Suluet 31 - Bibilia Buk na Ŋun nagon koti luŋu a

Yakobo a wökön kaŋo ko Labana i komor

¹ Nyena a Yakobo iŋge yiŋ adi ŋwajik ti Labana kulya adi, Yakobo aje ’dumaddu ŋo liŋ nagon a ti baba; Köti lepeŋ aje wuju ŋina tukworien liŋ i ŋo nagon a ti baba kune.

² A Yakobo iŋge met adi Labana tine met nye ko lyöŋön gwoso na ’beron köju nu.

³ A MATAT kulyani ko Yakobo adi, Yitöni i jur lo merenyejin kulök, ko i karu kulok; a nan mo gwe ko do

⁴ Nyena a Yakobo soŋdi kutuk, a lupundye Raele ko Lea anyen tu i yöbu na yuggi nye yidin kanyit nu.

⁵ A nye kulyani ko se adi, Nan a met adi munyi ti met nan ko lyoŋon gwoso na ’beron köju nu. Ama ŋun lo baba gwon ko nan.

⁶ Ta a den adi nan a kitakiŋdya monye losu ko riŋit nio liŋ;

⁷ ama monye losu a mumulugga nan ko aje löpuggö daŋin puök ŋo nagon nye parakiŋdye nan kune, ama ŋun a ko ’burukin nye i konakiŋdya na nan arabat.

⁸ Ko nye a kulya adi, Yidin nakiri kune mo gwon a pariesi kunök, nyena a yidin liŋ yuŋu ŋdye nakiri; a ko nye a kulya adi, Se nagon ko wuresi adi ’yim ’yim kune mo gwon a pariesi kunok, nyena a yidin liŋ yuŋuŋdye nagon ko wuresi adi ’yim ’yim.

⁹ Nyena a Ŋun ’dumaddi toro ’bo ti munyi sona a tiŋdi nan se.

¹⁰ A ko gwe sona i diŋit luwet, a nan rudweni rudwe, a nan meddi lorijoki melon liŋ logon a kaluwak ti yidin gwe a lobeke, ko wuresi adi ’yim ’yim, ko a lonyete.

¹¹ A malaikatat lo Ŋun luŋgi nan i rudwe adi, Yakobo, a nan ruŋge adi, Nan malo!

¹² a nye kulyani adi, ’Bi ’yi konyen kulök ki ko meddi lorijoki melon liŋ logon a kaluwak ti yidin gwe a lobeke, ko wuresi adi ’yim ’yim, ko a lonyete; kogwon nan aje met kulya liŋ nagon Labana kokonakin do kune.

¹³ Nan lo gwon a Ŋun lo Betele, nu pirit nagon do a welakiŋdye ŋurupit na togwi ’dikin do ki nu, na milyekiŋdye do nan milye nu. Nyenagon soŋinana ŋine ki ko wuddye wuddya i ŋilo jur, ko yitöni bot i jur lo yuŋwe ’i do kata lu.

¹⁴ A Raele ko Lea waddi waddu pipije lepeŋ adi, Swöt lo toro ’bo ŋona kata ko baba midi lo pitöki yi a lomoriot kaŋ le?

¹⁵ Lepeŋ ŋona a ko konakiŋdya yi gwoso lwaka le? Kogwon nye a tugwöŋu yi, Köti aje nyesu toro ’bo kaŋ.

¹⁶ Kogwon tukworien liŋ nagon Ŋun aje ’dumara ko baba na, ŋina gwe a nikaŋ se ko ŋwajik kaŋ; nyenagon koŋdi ŋo liŋ nagon Ŋin a takin do kune.

¹⁷ Nyena a Yakobo ŋine ŋien, a tosi ’dakiŋdye ŋwajik kanyit ko wate kanyit i kamilojin loki;

¹⁸ a nye meyaddi toro ’bo kanyit liŋ nagon nye aje ryo kune, kweja adi toro ’bo na ryö nye Padan-aram yu kunu, anyen nye tu i jur lo Kanana ko monye lonyit Yisaka yu.

¹⁹ A Labana aje tu i ’bariŋdu na kupir ti köbilu kanyit kune, a kudyakan Raele kokoladdi nyömuejin logon a ŋunyen ti mede na monye.

²⁰ A Yakobo iti a Iwon Labana ŋuto lo Aram a ko den, kogwon nye a ko takin lepeŋ adi nye wöwökön.

