Yuörö 13 - Bibilia Buk na Ŋun nagon koti luŋu a

Gelwe na kayujin liŋ

¹ A MATAT kulyani ko Mose adi,

² Gelaki nan kayujin liŋ, kweja adi se liŋ logon ŋaju pelela ko Ŋutu ti Yisaraele kiden, kode ti Ŋutu, kode ti toro ’bo, kilo a kwe.

Rorwe lo ambata nagon ’bak kape

³ A Mose takiŋdye Ŋutu adi, Yeyene ta yeye lo lor lo yuuŋdye ta kaŋo i Ejipeto i pirit na to ’dupien nu, kogwon MATAT aje joŋga ta kaŋo i na pirit ko riŋit na könin iŋgo. Ta kodyo ti nyesu ambata nagon ko kape.

⁴ I lo lor i yapa Abiba, ta de yuyuörö.

⁵ A ko gwe sona nagon MATAT aje tolupödöu ta i jur logon nye a milyekin tiŋdu merenyejin kasu lo a ta kodyo yeŋe koŋdya ŋilo rorwe i lo yapa. ŋilo a jur logon ’dokon a le ko a siwatat, logon a lo Ŋutu ti Kanana, ko a lo Ŋutu ti Kiti, ko a lo Ŋutu ti Amori, ko a lo Ŋutu ti Kiwi, ko a lo Ŋutu ti Yebusi.

⁶ Ta ködyö nyesu ambata nagon ’bak kape ko perok buryo, a rorwe konakine MATAT i lor toburyo lo kilo perok.

⁷ Iŋkoi, ta ködyö nyesu ambata nagon ’bak kape ko perok buryo; ti ambata nagon ko kape gwe ti meta kasu, kweja adi kape ti meta kasu i piriton asut.

⁸ A i ŋilu lor a do monye mo nyönyö-kökiŋdye ŋuro ilot adi, Kine kulya kona kogwon ŋo nagon MATAT a konakin nan na yuuŋdye nan kaŋo i Ejipeto nu.

⁹ A ŋina gwe gwoso kweyet konut i könin, ko a toyeyeet i kiden na konyen kulök, anyen saret lo MATAT böŋö gwolor konut i kutuk; kogwon MATAT a joŋga do kaŋo Ejipeto yu ko könin iŋgo.

¹⁰ Nyena a do ködyö ’debbi ŋilo saret lo wurö temba i kiŋa i diŋit nanyit.

Kulya ti kayujin

¹¹ A nagon MATAT aje tolupödöu do i jur lo Kanana gwoso na milye-kiŋdye nye do se ko merenyejin kulok nu, a mo tiŋdi do ŋilo jur,

¹² a do mo gelakiŋdye MATAT kayujin liŋ lo ŋaju pelela kilo. A kayujin liŋ logon a mönikön ti toro ’bo kulök kilo ködyö gwe a ti MATAT.

¹³ A do dakuŋdye kayu lo kaine ko kilolor, ama ko do ti ’bon dakuŋdya nye, a ti do ’beleŋgi murut nanyit. A do dakuŋdye kayujin liŋ ti ŋwajik kasu lulyan.

¹⁴ A i diŋit na molu nagon ŋuro ilot pija do adi, Kine kulya kweja nyo? a do mo waddi lepeŋ adi, Nan koŋdya sona kogwon MATAT a joŋga yi kaŋo Ejipeto i pirit na to ’dupien yu ko riŋit na könin lonyit iŋgo.

¹⁵ A nagon Paro aje renya go i kölöddu na yi nu, a MATAT tatuje kayujin liŋ ti Ŋutu ko ti toro ’bo i jur lo Ejipeto. Nye ŋina kwe nagon nan ’duŋökiŋdyö MATAT mönikön liŋ logon ŋaju pelela kulo, ama nan dakuŋdya kayujin ti ŋwajik kwe liŋ.

¹⁶ Nyena a ŋina mo gwe gwoso kweyet konut i könin, ko gwoso rikiji logon a dukuki konut i komor; kogwon MATAT aje joŋga yi kaŋo Ejipeto yu ko könin iŋgo.

Bilili lo luru ko bilili lo kimaŋ

¹⁷ A ko gwe sona nagon Paro aje kölöddu kulu Ŋutu nu, a ŋun tine nyömöddu lepeŋat i kiko lo tiri jur lo Pelesete ma ’di nye gwon nyona; ko gwon ŋun a kulya adi, An kilo Ŋutu ködyö ko löpuggö yeyeesi kase na meddi se mörö nu a yitöni bot Ejipeto.

¹⁸ Ama a ŋun togiraddi se i kiko lo tiri yöbu i swöt lo Tör Nator. A Ŋutu ti Yisaraele lupödöi kaŋo i jur lo Ejipeto a jupu tito möriesi.

¹⁹ A Mose baraddi kuyu ti Yosepa; kogwon Yosepa köju a tukökiŋdyö Ŋutu ti Yisaraele milyeju adi, ’Diri ’diri Ŋun mo popo kasu kiden i parakiŋdya na ta; a na yuöddi ta nu a ta ködyö baraddi kuyu kwe kaŋo ni.

²⁰ A se ŋiörö kaŋo Suköt, a ’beggi mera nase Etam yu i kutuk na yöbu.

²¹ A MATAT iti kase ŋerot i tuparan i bilili lo luru lukata i nyö möddu na lepeŋat i kiko, a i tukwaje a lepeŋ gwe i bilili lo kimaŋ i tiŋdu na lepeŋat parara anyen se jojo wörö ko tuparan ko tukwaje.

²² A bilili lo luru i tuparan ko bilili lo kimaŋ i tukwaje tine wuddya ko kilo Ŋutu i komor kwöŋ.