Suluet 44 - Bibilia Buk na Ŋun nagon koti luŋu a

Kopo logon a likin

¹ A Yosepa saŋi duma lo kadi nanyit lo adi, Tojorene jurakan ti kulo Ŋutu ko kinyo gwoso nagon se bubulö ’doggu na, ko tiŋdi gurut ti kulo Ŋutu liŋ geleŋ geleŋ i kutusen ti jurakan kase,

² ko tiŋdi kopo lio logon a pödö lo i kutuk na jurak lo ŋuro lo ’dutet lo, mora ko gurut kanyit ti ’bolot kune. A ŋilo ŋuto koŋdi gwoso na kulyari Yosepa na.

³ A i tar na kak, a kulu Ŋutu sonyojine sonyoji se ko kaineki kase kune.

⁴ A nagon se a ko nyuŋ yeŋga pajo ko köji nu, a Yosepa kulyani ko duma lo kadi nanyit lo adi. Ŋine ki, keporo kulu Ŋutu; a ko do a wokun se, pine lepeŋat adi, Nyö ta a nyokökiŋdyo nan toron i kulya na ’but? Nyö ta a kokolara kopo lio logon a podo?

⁵ Lepeŋ ti gwon a kopo logon duma lio mömoji ko wawaŋdi lo le? Ta a koŋdya toron i koŋdya na ŋo gwoso ŋina.

⁶ A nye ko wokuŋdye se, a jamakiŋdye se kilo kulyaesi.

⁷ A se pipije lepeŋ adi, Ko nyo duma likaŋ jambu kulya gwoso kine? Ti yi köliponok kulök gwe pajo i koŋdya na ŋo gwoso ŋina.

⁸ Mete, gurut na ryö yi i kutusen ti jurakan kaŋ kune, yi a jon se i jur lo Kanana a nyökökiŋdye do; nyena a yi bulöni bulö kokoladdu pödö kode dakap ko duma ilot kadi ada?

⁹ Ko ŋilo kopo a rye ko lon likaŋ yi kölipönök kulök, a ti nye tatuani tatua, a yi Köti de gwe a ’dupi kulök pon duma likaŋ.

¹⁰ A nye waddi adi, A na ’but, ti gwe gwoso na kulyari ta na: nye logon ŋilo kopo a rye kanyit lo, a nye mo gwe a ’dupiet lio, a kulye kasu mo gwe ’bak kulya.

¹¹ A se nyoŋgi ’dukukiŋdyö jurakan kase kulo kak, a Ŋutu liŋ geleŋ geleŋ ŋaji jurakan kase.

¹² A nye poki i ga ’yu, suluja i kayu tojo ko ŋuro lo ’dutet lo; a lo kopo ryeni ko Benyamina i jurak.

¹³ A se kekereŋdi boŋgwat kase kune, a Ŋutu liŋ geleŋ geleŋ sobbi tito i kaineki kase, a se yitöni köji.

¹⁴ A Yuda se ko luŋasirik kanyit kulo ’dure ko Yosepa kadi i diŋit nagon nye nyuŋ gwon kata nu; a se rosokakine kak ko lepeŋ i komor.

¹⁵ A Yosepa pipije lepeŋat adi, Ŋo a nyo nagon ta a kon? Ta ti den le adi ŋuto gwoso nan bubulö waŋdu?

¹⁶ A Yuda waddi adi, Pon duma likaŋ, yi de kulya ko do ada? Yi jambu ada? Yi lakuŋdya ’börik ada? Ŋun aje ryö toron nikaŋ yi kölipönök kulök; mete, yi kulo gwe a ’dupi kulök pon duma likaŋ, yi se ko ŋuto logon lo kopo a rye kanyit i könin lo.

¹⁷ A Yosepa waddi adi, Ti nan gwe pajo i koŋdya na ŋo gwoso ŋina: ama tuŋ ŋuto logon lo kopo a rye kanyit i könin lo de gwon a ’dupiet lio; ama ko gwe gwoso ta kilo, iti ta ko monye losu yu ’bura.

