Yoane 1 - Bibilia Buk na Ŋun nagon koti luŋu a

Kulyaet toruet

¹ I suluki na ŋo liŋ, Kulyaet ’beron gwon kata, a Kulyaet gwe ko Ŋuni pirit na geleŋ, a Kulyaet lo gwe a Ŋun.

² Kulyaet lo gwon ko Ŋun i suluet.

³ Ŋo liŋ a gweya kogwon tomirian na lepeŋ, nene ŋo ’bayin nagon a gweya ’bak lepeŋ. Ŋo liŋ na gweya kune

⁴ gwolon ko ru nanyit, a ru na gwe a parara na ŋutu.

⁵ A pararan la pararakiŋdye i mudwe, a mudwe gwe a ko te ’ya lepeŋ kwoŋ.

⁶ A lele ŋuto gwe kata, logon Ŋun lo sunyuŋdyo; karin kanyit a Yoane.

⁷ Lepeŋ po a katokoronit, anyen tokurukiŋdyo ŋutu kulya ti ŋina parara, anyen nutu liŋ boŋo yuyubbo kogwon kulya kanyit.

⁸ Lepeŋ ko mugun nanyit ti gwon a ŋina parara, ama lepeŋ po i to koŋu na kulya ti ŋina parara.

⁹ ŋina a parara na to ’diri nagon po i na kak, a pararakiŋdye i ŋutu liŋ.

¹⁰ Lepeŋ gwon i na kak, a kak na gweyani kogwon tomirian na lepeŋ, ama a ŋutu ti na kak tine den lepeŋ.

¹¹ Lepeŋ a po kanyit i jur, ama a ŋutu kanyit gwe a ko wu lepeŋ.

¹² Ama ŋutu liŋ logon a wu lepeŋ ko a yuŋ karin kanyit kilo, nye titikin lepeŋat kido anyen wora a ŋwajik ti Ŋun.

¹³ Yuŋwe nase ti gwon gwoso na yuŋweni ŋutu na i ’dekesi ti mugun gwoso na ’deggi ŋutu na, ama yuŋwe nase a na Ŋun.

¹⁴ A Kulyaet lo worani a ŋuto, a mönuŋdye kayaŋ kiden, a yi meddi kwelen nanyit, kwelen gwoso ŋuro pilili lo Monye, a jore ko ’busan na nyaŋu se ko to ’diri.

¹⁵ A Yoane tokoŋ kulya ti lo Kulyaet, a kulyajine ki adi, Lo a ŋuto logon nan a kulyari kulya kanyit lo adi, ŋuto logon popo koyo i mukok lo a duma Iwolwoŋ nan, kogwon lepeŋ koju kata koyo ŋerot.

¹⁶ A yi liŋ iŋge ’yalaki ’busan na nyaŋu i nene ’busan loki nagon ’dumwe i gugu lonyit logon a jore adi milin.

¹⁷ Kogwon ŋun a tiŋdu Saresi kulo ko Mose i kutuk, ama ’busan na nyaŋu se ko to ’diri po kogwon Yesu Kristo.

¹⁸ Lele ŋuto ’bayin kwoŋ logon aje met ŋun, ama ŋuro pilili lo Ŋun logon gwon ko Monye i merete, nye lo tiŋdu lepeŋ i dena.

Tokoret na Yoane Kabatisanit

¹⁹ Yoane koju tökoŋu sona i diŋit nagon Yudayaki ti Yerusalema a sonyoddu koanejin se ko Lewijin i pija na lepeŋ adi, Do a pa?

²⁰ A nye tuŋge köke, a gwe a ko renya, a tuŋge adi, Nan ’bayin a Masia.

²¹ A se köti pije adi, A ko sona, do ŋona a Eliya? A nye waddi adi, Nan a leŋe. Do a ŋilu nebi? A nye waddi adi, ’Bayin.

²² Nyena a se köti pije adi, A kirut do gwe a ija? Taki yi anyen yi bubulö tukökiŋdyö nutu lo sunyuŋdyö yi kulu. Do jambu nyo i kulya kunök?

²³ A Yoane waddi gwoso na kulyari nebi Yisaya köju nu adi, Nan a gworo lo ŋuto lo wowoŋon i yöbu adi, Rine ta kiko lo MATAT gwogwo.

²⁴ Kulye Parusijin köti a sonyo,

²⁵ a se pije lepeŋ adi, Ko do ti gwon a Masia, kode a Eliya, kode a ŋilu nebi, nyo nagon do babatiddya?

²⁶ a Yoane waddi se adi, Nan batiddya ko pioŋ. Ama lele gwogwo ’dan kasu kiden logon ta a ko den;

²⁷ lepeŋ popo köyö i mukök, a nan tine jukin laggu patala ti kamuka kanyit.

²⁸ Kine kulya kona Betania i nu pele na Yardene i pirit na batiddye Yoane nu.

