Suluet 18 - Bibilia Buk na Ŋun nagon koti luŋu a

Yisaka mo yuyuŋwe

¹ A MATAT puköki ko Abarayama nyona ko kaden logon a rinö ti Mamure, na si ’dari nye i kötumit na kemia i tuparan kiden nu

² A nye ’bi ’yi konyen kanyit ki a diŋe diŋa, mete, a Ŋutu musala gwo ’de kanyit i komor. A nye ko meddi se, a nye wöki kaŋo i kötumit na kemia i dodogga na lepeŋat, a nye rosokakine kak,

³ a kulyani adi, Pon duma liŋ, ko do a met adi nan a lo ’but, böŋö an ta ko Iwo ŋöddu ta köyö nan kölipönit losu.

⁴ Ti pioŋ ku ’dik jweni anyen lalaarikin mokosi kasu, ko yuke ta yukan i ködini mukök,

⁵ a nan de jakiŋdye ta kinyo a lo ’dit, anyen togo ’yu mugunya kasu, a kirut ta de lwöŋöddi lwöpöddu, kogwon ta a ’dur ko köli pönit losu mede. A se kulyani adi, A na ’but, koŋdi gwoso na kulyari do ŋina.

⁶ A Abarayama nyoŋgi lupö ko Sara i kemia yu, a kulyani adi, Temuŋdye ’de ’de pelela musala ti löjiet lo ’bolot naliliŋök, ko nute nut se a ambatajin.

⁷ A Abarayama wöki wökön i teŋ na toro ’bo, a joŋdi tagwok lopir lomunyan, a tiŋdi kölipönit; a lepeŋ nyoŋgi deruŋdya.

⁸ A nye joŋdi gwoŋali, ko le, se ko lokore na der nye na, a tiŋdi kase i komor; a nye gwo ’de kase nyona i ködini mukök na nyesi se nu.

⁹ A se pipije nye adi, Niya Sara narakwan inot? A nye waddi adi, Manu i kemia lukata.

¹⁰ a lepeŋ kulyani adi, Nan ’diri mo Köti yiyitwe konut ni i kiŋa lo popo gwoso i na diŋit na, a Sara nakwan inot moyoŋundye ŋuro lulalet. A Sara gwe i yiyiŋga i kötumit na kemia na gwon ko Abarayama i ki ’diŋ na.

¹¹ Ama a Abarayama se ko Sara gwe a muduŋin, kiŋajin kase jore parik; a perok ti yapa gwe ’bayin ko Sara.

¹² A Sara kwenine kweni kanyit i töili adi, I mukök nagon nan aje doŋga a lalet liŋ gwe a modoŋ nu, nan ŋona mo gwon ko lyöŋön le?

¹³ A MATAT pipije Abarayama adi, Nyö Sara kwekweni kulya adi, Nan ’diri mo tata ’duuŋdyö ŋuro, nan nagon soŋinana gwe a modoŋ na le?

¹⁴ Nene ŋo kata nagon bubulö te ’ya nan MATAT le? A nagon diŋit mo aje temakiŋdya nu, nan mo yiyitwe konut ni i kiŋa lo popo gwoso i na diŋit na, a Sara mo yupundye ŋuro lulalet.

¹⁵ Nyena a Sara renyani renya adi, Nan a ko kweni kwöŋ; kogwon nye kukujönö. Ama a nye kulyani adi, ’Bayin, do ’diri a kweni.

Abarayama momo ’yu Ŋun i kulya ti Sodoma

¹⁶ A kulu Ŋutu ŋiörö ŋiörö nyu, a komorgi tu Sodoma; a Abarayama nyömökindye lepeŋat i kiko.

¹⁷ A MATAT pipije mugun adi, Nan ŋomi ’de ’delakin Abarayama ŋo nagon nan kökon na le?

¹⁸ Abarayama ’diri mo wora a jur duma lo riŋit, a gweyajin liŋ ti Ŋutu ti kak mo mo ’yi nan i ’boroja na se gwoso na ’boroji nan nye na.

