Suluet 3 - Bibilia Buk na Ŋun nagon koti luŋu a

’Doro na ŋuto i toron

¹ Nyena a munu gwe a lokoŋ lwö-lwöŋ kulye ŋo liŋ ti mu ’diŋ logon MATAT Ŋun a gweja kulo. A nye pipije nu ŋuto adi, Ŋun ’diri a kulya adi ta ti nyesu ludweki ti kaden liŋ ti melesen le?

² A nu ŋuto waddi munu adi, Yi bubulö nyesu ludweki ti kaden liŋ ti melesen,

³ ama Ŋun a kulya adi, Ta ti nyesu ludweki ti ködini lo gwon i kiden na melesen lu kwöŋ, a ta tine ’bo se, an ta twatwa.

⁴ A munu kulyani ko nu Ŋuto adi, Ta ti twatwa asut.

⁵ Kogwon Ŋun a den adii lor lo nyesi ta ludweki ti Ŋilu ködini lu, a konyen kasu mo ŋaji ŋaju, a ta mo gwe gwoso Ŋun lo deŋdya kulya na ’but ko narok.

⁶ A nu nuto ko meddi adi ludweki ti lu ködini a lo ’but i nyei, Köti kwekwelen i meta, Köti a ködini lo ’de ’dekarikin i tokoŋgu na ŋuto, a ’deuŋdye ludweki kanyit a nyesi nyesu, a tiŋdi lalet lonyit Köti, a lu ŋuto nyesi nyesu.

⁷ A kirut konyen kase ŋaji ŋaju se murek liŋ, a se deŋdi adi se gwon ko mugunya a limuö kana; a se ribbe koropo ti ki ’bi i pirit na geleŋ, a tetenakiŋdye ’börik a ’böno.

⁸ A se yiŋge mumuyukta na MATAT Ŋun i wörö i melesen i likun na kak, a lu ŋuto se ko nakwan nanyit ’danani ’dana ko MATAT Ŋun i komor i kiden na kaden ti melesen.

⁹ A MATAT Ŋun luŋgi lu ŋuto a pipije lepeŋ adi, Do liya?

¹⁰ A nye waddi adi, Nan a yiŋga mumu yukta inot i melesen, a nan kujönöni kujönö, kogwon nan gwon a limu kana; a nan ’danani ’dana.

¹¹ A Ŋun pipije adi, Ŋa lo takiŋdya do adi do gwon a limu kana? Do a nyesu ludweki ti lo ködini logon nan a saŋu do adi do ködyö ti nyö lo?

¹² A lu ŋuto waddi adi, Na Ŋuto nagon do aje tin i gwon ko nan na aje tiŋdu nan ludweki ti lo ködini a nan nyesi nyesu.

¹³ A kirut MATAT Ŋun pipije nu ŋuto adi, Na ŋo a nyo nagon do a kon na? A nu ŋuto waddi adi, Munu lo mumulukakindya nan, a nan nyesi nyesu.

¹⁴ A MATAT Ŋun kulyani ko lu munu adi, Kogwon do aje kon na ŋo, do a senya i kiden na toro ’bo liŋ, ko i kiden na kijakwa liŋ ti mu ’diŋ; do mo wawaraktu kak ko pele, a do mo nyenyesiti ŋutu i perok liŋ ti gwiliŋit inot.

¹⁵ A nan mo tiŋdi ŋisa i kiden inot ko na ŋuto, Köti i kiden na nyakwariat kulök ko na nyakwariat kanyit; nye mo böböŋörö do i kwe, a do mo böŋöddi lepeŋ i loru ’yum.

¹⁶ A Ŋun kulyani ko nu ŋuto adi, Nan mo tutuŋdi tömiesi kunökjöre parik i yupuŋdyö inot, iŋkoi, do mo ŋoŋoŋga i ta ’duuŋdyö inot na ŋwajik; a do mo ’deke lalet ilot, a nye mo saŋi do.

¹⁷ A Ŋun kulyani ko Adama adi, Kogwon do a yiŋga gworo lonarakwan inot, Köti do a nyesu ludweki ti lu ködinilogon nan a saŋu do adi do ti nyesu kata lu, kak na a senya kogwon kulya kunök; do mo nyesu ŋo kanyit ko ŋiŋiresi i perok liŋti gwiliŋit inot.

¹⁸ A na kak mo towilakindye do kikwa se ko kalelerök; a do mo nyesi ’dötilön ti mu ’diŋ.

¹⁹ Do mo nyesu kinyo ko ŋiŋiresi tojo do a yitö kak, kogwon do a ’dumwe kaŋo kanyit. Do a lipo, a do mo yitöni i lipo.

²⁰ A lu ŋuto gwije nakwan nanyit a Awa, kogwon nye a ŋote na ŋo liŋ lo gwon jörun kilo.

²¹ a MATAT Ŋun tetenakiŋdye Adama se ko nakwan nanyit boŋgwat nagon a gobero, a nye tojubbi se.

²² A kirut MATAT Ŋun kulyani adi, Mete, lo ŋuto a wora gwoso lele likaŋ i deŋdya na kulya na ’but ko narok, nyena sopinana an nye ko riöddu könin i ’dumuŋdya na ludweki i ködini toruet, a nyesi nyesu a gwe jörun ŋupi.

²³ Nyenagon a MATAT Ŋun riköddi lepeŋ kaŋo i melesen na Edene i kuŋu na kak nagon nye a ’dumwe kaŋo kata na.

²⁴ Nyena a nye turöddi lu ŋuto kaŋo, a i swöt lo ’yure na melesen na Edene, a nye tiŋdi kerubajin se ko baŋdu lo tule a kimaö, logon wöwöriŋöddu i swötön liŋ anyen teŋgu kiko lo tu i ködini toruet.