Yuörö 10 - Bibilia Buk na Ŋun nagon koti luŋu a

Tomiet nagon a mayat

¹ A MATAT takiŋdye Mose adi, iti ko Paro yu; kogwon nan lepeŋ lo tupömöni ’yö töili lonyit, se ko töilyet ti kölipönök kanyit, anyen nan böŋö kwekiŋdya kweyesi kwe kune kase kiden,

² anyen do böŋö nyönyö kökin ŋuro ilot se ko ŋuro lo ŋuro ilot anyen se yiyiŋ ko ŋo a nyo nagon nan a konakin Ŋutu ti Ejipeto, Köti ko kweyesi kwe a nyo nagon nan a kon kase kiden kune; anyen ta böŋö deden adi nan a MATAT.

³ A Mose ko Arona lupöni ko Paro yu, a kulyani ko lepeŋ adi, MATAT Ŋun lo Ebere lo pija adi, Diŋit ŋoman nagon do renya tokoyogga mugun koyo i komor? Kölörö Ŋutu kwe anyen se böŋö tu kitakiŋdya nan.

⁴ Ama ko do ti ’bön kölöddu Ŋutu kwe, mete, ko ’bure nan de jojon mayat konut i jur,

⁵ a se de muŋge kak, a Ŋutu tine bulo meddya kak; a se de nyesi pitönö ti kinyo lo pitöki ta i torok ti kudu kulo, a se de nyesi kaden liŋ logon a punun kasu i meleseno kilo,

⁶ a kadijik kunök, ko kadijik ti köliponok kulök liŋ se ko kadijik ti Ŋutu ti Ejipeto liŋ mo jorene jore ko mayat; gwoso nagon komunyi kasu se ko merenyejin kasu a ko meddi kwöŋ na, suluja i lor lo suluje se gwon i na kak lu tojo ko lo lor. A Mose wöriŋöni wöriŋö a lupöni kaŋo ko Paro i komor.

⁷ A kölipönök ti Paro kulo pipije lepeŋ adi, Diŋit ŋoman lo ŋuto yeŋon gwon a widi nikao? Kölörö kilo Ŋutu anyen se tu kitakiŋdya MATAT Ŋun lose; do a ko nyuŋ kuruŋdyo adi Ejipeto aje körö?

⁸ A Mose ko Arona nyökwene ko Paro ni; a nye kulyani ko lepeŋat adi, iŋgo iti ta, tu kitakiŋdye ta MATAT Ŋun losu; ama ko ŋa lo tu?

⁹ A Mose waddi adi, Yi tutu ko lupu-diet kaŋ ko muduŋin kaŋ, ko ŋwajik kaŋ lyan ko nawate, ko teŋon ti yidin, ko ti kisuk, yi babarara se; kogwon yi ködyötu i konakiŋdya na MATAT rorwe.

¹⁰ A nye kulyani ko lepeŋat adi, Ti MATAT gwe ko ta ko kodyo nan a kölörö ta se ko lupudiet kasu! Ama kunyar ta, kogwon ta gwon ko yeyeesi narok kasu i töilyet.

¹¹ ’Bayin sona kwön, ta logon a Ŋutu lyan kilo iti ta i kitakiŋdya na MATAT; kogwon ŋina a ŋo nagon ta ’de ’dekan. A se riköjine kaŋo ko Paro i komor.

¹² A MATAT kulyani ko Mose adi, Riörö könin ilot i jur lo Ejipeto i luŋgu na mayat, anyen se ’du ’durökin i jur lo Ejipeto i nyesu na ŋo liŋ na wilan i jur, ma ’di se liŋ logon torok ti kudu a pitun kulo.

¹³ A Mose riöddi ture lonyit ki i jur lo Ejipeto, a MATAT joŋdi köbuŋöt lo swöt lo ’yure i lu jur i ŋilu tuparan liŋ, ko i ŋilu tukwaje liŋ; a nagon kak aje waran nu, a köbuŋöt lo ’yure joŋdi mayat.

