Tito 3 - Bibilia Buk na Ŋun nagon koti luŋu a

Koŋdya na ŋo na ’but

¹ Toyiyikiŋdye se adi ti se twönitwo kasarak liŋ ti miri; lepeŋat agu ködyö ’debba saresi kase, a gwe ajo i koŋdya na go liŋ na ’but.

² Taki lepeŋat adi, ti se gwe ti jambu kulya ti lele ŋuto arabat, ti se gwe ti momorotu, ko ti se gwe a lotonoŋak, ko ti se gwe a lokoyokak i ŋutu liŋ.

³ Kogwon yi köju a lu ’böŋ ko a karenyak. Yi a giran a gwe a ’dupi ti ’dekesi narok ko ti lyoŋesi ka ’de ka ’de ti na kak, a yi gwilipara ko töilyet lurwök ko a kayulök, ŋutu maman yi a yi koti iŋge man ’börik.

⁴ Ama na pukuŋdye ’busan se ko nyaŋu na Ŋun Kalwokonit likaŋ nu,

⁵ a lepeŋ iŋge lwok yi. Lepeŋ lwöggu yi ’bayin kogwon kitajin na ’but nagon yi a kon kune, ama kogwon lepeŋ a kayatanit. Lepeŋ Iwoggu yi kogwon lalai nikaŋ, ko yuŋwe nikao a ludukö i riŋit na Mulökötyo Loke logon a toluduggo yi lo.

⁶ Kogwon ŋun a tiŋdu yi Mulokotyo Loke abur, kogwon Yesu Kristo Kalwökönit likaŋ.

⁷ Nyena i ’busan nanyit na nyaŋu a nye tetenakiŋdye kulya kaŋ a na rigwo ko Ŋun i komor, a tiŋdi yi i yeŋdu adi yi ’diri mo wuju ru na yeŋ nyin a lomore nikao.

⁸ Lo a kulyaet logon a gwak.Nan ’de ’dekan adi ti do todiŋdye kine kulya parik, anyen ŋutu lo yubbö Ŋun kilo böŋö tiŋdu ’börik i kitajin na ’but. Kine kulya a na ’but ŋaparakin ŋutu.

⁹ Ama paji rerenyesi na ’boŋ, se ko kena na karin ti merenyejin gwoso i yuŋwe nase, koti paji pisesi se ko mömörötu i kulya ti Saresi ti Mose, kogwon kine ŋo ’bak ’bulit ko a ŋo kana.

¹⁰ ŋuto logon kökoroja ŋutu lo, tokujöne tokujön lepeŋ daŋ geleŋ kode daŋ tomurek, a i mukök na ŋina paji lepeŋ asut.

¹¹ Kogwon do deden adi ŋuto gwoso ŋilo gwon ko yeyeesi nakwolö ŋök, a toronjin kanyit iŋge ’duŋökin lepeŋ putet.

Jujuwesi ti ’dutet

¹² Ko nan a soŋdu Artema kode Tukiko konut ŋini, möŋi möŋu parik i tu Nikopoli köyö yu, kogwon nan a yeyeju meliŋa nyu.

¹³ Moŋi möŋu parik i parakiŋdya na Jena bodo lo saresi se ko Apolo i jölö nase. Mete met ’bura aidi ti se gwe ti yaŋan i kunie po.

¹⁴ Ti ŋutu kaŋ dinikine tiŋdu ’börik i koŋdya na kitajin na ’but, anyen lwöggu ŋutu logon gwon ko yöŋö na ŋo kilo; an se gwon gwoso ködini logon ti radan ludweki.

¹⁵ ŋutu liŋ lo gwon ko nan ni kulo roman ko do. Rome ko kayupök liŋ logon a julin kao kilo.Ti ’busan gwe ko ta liŋ.