a ta mo yimönöni ko ambata. A ta mo dene den adi nan a MATAT Ŋun losu.

¹³ A ko gwe sona i sömukö, a kwen tingwuruŋön ’duruu kak ki yu, a muŋge mera liŋ, a i ko ’bure a puŋutut lora kiŋdye mera kiden.

¹⁴ A nagon puŋutut aje lilikara nu, a kunie ŋo gwoso ’belat naparere gwe kak i yöbu, a gwe a na ’di ’dik gwoso puŋutut logon a gworan i lik na kak.

¹⁵ A Ŋutu ti Yisaraele ko meddi kine ŋo, a se totopine ko ’börik adi, Kune a nyo? Kogwon se a ko den ko kine ŋo a nyo. A Mose nyö-nyökökiŋdye se adi, Kine a ambatajin nagon MATAT a tin ta i nyesu kune.

¹⁶ Kine a ŋo nagon MATAT a saŋu adi, Ti Ŋutu liŋ geleŋ geleŋ ŋadi ’du ’dumbe gwoso nagon nye jujukin i nyesu na; ta de joŋga wuyit nagon a omer geleŋ i ŋuto geleŋ, gwoso i kenet na Ŋutu lo gwon kasu i kemialan geleŋ geleŋ kilo,

¹⁷ A Ŋutu ti Yisaraele iŋge koŋdya sona; kulye ’du ’dumba jore kulye ko ku ’dik.

¹⁸ Ama a na tembi se ko wuyit nagon a omer nu, a ŋuto logon a ’du ’dumba jore lo ’bak nene ŋo na pipituŋdyö, a nye logon a ’du ’dumba ku ’dik lo tine yöŋö nene ŋo; se liŋ geleŋ geleŋ ’du ’dumba gwoso nagon se jujukin i nyesu na.

¹⁹ A Mose kulyani ko se adi, Ti lele ŋuto gwe ti pituŋdyö nene tojo i ko ’bure.

²⁰ Ama a se tine ’bön yioga Mose, ama a kulye kase pituŋdye kunie tojo i ko ’bure, a worani a kuru a mone mon; a Mose iŋge woran ko se.

²¹ A se ’du ’dumbe se temba i ko ’bure gwoso nagon se jujukin i nyesu na; ama ko kolor gwe ki, a kine ŋo lusököni lusökö.

²² A ko gwe sona i lor tobuker, a se ’du ’dumbe ambatajin i wuyit na yeŋ na daŋin murek; kweja adi ŋuto geleŋ ko wuyisi murek ti omer; a temejik ti momoret poŋdi i takiŋdya na Mose.

²³ A Mose kulyani ko lepeŋat adi, Na a ŋo nagon MATAT a sarakin adi, Ko ’bure a lor duma yukaet, ko a sabata loke lo MATAT; pe ’yi ta ŋo nagon ta ’dek pe ’yu kine, deŋi ta ŋo nagon ta ’dek deŋa kine; ’de ’yi ta ŋo liŋ nagon a pituŋdyö kune tojo ko ko ’bure.

²⁴ Nyena a se ’de ’yi se tojo ko ko ’bure, gwoso na saŋi Mose na, a se tine mon a kuru tine rye lukata.

²⁵ A Mose kulyani adi, Nyesi ta se i lo lor, kogwon lo lor a sabata lo MATAT; a ta tine ryö lepeŋat mu ’diŋ i lo lor.

²⁶ Ta ’du ’dumba perok buker, ama i lor to-buryo logon a sabata a kine ŋo gwe ’bayin.

²⁷ A ko gwe sona i lor toburyo, a kulye Ŋutu iti i ’du ’dumba, a se gwe a ko ryö.

²⁸ A MATAT pipije Mose adi, Diŋit ŋoman ta ti ’bön ’debba jujuwesi kwe ko saresi kwe?

²⁹ Mete, MATAT a tiŋdu ta sabata, nyenagon temba i lor tobuker a nye tiŋdi ta ambata na tema-kiŋdya i perok murek; si ’dani ta liŋ geleŋ geleŋ kasu i piritön, ti lele ŋuto gwe ti tu kaŋo i pirit nanyit i lor toburyo.

³⁰ Nyena a Ŋutu yuke yukan i lor toburyo.

³¹ A kötumit na Yisaraele luŋgi karin ti ŋina ambata a mana; a nye gwe a nakwe gwoso konyen ti bamia lodök, a tupaleleŋ nanyit gwe gwoso kisera nagon a ŋola ko siwatat.

³² A Mose kulyani adi, Kine a kulya na saŋi MATAT adi, Ti wuyit na omer geleŋ na mana ’depajine tojo ko nyakwariat kasu, anyen se bubulö meddya ambata nagon nan a tunyeji ta i yöbu na joŋdi nan ta kaŋo i jur lo Ejipeto nu.

³³ A Mose kulyani ko Arona adi, ’Dumuŋdye lupunit, ko tiki omer geleŋ na mana kanyit lukata, ko tiki lepeŋ ko MATAT i komor, anyen ’depaji tojo ko nyakwariat kasu.

³⁴ Nyena a Arona tiŋdi ŋilu lupunit i komor na ŋurupö tökoresi anyen ’de ’depe, gwoso na sarakiŋdye MATAT Mose nu.

³⁵ A Ŋutu ti Yisaraele nyesi mana kiŋajin merya Iŋwan, tojo ko se a po i kak nagon jojo si ’darikin na; iŋkoi, se a nyesu nu mana tojo se a ’dur i koret na jur lo Kanana.

³⁶ (Omer geleŋ a swöt topuökit geleŋ na wuyit nagon a epa.)