Kilolor lo ŋun

²⁹ A kotumalu Yoane meddi Yesu i po kanyit ni, a kulyani adi, Meddi ta Kilolor lo ŋun lo joŋga toronjin ti ŋutu ti na kak kapo malu!

³⁰ ŋilo a ŋuto logon nan aje jambu i kulya kanyit adi, Lele ŋuto popo köyö i mukök logon a duma lwölwöŋ nan, kogwon lepeŋ köju kata köyö ŋerot.

³¹ Nan ko mugun nio köju a ko den lepeŋ, ama nan po i batiddya ko pioŋ anyen nye böŋö kweki i Yisaraele.

³² A Yoane tokoŋ adi, Nan aje met Mulökotyo po kak ki yu gwoso gure, a gwe ko lepeŋ.

³³ Nan ko mugun nio köju a ko den lepeŋ, ama lepeŋ lo sunyuŋdyö nan i batiddya ko pioŋ lo a takin nan adi, Na meddi do Mulökötyo i po kak a gwe ko ŋuto nu, nye ŋilo ŋuto logon batiddya ko Mulökötyo Loke lo.

³⁴ Nan ko mugun nio aje met ko aje tökoŋu adi lepeŋ a Ŋuro lo Ŋun.

ŋutu ti Yesu kajujumuk ti kokwe

³⁵ Köti i lele kotumalu, a Yoane gwo ’de i pirit na geleŋ ko ŋutu kanyit kajujumuk murek;

³⁶ a na lwöŋoddi Yesu nyona nu, a Yoane diŋe lepeŋ, a kulyani adi, Meddi ta Kilolor lo ŋun malu!

³⁷ A nagon kilo kajujumuk kanyit murek ko yiŋge lepeŋ i jambu sona nu, a se kepoddi Yesu.

³⁸ A Yesu ko boŋgi, a meddi lepeŋat kipuŋdyö nye, a pije lepeŋat adi, Ta ga ’yu nyo? A se waddi adi, Pon Rabi, do si ’da ya? (Rabi nyönyökö adi Katodinönit.)

³⁹ A nye waddi adi, Po ta, ko meddi ta pirit nagon nan si ’da kata nu. Nyena a se moraddi ko lepeŋ, a se iŋge met pirit na si ’dari lepeŋ nu, a se mönuŋdye ko lepeŋ yu i ŋilu lor, kogwon gwe nyona ko saa iŋwan na koriri.

⁴⁰ Lele lo kilo ŋutu murek logon aje yiŋ Yoane i jambu, a moraddi ko Yesu kulo, karin kanyit a Andarea luŋaser Simona Petero.

⁴¹ A nye galaddi luŋaser lonyit Simona a kokwe, a takiŋdye lepeŋ adi, Yi aje ryö Masia. (Masia nyönyökö adi Kristo).

⁴² a nye joŋdi Simona ko Yesu ni. A Yesu diŋe lepeŋ, a kulyani adi, Do a Simona ŋuro lo Yoane; do mo luŋu a Kepa. (Kepa nyönyökö adi Petero, kweja adi Lurutar.)

Yesu a luŋgu Pilipo ko Natanaele

⁴³ A kotumalu Yesu ’deke tu Galilaya, a nye ryeji Pilipo, a kulyani ko lepeŋ adi, Kipuŋdye nan.

⁴⁴ pilipo a lo Betesaida, köji nase Andarea ko Petero.

⁴⁵ a Pilipo ryeji Natanaele, a takiŋdye lepeŋ adi, Yi aje ryö ŋuto logon kulya kanyit Mose a wur i Saresi se ko nebijiin koti a wur lo, lepeŋ a Yesu lo Najareta, ŋuro lo Yosepa.

⁴⁶ a Natanaele pije adi, ŋo na ’but bubulo pukun kaŋo i Najareta le? A Pilipo waddi adi, Po ko meddi.

⁴⁷ A na meddi Yesu Natanaele i po kanyit ni nu, a nye kulyani i kulya ti lepeŋ adi, Malo Yisaraeletyo gwak logon ’bak ’burönö!

⁴⁸ A Natanaele pije lepeŋ adi, Do den nan ada? A Yesu waddi lepeŋ adi, Nan aje met do na sakari do i ki ’bi mukok a kokwe nagon Pilipo a ko nyuŋ luŋgu do nu.

⁴⁹ a Natanaele waddi lepeŋ adi, Katodinönit, do ’diri a Ŋuro lo Ŋun; do a Mor lo Yisaraele.

⁵⁰ A Yesu waddi adi, Do ŋona a yubbö tuŋ kogwon nan aje takiŋdya do adi nan a met do i saka i ki ’bi mukök nu le? Do mo memet Ŋo dumalak lwölwöŋ kine.

⁵¹ A nye kulyani ko lepeŋ adi, ’Diri ’diri nan takiŋdya ta adi ta mo memet ki i ŋaju ko malaikajin ti Ŋun i tu ki ko i po kak köyö i mugun, nan Ŋuro lo ŋuto.Budu yemet kata Kana yu