Yosua 10 - Bibilia Buk na Ŋun nagon koti luŋu aTela na ŋutu ti Amori 1 A Adoni-sedek mor lo Yerusa-lema yiŋge adi Yosua aje morga Ai, ko aje tukaŋu nye asut ko a konakiŋdya Ai se ko mor lonyit gwoso nagon nye aje konakiŋdye Yeriko se ko mor lonyit nu. A nye köti yiŋge adi ŋutu ti Gibeon aje tomor a ’börik ko ŋutu ti Yisaraele, a gwe kase kiden. 2 A na yiŋge mor kine kulya nu a nye kujönöni kujonö, kogwon Gibeon gwon a köji duma gwoso nene köji na mor, kogwon nye a duma lwölwöŋ Ai, köti a ŋutu kanyit liŋ gwe a iŋgo. 3 Nyenagon a Adoni-sedek mor lo Yerusalema sunyukiŋdye Owam mot lo Keberon kutuk, se ko Piram mor lo Yarmut, ko Yapia mor lo Lakisa, ko Debir mor lo Egelon adi, 4 ŋo ta köyö ni iparakiŋdya na nan, ko ti yi möröni ta ko Gibeon; kogwon se aje tomor a ’börik ko Yosua se ko ŋutu ti Yisaraele. 5 Nyenagon a kulu moran mukanat ti Amori, logon a ko mor lo Yerusalema, ko mor lo Keberon, ko mor lo Yarmut, ko mor lo Lakisa, se ko mor lo Egelon momoruŋdye ’börik i pirit na geleŋ, a iti tu, mora ko teŋon kase liŋ ti kamörök, a ’bikikiŋdye merajin kase i komor na Gibeon, a suluje mörö ko lepeŋ. 6 A ŋutu ti Gibeon sunyukiŋdye Yosua kutuk i mera na gwon Giligala nu adi, Ko kakalakin köliŋönök kulök; amaŋoŋdi kayaŋ ni ’de ’de i lwöku-ŋdyo na yi, ko iparakiŋdya na yi; kogwon moran liŋ ti Amori logon si ’da i merya kulu a momoruŋdya i moro koyi. 7 Nyenagon a Yosua iti kaŋo i Giligala i swöt lo loki se ko ŋutu kamörök liŋ i pirit na geleŋ, ko walan liŋ. 8 A MATAT kulyani ko Yosua adi, Ko kujönö se; kogwon nan aje pakiŋdya se konut i könisi; a lele ŋuto lose gwe ’bayin logon bubulö te ’ya do. 9 A Yosua ’bunyökiŋdye se ’de ’de, kogwon nye tu kaŋo i Giligala i swöt lo loki tukwaje liŋ. 10 A MATAT köbuŋe se ko ŋutu ti Yisaraele i komor, a nye tatuje se Gibeon yu gwak, a kepoddi bot nase i kiko lo kiyaddu Bete-koron, a rembi se tojo ko Ajeka, ko Makeda. 11 A ko gwe sona na woggiri se kaŋo ko ŋutu ti Yisaraele i komor, i diŋit nagon se gwe i dudulet na Bete-koron nu, a MATAT gubakiŋdye torok dumalak ti ki kase i kusik tojo ko Ajeka, a se twatwane twatwa; a se logon twatwa kogwon torok ti kudu kulu lwöŋe lwöŋ se logon ŋutu ti Yisaraele lo tatuja ko baŋdujin kulo. 12 Nyena a Yosua kulyani ko MATAT i ŋilu lor logon MATAT pakiŋdye ŋutu ti Amori ko ŋutu ti Yisaraele i könisi lu; a nye kulyani ko ŋutu ti Yisaraele i komor adi, Do kolor, gwo ’de gwo ’dan adi lir i Gibeon loki; do yapa, gwo ’de gwo ’dan i pirit na ’dir na Ayalon. 