Yuörö 12 - Bibilia Buk na Ŋun nagon koti luŋu a

Rorwe lo Pasaka

¹ A MATAT kulyani ko Mose ko Arona i jur lo Ejipeto adi,

² Ŋilo yapa ködyö gwon kasu a suluet lo yapala; ta ködyö koŋdya lepeŋ a yapa togeleŋ lo kiŋa.

³ Tamaki ta momoret liŋ na Ŋutu ti Yisaraele adi, I perok puök ti ŋilo yapa, ti Ŋutu liŋ geleŋ geleŋ ŋadi ’dumuŋdye kilolor köbilityo kode meetyo gwoso i kötumit na mere­nye lonyit, kweja adi mede geleŋ ’dumuŋdya kilolor geleŋ;

⁴ a ko nene mede gwon ko Ŋutu ku ’dik ti jukin tutuŋgö nyesu kilolor, a ti lu ŋuto se ko marate lonyit lo diŋö ko kadi nanyit lo ’dumuŋdye gwoso i tojore na Ŋutu; ta ködyö kenakiŋdya Ŋutu logon nyesu kilolor geleŋ gwoso i temet na nyesu nasu.

⁵ A yisi kasu ködyö gwe a mönikön ti kiŋa geleŋ logon ’bak yuyuket; a ta ködyö ’dumuŋdye se i kiden na köbilu kode i kiden na melon;

⁶ a ta kodyö wowoji se tojo ko perok puök wot Iŋwan ti ŋilo yapa, a lodir liŋ lo momoret na Ŋutu ti Yisaraele ködyö ’duŋge se i sömukö.

⁷ A se ködyö ’dumuŋdye kunie rima a ’bulukiŋdye se i kaden goŋesi murek ti kötumitön ko i görit na ki i kadijik na nyesi se kilo yisi kata kunu.

⁸ A i ŋilu tukwaje lo geleŋ lu, a se ködyö nyesi lokore na pepelo, mora ko ambata nagon ’bak kape ko ’dötilön nagon a koropo na pötwör.

⁹ An ta ko nyesu ta nene na ŋina lokore a nadon kode na dera ko pioŋ, ama ti nye peloni pelo ’buluŋ, kwe nanyit ko mokosi kanyit ko ŋo kanyit liŋ ti lukata.

¹⁰ a ta ködyö tine kölökin nene pitönö i möŋdu tojo ko ko ’bure, kölumbö a ta ’yuŋe pitönö na möŋdu tojo ko ko ’bure na.

¹¹ Ta ködyö nyesu sona, kweja adi ta a rupakiŋdya boŋgwat kasu i mukökö a tora, ko a sukiŋdyö kamuka, ko a ’debba turya; a ta rurume rurum i nyesu. Ŋilo a Pasaka lo MATAT.

¹² Kogwon i lu tukwaje nan mo laŋaddu i jur lo Ejipeto, a nan mo tatuje kayujin liŋ ti jur lo Ejipeto, kweja adi kayujin ti Ŋutu ko ti toro ’bo; a nan mo ’duŋökiŋdye ŋunyen liŋ ti Ejipeto putet. Nan logon a MATAT.

¹³ a kine rima mo gwe a kweyet kasu i kadijik na gwoŋdi ta kine; a na meddi nan kine rima nu, a nan mo laŋaddi laŋaddu kasu, a nene tomiet na tatatuja mo tine ’dukin kasu ki na tukaŋi nan jur lo Ejipeto nu.

¹⁴ A ta ködyö ’debbi ŋilo lor a toyeyeet, logon ta konakiŋdye MATAT rorwe; a ta ’debbi lepeŋ tojo i nyakwariat kasu liŋ a saret ŋupi lo wurö.

¹⁵ Ta ködyö nyesu ambata nagon ’bak kape ko perok buryo; i lor lo kokwe a ta ’buköddi kape kaŋo kasu i kadijik, kogwon ko lon ŋuto logon a nyesu kinyo logon ko kape suluja i lor lo kokwe tojo ko perok buryo, a lu ŋuto ködyö riköjine kaŋo i kiden na Ŋutu ti Yisaraele.

¹⁶ A lor lo kokwe kodyö gwe kasu a pepenet loke, ko lor toburyo lo kilo perok a pepenet loke; kita ködyö ti bulö kona kwöŋ i kilo perok, ama kinyo logon Ŋutu nyönyö lo ta tuŋ ködyö teteŋdya nye.

