Suluet 32 - Bibilia Buk na Ŋun nagon koti luŋu a

¹ A Yakobo morgi kiko lonyit, a malaikajin ti Ŋun torumbe ko lepeŋ;

² a Yakobo ko meddi se, a nye kulyani adi, Kilo a kurumi na Ŋun! Nyena a nye gwije nu pirit a Makanayim.

Yakobo a teteŋdya torumbö ko Esau

³ A Yakobo yökiöddi Ŋutu kulye ŋerot ko Esau luŋaser lonyit yu i jur lo Seir, logon a jur lo Edom.

⁴ A nye saŋi se adi, Kulyani ta sona ko duma lio Esau adi, Yakobo kölipönit ilot lo kulya adi, Nan aje mönuŋdyö ko Labana yu, ko aje si ’da nyu tojo ko na diŋit;

⁵ a nan gwe ko kisuk, ko kaineki, ko teŋon ti yidin, ko kölipönök lulyan ko nawate; nan aje sonyoddu kilo Ŋutu i takiŋdya na do pon duma lio, anyen nan böŋö ryeju ’busan konut i komor.

⁶ A Ŋutu lo yökiöji kulo yitweni ko Yakobo ni, a kulyani adi, Yi a ’durökin ko luŋösur Esau yu, lepeŋ lu popo ko Ŋutu miajin Iŋwan ko lepeŋ i pirit na geleŋ i rum ko do.

⁷ A kirut Yakobo kujönöni kujönö parik a delyani delya; a nye koŋi Ŋutu lo gwon ko lepeŋ kulo ko teŋon ti yidin ko ti kisuk se ko kamilojin a kurumijin murek,

⁸ a nye kulyani adi, Ko Esau a po i nene kurumi a köŋi lepeŋ, a kirut Ŋutu ti kurumi na pituŋdyö na wöki wökön.

⁹ A Yakobo mo ’yi adi, Pon Ŋun lo baba Abarayama, logon a Ŋun lo baba Yisaka, pon MATAT logon a kulya ko nan adi, Yitöni kasu i jur i karu kulök, a nan mo koŋdi do ’bura lo,

¹⁰ nan ti jukin ma ’di swöt lo ’dit parik i nyaŋu inot lio nagon ti ’duddyö ko i to ’diri lio nagon do a kwekin kölipönit ilot na, kogwon nan a laŋuŋdya lo Yardene ko ture lio ka ’de; nyena soŋinana nan a wora a kurumijin murek.

¹¹ Lwök nan böŋö i könin lo luŋaser lio Esau, kogwon nan kukujönö lepeŋ, an nye po i tatuja na nan ko ko ŋote ko ŋwajik i pirit na geleŋ.

¹² Ama do köju a kulya adi, Nan ’diri mo konakiŋdya do ’bura, a nan mo tiŋdi nyakwariat kulök i gwon jore gwoso sese nagon ti bulö kena na gwon i tör duma na ’balaŋ.

¹³ Nyenagon a Yakobo dotoni nyu i ŋilu tukwaje, a nye ’dumuŋdye ’dokesi i kiden na ŋo kanyit anyen ’dokari Esau luŋaser lonyit,

¹⁴ kweja adi melon miajin murek ko mönikön merya murek, ko köbilu miajin murek, ko lopijoki merya murek,

¹⁵ ko kamilojin na dudurö merya musala ko torela kase, ko kisuk merya Iŋwan, ko dwönin puök, ko kaineki merya murek se ko mönikön puök.

¹⁶ A nye tiŋdi kine toro ’bo ko kölipönök kanyit i könisi a teŋon a teŋon; a takiŋdye kölipönök kanyit kulo adi, Wöröjine ta köyö ŋerot, kölöki ta kwake i kiden na teŋ ko teŋ.

¹⁷ A nye saŋi duma lo teŋ na ŋerot lo adi, Ko Esau luŋaser lio a rum ko do, ko a pija do adi, Ta a Ŋutu ti ŋa? Ta tu da? Kine toro ’bo nagon ta memeyara kine a ti ŋa?

¹⁸ a kirut do mo waddi adi, Kune toro ’bo a ti kölipönit ilot Yakobo, a se gwe a ’dokesi nagon lepeŋ a sunyukin do pon duma lio Esau; nye ŋilo popo kayaŋ i mukök.

¹⁹ A Yakobo Köti sarakiŋdye temejik ti teŋ tomurek ko tomusala, se ko Ŋutu liŋ lo kebbu mukök na teŋon kulo adi, Tambi ta sona ko Esau ko ta a torumbö ko lepeŋ.

²⁰ A ta mo kulyani adi, Yakobo kölipönit ilot ŋilo popo kayaŋ i mukök. Kogwon Yakobo yeyeju adi, Nan ŋona mo rabbu konyen kanyit ko ’dokesi na meyaji köyö ŋerot kune, a molu i mukök a nan mo meddi komor nanyit; ko nye ŋona mo ruruk nan.

²¹ Nyena a ’dokesi kune meyajine kanyit ŋerot; a nye lepeŋ dotoni ŋilu tukwaje i mera kata.

Yakobo a tomok kupe Peniele yu

²² A Yakobo ŋine ki i ŋilu tukwaje, a ’dumuŋdye wate kanyit murek kune, ko kölipönök kanyit nawate murek kune, se ko ŋwajik kanyit puök wot geleŋ kulo, a laŋaddi i pirit nanye ’de nagon a Yabok.

²³ Nye a ’dumuŋdya se, a iŋge soŋdu se i nu pele na kare, a iŋge sonyoddu ŋo liŋ na gwon ko lepeŋ kune.

²⁴ A Yakobo lo kölökine geleŋ; a lele ŋuto tomoke kupe ko lepeŋ tojo ko baŋun na kak.

²⁵ a ŋuto lo ko meddi adi nye ti te ’ya Yakobo, a nye ’bo ’yi ŋeti lo Yakobo, a ŋeti lonyit ŋuleddi puleddya na tomorgi se kupe nu.

²⁶ A lu ŋuto kulyani adi, Kölöddi nan, kogwon kak baŋu baŋun. Ama a Yakobo waddi adi, Nan ti kölöddu do ko do a ko ’boroja nan.

²⁷ a ŋilu ŋuto pipije lepeŋ adi, Karin kunök a ŋa? A nye waddi adi, Karin kwe a Yakobo.

²⁸ A ŋilu ŋuto kulyani adi, Karin kunök ti luŋu a Yakobo Köti kwöŋ, ama luŋu a Yisaraele, kogwon do a kupeja ko Ŋun se ko Ŋutu, a do iŋge te ’ya.

²⁹ a Yakobo pipije lepeŋ adi, Böŋö taki nan karin kunök. A nye waddi pija adi, Ko nyo do pija karin kwe? A ŋilo ŋuto ’boroji lepeŋ nyu.

³⁰ a Yakobo luŋgi karin ti nu pirit a Peniele, kulya adi, Kogwon nan a meddya Ŋun a lokomor a nan gwe a ko twan.

³¹ A kolor iŋge nyerakin ko lepeŋ na laŋgi nye Penuele nu, a nye iti a ŋöde kogwon kulya ti ŋeti lonyit.

³² Nyenagon Ŋutu ti Yisaraele ti nyesu murilö lo tomor a nyuti ko ŋeti tojo ko lo lor, kogwon ŋilo ŋuto a ’bo ’yu ŋeti lo Yakobo i murilö lo tomor a nyuti ko ŋeti.