13 A kolor gwo ’de gwo ’dan adi lir, a yapa si ’dani si ’da, tojo ŋutu ti lu jur aje ropakiŋdya ’börik i merok kase. Kine kulyaŋona a ko wuröki i buk na Yasar le? A kolor yeŋe a tuparan kiden, a tine nyoŋga ’doro gwoso a lor ’bukuluŋ. 14 Lele lor köju ’beron ’bayin gwoso ŋilu, kode i diŋit na mukök, logon MATAT yiŋge gworo lo ŋuto; kogwon MATAT ŋilo mörö i swöt lo Yisaraele. 15 A Yosua se ko ŋutu liŋ ti Yisaraele yitöni yitö tojo i mera na gwon Giligala yu nu. 16 A kulu moran mukanat wöki wökön, a ’danani ’dana i kuggi na Makeda. 17 A Yosua takine adi, Moran mukanat kulo aje rye, a ’dana i kuggi na Makeda. 18 A Yosua kulyani adi, Gwugwu luŋo kiŋdye ta ŋurupö dumalak i kutuk na kuggi, ko tiŋdi ta ŋutu nyu i tiju na lepeŋat; 19 ama ko möŋdu ta nyu; riköddi ta merok kasu, ko rembi ta ŋutu logon gwon kase bot; ko kölö-kin ta se i luŋo kase i köjinö; kogwon MATAT ŋun losu aje pakiŋdya se kasu i könisi. 20 A ko gwe sona nagon Yosua se ko ŋutu ti Yisaraele aje tutuŋgö tatuja se adi sit, tojo ko se aje ’baka nu, a pitöno kase kulo lupöni kase i köjinö nago na titiyu, 21 a ŋutu liŋ yitöni ’bura ko Yosua yu i mera na gwon Makeda nu; a lele ŋuto gwe ’bayin lor aju kutuk ko lele lo ŋutu ti Yisaraele. 22 Nyena a Yosua kulyani adi, ŋane ta kötumit na kuggi, ko jaki ta nan kilo moran mukanat kaŋo i kuggi. 23 A se koŋdi sona, a jakiŋdye lepeŋ kulu moran mukanat kaŋo i kuggi, logon a ko mor lo Yerusalema, ko mor lo Keberon, ko mor lo Yarmut, ko mor lo Lakisa, se ko mor lo Egelon. 24 A ko gwe sona na joŋdi se kulu moran ko Yosua ni nu, a Yosua luŋgi ŋutu liŋ ti Yisaraele, a kulyani ko temejik ti ŋutu kamörök logon a tu ko lepeŋ i pirit na geleŋ kulo adi, ŋo ta nyona, ko ryoggi ta kilo moran i murutö ko mokosi kasu. A sepoŋdi nyona, a ryoggi murutö kase. 25 A Yosua kulyani ko se adi, Ko kujönö ta, ko an ta ko delya; gwe ta a iŋgo, ko a purwat; kogwon MATAT de konakiŋdya merok kasu liŋ logon ta mömöröri kilo sona. 26 A kirut Yosua rerembi se, a tatuje se, a lilikiŋdye se ki i kaden mukanat, a se dödönti sona i kaden loki tojo ko sömukö. 27 A ko gwe sona na ’doro ’i kolor nu, a Yosua tiŋdi saret, a se lauŋdye lepeŋat kak i kaden ki, a gubakiŋdye se i kuggi nagon se aje ’danari nu, a peddi ŋurupö dumalak i kutuk na kuggi, a gwe nyu tojo ko lo lor. 28 A Yosua morgi Makeda i pilu lor, a tatujeŋutu kanyit se ko mor lonyit ko baŋdu; a nye tukaŋi ŋutu liŋ asut lo gwon lukata kulu, a nye gwe a ko kölökin lele jörun; a nye konakiŋdye mor lo Makeda gwoso na konakiŋdye nye mor lo Yeriko nu. 29 A Yosua se ko ŋutu liŋ ti Yisaraele i pirit na geleŋ piörö kaŋo Makeda yu, a iti tojo Libina, a möröni ko Libina; 30 a MATAT köti pakiŋdye