¹⁷ Ta kodyö ’debba rorwe lo ambata nagon ’bak kape, kogwon i lu lor gwak nan a joŋga lodirön kasu kaŋo i jur lo Ejipeto; nyenagon ’debbi ta ŋilu lor tojo i nyakwariat kasu a saret ŋupi lo wurö.

¹⁸ Suluja i tokotyaŋ i perok puök wot Iŋwan ti yapa togeleŋ ta ködyö nyesu ambata nagon ’bak kape tojo ko tokotyaŋ i perok merya murek wot geleŋ ti yapa.

¹⁹ Kape ködyö ti rye kasu i kadijik ko perok buryo; kogwon ko lon ŋuto logon a nyesu kinyo logon ko kape a lu ŋuto ködyö riköjine kaŋo i kiden na momoret na Ŋutu ti Yisaraele, kode nye a lepetyo, kode nye yuŋwe i lo jur.

²⁰ Ta ködyö ti nyesu kinyo logon ko kape; ta ködyö nyesu kinyo logon ’bak kape i piritön kasu liŋ.

²¹ A kirut Mose luŋgi temejik liŋ ti Yisaraele, a kulyani ko se adi, Wulö kiŋdye ta ’börik yisi gwoso i midijik kasu, ko ’duŋge ta se a ti Pasaka.

²² A ta ködyö ’dumuŋdye lömuryeje logon a tora i pirit na geleŋ, a jurutökiŋdye i rima na gwon i diköri kune, a sekiŋdye kine rima i görit ko i goŋesi murek ti kötumit; a lele losu tine tu kaŋo i kötumit na kadi nanyit tojo ko ko ’bure.

²³ Kogwon MATAT mo wöröji i jur ’bukuluŋ i tukaŋu na Ŋutu ti Ejipeto; a na meddi nye rima i görit ko i goŋesi murek ti nene kötumit nu, a MATAT mo laŋakiŋdye nu kötumit kak, a tine kölökiŋdyö katukaranit i lupö kasu i kadijik i tatuja na ta.

²⁴ Ta ködyö ’debba kine kulya a saret lo wuröki ta se ko ŋwajik kasu ŋupi.

²⁵ A mo gwe sona, ko ta a ’dur i ŋilu jur logon MATAT a milyekin tiŋdu ta lu, a ta ködyö ’debbi na kita.

²⁶ A ko ŋwajik kasu a pija ta adi, Tokoret na ŋina kita a nyo?

²⁷ a ta ködyö waddi adi, Lo a rubaŋga lo Pasaka lo MATAT, kogwon nye a lapakiŋdya kadijik ti Ŋutu ti Yisaraele kak Ejipeto yu i diŋit na tatuje nye Ŋutu ti Ejipeto a kölökiŋdye kadijik kaŋ nu. A Ŋutu dulakiŋdye kusik kase kak i twöju.

²⁸ A Ŋutu ti Yisaraele iti i koŋdya na ŋo liŋ gwoso na saŋi MATAT Mose ko Arona nu.

Tomiet na ’dutet nagon a twatwa na kayujin

²⁹ A ko gwe sona i tukwaje kiden, a MATAT tatuje kayujin liŋ i jur lo Ejipeto, suluja i ŋuro kayu lo Paro, iŋkoi ŋilo Paro lo si ’da i si ’daet na tumatyan lo, ma ’di tojo ko ŋuto kayu lo ŋuto lo rereka lo gwon i dili rereket lo, se ko kayujin liŋ ti toro ’bo.

³⁰ A Paro ko köliŋönök kanyit liŋ se ko Ŋutu liŋ ti Ejipeto ŋine ŋien i tukwaje, a poki i lulujö parik lwölwöŋgu, kogwon nene kadi ’bayin nagon ŋuto a ko twan kata.

³¹ A Paro luŋgi Mose ko Arona i tukwa je, a takiŋdye se adi, Ta se ko kilo Ŋutu ti Yisaraele ŋine ta ki, iti ta kaŋo ko Ŋutu kwe kiden; iŋgo iti ta i kitakiŋdya na MATAT gwoso na kulyari ta nu.

³² Joŋgi ta teŋon kasu ti yidin ko ti kisuk gwoso na kulyari ta nu, ko iti ta; ko momo ’yi ta MATAT i ’boroja na nan.

