Yeremia 3 - Bibilia Buk na Ŋun nagon koti luŋu a

¹ Ko ŋuto a yaŋdu nakwan nanyit a ŋina ŋuto kö ’yi nye a yemani ko lele lalet, ŋilo ŋuto ŋona bubulö yitö ko ŋina ŋuto yu le? ŋina nakwan ŋona a ko toluta parik le? Do aje biryeri mugun gwoso kalupe ko kanyarak jore, do ŋona bubulö yitwe köyö ni le? ŋilo a nan MATAT lo pija.

² ’Biluddi konyen kulök ki i ko ’du­lan ti merya nagon gwon kana ’bak nene ŋo, a meddi se;nan pirit nagon do a ko körö kata? Do si ’da i merete lo kiko i mömöŋdu na kanyarak kulök gwoso Arabityo lo mömöŋdu ryag­gu kajölök i yöbu. Do aje toluddya jur ko wutön i lulupujö inot se ko toron inot.

³ Nyenagon a lilima iŋge togwo ’da, a kudu lo kiser gwe a ko ’don; ama do gwon ko komor na kalupe a do lauŋdye yu na kwe.

⁴ Do pete luŋgu nan adi, Baba doa ju lio lo tukö ’disen,

⁵ a do pije mugun adi, Nye ŋonade woworan a tömönik le? adi, Nye ŋona de ’debba woran nanyit ŋupi le? Mete, do a jambu sona, ama do aje koŋdya ŋo liŋ narok nagon do bubulö koŋdya kune.

MATAT a mo ’yu ŋutu ti Yisaraele ko ti Yuda i Iopuggo na töilyet

⁶ A i perok ti mor Yosia a MATAT pije nan adi, Do a met ŋo nagon Yisaraele a kon i tu nanyit kaŋo köyö a iti i ko ’dulan liŋ ti merya ko i mukökö ti kaden liŋ logon rurwan, a nye biryeri mugun gwoso kalupe nyu?

⁷ A i mukök nagon nye aje koŋdya kine ŋo liŋ nu, a nan kulyani ko lepeŋ adi. Yitwene bot köyö ni, ama a lepeŋ tine ’bön yitwe, a kiaser nanyit Yuda nagon a kadumanit na iŋge met kine kulya.

⁸ Lepeŋ a met nan i sunyukiŋdyö na Yisaraele nagon tu kaŋo köyö na, nan a sunyukin lepeŋ ko waraga yanyet kogwon lulupesi kanyit liŋ, a kiaser nanyit Yuda nagon a kadumanit na nyuŋ ti kujönö, ama a lepeŋ köti biryeri mugun gwoso kalupe.

⁹ Kogwon lepeŋ lalaun toluŋ na, a lepeŋ iŋge tolut jur a biryeri mugun gwoso kalupe i twöju na ŋurupö se ko kaden.

¹⁰ Ma ’di ko kine ŋo liŋ, kiaser nanyit Yuda nagon a kadumanit na a ko yitwe köyö ni ko töili lonyit liŋ, ama nagon ko mumuluket. Kilo a kulyaesi kwe ti MATAT.

¹¹ A MATAT takiŋdye nan adi, Yisa­raele nagon tu kaŋo köyö na a koŋdya toron a na ’dit lwölwöŋ na Yuda nagon a kadumanit na.

¹² Iti ko laiki kine kulya i swöt lo lobot adi, Nan MATAT lo kulya adi, Do Yisaraele nagon tu kaŋo köyö na, yitwene köyö ni. Nan MATAT lo kulya adi, Nan mo ti met do ko woran, kogwon nan wowon konyen ko do. Nan mo ti yeŋon woran ŋupi.

¹³ Ama ka ’de ruŋge toron inot nagon do renyari nan MATAT ŋun ilot na, ruŋge adi do aje tu i ŋunyen logon a lepelok lo gwon i mukökö ti kaden liŋ lo rurwan, gwoso kalupe nagon wöröji abur i lyan, ruŋge adi do a ko twöju gworo lio. Kilo a kulyaesi kwe ti MATAT.

¹⁴ Nan MATAT lo luŋgu adi, Ta ŋwajik logon a tu kaŋo köyö kilo, yitwene ta köyö ni, nan a lalet losu; nan mo jojon ta, geleŋ i köji ko murek i ’duŋet, a nan mo joŋdi ta Siona.

¹⁵ A nan mo tiŋdi ta kayukuk logon töili lio ’de ’deggi kulo, a lepeŋat mo yuggi ta ko deŋdya se ko kuruŋdyö na kulya.

¹⁶ Nan MATAT lo kulya adi, A nagon ta aje ŋdi ko aje wora jore i jur i kilu perok nu, a ŋutu mo tine jambu köti i kulya ti saŋduk na tomoret nio na MATAT. A se mo tine den lepeŋ, kode yeyeju lepeŋ, kode tiŋdu lepeŋ kase i töilyet; a lepeŋ mo tine tetena köti asut.

¹⁷ A i ŋinu diŋit a Yerusalema mo luŋuni a si ’daet nio na MATAT, a jurön liŋ mo momoruŋdye Yerusalema i bu ’ya na karin kwe ti MATAT, a lepeŋat mo köti tine kebbu töilyet kase lorok kulo.

¹⁸ A i kilu perok a kötumit na Yuda molu morakiŋdye i kötumit na Yisaraele, a lepeŋat liŋ mo poŋdi kaŋo i jur lo lobot tojo i jur logon nan aje tikin merenyejin kasu a lomore lo.

¹⁹ A nan yeyeji adi, Nan ködyö tikin ta i kiden na ŋwajik kwe anyen tiŋdu ta jur lo ’but logon a lomore lokwekwelen lwölwöŋ jurön liŋ. A nan yeyeji adi ta ködyö luŋgu nan a Monye losu, a ködyö tine löpuköddu kaŋo i kepoddu na nan.

²⁰ Kudyakan ta ŋutu ti kötumit na Yisaraele aje dumba nan, gwoso na dumbe narakwan lalet na. Kilo a kulyaesi kwe ti MATAT.

²¹ Gworo lo gwien a yiŋa i ko ’dulan ti merya nagon gwon kana ’bak nene ŋo. Kilo a ŋutu ti Yisaraele lo gwien pija pitönö, kogwon lepeŋat a tukwölöŋgu kikolin kase, a iŋge böŋöri nan MATAT ŋun lose.

²² Ta ŋwajik logon a tu kaŋo köyö kilo, yitwene ta bot köyö ni, a nan mo toliŋge ta i toronjin kasu na kölökiŋdye ta nan kune. Pon MATAT, yi aje po konut ni, kogwon do a ŋun likaŋ.

²³ ’Diri nene paret ’bayin i kwakwaddu i lurwat loki, paret ’bayin i wuwuŋi i ko ’dulan ti merya. ’Diri gwak lwökit nikaŋ na Yisa­raele gwon ko MATAT ŋun likaŋ.

²⁴ Suluja i diŋit nagon yi nyuŋ a lo ’di ’dik nu, Bala ŋun lo yu na kwe köju lo tu tuŋgo teŋon ti köbilu, ko ti kisuk, ko ŋwajik lulyan ko nawate ti merenyejin kaŋ nagon se a kitaun kune.

²⁵ Ti yi pere ta kak ko yu na kusik.