nye se ko mor lonyit ko ŋutu ti Yisaraele i könisi; a nye tatujeŋutu kanyit ko baŋdu, kweja adi se liŋ lo gwon lukata kulu; a nye gwe a ko kölökin lele geleŋ lukata jörun; a nye konakiŋdye mor lose gwoso na konakiŋdye nye mor lo Yeriko nu. 31 A Yosua se ko ŋutu liŋ ti Yisaraele i pirit na geleŋ piörö kaŋo Libina yu, a iti tojo Lakisa, a ’bikikiŋdye mera nase nyona ko se, a möröni ko se. 32 A MATAT pakiŋdye Lakisa ko ŋutu ti Yisaraele i könisi, a nye morgi nu köji i lor tomurek lonyit, a tatujeŋutu kanyit ko baŋdu, kweja adi se liŋ lo gwon lukata kulu, gwoso i liŋ na konakin nye Libina kunu. 33 Nyena a Oram mor lo Gejer ŋoki i parakiŋdya na ŋutu ti Lakisa; a Yosua möröni ko lepeŋ a tatujeŋutu kanyit, tojo nye a ko kölökin lele jörun. 34 A Yosua se ko ŋutu liŋ ti Yisaraele i pirit na geleŋ piörö kaŋo Lakisa yu, a iti tojo Egelon; a se ’bikikiŋdye mera nase nyona ko se, a möröni ko se; 35 a se morgi nu köji i pilu lor, a tatujeŋutu kanyit ko baŋdu, kweja adi nye a tukaŋu ŋutu liŋ lo gwon lukata kulo i pilu lor asut, gwoso na konakiŋdye nye Lakisa nu. 36 A Yosua se ko ŋutu liŋ ti Yisaraele i pirit na geleŋ piörö kaŋo Egelon yu, a iti tojo Keberon; a se möröni ko lepeŋ; 37 a se morgi nu köji, a tatujeŋutu kanyit ko baŋdu, se ko mor lonyit, ko turön kanyit, ko ŋutu liŋ lo gwon lukata kulu; a nye gwe a ko kölökin lele jörun. gwoso i liŋ na konakin nye Egelon kunu; kweja adi nye a tukaŋu nu köji asut se ko ŋutu liŋ lo gwon lukata kulu. 38 A Yosua se ko ŋutu liŋ ti Yisaraele i pirit na geleŋ yitöni Debir; a möröni ko se; 39 a nye morgi nu köji se ko mor lonyit, ko turön kanyit liŋ; a se tatujeŋutu kanyit ko baŋdujin, a tukaŋi ŋutu liŋ lo gwon lukata kulu asut; a nye gwe a ko kölökin lele jörun; a nye konakiŋdye Debir se ko mor lonyit gwoso na konakiŋdye nye Keberon nu; ko gwoso na konakiŋdye nye Libina se ko mor lonyit köti nu. 40 Nyena a Yosua iŋge te ’ya ŋilu jur liŋ, kweja adi jur lo merya, ko lo swöt lo loki, ko lo jur lo gwon kak, ko lo dudu-lesi, se ko moran kase liŋ; a nye gwe a ko kölökin lele jörun; ama a nye tukaŋi ŋutu liŋ lo gwon jörun kulo asut, gwoso na sarakiŋdye MATAT ŋun lo Yisaraele nu. 41 A Yosua iŋge te ’ya lepeŋat suluja Kadesa-barenea tojo ko Gaja, se ko jur liŋ lo Gosene, ma ’di tojo Gibeon. 42 A Yosua momorgi kulu moran liŋ se ko jurön kase i daŋ geleŋ, kogwon MATAT ŋun lo Yisaraele lo mörö i swöt lo ŋutu ti Yisaraele. 43 A Yosua se ko ŋutu liŋ ti Yisaraele i pirit na geleŋ yitöni tojo i mera na gwon Giligala yu nu. |
Bari Bible © United Bible Societies, 1979.
Bible Society in South Sudan