Tolupesi 2 - Bibilia Buk na Ŋun nagon koti luŋu a

ŋutu logon ga ’yu koŋon wuju kulya na ’but

¹ ŋuro lio, ko do a yiŋ kulyaesi kwe, a ’delakindye saresi kwe konut i töili,

² a pakindye swö kulök i yiŋga na koŋon, a petakindye töili ilot i kurundyö na kulya,

³ iŋkoi, ko do a mulundyö timundya na kulya i ŋarakindya na do a do luŋgi kurundyö na kulya ko riŋit,

⁴ ko do a ga nye gwoso podo a do ga ’yi nye gwoso tukworien na ’dela;

⁵ ko do a kondya sona a do mo kurundye ko kuka na MATAT a nyo, a do mo ryeji ko dendya na ŋun a nyo.

⁶ Kogwon MATAT nye lo tindu koŋon; a dendya se ko kurundyö na kulya suluundye kanyit.

⁷ A nye ’delakindye ŋutu logon ko loti lo rigwo yeyeesi nakoŋ, a nye gwe a ’buku gayet na ŋutu lo gwon ko gwiliŋit na to ’diri.

⁸ Lepeŋ titi kikolin ti ’duŋgo na kulya gwogwo, a toi ’bura kikolin ti katwoyok kanyit.

⁹ A kirut do mo kuru kurun ko loti lo ’but lo rigwo ko liliet na ’but ko torigwo a nyo, kweja adi a kikolin liŋ logon tu i gwiliŋit lo ’but.

¹⁰ A koŋon mo lupöni konut i töili, a kodudwo inot mo lyoŋi lyoŋon ko denesi.

¹¹ A totolok mo na toi do, a kurundyö na kulya mo gaji do,

¹² i lwökundyö na do i kikolin ti ŋutu lorok, logon jamesi kase totogiŋa.

¹³ Kilo ŋutu a renya kikolin ti torigwo, a woroni i gwokiot logon tu i mudwe,

¹⁴ kilo a ŋutu logon lyölyöŋi i kondya na toron, a nyolani i toron na totogiŋa;

¹⁵ logon kikolin kase a lukwolorok, a gwiliŋisi kase neneŋeji neneŋeja.

¹⁶ A totolok mo lwöggi do i be ’ya na ŋuto nagon a kalupe, kode i ŋuto nagon a lwakatyo nagon jambu kulya lulukesi,

¹⁷ na yandu lalet logon ja yemba lepeŋ i tuko ’disen nanyit, a iŋge boŋo milye logon nye a milyeju ko ŋun lonyit i komor lo;

¹⁸ kogwon kiko lo lulurara kak i twan gwon kanyit midi, a gwokiot kanyit iti i ŋutu lutwatwa.

¹⁹ ŋutu ’bayin lo tu ko lepeŋ yu logon a yitwe bot, a se tine ryo kikolin logon tu i ru.

²⁰ Nyena a do mo woroni i kikolin ti ŋuto lo ’but, i kebbu na gwokiot ti ŋutu ti loti lo rigwo.

²¹ Kogwon ŋutu ti loti lo rigwo mo gwolor i na kak, a ŋutu logon ’bak kulya mo lo yeŋe kata,

²² ama a ŋutu lorok mo gelajine kaŋo i kak ni, a kadumak mo gwunyoni kaŋo kata asut.