¹⁹ Kogwon nan a wulun lepeŋ, anyen nye ködyo saŋu ŋwajik kanyit ko Ŋutu ti mede nanyit lo gwon kanyit i mukök kilo, anyen se ködyo kebbu kiko liŋ lo MATAT i koŋdya na kulya na rigwo ko i ’duŋgö na kulya gwogwo; anyen nan MATAT böŋö jakiŋdya Abarayama ŋo nagon nan a milyekin lepeŋ kune.

²⁰ A MATAT kulyani adi, Ŋutu gwigwien parik i kulya ti Sodoma ko Gomora, kogwon toronjin kase gwe a narok parik a Iwoŋgu.

²¹ Nan de lulurara kak soŋinana i meddya kode lepeŋat ’diri aje kon gwoso gwien nagon a ’durökin köyö na; a ko ti gwon sona, a nan de lo deŋdi.

²² A kilu Ŋutu woriŋöddi nyu, a iti tu tojo Sodoma, ama Abarayama nyuŋ gwogwo ’dan ko MATAT i komor.

²³ A Abarayama mijörö nyona, a pipije adi, Do ’diri de tukaŋu Ŋutu lo rigwo ko Ŋutu lorok i pirit na geleŋ le?

²⁴ Böŋö ko ködyö Ŋutu merya mukanat lo rigwo kata i köji lukata, do ŋona de kökör nu pirit a tine pitun lepeŋ kogwon kulya ti Ŋutu merya mukanat lo rigwo logon gwon i lukata nanyit kulu le?

²⁵ Ti do gwe pajo i koŋdya na ŋo gwoso ŋina i tatuja na Ŋutu lo rigwo ko lorok i pirit na geleŋ, anyen kulya ti Ŋutu lo rigwo ko lorok gwon jojo! Ti do gwe pajo i ŋo gwoso ŋina! Ka ’duŋönit lo kak liŋ ŋona ti ’duŋgö gwogwo le?

²⁶ A MATAT kulyani adi, Ko nan a ryö Ŋutu merya mukanat lo rigwo Sodoma i köji lukata, a nan de pitok iŋdye nu pirit liŋ kogwon kulya kase.

²⁷ A Abarayama waddi adi, Mete, soŋinana nan logon a lipo kana lo aje juŋ a jambu ko MATAT.

²⁸ Böŋö ko ködyö Ŋutu mukanat ’bayin kilo Ŋutu merya mukanat lo rigwo, a do ŋona de köŋi nu köji ’bukuluŋ kogwon Ŋutu mukanat ’bayin le? A nye waddi adi, Nan de ti köŋu lepeŋ ko nan a ryo Ŋutu merya ŋwan wot mukanat kulo nyu.

²⁹ A nye nyaggi pija lepeŋ adi, Boŋo ko kodyo Ŋutu merya Iŋwan a rye nyu? A nye waddi adi, Nan de ti koŋdya nene ŋo kogwon kulya ti Ŋutu merya Iŋwan kulo.

³⁰ A nye kulyani adi, Boŋo ti MATAT gwe ti woran, nan lo jajambu. Boŋo ko kodyo Ŋutu merya musala a rye nyu? A nye waddi adi, Nan de ti koŋdya nene ŋo ko nan a ryo Ŋutu merya musala nyu.

³¹ a nye kulyani adi, Mete, soŋinana nan aje juŋ a jambu ko MATAT. Böŋö ko ködyo Ŋutu merya murek a rye nyu? A nye waddi adi, Nan de ti koŋu lepeŋ kogwon kulya ti Ŋutu merya murek.

³² A nye kulyani adi, Böŋö ti MATAT gwe li woran, nan lo nyaggi jambu daŋ geleŋ tuŋ. Böŋö ko ködyö Ŋutu puök a rye nyu? A nye waddi adi, Nan de ti köŋu lepeŋ kogwon kulya ti Ŋutu puök.

³³ A nagon MATAT aje ko ’yu jambu ko Abarayama nu, a nye iti tu, a Abarayama yitöni bot kanyit i pirit.