Suluet 23 - Bibilia Buk na Ŋun nagon koti luŋu a

Twan na Sara

¹ A Sara iŋge gwolor ko kiŋajin mia geleŋ ko merya murek wot buryo; iŋkoi, kilo a kiŋajin ti Sara.

² A kirut Sara twane twan Kiryat-arba yu i jur lo Kanana. (Kiryat-arba a Keberon.) A Abarayama lupöni lukata i delya na Sara ko i gwien na lepeŋ.

³ A Abarayama ŋine ki ko öpu nanyit na i komor, a kulyani ko Ŋutu ti kötumit na Ket adi,

⁴ Nan gwon a lwakatyo lo si ’da kasu kiden ko diŋit a na ’dit; koraki ta nan pirit nuket a nio, anyen nan ködyö ’de ’yi öpu nio na an nan nyuŋ memeddya nye.

⁵ Nyena a Ŋutu ti Ket kulo waddi Abarayama adi.

⁶ Yiŋge yi pon duma likaŋ; do a duma lo kukwön kayaŋ kiden. Nuŋge öpu inot i dili na ’but nagon do a wulun i dilyö kaŋ; lele ŋuto ’bayin kayaŋ kiden logon renyakiŋdya do dili nanyit nuket, kode tiŋikiŋdyö do i nugga na öpu inot.

⁷ A Abarayama ŋine ki, a dulakiŋdye mugun ko Ŋutu ti ŋilu jur i komor logon a Ŋutu ti Ket.

⁸ A nye jambi ko lepeŋat adi, Ko ta a ruk adi nan bubulö nugga na öpu nio an naŋ nyuŋ memeddya nye, a ti ta yiŋge ta naŋ. Böŋö mumuluki ta nan Epurön ŋuro lo Sokar,

⁹ anyen nye böŋö tiŋdu nan kuggi nanyit na gwon Makpela na gwon i ’dutet na kak nanyit nu. Ti lepeŋ tiŋdi nan nye kasu i komor ko ropet nagon ta a met adi jujukin ta na, anyen gwon a nio a pirit nuket.

¹⁰ Nyenagon a Epurön gwe i si ’da i kiden na Ŋutu ti Ket; a Epurön lo Ket waddi Abarayama a Ŋutu ti Ket liŋ lo momoruŋdya i kötu mit lupet na köji kulo yiyiŋga.

¹¹ A nye kulyani adi, ’Bayin sona pon duma liŋ, yiŋge nan; nan titin do ŋina kak, a nan tiŋdi do kuggi na gwon kata nu; nan titikin do nye i komor na karu kwe; nyena nuŋge öpu inot.

¹² a Abarayama rosokakine kak ko Ŋutu ti ŋilu jur i komor.

¹³ A nye kulyani ko Epurön a Ŋutu ti jur yiyiŋga, adi, Böŋö nan mo ’yu do, yiŋge nan; nan de tiŋdu ropet na nu kak; wuji ŋina ropet köyö, anyen nan böŋö nugga öpu nio na nyu.

¹⁴ A Epurön waddi Abarayama adi,

¹⁵ Pon duma liŋ, yiŋge nan; swöt lo kak logon jujukin ropaki ko pödöjin nagon temuŋdya sekelejin miajin Iŋwan ’bayin a nene ŋo kayaŋ kiden. Nyenagon nuŋge öpu inot ŋina.

¹⁶ A Abarayama yiŋge kulyaet lo Epurön; a Abarayama temakiŋdye Epurön kine pödöjin i mijan, gwoso na ’diŋdye nye nu a Ŋutu ti Ket yiyiŋga. Pödöjin nagon nye a temakin lepeŋ kune a sekelejin miajin Iŋwan, gwoso i temesi nagon katugwörök ti ŋinu diŋit tetembi kune.

¹⁷ Nyena a kak na Epurön na gwon Makpela, na gwon i swöt lo ’yure lo Mamure, ko kuggi na gwon kata nu, se ko kaden liŋ ti ninu kak lo gwon i swötön kanyit liŋ kulo iŋge ’buruki

¹⁸ Abarayama asut a lomore nanyit ko Ŋutu ti Ket i komor, se ko i komor na Ŋutu liŋ lo momoruŋdya i kötumit lupet na köji nase kulo.

¹⁹ A i mukök ŋina na, a Abarayama nuŋge nakwan nanyit Sara i kuggi lukata na kak na Makpela, i swöt lo ’yure na Mamure i jur lo Kanana. (Nu pirit a Keberon.)

²⁰ A Ŋutu ti Ket ’burukiŋdye Abarayama ŋinu kak se ko kuggi nagon kata nu a lomore nanyit anyen gwon a pirit nuket na lo twatwa.