¹⁴ A mayat reki i jur lo Ejipeto liŋ, a se si ’dani i jur lo Ejipeto ’bukuluŋ a ’diko duma parik gwoso nagon Ŋutu köju a ko met ’beron a mo tine meta Köti.

¹⁵ Kogwon se a muk kak ’bukuluŋ, nyena a kak poŋdi a mudwe, a se iŋge nyö ŋo liŋ lo wilan i jur, ko ludweki liŋ ti kaden logon torok ti kudu aje pitun kulo; ŋo lodök a ko pitun i jur lo Ejipeto liŋ ma ’di ködini kode ŋo lo wilan mu ’diŋ.

¹⁶ A kirut Paro luŋgi Mose ko Arona ’de ’de a kulyani adi, Nan aje giran ko MATAT Ŋun losu i komor, ko kasu i komor koti.

¹⁷ Nyena-gon soŋinana, nan mo ’yu do, pitöki nan toron nio i na daŋ geleŋ tuŋ, ko mo-mo ’yi MATAT Ŋun losu anyen nye joŋga kaŋo koyo na tomiet geleŋ na tatatuja na.

¹⁸ A Mose poŋdi kaŋo ko Paro i komor, a momo ’yi MATAT.

¹⁹ A MATAT löpukuŋdye köbuŋöt iŋgo parik i swöt lo tokotyaŋ logon ’dokoddu mayat liŋ, a wuköddi se tojo i Tör Nator; a mayat gwe a ko pituŋdyö ma ’di geleŋ to i jur lo Ejipeto ’bukuluŋ.

²⁰ Ama a MATAT togo ’yi töili lo Paro, a nye tine kölörö Ŋutu ti Yisaraele asut.

Tomiet nagon a mudwe

²¹ A MATAT takiŋdye Mose adi, Riörö könin ilot ki yuddya ’dikolo, anyen mudwe pokin i jur lo Ejipeto, kweja adi ŋilo a mudwe logon Ŋutu wawaju.

²² A Mose riöddi könin lonyit ki yuddya ’dikolo; a mudwe lurwö adi ’dii gwe i jur lo Ejipeto liŋ ko perok musala;

²³ a se tine tomet ko ’borik, a ŋuto tine ŋien ki kanyit i pirit ko perok musala; ama a Ŋutu ti Yisaraele liŋ gwe ko parara i pirit na gwoŋdi se nu.

²⁴ A Paro luŋgi Mose, a kulyani adi, Iŋgo iti ta, tu kitakiŋdye ta MATAT ta se ko lupudiet kasu liŋ i pirit na geleŋ, ama tuŋ ti teŋon ti yidin kasu ko ti kisuk kasu möŋdi kayaŋ ni.

²⁵ A Mose kulyani adi, Do Köti ködyö tiŋdu yi toro ’bo lo ’du ’duŋö a rubaŋgajin ko lo ’yuraki MATAT Ŋun likaŋ ’buluŋ.

²⁶ Iŋkoi, yi agu ködyö babarara toro ’bo kao; lele moköt geleŋ ti kolwe bot, kogwon yi agu ’dumuŋdya i se anyen kitakiŋdya MATAT Ŋun likaŋ; a yi kulo tine den koyi kitakiŋdya MATAT ko kulon ŋo tojo yi a ’dur nyu.

²⁷ Ama a MATAT Köti togo ’yi töili lo Paro, a nye tine ’bon kölöddu lepeŋat.

²⁸ A Paro kulyani ko Mose adi, iŋgo ŋiörö kaŋo köyö, kunyar mugun; do mo ti met komor nio Köti asut; kogwon i lor logon do meddi komor nio lu do mo twatwan.

²⁹ A Mose kulyani adi, Do aje kulya ’bura; nan mo ti met komor inot Köti asut.