²¹ A nye wöki wökön ko ŋo kanyit liŋ, a nye laŋgi kare Perat, a komor nanyit juŋe jur lo Gilada logon a merya.

Labana a ’demeja Yakobo

²² A i mukök na perok musala, a Labana tukökine adi Yakobo aje wökön.

²³ A nye ’dumuŋdye luŋasirik kanyit kulo a kebbi bot nanyit ko jölö na perok buryo, a gwe nyona ko ryeju na lepeŋ i jur i Gilada logon a merya.

²⁴ a Ŋun poŋdi ko Labana ŋuto lo Aram ni i rudwe na tukwaje, a kulyani ko lepeŋ adi, Kunyar, an do ko jamakiŋdya Yakobo nene ŋo na ’but kode naron.

²⁵ A Labana ’dure ko Yakobo yu. Nyena Yakobo aje ’beggu kemia nanyit i mere, a Labana ko luŋasirik kanyit ’beggi kase i jur lo Gilada logon a merya.

²⁶ a Labana pipije Yakobo adi, Ŋo a nyo nagon do a kon nagon do aje kokoladdu mugun koyo, ko aje baraddu ŋwajik kwe gwoso na momoka i gor?

²⁷ Ko nyo do a wökön a lwön ko a kokoladdu mugun köyö a gwe a ko takin nan, anyen nan bubulö nyömöki ŋdyö do ko lyöŋön, ko kölisi, ko tiŋgiliet se ko tomon?

²⁸ Nyö do a ko mönökin nan i roman ko ŋwajik kwe lulyan ko nawate? Do aje koŋdya ŋo na ’boŋ.

²⁹ Nan gwon ko riŋit i kona kiŋdya na do arabat; ama Ŋun lo munyi a kulya ko nan kwaje adi, Kunyar, an do ko jama kiŋdya Yakobo ŋo na ’but kode naron.

³⁰ Nyena do soŋinana aje tu kogwon do yöyöŋö mede na munyi parik; ama kwe a nyo nagon do kokoladdi ŋunyen kwe?

³¹ A Yakobo waddi Labana adi, Nan a kokoladdu se kogwon nan a kujönö adi do riripara ŋwajik kunök kaŋo köyö.

³² Ko do a ryö ŋunyen kulök ko lon ŋuto a nye tine ru. Titimbe ’bura ŋo nagon a kunök köyö ko luŋasirik kaŋ i komor, ko joŋgi se a kunök. Yakobo a ko den adi Raele aje kokoluŋdya kilo nyömuejin.

³³ A Labana lupöni ko Yakobo i kemia, ko i kemia na Lea, ko i kemia na kölipönök murek nawate, ama a nye tine ryö kilo nyömuejin. A nye lupene kaŋo ko Lea i kemia a lupöni ko Raele i kemia.

³⁴ a kudyakan Raele aje ’du muŋdya kilu nyömuejin ko aje tiŋdu i lukata na si ’daet na toraki i kamilo na, a si ’dani ko lepeŋat loki. A Labana ŋge bebereŋdya lukata na kemia liŋ, ama a nye gwe a ko ryö se.

³⁵ A nye kulyani ko monye adi, Pon duma lio, ti do gwe ti woran kogwon nan ti bulöŋien ki konut i komor, kogwon nan gwon ko perok ti yapa. Nyena a Labana ga ’yi ga ’yu, a nye tine ryö nyömuejin kulo.

³⁶ A Yakobo wore woran, a woŋe ko Labana; a Yakobo pipije Labana adi, Nan ŋona a lyaŋan i nyo? Toron nio a nyo nagon do ’demeja mukök nio ko riŋit?

³⁷ Ma ’di nagon do a bebereŋdya tito kwe liŋ, do a ryeju ŋo a nyo na tito kunök liŋ ti mede? Tiki ŋo nagon do a ryö na ko luŋasirik kwe i komor ko i komor na luŋösurök, anyen se bubulö lilija kulya kaŋ yi murek.

³⁸ Kilo kiŋajin merya murek nan gwon konut i könin; köbilu kunök ko melon kunök a ko yöpun, Köti nan a ko nyö lopijoki ti teŋon kunök.

³⁹ Turu ’buti nagon gworoŋ lo koja nan a ko jakin do, kolumbö nan lo ropakiŋdya nene i pirit; do a luŋgu köyö ŋo nagon a kokolaji paran kode kwaje.