Yuda mamaŋdu Yosepa i kulya ti Benyamina

¹⁸ A kirut Yuda miju nyona ko Yosepa ni, a mamaŋdi adi, Pon duma lio, nan mo ’yu do, böŋö ti nan kölipönit ilot jamakiŋdye do kulyaet geleŋ anyen do yiyiŋ pon duma lio, ko ti woran inot gwe ti tulekin köyö nan kölipönit ilot, kogwon do ’diri gwon gwoso Paro lepeŋ.

¹⁹ Do duma lio a pipija yi kölipönök kulök adi, Ta gwon ko munyi kode lele luŋaser?

²⁰ a yi waddi do duma lio adi, Yi gwon ko monye, lepeŋ gwe aŋuto modoŋ, a yi Köti gwe ko luŋaser lo ’dit logon monye likaŋ lo yupuŋdyö i tomodŋoan nanyit; a luŋaser lonyitoge twan, a nye geleŋ lo pituŋdye i ŋwajik ti ŋote; a monye nyare nyar lepeŋ.

²¹ Ama a do kulyani koyi kölipönök kulök adi, Joŋdi ta lepeŋ köyö ni anyen nan bubulö meddya lepeŋ ko konyen kwe.

²² A yi kulyani ko do duma likaŋ adi, Lu ŋuro ti bulö kölökiŋdyö monye lonyit, kogwon ko nye ködyö a kölökin monye, a monye ködyö twane twan.

²³ A do kulyani koyi kölipönök kulök adi, Ko luŋaser losu lo ’dutet lu ti moruŋdya ko ta, a ta mo tine met komor nio Köti kwöŋ.

²⁴ A yi yitöni bot ko kölipönit ilot yu logon a monye likaŋ, a yi nyönyökö kiŋdye kulyaesi kulök ti duma likaŋ.

²⁵ A monye likaŋ kulyani adi, Yitöni ta, ko tu gwörökiŋdye ta yi kinyo a lo ’dit,

²⁶ a yi kulyani adi, Yi ti bulö tu. Ko luŋaser likaŋ lo ’dutet lo a moraddu koyi a yi de iti tu; kogwon yi ti bulö meddya komor na lu ŋuto, ama tuŋ ko luŋaser likaŋ lo ’dutet lo a moraddu koyi.

²⁷ A kölipönit ilot baba kulyani koyi adi, Ta a den adi narakwan nio a yuŋwekiŋdyö nan gwajik murek;

²⁸ lele aje tu kaŋo köyö, a nan kulyani adi, ’Diri nye aje nyei asut; a nan gwe a ko met lepeŋ tojo ko na diŋit.

²⁹ Nyena ko ta joŋga ŋilo ŋuro Köti kaŋo köyö i könin a ko ŋo naron ködyö a mok lepeŋ, a ta mo joŋgi kupir kwe lokwe kak i pirit na mulökö dedelyaji.

³⁰ Nyena böŋö yeyene yeye adi ru na kölipönit ilot baba gwon a ŋo geleŋ ko ru na lo Ŋuro. Soŋinana ko nan a ’dur ko baba yu, a ŋilo ŋuro gwe ’bayin kayaŋ,

³¹ a nye ko meddi adi lo ŋuro gwe ’bayin koyi i pirit na geleŋ, a nye mo twane twan; a yi kölipönök kulök mo joŋgi kupir lokwe ti kölipönit ilot monye likaŋ kak i pirit na mulökö dedelyaji.

³² Kogwon nan kölipönit ilot a ruk gwo ’dan i kulya ti lo ŋuro ko baba i komor, nan a takin lepeŋ adi, Ko nan ködyö a ko nyökökin do lepeŋ, a ti ŋina toron ködyö gwe köyö loki tojo ko twan nio.

³³ Nyenagon soŋinana nan mo ’yu do, bögö ti nan kölipönit ilot si ’dani i pirit na lo ŋuro a ’dupiet ilot pon duma lio; ko ti lo ŋuro yitöni bot ko luŋasirik kanyit i pirit na geleŋ.

³⁴ Kogwon nan yitö ko baba yu ada ko lo ŋuro gwe ’bayin köyö? An nan ko meddya go naron nagon mo pokin ko baba nu.