³³ A Ŋutu ti Ejipeto rurumbe Ŋutu kulo anyen sonyoddu se kaŋo ’de ’de i jur; kogwon se kulya adi, Yi liŋ a Ŋutu lo twatwa.

³⁴ A Ŋutu kulo ’dumuŋdye ’bolot kase nagon kape a ko nyuŋ tiki nyin kune, a torakiŋdye kalabajin nutusi i boŋgwat kase muisi, a lilikiŋdye kase i kidyö.

³⁵ A Ŋutu ti Yisaraele iŋge koŋdya gwoso nagon Mose a kulyari nu, lepeŋat a mo ’yu Ŋutu ti Ejipeto ko minyojin ti pödö ko ti dakap, se ko boŋgwat;

³⁶ a MATAT iŋge tiŋdu Ŋutu ti Ejipeto i gwon ko töilyet lo ’but ko kilo Ŋutu i rukökiŋdyö na se ŋo na mulun se kune. A se ryakaddi tito ti Ŋutu ti Ejipeto sona. Ŋutu ti Yisaraele a Yuörö kaŋo i jur lo Ejipeto.

³⁷ A Ŋutu ti Yisaraele oidrö Ramasese tojo Suköt, gwoso Ŋutu aliŋan miajin buker lo wörö ko mok, wat Ŋutu wate ko lupudiet.

³⁸ A lodir lo Ŋutu ka ’de ka ’de iŋge moraddu ko lepeŋat, ko tepon ti yidin ko ti kisuk a toro ’bo jore parik.

³⁹ A se pe ’yi ambatajin nagon ’bak kape ti ’bolot nagon se a jon kaŋo i jur lo Ejipeto yu kune, kogwon a ko nyuŋ tiki kaŋe nyin, kogwon se a riköji kaŋo i Ejipeto a tine bulö möŋdu i tetena-kiŋdya na ’börik kinyojin.

⁴⁰ Ŋutu ti Yisaraele a si ’da i jur lo Ejipeto ko kiŋajin miajin Iŋwan ko merya musala.

⁴¹ a ko gwe sona i ’dutet na kaŋajin miajin Iŋwan ko merya musala, i ŋilu lor gwak a lodirön lio ti MATAT Yuörö kaŋo i jur lo Ejipeto.

⁴² A ŋilu tukwaje gwe a tukwaje logon MATAT gwon ko konyen na i meddya i joŋga na se kaŋo i jur lo Ejipeto; nyena Ŋutu ti Yisaraele lio ködyö ’debba ŋilo tukwaje ko konyen ŋa i yeyeöddu na MATAT tojo i nyakwa-riat kase.

Kulye saresi i kulya ti Pasaka

⁴³ A MATAT kulyani ko Mose ko Arona adi, Lo a saret lo wurö i kulya ti Pasaka. Lwakatyo a ko ’buruki i nyesu kinyo lo Pasaka;

⁴⁴ ama ’dupi liŋ lo gwögworwe ko gurut kilo bubulö nyesu ko ködyö ta a taweŋu lepeŋat.

⁴⁵ Ŋutu lepelok kode koliŋönit lo roŋaki i kita a ko ’buruki i nyesu.

⁴⁶ Ti ŋilo Pasaka nyeni i kadi geleŋ; do ti baraddu nene na lokore kaŋo kadi; do ti ’beleŋgu lele kuyutyo lonyit.

⁴⁷ Ti momoret na Yisaraele liŋ ’depe ’deŋ ŋilo rorwe.

⁴⁸ A ko ŋuto logon a lepetyo kata konut logon ’dek koŋdya Pasaka lo MATAT, ti Ŋutu kanyit lyan liŋ tawe-roni tawero, a kirut ti lepeŋ ’burukine i moruŋdya kata; a nye de gwe gwoso ŋuto lo yuŋwe i jur. Ama ŋuto logon a a ko tawero lo ti gwe ti ’buruki i nyesu kwöŋ.

⁴⁹ Saret geleŋ kata i kulya ti ŋuto lo yuŋwe i jur ko i ŋuto lo si ’da a lepetyo kasu kiden.

⁵⁰ A Ŋutu ti Yisaraele liŋ koŋdi gwoso nagon MATAT a saŋi Mose ko Arona nu.

⁵¹ A i ŋilu lor gwak, a MATAT joŋgi Ŋutu ti Yisaraele kaŋo i jur lo Ejipeto ko lodirön kase.