Suluet 6 - Bibilia Buk na Ŋun nagon koti luŋu a

Ŋutu a toroŋdya parik

¹ A ko gwe sona nagon Ŋutu ajesuluja ŋdi i kak, a ŋwajik wate iŋge yuŋweki se nu,

² a ŋwajik ti Ŋun ko meddi adi ŋwajik ti Ŋutu a nakwe kwelen, a se yemakiŋdye ’börik wate gwoso na ’deggi se na.

³ A MATAT kulyani adi. Mulökötyo lio mo ti si ’da ko Ŋutu i mugunya ŋupi, kogwon lepeŋat gwon ko mugunya na ’bu ’burön, ama lepeŋat mo gwolor ko kiŋajin mia geleŋ ko merya murek.

⁴ A i diŋit nagon ŋwajik ti Ŋun a mora ko ŋwajik wate ti Ŋutu a se iŋge yuŋwekiŋdyö lepeŋat ŋwajik nu, a Ŋutu lojo lo lilimba gwolore i kak suluja i nu diŋit. Lepeŋat a walan ti ’beron ko a Ŋutu lokukwön.

⁵ A MATAT ko meddi adi Ŋutu a toroŋdya parik i kak, a ŋo liŋ na yeye töilyet kase ko na kakatim se kune yeŋe gwon a narok tuŋ.

⁶ MATAT iŋge delya kogwon nye a gwekiŋdya Ŋutu i kak, a kine kulya iŋge tomi töili lonyit.

⁷ a MATAT kulyani adi, Nan mo seyara Ŋutu logon nan a gweyun i na kak kulo kaŋo; kweja adi, Ŋutu, ko toro ’bo, ko ŋo lo gwögwöŋtu kak se ko kwen ti ki; kogwon nan a delya i gweja niŋ na lepeŋat.

⁸ Ama a Noa iŋge ryö ’busan ko MATAT i komor.Noa a teteŋdya ki ’bo

⁹ Kulo a nyakwariat ti Noa. Noa a ŋuto lo rigwo a gwe ’bak yuyuket i toberon nase; a Noa wöröni ko Ŋun.

¹⁰ A Noa yuŋuŋdye ŋwajik musala, karin kase a ko Seme, ko Ama, ko Yapete.

¹¹ A kak iŋge körö ko Ŋun i komor, a kak iŋge jore ko ryaggu.

¹² a Ŋun meddi adi kak na aje körö, kogwon Ŋutu liŋ aje köŋu gwiliŋisi kase i na kak.

¹³ A Ŋun kulyani ko Noa adi, ’Duddyö na Ŋutu lio a ’dur köyö i komor; kogwon kak na ajore köryaggu kogwon kulya kase; nyena mete, nan de tutukar se ko kak liŋ i pirit na geleŋ.

¹⁴ Tetenakiŋdye mugun ki ’bo logon a kaden ti göper; nyena i ki ’bo lukata yu lolokote loloköt, a do woyöji lukata ko kaŋo ko meme.

¹⁵ Nyena ti do teteŋdi lepeŋ sona; ti tojolan na ki ’bo gwe a lokiliŋan miajin musala, ti tugalaŋ nanyit gwe a lokiliŋan merya mukanat, ti tojolan nanyit ki gwe a lokiliŋan merya musala.

¹⁶ A do mo tetenakiŋdye kwiliset i ki ’bo, a do mo tutupökiŋdye lepeŋ ki ko lokiliŋ geleŋ, a do tiŋdi kötumit na ki ’bo i merete lonyit; a do teteŋdi kadijik na ’du ’dulu, ko na kak, ko tomurek, ko tomusala.

¹⁷ Mete, nan mo jojon bar i kak i tukaŋu na ŋo liŋ lo gwon jörun i na kak kulo; a ŋo liŋ lo gwon i na kak kulo mo tatuani tatua.

¹⁸ Ama nan mo tetenakin do tomoret niŋ nagon gwo ’dan go; a do mo lupöni i ki ’bo, do se ko ŋwajik kulök, ko nara kwan inot, se ko wate ti ŋwajik kulök.

¹⁹ A do mo joŋgi gweyarijin liŋ ti ŋo liŋ lo gwon jörun i ki ’bo kata, anyen do tiju se jörun ko do i pirit na geleŋ, kweja adi gweyarijin liŋ murek murek, mönik ko nakwan.

²⁰ a do mo joŋgi gweyarijin liŋ murek murek ti kwen, ko ti kijakwa, ko ti ŋo liŋ lo gwögwöŋu kak, a se mo iti konut pini anyen do tiju se jörun.

²¹ Barakiŋdye mugun gweyarijin liŋ ti kinyojin, ko ’de ’yi se; a kilo mo gwe a kinyojin kulök ko a ti lepeŋat.

²² A Noa koŋdi ŋo liŋ gwoso na sarakiŋdye Ŋun nye nu.