⁴⁰ Nyena gwiliŋit lio gwon sona, adi kolor a leŋ nan i tuparan ko katirut i tukwaje, doto nio aje wökön köyö i konyen.

⁴¹ Kilo kiŋajin merya murek nan aje si ’da konut i ’baŋ; nan aje kitakiŋdya do ko kiŋajin puök wot Iŋwan anyen do tiŋdu nan ŋwajik kunök murek, nan Köti a kitakiŋdya do ko kiŋajin buker anyen do tiŋdu nan yidin kunök, a do iŋge löpuggö daŋin puök ŋo nagon do parakiŋdye nan kune.

⁴² Ko kodyö ŋun lo baba, logon a Ŋun lo Abarayama logon Yisaka kukuk lo a ko gwon ko nan, do soŋinana kodyö aje sonyoddu nan kana ’bak nene ŋo. Ŋun aje meddya yöyöŋesi kwe ko dara na könisi kwe, a nye iŋge riŋ do kwaje.

Yakobo ko Labana a mora ko milye

⁴³ A Labana waddi Yakobo adi, Kine ŋwajik a ŋwajik kwe, ko kilo lupudiet a lupudiet kwe, ko kine teŋon ti yidin a teŋon kwe, Köti ŋo liŋ nagon do memet kine gwon a kwe. Ama nan konakiŋdya kine ŋwajik kwe nyo i lo lor se ko ŋwajik kase lo yuŋ se kilo?

⁴⁴ Soŋinana ti yi morani mora; ko ti Ŋina mora nikao gwe a kweyet i kiden nikao ko do.

⁴⁵ a Yakobo ’dumuŋdye ŋurupit, a togwi ’dikiŋdye lepeŋ ki gwoso kumut.

⁴⁶ A Yakobo kulyani ko luŋasirik kanyit adi, ’Du ’dumuŋdye ta ŋurupö, a se ’du ’dumuŋdye ŋurupö, a ’du ’du ’yi se i pirit na geleŋ; a se nyesi nyu i ŋilu ’dome nyona.

⁴⁷ a Labana luŋgi ŋilu ’dome a Yegar-saduta; ama a Yakobo gwije ŋilu ’dome a Galeda.

⁴⁸ A Labana kulyani adi, ŋilo ’dome i lo lor a kweyet i kiden nikaŋ ko do. Nyena ko ŋina kwe a ŋilo ’dome luŋuni a Galeda,

⁴⁹ Köti a luŋuni a Misepa, kogwon Labana a kulya adi, MATAT titiju i kiden nikaŋ ko do, na gwoŋdi yi ka ’de ka ’de na.

⁵⁰ Ko do mo yöyoŋgu ŋwajik kwe, Köti ko do mo yemuŋdya kunie wate lwö lwöŋ ŋwajik kwe, ma ’di lele ŋuto ’bayin koyi i pirit na geleŋ, dene den adi Ŋun lo gwon a kametanit i kiden nikaŋ ko do.

⁵¹ A Labana kulyani ko Yakobo adi, Meddi ŋilo ’dome ko meddi ŋilo ŋurupit logon nan a togwi ’dikin a kumut i kiden nikaŋ ko do lo.

⁵² Ti ŋilo ’dome gwe a kweyet, ko ti ŋilo ŋurupit logon a togwi ’diki ki a kumut lo Köti gwe a kweyet nagon tökoŋu adi nan mo ti laŋgu ŋilo ’dome i tu konut ŋini i konakiŋdya na do arabat, a do mo tine laŋgu ŋilo ’dome ko ŋilo ŋurupit i po köyö ni i konakiŋdya na nan arabat.

⁵³ Ti Ŋun lo Abarayama logon a Ŋun lo Nakor, kweja adi a Ŋun lo merenye lose lo, ti nye lilije kine kulya kayaŋ kiden. Nyena a Yakobo milyeji i karin ti Ŋun logon monye lonyit Yisaka kukuk lo,

⁵⁴ A Yakobo ’duŋge rubaŋga i ŋilu mere, a luŋgi luŋasirik kanyit kulo i nyesir na kinyo; a se nyesi nyesu a mönuŋdye i ŋilu mere tukwaje liŋ.

⁵⁵ A Labana ŋine ŋien ko ’bure kobubut, a romara ko nyakwariat kanyit ko ŋwajik kanyit nawate kune, a ’boroji se; a kirut a nye ŋiörö ŋiörö a yitöni bot kanyit mede.