Suluet 22 - Bibilia Buk na Ŋun nagon koti luŋu a

Ŋun a sarakiŋdya Abarayama lwukiŋdya na Yisaka a rubaŋga

¹ A ko gwe sona i mukök na kine kulya, a Ŋun mori Abarayama, a luŋgi lepeŋ adi, Abarayama! A lepeŋ ruŋge adi, Nan malo.

² A lepeŋ kulyani adi, Soŋinana ’du muŋdye pilili ilot lo ŋuro logon do nyanyar lo, logon a Yisaka, ko iti ta i jur lo Moria, ko wukiŋdye lepeŋ yu a rubaŋga lo ’yu ’yura i lele geleŋ lo merya logon nan mo tatakin do kulya kanyit lu.

³ A Abarayama ŋine ŋien i ko ’bure kobubut, a toŋi kaine nanyit, a joŋgi teton kanyit murek anyen moraddu ko lepeŋ se ko ŋuro lonyit Yisaka; a tutukuŋdye kaden ’yuresi ti rubaŋga, a ŋine ŋien, a iti i pirit nagon Ŋun a takin nye nu.

⁴ A i lor tomusala lonyit, a Abarayama ’bi ’yi konyen kanyit ki, a metaddi nu pirit pajo.

⁵ A Abarayama kulyani ko teton kanyit kulo adi, Gwe ta ni leru ko kaine; nan se ko ŋuro kulo tu nyu i kwakwaddu, a yitwene bot kasu ni.

⁶ A Abarayama ’dumuŋdye kaden ’yuresi ti rubaŋga kune, a ’dukukiŋdye ko ŋuro lonyit Yisaka i kwe, a nye joŋgi kimaŋ ko wale, a se liŋ murek iti tu.

⁷ A Yisaka luŋgi monye lonyit Abarayama adi, Baba! A monye ruŋge adi, Nan malo ŋuro liŋ. A nye pipije adi, Mete, kimaŋ ko kaden makine, ama liya kilolor logon ’yura a rubaŋga?

⁸ A Abarayama waddi adi, Ŋuro lio, Ŋun de ryeryekin mugun kilolor lo ’yura a rubaŋga. A se liŋ murek iti tu.

⁹ A se ko ’dure i pirit na takin Ŋun nye na, a Abaryama dibbe pirit ’yuret na rubaŋgajin nyu, a peddi kaden nyin, a toŋi ŋuro lonyit logon a Yisaka, a topirikiŋdye lepeŋ i pirit ’yuret i kaden loki.

¹⁰ A Abaryama riöddi könin a ’dumuŋdye wale anyen ’duŋgö ŋuro lonyit.

¹¹ Ama a malaikatat lo MATAT luŋgi lepeŋ ki yu adi, Abarayama, Abarayama! A nye ruŋge adi, Nan malo.

¹² A nye kulyani adi, Ko tanyakin könin i ŋilo ŋuro, ma ’di ko konakiŋdya lepeŋ nene ŋo, kogwon soŋinana nan a den adi do a kugga ŋun, kogwon do a ko renyakin nan ŋuro ilot logon a pilili ilot lo ŋuro lo.

¹³ A Abarayama ’bi ’yi konyen kanyit ki, a boboŋgi boboŋgi, mete, a lopijot gwe kanyit i mukök a moka oŋgwora ko kikwa, a Abarayama iti tu a morgi lu lopijot, a ’yuŋe a rubaŋga i pirit na ŋuro lonyit.

¹⁴ Nyena a Abarayama gwije karin ti nu pirit a Yekowa-yiŋe, gwoso na kulyarikin tojo ko lo lor na adi, Titiki i mere lo MATAT.

¹⁵ Köli a malaikatat lo MATAT luŋgi Abarayama ki yu daŋ tomurek,

¹⁶ adi, MATAT lo kulya adi, Nan a milyeju ’diŋdya mugun adi, ’Diri ’diri kogwon do a koŋdya na ŋo, a gwe a ko renyakiŋdya nan ŋuro ilot, logon a pilili ilot lo ŋuro lo,

¹⁷ nan mo ’diri ’bo ’boro do, a nan mo tuŋdije nyakwariat kulök gwoso kaser ti ki, ko gwoso sese na gwon i kijit na tör; a nyakwariat kulök mo ruddye köjinö ti merok kase,

¹⁸ a gweyajin lio ti Ŋutu ti kak mo, mo ’yi nan i ’boroja na se gwoso na ’boroji nan nyakwariat kulök na; kogwon do a yiŋga gworo lio.

¹⁹ Nyena a Abaryama yitöni bot ko teton kanyit kulo yu, a se ŋine ŋien, a moraddi i pirit na geleŋ tojo Ber-seba; a Abarayama gwolore Ber-seba yu.

Nyakwariat ti Nakor

²⁰ A i mukök na kine kulya, a se takiŋdye Abarayama adi, Mete, Mileka Köti a yuŋwekiŋdyö luŋösur Nakor ŋwajik;

²¹ Usa logon a kayu, a Buja gwe a loponi, ko Kemuele monye Aram;

²² ko Kesede, ko Kajo, ko Piledasa, ko Yidelap, se ko Betuele.

²³ A Betuele yuŋuŋdye Rebeka. Kilo a ŋwajik budök logon Mileka a yuŋwekin Nakor luŋaser Abarayama.

²⁴ nene nakwan na Nakor nagon karin kanyit a Reuma na, Köti yuŋuŋdye Tebak, ko Gakam, ko Takasa, se ko Maka.