Yuörö 11 - Bibilia Buk na Ŋun nagon koti luŋu a

Mose a tuggö twatwa na kayujin

¹ A MATAT kulyani ko Mose adi, Nene tomiet geleŋ Köti kata nagon nan de jajakin Paro, ko i jur lo Ejipeto; a i mukök a nye mo kölöddi ta; a i diŋit na kölöddi nye ta nu, a nye mo riköddi ta asut.

² Taki lore i Ŋutu liŋ anyen se yiyiŋ, taki se adi ti Ŋutu liŋ mora ko wate ŋadi muluŋdye minyojin ti pödö ko ti dakap ko marate lonyit.

³ A MATAT tiŋdi Ŋutu ti Ejipeto töilyet lo ’but i rukökiŋdyö na se. Köti lo Mose a duma parik i jur lo Ejipeto, ko i komor na kölipönök ti Paro, ko i komor na Ŋutu.

⁴ A Mose kulyani adi, MATAT lo kulya adi, I tukwaje kiden nan mo tu i kiden na jur lo Ejipeto;

⁵ a kayujin liŋ ti jur lo Ejipeto mo twatwane twatwa, suluja i ŋuro kayu lo Paro, iŋkoi ŋilo Paro lo si ’da i si ’daet na tumatyan lo, ma ’di tojo ko ŋuro kayu lo ’dupiet na gwon i jijö na; se ko kayujin liŋ ti toro ’bo.

⁶ A Ŋutu ti jur lo Ejipeto ’buku-luŋ mo luluje lulujö parik gwoso nagon Ŋutu ’beron a ko yiŋ a mo Köti tine yiŋ.

⁷ Ama i Ŋutu ti Yisaraele, ma ’di ’dioŋ mo ti ŋaju kutuk i Ŋutu kode i toro ’bo; anyen ta böŋö kuruŋdyö adi MATAT lo tiŋdu koret i kiden na Ŋutu ti Ejipeto ko na Ŋutu ti Yisaraele.

⁸ A kilo kölipönök kulök liŋ mo poŋdi köyö ni, a dulakiŋdye ’börik kak köyö i komor kulya adi, Iti kaŋo do se ko Ŋutu liŋ lo kebbu do kilo. A kirut nan mo iti tu. A Mose lupöni kaŋo ko Paro i komor ko woran na pape.

⁹ A MATAT kulyani ko Mose adi, Paro mo ti ’bön yiŋga ta; anyen sörösi kwe böŋö ŋöŋdi i jur lo Ejipeto.

¹⁰ A Mose ko Arona iŋge koŋdya kine sörösi liŋ ko Paro i komor; kölumbö a MATAT togo ’yi töili lo Paro, a nye tine kölörö Ŋutu ti Yisaraele kaŋo kanyit i jur.